بلوچستان: نوکنڈی میں ایف سی ہیڈکوارٹر پر حملہ، سکیورٹی فورسز کی جوابی کارروائی

لائیو کوریج

1. 28 نومبر 2025خیبرپختونخوا کے ضلع بنوں میں مسلح افراد کے حملے میں پانچ پولیس اہلکار زخمی, عزیز اللہ خان، بی بی سی اُردو، پشاور

   پاکستان کے صوبہ خیبرپختونخوا کے ضلع بنوں میں جمعرات کی شب پولیس تھانے پر مسلح افراد کے حملے میں پانچ پولیس اہلکار زخمی ہو گئے ہیں۔

   بنوں کے ریجنل پولیس افسر کے دفتر کی جانب سے جاری کیے گئے بیان میں کہا گیا ہے کہ مسلح افراد نے چاروں اطراف سے ہلکے اور بھاری ہتھیاروں سے حملہ کیا ہے جس پر تھانے میں موجود پولیس اہلکاروں نے فوری جوابی کارروائی کرتے ہوئے حملہ ناکام بنا دیا۔

   بیان میں کہا گیا ہے کہ حملے کی اطلاع ملتے ہی تھانہ ڈومیل اور تھانہ ٹاؤن کی نفری اور سکیورٹی فورسز موقع پر پہنچ گئے اور مشترکہ طور پر دہشتگردوں کے خلاف سخت کارروائی عمل میں لائی گئی ہے۔

   گذشتہ روز تھانہ ہوید کی حدود شیخ لنڈک پولیس چوکی پر نا معلوم افراد نے کواڈ کاپٹر/ڈرون حملہ حملہ کیا تھا جس میں تین پولیس اہلکار زخمی ہو گئے تھے۔

   مسلح افراد نے کواڈ کاپٹر ڈرون سے پولیس چوکی پر دھماکہ خیز مواد گرایا۔

   زخمی ہونے والوں میں سپاہی اسلم سپاہی حمید اللہ اور سپاہی اسماعیل شامل ہیں۔

   خیبر پختونخوا کے جنوبی اضلاع میں تشدد کے واقعات میں خطرناک حد تک اضافہ دیکھا جا رہا ہے۔

   بنوں میں گذشتہ چند ماہ کے دوران پولیس تھانوں پر حملوں کے علاوہ ٹارگٹ کلنگ اور کواڈ کاپٹر حملے ہوئے ہیں جن میں پولیس اہلکاروں کا جانی نقصان ہوا ہے۔

   پولیس اور سکیورٹی فورسز کے جانب سے مسلح افراد کے خلاف مختلف مقامات پر خفیہ اطلاعات پر آپریشنز کیے گئے ہیں جن میں عسکریت پسندوں کے جانی نقصانات کی اطلاعات ہیں۔

2. 28 نومبر 2025عمران خان کے بیٹے کا عالمی برادری کے نام پیغام: ’میرے والد کی زندگی کا ثبوت مانگا جائے‘

   سابق وزیرِ اعظم عمران خان کے بیٹے قاسم خان نے عالمی برادری اور انسانی حقوق کی تنظیموں سے مطالبہ کیا ہے کہ وہ حکومت پاکستان پر زور دیں کہ وہ ان کے والد کی زندگی کا ثبوت فراہم کریں۔

   پاکستان تحریکِ انصاف نے قاسم خان کے پیغام کے مندرجات اپنے سوشل میڈیا اکاؤنٹ پر شیئر کیے ہیں۔

   پیغام میں کہا گیا ہے کہ ’میرے والد 845 دنوں سے زیرِ حراست ہیں۔ پچھلے چھ ہفتوں سے اُنھیں قیدِ تنہائی میں رکھا گیا ہے۔ ان کی بہنوں کو آنے جانے سے منع کیا گیا ہے، یہاں تک کہ عدالت کے واضح احکامات کے باوجود بی رسائی کی اجازت دی گئی ہے۔ کوئی فون کال، کوئی ملاقات اور زندگی کا کوئی ثبوت نہیں ہے۔‘

   قاسم خان کا کہنا تھا کہ ’میرا اور میرے بھائی کا والد سے کوئی رابطہ نہیں ہے۔ یہ ہمارے خاندان کو یہ جاننے سے روکنے کی دانستہ کوشش ہے کہ آیا وہ محفوظ ہیں یا نہیں۔‘

   اُن کا کہنا تھا کہ ’میں عالمی برادری، انسانی حقوق کی عالمی تنظیموں اور ہر جمہوری آواز سے فوری مداخلت کرنے کا مطالبہ کرتا ہوں کہ وہ عمران خان کی زندگی کا ثبوت مانگیں، عدالت تک رسائی کا حکم دیں، اس غیر انسانی تنہائی کو ختم کریں۔‘

   خیال رہے کہ وزیرِ اعظم کے مشیر رانا ثناء اللہ نے سماء نیوز کے پروگرام میں گفتگو کرتے ہوئے دعویٰ کیا ہے کہ عمران خان کو اڈیالہ جیل سے کہیں اور منتقل نہیں کیا گیا جبکہ وہ جیل میں خیر و عافیت سے ہیں۔

3. 28 نومبر 2025وائٹ ہاؤس کے باہر فائرنگ: ٹرمپ انتظامیہ 19 ممالک کے گرین کارڈ ہولڈرز کی دوبارہ جانچ کرے گی

   ٹرمپ انتظامیہ نے کہا ہے کہ وہ 19 ممالک سے امریکہ ہجرت کرنے والے افراد کو جاری کیے گئے گرین کارڈز کی دوبارہ جانچ کرے گی۔

   یو ایس سٹیزن شپ اینڈ امیگریشن سروسز کے سربراہ جوزف ایڈلو نے کہا کہ صدر نے انھیں ہدایت کی ہے کہ وہ ’امریکہ کے لیے تشویش کا باعث بننے والے ممالک سے آنے والے ہر اجنبی کے لیے گرین کارڈ کی مکمل اور سخت جانچ پڑتال کریں۔‘

   جب بی بی سی نے پوچھا کہ کون سے ممالک اس فہرست میں شامل ہیں؟ تو ایجنسی نے جون میں وائٹ ہاؤس کے اعلان کی طرف اشارہ کیا جس میں افغانستان، کیوبا، ہیٹی، ایران، صومالیہ اور وینزویلا شامل ہیں۔

   یہ اعلان بدھ کے روز واشنگٹن ڈی سی میں ایک افغان شہری کی جانب سے مبینہ طور پر نیشنل گارڈ کے دو فوجیوں پر فائرنگ کے بعد سامنے آیا ہے، اس واقعے میں نیشنل گارڈ کی ایک اہلکار جان کی بازی ہار گئی تھیں جبکہ ایک اہلکار شدید زخمی ہے۔

   ملزم رحمان اللہ لکنوال 2021 میں ایک پروگرام کے تحت امریکہ آیا تھا جس میں افغانستان سے امریکہ کے انخلاء کے تناظر میں افغانوں کو خصوصی امیگریشن کی پیشکش کی گئی تھی۔

   صدر ڈونلڈ ٹرمپ نے کہا کہ فائرنگ سے قومی سلامتی کو لاحق ایک بڑے خطرے کی نشاندہی ہوتی ہے۔

   گرین کارڈ کے جائزے کے بارے میں جمعرات کو ایڈلو کی سوشل میڈیا پوسٹ میں واضح طور پر اس حملے کا ذکر نہیں کیا گیا۔

   ایڈلو نے کہا کہ ’اس ملک اور امریکی عوام کا تحفظ سب سے اہم ہے، اور امریکی عوام سابقہ ​​انتظامیہ کی دوبارہ آبادکاری کی لاپرواہ پالیسیوں کی قیمت برداشت نہیں کریں گے۔‘

   دیگر ممالک جن کے گرین کارڈ ہولڈرز کی دوبارہ جانچ کی جائے گی ان میں میانمار، چاڈ، جمہوریہ کانگو اور لیبیا شامل ہیں۔

4. 28 نومبر 2025ہانگ کانگ میں رہائشی عمارتوں میں لگنے والی آگ سے ہلاکتوں کی تعداد 94 ہو گئی

   ہانگ کانگ میں رہائشی عمارتوں میں لگنے والی آگ سے مرنے والوں کی تعداد 94 ہو گئی ہے جبکہ حکام کا کہنا ہے کہ آگ پر قابو پا لیا گیا ہے۔

   آگ لگنے سے ہلاک ہونے والوں میں ایک 37 سالہ فائر فائٹر بھی شامل ہے، فائر ڈیپارٹمنٹ کے مطابق، کم از کم 76 مزید افراد زخمی ہوئے جن میں 11 فائر فائٹرز بھی شامل ہیں۔

   مرنے والوں کی تعداد میں اضافہ اس وقت ہوا ہے جب حکام کا کہنا ہے کہ آگ پر تقریباً مکمل قابو پا لیا گیا ہے اور امدادی کارکن ابھی تک لاپتہ افراد کی تلاش جاری رکھے ہوئے ہیں۔

   ہانگ کانگ میں وانگ فوک کورٹ ہاؤسنگ سٹیٹ میں بڑے پیمانے پر آگ لگنے پر افسوس کا اظہار کیا جا رہا ہے۔

   سوالات بڑھ رہے ہیں کہ آگ اتنی تیزی سے کیسے پھیلی اور کس کو ذمہ دار ٹھہرایا جائے،ہانگ کانگ کے بہت سے شہری اسے ’انسانی ساختہ آفت قرار‘ دے رہے ہیں۔

   متعدد رہائشیوں نے انٹرویوز میں انکشاف کیا ہے کہ آگ لگنے کے وقت فائر الارم نہیں بجا تھا۔

   کیکو ما، جو وانگ فوک کورٹ میں ایک اپارٹمنٹ کے مالک ہیں، کا کہنا ہے کہ تزئین و آرائش کے کاموں کے دوران الارم بند کر دیا گیا تھا، کیونکہ تعمیراتی کارکن باقاعدگی سے عمارت کے اندر اور باہر جانے کے لیے فائر اسکیپ کا استعمال کرتے تھے۔

   اُن کے بقول ’یہ روکا جا سکتا تھا... بہت سے لوگوں نے اپنے فرائض ادا نہیں کیے۔‘

   وہ مزید کہتی ہیں کہ رہائشیوں نے اکثر کارکنوں کو تمباکو نوشی کرتے دیکھا۔ لوگ پوچھتے رہے کہ آگ لگ جائے تو کیا ہو گا۔ ہر کوئی اس بات سے بہت پریشان تھا۔

5. 28 نومبر 2025تاجکستان میں مبینہ ڈرن حملے میں تین چینی باشندوں کی ہلاکت پر پاکستان کا اظہارِ افسوس

   پاکستان نے تاجکستان میں مبینہ ڈرون حملے میں تین چینی باشندوں کی ہلاکت پر افسوس کا اظہار کیا ہے۔

   پاکستان کی وزارتِ خارجہ کی جانب سے جاری کیے گئے بیان میں کہا گیا ہے کہ ’پاکستان چینی شہریوں پر ہونے والے اس بزدلانہ حملے کی واضح الفاظ میں مذمت کرتا ہے۔ اس واقعے میں مسلح ڈرونز کا استعمال افغانستان سے آنے والے خطرے کی سنگینی اور اس کے پیچھے کارفرما افراد کی ڈھٹائی کو واضح کرتا ہے۔‘

   بیان میں کہا گیا ہے کہ ’پاکستان اس گھناؤنے دہشت گردانہ حملے میں چینی شہریوں کی قیمتی جانوں کے ضیاع پر عوامی جمہوریہ چین کی حکومت اور عوام کے ساتھ ساتھ تاجکستان کی حکومت اور عوام کے ساتھ تعزیت اور مضبوط یکجہتی کا اظہار کرتا ہے۔‘

   بیان کے مطابق ’ایک پڑوسی کے طور پر جو بار بار افغان سرزمین سے دہشت گردی کے حملوں کا شکار ہوا ہے، پاکستان کے لوگ ہمارے چینی دوستوں اور تاجک شراکت داروں کے دکھ اور غم کو پوری طرح سمجھتے اور ان میں شریک ہیں۔‘

   بیان میں کہا گیا ہے کہ پاکستان نے مسلسل اس بات پر زور دیا ہے کہ افغان سرزمین اپنے پڑوسیوں یا کسی دوسرے ملک کے خلاف دہشت گردی کے لیے استعمال نہیں ہونی چاہیے۔

   واضح رہے کہ افغانستان میں طالبان حکومت پاکستان کے ان الزامات کی تردید کرتی رہی ہے۔

6. 28 نومبر 2025افغانستان سے کیے گئے ڈرون حملے میں چینی کمپنی کے تین ملازمین ہلاک: تاجکستان کا دعویٰ

   تاجکستان نے دعویٰ کیا ہے کہ اس کے سرحدی علاقے میں افغانستان کی سرزمین سے کیے جانے والے ایک ڈرون حملے میں ایک چینی کمپنی کے تین ملازمین ہلاک ہوئے ہیں۔

   جمعرات کو ایک بیان میں تاجکستان کی وزارتِ خارجہ نے دعویٰ کیا ہے کہ ڈرون حملہ اس کے صوبے ختلان کے سرحدی علاقے میں ہوا ہے۔

   تاجکستان کے دعوے پر افغانستان کی جانب سے تاحال کوئی بیان نہیں سامنے آیا ہے۔

   تاہم تاجکستان کی وزارتِ خارجہ کا کہنا ہے کہ ’یہ حملہ ایک ڈرون کا استعمال کرتے ہوئے کیا گیا ہے جس میں گرینیڈز اور اسلحہ نصب تھا۔‘

   بیان میں مزید کہا گیا ہے کہ تاجکستان افغانستان کے ساتھ سرحدی علاقوں میں سکیورٹی اور استحکام برقرار رکھنے کی کوشش کر رہا ہے لیکن اس کے باوجود بھی ’افغانستان کی سرزمین پر موجود جرائم پیشہ گروہوں کی تباہ کُن کارروائیاں جاری ہیں۔‘

7. 28 نومبر 2025گزشتہ روز کی اہم خبروں کا خلاصہ

   جمعے کے روز کی خبروں کو شامل کرنے سے قبل اہم خبروں کا خلاصہ پیش خدمت ہے۔

   • پاکستانی فوج کا کہنا ہے کہ اس نے خیبر پختونخوا کے ضلع ڈیرہ اسماعیل خان میں ایک کارروائی میں 22 شدت پسندوں کو ہلاک کیا ہے۔
   • ہانگ کانگ میں رہائشی عمارتوں میں لگنے والے آگ سے اب تک ہلاکتوں کی مجموعی تعداد 75 ہو گئی ہے۔مقامی میڈیا اور اے ایف پی نیوز ایجنسی نے ہانگ کانگ فائر ڈیپارٹمنٹ کے حوالے سے کہا ہے کہ اب تک آگ میں 76 افراد زخمی ہوئے ہیں۔
   • پاکستان میں حکام کا کہنا ہے کہ پاکستان کے ضلع خیبر میں داعش کے مبینہ ٹھکانوں پر مبینہ ڈرون حملوں کی خبریں غیر مصدقہ ہیں۔ پاکستان کی وزارت اطلاعات و نشریات کا کہنا ہے کہ سوشل میڈیا پر ایسی غلط خبریں گردش کر رہی ہیں کہ جن میں ’خیبر ضلع میں داعش کے ٹھکانوں پر ڈرون حملے‘ کا الزام لگایا گیا ہے۔
   • ایف آئی اے لاہور زون کے ڈائریکٹرکیپٹن ریٹائرڈ علی ضیا نے ایئرپورٹس پر لوگوں کو مبینہ طور پر جہاز سے اتارنے کے واقعات کے حوالے سے سوشل میڈیا پر پھیلنے والی خبروں کے حوالے سے کہا ہے کہ یہ ’گمراہ کن اے آئی سے تیار کردہ ویڈیوز اور غلط معلومات‘ پر مبنی ہیں
   • بنگلہ دیش کی ایک عدالت نے معزول وزیر اعظم شیخ حسینہ واجد کو پرباچل میں کیپٹل ڈیولپمنٹ اتھارٹی سے پلاٹ حاصل کرنے کے لیے اپنے اختیارات کا ناجائز استعمال کرنے کے الزام میں ان کے خلاف دائر تین مقدمات میں 21 سال قید کی سزا سنائی ہے۔
   • امریکہ کے شہریت اور امیگریشن سروسز کے محکمے کا کہنا ہے کہ ’سکیورٹی اور جانچ کے پروٹوکولز‘ کے جائزے تک افغان شہریوں کی امیگریشن کی تمام درخواستوں پر کارروائی معطل کی جا رہی ہے۔
   • امریکہ کے دارالحکومت واشنگٹن ڈی سی میں وائٹ ہاؤس سے دو بلاکس سے بھی کم فاصلے پر نیشنل گارڈ کے دو اہلکاروں کو گولی مار کر شدید زخمی کر دیا گیا ہے۔ واشنگٹن ڈی سی کے میئر نے اسے ’ٹارگٹڈ شوٹنگ‘ قرار دیا ہے۔
   • امریکی صدر ڈونلڈ ٹرمپ کا کہنا ہے کہ اگلے سال امریکہ کے شہر میامی میں ہونے والے جی 20 سربراہی اجلاس میں جنوبی افریقہ کو مدعو نہیں کیا جائے گا۔ ان کا کہنا تھا کہ اس سال کے جی 20 اجلاس میں امریکی نمائندے کے ساتھ کیے گئے سلوک کے باعث جنوبی افریقہ کو کی جانے والی ’تمام ادائیگیاں اور امداد‘ بھی روک دی جائے گی۔
   • بلوچستان کے ضلع کچھی میں بدھ کو بارودی سرنگ کے دھماکے میں تین بچے ہلاک جبکہ ایک بچی سمیت تین افراد زخمی ہوگئے

8. 28 نومبر 2025بی بی سی اردو کے لائیو پیج میں خوش آمدید!

   بی بی سی اردو کے لائیو پیج میں ہم آپ سب کو خوش آمدید کہتے ہیں۔ یہاں ہم آپ کے لیے پاکستان سمیت دنیا بھر سے تازہ ترین خبریں اور اہم تجزیے شامل کرتے ہیں، تاہم اگر آپ 17 نومبر کی خبریں پڑھنا چاہیں تو اس لنک پر کلک کیجئے۔