آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
انڈیا کے مقامی ذرائع ابلاغ کے مطابق انڈین وزارت خارجہ نے اسلام آباد کو انسانی ہمدردی کی بنیاد پر ممکنہ سیلاب سے متعلق انتباہ جاری کیے تھے۔ خبر رساں ادارے پی ٹی آئی کے مطابق ذرائع کا کہنا ہے کہ شمالی ریاستوں شدید بارشوں کے باعث بڑے ڈیمز سے پانی چھوڑا گیا جس کے بارے میں پاکستان کو مطلع کیا گیا تھا کہ دریائے ستلج میں سیلاب کا ’قوی امکان‘ ہے۔
پنجاب میں سیلابی صورتحال کے دوران دریائے چناب سے نکلنے والا ساڑھے آٹھ لاکھ کیوسک کا ریلا ضلع چنیوٹ سے گزرا اور اب دیہات جھیل کا منظر پیش کر رہے ہیں۔ کیا اب بھی لوگ پانی میں پھنسے ہوئے ہیں اور ان تک امداد کیسے پہنچائی جا رہی ہے۔
یہ دیکھنے کے لیے بی بی سی کی ٹیم تحصیل بھوانہ میں ریسکیو اہلکاروں کے ساتھ نکل پڑی۔
رپورٹر: عمر دراز ننگیانہ
فلمنگ اینڈ ایڈیٹنگ: فرقان الٰہی
پاکستان کے صوبہ خیبر پختونخوا کے مختلف اضلاع میں مسلسل بارش کی وجہ سے سیلابی صورتحال کے پیشِ نظر ہائی الرٹ جاری کر دیا گیا ہے۔
واضح رہے کہ صوبہ خیبرپختونخوا کے مختلف اضلاع میں بارشوں کا سلسلہ جاری ہے۔
صوبہ خیبر ہختونخوا میں ریسکیو 1122 کے ترجمان بلال احمد فیضی کے مطابق متاثرہ اضلاع میں ضلع خیبر، بونیر، شانگلہ، سوات، پشاور اور چارسدہ شامل ہیں۔
اُن کے مطابق اب تک کی تطلاعات کے مطابق ضلع بونیر سب سے زیادہ بارشوں کی وجہ سے متاثر ہوا ہے تاہم ضلع خیبر میں ایک شخص کے ہلاک اور دو بچوں کے زخمی ہونے کی اطلاعت ہیں۔
بونیر کے ڈپٹی کمشنر کاشف قیوم کی جانب سے جاری ہونے والے بیان کے مطابق ’بٹئی‘ اور ’قدر نگر‘ میں پانی کی سطح بلند ہے اور یہ تیزی سے پیر بابا خوڑ کی طرف بہہ رہا ہے۔‘
ڈپٹی کمشنر بونیر کا کہنا ہے کہ ’مساجد اور باہر اعلانات کیے جا رہے ہیں کہ عوام محفوظ مقامات پر منتقل ہو جائیں۔ مسلسل بارش کے باعث تیز پانی اور سیلاب کا خطرہ زیادہ ہے۔ تاہم اس صورتحال میں لوگوں کو محفوظ مقامات پر منتقل کرنے کی کوششیں جاری ہیں۔‘
تاہم دوسری جانب صوبائی دارلحکومت پشاور میں شدید بارش کے باعث کوریڈور اور فیڈر روٹس پر پانی آنے کی وجہ سے بی آر ٹی سروس عارضی طور پر معطل کر دی گئی ہے۔
بونیر کے ساتھ ساتھ پشاور میں بھی وقفے وقفے سے بارش کا سلسلہ جاری ہے۔ ترجمان ریسکیو 1122 کے مطابق بارش کے اس حالیہ سلسلے کے کی وجہ سے پشاور کے کُچھ علاقوں سے ایسی اطلاعات بھی موصول ہوئی ہیں کہ جہاں گھروں کے اندر پانی داخل ہو گیا ہے۔
ترجمان ریسکیو 1122 کے مطابق متاثرہ علاقوں میں کادو کور میچنئی، قندارو صافی (جاز ٹاور والی کور) اور خوازئی کونگ کے علاقے شامل ہیں۔
ریسکیو 1122 کے مطابق بڈھنی پل کے علاقے سمیت متاثرہ علاقوں میں امدادی اداروں ٹیمیں لوگوں کی مدد کر رہی ہیں۔
ترجمان ریسکیو 1122 کے مطابق جن علاقوں کے گھروں میں پانی داخل ہوا ہے وہاں سے شہریوں کو محفوظ مقامات پر منتقل کرنے کا سلسلہ جاری ہے۔ جن علاقوں میں پانی داخل ہوا ہے اُن میں حیات آباد، ورسک روڈ اور بڈھنی پل کے اطراف کے علاقے شامل ہیں۔
انڈیا میں موجود سلال ڈیم اس وقت زیرِ بحث آیا جب پاکستان میں بارہا اس خدشے کا اظہار کیا گیا کہ اس ڈیم سے لاکھوں کیوسک پانی چھوڑنے سے پنجاب کے دریائے چناب میں دوبارہ سیلاب آ سکتا ہے۔
افغان سرمایہ کار اور عزیزی بینک کے مالک میرویس عزیزی نے مشرقی افغانستان میں آنے والے زلزلے پر تعزیت کا اظہار کرتے ہوئے متاثرین کے لیے ’50 کروڑ افغانی روپے‘ عطیہ کرنے کا اعلان کیا ہے۔
انھوں نے ایکس پر اپنے پیغام میں کہا کہ ’میں نے عزیزی فاؤنڈیشن کے اپنے ساتھیوں کو ہدایت کی ہے کہ وہ جلد از جلد متاثرہ علاقوں کا دورہ کریں اور ان کی ضروریات کا جائزہ لیں اور امداد کی تقسیم کا عمل جلد از جلد شروع کریں۔‘
افغانستان میں اتوار کی شب آنے والے قیامت خیز زلزلے اور اس کے نتیجے میں ہونے والی تباہی کے بعد سے بین الاقوامی اداروں اور مُمالک کی جانب سے امداد کے اعلانات سامنے آرہے ہیں۔
واضح رہے کہ افغانستان میں آنے والے چھ اعشاریہ صفر شدت کے زلزلے کے بعد بین الاقوامی امداری اداروں اور مقامی انتظامیہ کی جانب سے کہا جا رہا ہے ہلاکتوں میں اضافے کا خدشہ ہے تاہم اب تک 800 افراد کی ہلاکت کی تصدیق کی گئی ہے۔
برطانوی دفتر خارجہ نے مشرقی افغانستان میں زلزلے کے متاثرین کے لیے ایک دس لاکھ پاؤنڈ کی ہنگامی مالی امداد کا اعلان کیا ہے۔
ملک کی وزارت خارجہ نے ایک بیان میں کہا ہے کہ یہ رقم اقوام متحدہ کے پاپولیشن فنڈ (یو این ایف پی اے) اور انٹرنیشنل فیڈریشن آف ریڈ کراس (آئی ایف آر سی) کے ذریعے سب سے زیادہ متاثرہ علاقوں کی بحالی کے لیے خرچ کی جائے گی۔
برطانوی وزیر خارجہ ڈیوڈ لیمی نے ایک بیان میں کہا کہ ’اس ہنگامی امداد سے ہمارے شراکت داروں کو سب سے زیادہ متاثرہ افراد کو صحت کی خدمات اور ہنگامی سامان کی فراہمی میں مدد ملے گی۔‘
دوسری جانب سوئٹزرلینڈ حکومت کی جانب سے جاری ہونے والے ایک بیان میں کہا گیا ہے کہ وہ مشرقی افغانستان میں زلزلے کے متاثرین کو امداد فراہم کرنے کی تیاری کر رہا ہے۔
ملک کی وزارت خارجہ نے اپنی ویب سائٹ پر لکھا ہے کہ وہ کابل میں اپنے انسانی امداد اور تعاون کے دفتر کے ذریعے زلزلے سے متاثرہ علاقوں میں اپنے شراکت داروں کی مدد کرے گا۔ سوئٹزرلینڈ نے واقعے کے متاثرین سے اظہار تعزیت کیا ہے۔
سوڈان میں باغی گروپ لبریشن موومنٹ کے مطابق مغربی سوڈان کے دور دراز علاقے ’مارا‘ کے پہاڑوں میں لینڈ سلائیڈنگ کے نتیجے میں کم از کم 1000 افراد ہلاک ہو گئے ہیں۔
باغی گروپ کی جانب سے جاری ہونے والے ایک بیان میں کہا گیا ہے کہ گزشتہ کئی دنوں کی جاری موسلادھار بارش کی وجہ سے اتوار کے روز لینڈ سلائیڈنگ ہوئی جس کی وجہ سے ’تاراسین‘ نامی گاؤں میں صرف ایک فرد زندہ بچا ہے جبکہ باقی پورا گاؤں مبلے تلے دب جانے کی وجہ سے تباہ ہو گیا ہے۔
باغی گروپ لبریشن موومنٹ کی جانب سے اقوام متحدہ اور دیگر علاقائی اور بین الاقوامی تنظیموں سے انسانی امداد کی اپیل کی گئی ہے۔
سوڈانی فوج اور نیم فوجی ریپڈ سپورٹ فورسز (آر ایس ایف) کے درمیان جنگ کے بعد شمالی دارفور ریاست کے بہت سے رہائشیوں نے ’مارا‘ نامی پہاڑی علاقے میں پناہ لی تھی۔
سوڈانی فوج اور آر ایس ایف کے درمیان اپریل سنہ 2023 میں شروع ہونے والی خانہ جنگی نے ملک کو قحط کی طرف دھکیل دیا ہے اور مغربی دارفور کے علاقے میں نسل کشی کے الزامات عائد کیے گئے ہیں۔
خانہ جنگی کے نتیجے میں ہلاکتوں کی تعداد کا تخمینہ کافی مختلف ہے لیکن گزشتہ سال ایک امریکی عہدیدار کے مطابق سنہ 2023 میں لڑائی شروع ہونے کے بعد سے اب تک ڈیڑھ لاکھ افراد ہلاک ہو چکے ہیں۔ تاہم اس جنگ کے بعد سے اب تک تقریباً ایک کروڑ 20 لاکھ افراد اپنا گھر بار چھوڑنے پر مجبور ہو چُکے ہیں۔
مشرقی افغانستان میں زلزلے کے نتیجے میں 800 سے زائد افراد ہلاک اور ہزاروں زخمی ہوگئے تھے جس کے نتیجے میں زندہ بچ جانے والے افراد نے رات کھلے میں تلے گزاری۔
افغانستان میں طالبان حکومت اور اقوام متحدہ کے اداروں کا کہنا ہے کہ کنڑ اور ننگرہار صوبوں میں 800 سے زائد افراد ہلاک جبکہ 2500 سے زائد زخمی ہوئے ہیں۔
مشرقی افغانستان کے صوبہ کنڑ کے دور افتادہ پہاڑی علاقوں میں امدادی کارروائیاں جاری ہیں لیکن خراب موسم کی وجہ سے اب بھی متعدد علاقوں تک پہنچنے میں شدید مُشکلات کا سامنا ہے۔
لینڈ سلائیڈنگ اور سڑکوں کی بندش کے باعث متعدد زخمیوں کو ہیلی کاپٹر کے ذریعے کنڑ سینٹرل ہسپتال اور دارالحکومت منتقل کیا گیا ہے تاہم بتایا جارہا ہے کہ متعدد دیہات میں لوگ اب بھی ملبے تلے دبے ہوئے ہیں۔
اقوام متحدہ کا کہنا ہے کہ اس کی 20 تشخیصی ٹیمیں سب سے زیادہ متاثرہ علاقوں میں بھیجی گئی ہیں۔
واضح رہے کہ افغانستان کا صوبہ کنڑ اتوار کی شب 6.0 شدت کے آنے والے زلزلے کی وجہ سے سب سے زیادہ متاثر ہوا ہے۔
کئی ممالک پہلے ہی امداد کا وعدہ کر چکے ہیں، جبکہ کچھ دیہات تک رسائی نہیں ہے اور مقامی صحت کی سہولیات بھی اس ہنگامی صورتحال کے لیے ناکافی ہیں۔
افغانستان کو اس وقت شدید خشک سالی کے ساتھ ساتھ طالبان کے مُلک پر قبضے کے بعد سے امداد میں کٹوتی جیسی مُشکلات اور چیلنجز کا سامنا ہے۔
میری آنکھ بچوں اور عورتوں کے چیخنے سے کھُلی۔ جب میں نے گھر کی طرف دیکھا تو چھت گر چکی تھی۔ زلزلہ اتنا شدید تھا کہ یہ قیامت کی گھڑی کی طرح رات تھی۔ میرے بچے مجھ سے چپکے ہوئے تھے اور خوف سے رو رہے تھے۔ ہوا میں ہر جانب دھول اور مٹی تھی۔‘
یہ الفاظ ہیں کنڑ کے ایک عینی شاہد کے انھوں نے بی بی سی سے مزید بات کرتے ہوئے کہا کہ ’زلزلے کے فوری بعد موبائل نیٹ ورکس بند ہو گئے، ہم اپنے رشتہ داروں سے رابطہ نہیں کر سکے۔ بجلی نہیں تھی، ہم نے صرف اپنے موبائل فون پر لائٹس کا استعمال کیا۔‘
انھوں نے مزید کہا کہ ’لوگوں کی مدد کے لیے مساجد میں اعلانات کیے گئے اور کہا گیا کہ بہت سے خاندان غم زدہ ہیں اور انھیں مرنے والوں کی تدفین میں مدد کی ضرورت ہے۔ میں نے بھی ایک گاؤں میں جا کر دس قبریں کھودیں۔ یہ صرف ایک گاؤں تھا اور سڑکیں بند ہونے کی وجہ سے ہم دوسرے گاؤں میں نہیں جا سکتے تھے، تاہم کچھ لوگ پیدل وہاں تک پہنچنے میں کامیاب ہوئے۔‘
وہاں ریسکیو کارکنان لاشیں اور زخمی افراد کو ریت اور پتھروں کے نیچے سے نکال رہے ہیں۔ ان میں سے کچھ افراد کو ایمبولینسز اور کچھ کو ہیلی کاپٹرز کے ذریعے جلال آباد علاج کے لیے منتقل کیا جا رہا ہے۔
اتوار کی شب افغانستان کے مشرقی صوبے کنڑ میں زلزلہ آیا تھا جس کی ریکٹر سکیل پر شدت چھ ریکارڈ کی گئی تھی۔ اس زلزلے کا مرکز جلال آباد سے صرف 27 کلومیٹر دور تھا۔
اس زلزلے کے جھٹکے نہ صرف افغانستان کے دارالحکومت کابُل میں محسوس کیے گئے تھے بلکہ اس کے اثرات پڑوسی ملک پاکستان میں بھی نظر آئے تھے۔
اب تک ہم اس زلزلے کے اثرات کے بارے میں کیا جانتے ہیں:
پاکستان میں قدرتی آفات سے نمٹنے کے ادارے این ڈی ایم اے کے نیشنل ایمر جنسی آپریشنز سینٹر نے یکم ستمبر سے تین ستمبر تک ممکنہ بارشوں کے باعث متعدد علاقوں کے لیے سیلاب کا الرٹ جاری کیا ہے۔
الرٹ کے مطابق یکم سے تین ستمبر کے دوران ممکنہ بارشوں کے نتیجے میں مشرقی دریاؤں کے بہاؤ میں شدید اضافہ متوقع ہے۔
دریائے ستلج میں اس وقت 2 لاکھ 53 ہزار 68 کیوسک کا غیر معمولی بہاؤموجود ہے۔ اور بالائی علاقوں میں مزید بارش اور ڈیموں سے اخراج کے باعث مزید 3 لاکھ کیوسک کا سیلابی ریلا متوقع ہے۔ ۔
این ڈی ایم اے کے مطابق دریائے راوی میں جسر کے مقام پر اس وقت 60 ہزار 94 کیوسک کے ساتھ نارمل بہاؤ موجود ہے۔ تھین ڈیم سے پانی کے اخراج اور ممکنہ بارشوں کے باعث جسر کے مقام پر دریائے راوی کا بہاؤ 1 لاکھ 50 ہزار کیوسک تک ہو سکتا ہے۔ ‘
این ڈی ایم اے نے خبردار کیا ہے کہ ’بالائی علاقوں میں ممکنہ بارشوں کے باعث دریائے راوی سے منسلک نالے بین، بسنتر اور ڈیک میں طغیانی کا خدشہ ہے۔ جبکہ دریائے چناب میں مرالہ کے مقام پر 94 ہزار 728 کیوسک کے ساتھ نچلی سطح کا بہاؤ موجود ہے۔ ‘
این ڈی ایم اے کے مطابق ’انڈیا کے زیر انتظام کشمیر میں بارشوں اور بالائی ڈیمز بشمول سلال، بگلیہار، ڈل ہستی سے اخراج کے باعث بہاؤ میں شدید اضافہ متوقع ہے۔ بالائی علاقوں میں بارشوں اور ڈیموں سے اخراج شدہ پانی کی آمد کے باعث مرالہ کے مقام پر اونچے درجے کے سیلاب کا باعث بن سکتی ہے۔‘
این ڈی ایم اے کا کہنا ہے کہ ’نشیبی و دریا کناروں کے علاقے زیر آب آنے، پشتوں میں شگاف اور فصلوں و بستیوں کے زیرِآب آنے کا خدشہ ہے۔ اس لیے مقامی آبادی، کسان اور متعلقہ ادارے ہائی الرٹ رہیں، بروقت حفاظتی اقدامات اختیار کریں۔‘
ادارے نے خبردار کیا ہے کہ ’دریاؤں کے کناروں اور واٹر ویز پر رہائش پذیر افراد فوری طور پر محفوظ مقامات پر منتقل ہو جائیں۔ اور ممکنہ طور پر زیر آب آنے کے خطر ے سے دوچار علاقوں کے مکین انخلا کے لیے متعلقہ اداروں کے ساتھ تعاون کریں۔ ‘
این ڈی ایم اے نے لوگوں سے کہا ہے کہ سیلاب زدہ علاقوں میں غیر ضروری سفر سے مکمل گریز کریں۔
پاکستان کے دارالحکومت اسلام آباد میں حکام کا کہنا ہے کہ سملی ڈیم کا سپل وے کھول دیا گیا۔ حکام کے مطابق سملی ڈیم میں پانی کی سطح 2314.90 فٹ پہنچ گئی تھی۔
ایک سرکاری بیان کے مطابق ’سملی ڈیم کا ایک گیٹ 2 فٹ تک کھولا جائے گا۔ موجودہ پانی کے بہاؤ اور مزید بارشوں کی پیش گوئی کے پیش نظر سپل وے کھولنے کا فیصلہ کیا گیا۔‘
اس کے علاوہ اسلام آباد میں موجود دوسرےے ڈیم راول ڈیم کے سپل ویز کل 2 ستمبر، صبح 7 بجے کھولنے کا فیصلہ کیا گیا ہے۔
حکام کا کہنا ہے کہ راول ڈیم کا لیول 1751.70 فٹ پر پہنچ چکا ہے۔
حکام کے مطابق سپل ویز کھولے جانے کے بعد کورنگ نالہ میں پانی کے بہاؤ میں اضافہ متوقع ہے۔ اس لیے این ڈی ایم اے نے تمام متعلقہ اداروں کو پیشگی آگاہ کر دیا ہے۔ حکام نے کورنگ نالہ سے ملحقہ رہائشی آبادیوں کے مکوں کو محتاط رہنے کی ہدایت کی ہے۔
دوسری جانب اسلام آباد میں واقع مارگلہ ہلز پر موجود ٹریلز کو بند کرنے کے احکامات جاری کیِ گئے ہیں۔
ضلعی انتظامیہ نے نوٹیفکیشن جاری کرتے ہوئے ٹریل 2، 3، 4، 5 اور سیدپور گاؤں کے پیچھے والا ٹریل بند کر دیا ہے۔
حکام کا کہنا ہے کہ شہریوں اور ہائیکرز کی حفاظت کے پیش نظر ٹریل بند رکھنے کا فیصلہ کیا گیا ہے۔
نوٹیفکیشن کے مطابق’ یکم ستمبر سے ٹریل بند رہیں گے۔ مزید احکامات تک عوامی رسائی پر پابندی رہے گی۔ ‘
بیا وضاحت دی گئی ہے کہ ’„ضلعی انتظامیہ کا یہ اقدام شہریوں کی جان و مال کے تحفظ کیلئے اٹھایا گیا ہے۔
یاد رہے کہ آج پیر کی شام دارالحکومت اسلام آباد اور راولپنڈی کے مختلف علاقوں میں شدید بارش ہوئی ہے جس کے سبب متعدد سڑکیں اور نشیبی علاقے زیرِ آب آ گئے ہیں۔
پاکستان کے محکمہ موسمیات کے مطابق پیر کو اسلام آباد میں 95 جبکہ راولپنڈی میں 60 ملی میٹر بارش ریکارڈ کی گئی ہے۔
اسلام آباد اور راولپنڈی میں دیگر علاقوں میں کتنی بارش ہوئی؟
سیدپور ویلیج 40 ملی میٹر
گولڑہ 66 ملی میٹر
بوکرا (آئی 12) 46 ملی میٹر
پی ایم ڈی (ایچ 8 ٹو) 95 ملی میٹر
شمس آباد 25 ملی میٹر
کچہری (چکلالہ) پانچ ملی میٹر
پیر وداھی 35 ملی میٹر
گوالمنڈی پانچ ملی میٹر
نیو کٹاریاں 60 ملی میٹر
محکمہ موسمیات کا یہ بھی کہنا ہے کہ بارش کے باعث نالہ لئی اور اور نشیبی علاقوں میں طغیانی کا خدشہ ہے۔
اسلام آباد کے ڈپٹی کمشنر عرفان نواز میمن نے سوشل میڈیا پلیٹ فارم ایکس پر اپنی پوسٹ میں کہا ہے کہ ’شدید بارش کے باعث ضلعی انتظامیہ ہائی الرٹ ہے، تمام اسسٹنٹ کمشنرز اور مجسٹریٹس فیلڈ میں موجود ہیں۔‘
ہم گذشتہ ایک گھنٹے سے افغان صوبے ننگرہار کے مرکزی ہسپتال میں موجود ہیں۔ اس ہسپتال میں بہت سارے زخمیوں کو ہیلی کاپٹرز کے ذریعے طبی امداد کے لیے لایا گیا ہے۔
میں نے یہاں متعدد ایمبولینسز کو زخمیوں کو لاتے ہوئے دیکھا ہے۔ یہاں ایک افراتفری کا عالم ہے، بے بس لوگ اپنے رشتے داروں کو ڈھونڈ رہے ہیں، جبکہ قریب ہی رضاکار اور ریسکیو کارکنان امدادی کاموں میں مصروف ہیں۔
مجھے یہاں ایک اور ڈاکٹر نے بتایا کہ اس ہسپتال میں زلزلے کے نتیجے میں زخمی ہونے والے تقریباً 460 افراد کو لایا گیا ہے۔ ان میں سے 250 افراد کو ہسپتال میں داخل کیا گیا ہے جبکہ باقی افراد کو طبی امداد کے بعد ڈسچارج کر دیا گیا ہے۔
میری ہسپتال میں ایک انتہائی دکھی بررگ خاتون سے ملاقات ہوئی جن کے متعدد رشتے دار اس زلزلے کے نتیجے میں ہلاک ہوئے ہیں۔ ان کی حالت بہت ہی خراب تھی۔
میں نے ایک بزرک شخص کو بھی دیکھا جو کہ غنودگی کی حالت میں کہیں اپنے ہی خیالات میں کھوئے ہوئے نظر آئے۔
یہ دونوں کسی سے بات کرنے کی حالت میں نہیں تھے، کبھی با آواز بلند رو رہے تھے اور کبھی خاموشی سے۔ یہ دونوں ہی صدمے کی حالت میں تھے۔
ان دونوں کا تعلق افغان صوبے کنڑ سے تھا۔
اس ہسپتال میں موجود ایک اور ڈاکٹر نے مجھے بتایا کہ ان کے پاس وسائل کم ہیں اور ہسپتال میں سینکڑوں کی تعداد میں مریض موجود ہیں۔
ڈاکٹروں کے مطابق انھیں غیرسرکاری تنظیموں کی طرف سے مدد مل رہی ہے اور وہ زیادہ سے زیادہ مریضوں کو طبی امداد دینے کی کوشش کر رہے ہیں۔
ہسپتال میں آنے والے متعدد مریضوں اور ان کے خاندان کے افراد سے بھی میری بات ہوئی۔ ان سب کا یہی کہنا تھا کہ زلزلے میں ہونے والی تباہی بیان نہیں کی جا سکتی۔
انھوں نے مجھے بتایا کہ وہ سب اس وقت سو رہے تھے جب ان پر گھر کی چھتیں گِریں۔
امریکی صدر ڈونلڈ ٹرمپ کا کہنا ہے کہ انڈیا نے امریکہ کی مصنوعات پر ٹیرف میں اس حد تک کمی کی پیشکش کی ہے کہ اب ’ٹیرف نہ ہونے کے برابر‘ ہو گا لیکن اب ’اس میں بہت تاخیر ہو گئی ہے۔‘
انڈیا کی جانب سے باضابطہ طور پر امریکہ کے لیے ٹیرف کم کرنے کا اعلان سامنے نہیں آیا ہے۔
ٹرتھ سوشل پر اپنی ایک پوسٹ میں ٹرمپ کا کہنا تھا کہ’تھوڑے ہی لوگ جانتے ہیں کہ ہم انڈیا کے ساتھ بہت کم کاروبار کرتے ہیں لیکن وہ (انڈیا) ہمارے (امریکہ کے) ساتھ بہت زیادہ کاروبار کرتے ہیں۔‘
’دوسرے لفظوں میں یہ کہہ لیجیے کہ وہ ہمیں بڑی تعداد میں مصنوعات فروخت کرتے ہیں لیکن ہم انھیں بہت کم (چیزیں) فروخت کرتے ہیں۔‘
انڈیا کا حوالہ دیتے ہوئے انھوں نے مزید لکھا کہ ’انھیں ایسا (ٹیرف میں کمی) برسوں پہلے کر دینا چاہیے تھا۔‘
امریکی صدر کے مطابق ’انڈیا اپنے لیے زیادہ تر تیل اور عسکری مصنوعات روس سے خریدتا ہے اور امریکہ سے بہت کم۔‘
’تباہی اتنی زیادہ ہوئی ہے کہ تصور بھی نہیں کیا جا سکتا، پورے کے پورے دیہات ملبے کا ڈھیر بن چکے ہیں اور پہاڑی علاقوں تک جانے والی سڑکیں تاحال بند ہیں۔ اس وقت ہماری ترجیح ملبے سے لاشیں نکالنا نہیں بلکہ زخمیوں تک پہنچنا ہے۔‘
یہ الفاظ افغان صوبے کنڑ میں تعینات ایک اعلیٰ سطح کے طالبان افسر کے ہیں جو کہ زلزلے سے متاثرہ علاقوں میں ہیلی کاپٹر بھیج رہے ہیں۔
ان کا کہنا ہے کہ ’زیادہ تر لاشیں ملبے تلے دبی ہیں۔ ہم سب کچھ کر رہے ہیں لیکن سب کچھ اتنی جلدی کرنا آسان نہیں ہوگا۔‘
طالبان افسر کے مطابق ریسکیو ٹیموں کو متاثرہ علاقوں تک پہنچنے میں مشکلات کا سامنا ہے اور دوسری جانب لوگوں کی ایک بڑی تعداد ہیلی کاپٹرز کی منتظر ہے کیونکہ سڑکوں کے ذریعے ان علاقوں تک رسائی ممکن نہیں ہے۔
یہ تصاویر افغانستان کے صوبے کنڑ کے ایک دیہات مزاد دارا کی ہیں جہاں زلزلے سے متاثرہ افراد نے کھیتوں میں پناہ لی ہے۔
پاکستان کے دارالحکومت اسلام آباد اور راولپنڈی میں گذشتہ ایک گھنٹے کے دوران مختلف علاقوں میں شدید بارش ہوئی ہے جس کے سبب متعدد سڑکیں اور نشیبی علاقے زیرِ آب آ گئے ہیں۔
پاکستان کے محکمہ موسمیات کے مطابق پیر کو اسلام آباد میں 95 جبکہ راولپنڈی میں 60 ملی میٹر بارش ریکارڈ کی گئی ہے۔
اسلام آباد اور راولپنڈی میں دیگر علاقوں میں کتنی بارش ہوئی؟
سیدپور ویلیج 40 ملی میٹر
گولڑہ 66 ملی میٹر
بوکرا (آئی 12) 46 ملی میٹر
پی ایم ڈی (ایچ 8 ٹو) 95 ملی میٹر
شمس آباد 25 ملی میٹر
کچہری (چکلالہ) پانچ ملی میٹر
پیر وداھی 35 ملی میٹر
گوالمنڈی پانچ ملی میٹر
نیو کٹاریاں 60 ملی میٹر
محکمہ موسمیات کا یہ بھی کہنا ہے کہ بارش کے باعث نالہ لئی اور اور نشیبی علاقوں میں طغیانی کا خدشہ ہے۔
اسلام آباد کے ڈپٹی کمشنر عرفان نواز میمن نے سوشل میڈیا پلیٹ فارم ایکس پر اپنی پوسٹ میں کہا ہے کہ ’شدید بارش کے باعث ضلعی انتظامیہ ہائی الرٹ ہے، تمام اسسٹنٹ کمشنرز اور مجسٹریٹس فیلڈ میں موجود ہیں۔‘
ان کا مزید کہنا تھا کہ ’نکاسی آب کا عمل جاری ہے جبکہ نشیبی علاقوں اور نالوں کی خصوصی نگرانی کی جا رہی ہے۔‘
خیال رہے اس سے قبل پاکستان کے محکمہ موسمیات نے پیش گوئی کی تھی کہ پیر کو ملک کے زیرِ انتظام کشمیر، شمال مشرقی پنجاب، اسلام آباد اور خیبر پختونخواہ میں تیز ہواؤں کے ساتھ بارش ہو سکتی ہے۔
انڈیا کے وزیرِ خارجہ ایس جے شنکر کا کہنا ہے کہ انڈین حکومت نے افغانستان میں زلزلہ متاثرین کے لیے ایک ہزار خیمے کابُل پہنچا دیے ہیں۔
پیر کو سوشل میڈیا پلیٹ فارم ایکس پر ایک بیان میں ایس جے شنکر کا کہنا تھا کہ ان کی اپنے افغان ہم منصب مولوی امیر خان متقی سے ٹیلی فون پر گفتگو ہوئی ہے اور انھوں نے زلزلے میں جانوں کے ضیاع پر افسوس کا اظہار کیا ہے۔
’انڈیا نے ایک ہزار خیمے کابل پہنچا دیے ہیں۔ کابُل میں انڈین مشن فوری طور پر 15 ٹن کھانے پینے کی اشیا کنڑ پہنچا رہا ہے۔‘
اس سے قبل ایک بیان میں وزیرِ اعظم نریندر مودی نے کہا تھا کہ ’انڈِیا متاثرین کو ہر ممکن امداد اور ریلیف دینے کے لیے تیار ہے۔‘
دوسری جانب پاکستان کے وزیرِ اعظم شہباز شریف نے بھی مشرقی افغانستان میں زلزلے اور اس سے ہونے والے نقصانات پر افسوس کا اظہار کیا تھا۔
انھوں نے کہا تھا کہ افغانستان میں زلزلے سے متاثرہ علاقوں میں ’ہم ہر ممکن مدد دینے کو تیار ہیں۔‘
طالبان میں وزیرِ اعظم کے دفتر نے زلزلے سے متاثرہ افراد کی امداد کے لیے ایک خصوصی کمیٹی تشکیل دے دی ہی۔
طالبان کے مرکزی ترجمان ذبیح اللہ مجاہد کے مطابق متاثرہ افراد کے لیے ایک ارب افغانی (ایک کروڑ 80 لاکھ پاؤنڈ) مختص کیے گئے ہیں اور ضرورت پڑنے پر مزید بھی مختص کیے جائیں گے۔
ذبیح اللہ مجاہد کا کہنا ہے کہ متاثرہ افراد کے انخلا اور انھیں کھانے پینے کی اشیا فراہم کرنے کے لیے اقدامات لیے جا رہے ہیں۔
میں افغانستان کے مشرقی علاقے کی طرف سفر کر رہی ہوں جہاں گذشتہ رات زلزلے نے تباہی مچائی ہے۔ ننگرہار اور کنڑ میں زلزلہ آئے ہوئے 12 گھنٹے سے زیادہ کا وقت گزر چکا ہے۔
اس زلزلے سے سب سے زیادہ نقصان کنڑ میں ہوا ہے۔ یہ ایک پہاڑی علاقہ ہے اور یہاں جانے کے راستے بھی محدود ہیں۔ حال ہی میں اس صوبے میں سیلاب اور لینڈ سلائیڈنگ کے سبب متعدد علاقوں کی طرف جانے والے سڑکیں تباہ ہو گئی تھیں۔
یہاں صرف ہیلی کاپٹرز کے ذریعے ہی رسائی اور ریسکیو سرگرمیاں ممکن ہیں۔
میری جلال آباد کے مرکزی ہسپتال میں عینی شاہدین سے بات ہوئی ہے اور ان کا کہنا ہے کہ ایمبولینسز کے ذریعے زخمیوں کے آنے کا سلسلہ جاری ہے۔
انھوں نے مجھے بتایا کہ خواتین اور بچوں سمیت سینکڑوں زخمیوں کو ہسپتال لایا گیا ہے، یہاں لاشیں بھی بڑی تعداد میں لائی گئی ہیں۔
میں کنڑ کے رہائشیوں سے بھی رابطے میں ہوں۔ ان سے رابطے قائم رکھنے میں مجھے مشکلات درپیش ہیں کیونکہ ان علاقوں میں انٹرنیٹ کی موجودگی بہت محدود ہے۔
کچھ لوگوں کا کہنا ہے کہ ان کے اطراف میں پورے کے پورے گاؤں ملبے کے ڈھیر میں تبدیل ہو چکے ہیں۔ لوگ اپنے پیاروں کو نکالنے کی کوشش کر رہے ہیں۔
طالبان کی حکومت اور غیر سرکاری اداروں نے ریسکیو ٹیمیں ان علاقوں میں بھیجی ہیں لیکن یہ سب کافی نہیں ہے۔
جلال آباد میں مقامی طبی حکام کا کہنا ہے کہ کنڑ میں دو وادیاں ایسی ہیں جہاں تک رسائی کا کوئی ذریعے ہی موجود نہیں ہے کیونکہ لینڈ سلائیڈنگ کے سبب سڑکیں تباہ ہو چکی ہیں۔
انھیں ڈر ہے کہ وقت کے ساتھ ساتھ ہلاکتوں کی تعداد میں اضافہ ہو سکتا ہے۔
افغانستان میں پہاڑوں سے گھرے صوبے کنڑ میں سید رحیم اپنے پڑوسی کے گھر کے ملبے کے درمیان کھڑے ہیں۔
اس زلزلے میں تباہ ہونے والے گھروں میں ان کا اپنا گھر بھی شامل ہو سکتا تھا لیکن ان کے پاس یہ سب سوچنے کا وقت نہیں ہے۔ انھیں ابھی بہت کام کرنا ہے۔
وہ ایمرجنسی کارکنان، ڈاکٹرز اور طبی عملے کو دور دراز دیہاتوں میں بھیج رہے ہیں تاکہ ملبے تلے دبے افراد کو بچایا جا سکے۔
وہاں ریسکیو کارکنان لاشیں اور زخمی افراد کو ریت اور پتھروں کے نیچے سے نکال رہے ہیں۔ ان میں سے کچھ افراد کو ایمبولینسز اور کچھ کو ہیلی کاپٹرز کے ذریعے جلال آباد علاج کے لیے منتقل کیا جا رہا ہے۔
اپنے دیہات سے فون پر بی بی سی سے بات چیت کے دوران ان کا کہنا تھا کہ: ’ریسکیو کارکنان نے بہت سے سارے لوگوں کو بچایا ہے۔ دیہاتوں میں لوگ بہت ڈرے ہوئے ہیں۔‘
ان کا خیال ہے کہ سرکاری طور پر بتائی جانے والی اموات کی تعداد اصل تعداد سے کم ہے۔
سید رحیم کا کہنا ہے کہ ’کچھ لوگوں نے ہمیں پیغامات بھیجے کہ ان کے گھر تباہ ہوگئے ہیں اور کچھ لوگ اب بھی پتھروں کے نیچے دبے ہوئے ہیں۔‘
انھیں اپنے خاندان کی بھی فکر ہے۔ ’جب میں گھر جاؤں گا تو وہاں رُک جاؤں گا۔ ہم سو نہیں پا رہے، ہمیں ڈر ہے کہ کہیں زلزلہ دوبارہ آجائے گا۔‘
گذشتہ رات افغانستان کے مشرقی صوبے کنڑ میں زلزلہ آیا تھا جس کی ریکٹر سکیل پر شدت چھ نوٹ کی گئی تھی۔ اس زلزلے کا مرکز جلال آباد سے صرف 27 کلومیٹر دور تھا۔
اس زلزلے کے جھٹکے نہ صرف افغانستان کے دارالحکومت کابُل میں محسوس کیے گئے تھے بلکہ اس کے اثرات پڑوسی ملک پاکستان میں بھی نظر آئے تھے۔
اب تک ہم اس زلزلے کے اثرات کے بارے میں کیا جانتے ہیں:
افغانستان میں طالبان حکومت کے ترجمان ذبیح اللہ مجاہد نے کہا ہے کہ گذشتہ رات ملک میں آنے والے زلزلے کے نتیجے میں 800 سے زیادہ افراد ہلاک ہو گئے ہیں۔
پیر کو جاری ایک بیان میں ذبیح اللہ مجاہد کا کہنا تھا کہ زلزلے سے کنڑ میں اب تک 800 افراد کی ہلاکت کی تصدیق ہوئی ہے، جبکہ ننگر ہار میں 12 افراد ہلاک ہوئے ہیں۔
امریکی جیولوجیکل سروے (یو ایس جی ایس) کے مطابق، اتوار کی شب 11 بج کر 47 منٹ (پاکستانی وقت کے مطابق پیر 12بج کر 17 منٹ) پر مشرقی افغانستان میں آنے والے زلزلے کی گہرائی محض آٹھ کلومیٹر تھی۔ زلزلے کے بعد سے اب تک کم از کم تین آفٹر شاکس آچکے ہیں جن کی شدت 4.5 اور 5.2 کے درمیان تھی۔
طالبان حکومت کے ترجمان کے مطابق زلزلے سے لغمان اور نوستان سمیت دیگر صوبے بھی متاثر ہوئے ہیں۔
ان کا کہنا ہے کہ کنڑ میں 2500، لغمان میں 58 اور نورستان میں زلزلے سے چار افراد کے زخمی ہونے کی اطلاعات ہیں۔