تہران کے پاس معاہدہ کرنے کے لیے ’وقت محدود‘ ہے: صدر ٹرمپ کا ایران پر ایک اور حملے کا عندیہ

لائیو کوریج

1. 19 مئ 2026لبنان میں اسرائیلی حملوں سے مرنے والوں کی مجموعی تعداد 3000 سے تجاوز کر گئی: لبنانی وزارت صحت

   

   ،تصویر کا ذریعہEPA

   لبنان کی وزارت صحت نے اعلان کیا ہے کہ مارچ کے آغاز سے حزب اللہ کے ساتھ لڑائی کے دوران اسرائیلی حملوں سے ملک میں ہلاکتوں کی تعداد تین ہزار سے تجاوز کر گئی ہے۔

   وزارت نے پیر کے روز ہلاکتوں کی تعداد 3,020 بتائی۔ جنگ بندی کے باوجود ہلاکتوں کی تعداد میں اضافہ تشویش ناک قرار دیا جا رہا ہے۔

   لبنان کی وزارت صحت کے مطابق 17 اپریل کو جنگ بندی شروع ہونے کے بعد سے اب تک 400 سے زیادہ ہلاکتیں ہوئی ہیں، یہ تعداد دونوں اطراف کی جانب سے بار بار خلاف ورزیوں کی وجہ سے بڑھ رہی ہے۔

   امریکہ کی ثالثی میں ہونے والے معاہدے کے تحت اسرائیل کو حزب اللہ کی عسکری سرگرمیوں کا مقابلہ کرنے کے لیے حملے کرنے کی اجازت ہے۔

   جمعے کو جنگ بندی میں توسیع کے اعلان کے بعد سے، جنوبی لبنان اور وادی بیکا کے قصبوں اور دیہاتوں پر اسرائیلی حملے جاری ہیں، جس میں درجنوں افراد ہلاک ہو چکے ہیں۔

   یاد رہے کہ اسرائیل کی جانب سے ایران پر 28 فروری کو شدید حملوں میں ایران کے سپریم لیڈر ہلاک ہو گئے تھے جس کے بعد لبنان میں موجود ایرانی حمایت یافتہ تنظیم حزب اللہ جنگ میں داخل ہوئی۔

   جنگ بندی معاہدے کے باوجود ہلاکتوں کی تعداد میں مسلسل اضافہ ہو رہا ہے۔ لبنان اور اسرائیل نے جمعے کے روز جنگ بندی میں مزید 45 دن کی توسیع کرنے پر اتفاق کیا، مذاکرات جون کے آغاز میں دوبارہ متوقع ہیں۔

2. 19 مئ 2026گزشتہ روز کی اہم خبروں کا خلاصہ

   • امریکہ کے صدر ڈونلڈ ٹرمپ نے کہا ہے کہ مشرقِ وسطیٰ کے اہم رہنماؤں کی درخواست پر ایران پر متوقع فوجی حملہ مؤخر کر دیا گیا ہے۔
   • ایران نے اس بات کی تصدیق کرنے سے انکار کر دیا ہے کہ سعودی عرب نے عدم جارحیت کے معاہدے پر دستخط کی تجویز دی ہے۔ دوبسری جانب روس کے وزیر خارجہ سرگئی لاوروف کا کہنا ہے کہ ایران کو پرامن مقاصد کے لیے یورینیم کی افزودگی کا پورا حق حاصل ہے۔
   • پاکستان نے 17 مئی 2026 کو متحدہ عرب امارات کے شہر براکہ میں قائم نیوکلیئر پاور پلانٹ پر ڈرون حملے کی شدید مذمت کی ہے اور کہا ہے کہ وہ امارات کی حکومت اور عوام کے ساتھ مکمل یکجہتی کا اظہار کرتا ہے۔
   • پاکستان میں جاری مالی سال کے پہلے 10 ماہ کے دوران براہِ راست غیر ملکی سرمایہ کاری (ایف ڈی آئی) میں 31 فیصد کمی ریکارڈ کی گئی ہے۔ پیر کو جاری کردہ مرکزی بینک کے اعداد و شمار کے مطابق جولائی تا اپریل کے عرصے میں ایف ڈی آئی کم ہو کر 1.409 ارب ڈالر رہ گئی۔
   • موجودہ مالی سال میں اپریل کے مہینے کے دوران پاکستان کا کرنٹ اکاؤنٹ خسارہ 32 کروڑ ڈالر سے زائد ریکارڈ کیا گیا، جبکہ مارچ میں کرنٹ اکاؤنٹ سرپلس میں تھا۔
   • خیبر پختونخوا کے قبائلی ضلع باجوڑ میں پولیو ٹیم کی حفاظت پر مامور پولیس اہلکاروں پر فائرنگ کے دو مختلف واقعات پیش آئے ہیں جن میں دو پولیس اہلکار ہلاک ہو گئے ہیں۔
   • فلسطین حامی کارکنوں کا کہنا ہے کہ اسرائیلی فوج قبرص کے مغرب میں بین الاقوامی پانیوں میں غزہ کے لیے امداد لے جانے والی 50 سے زائد کشتیوں پر مشتمل ایک بیڑے کو روک رہی ہیں۔

3. 19 مئ 2026سعودی عرب، قطر اور متحدہ عرب امارات کی درخواست پر اب ہم ایران پر کل طے شدہ حملہ نہیں کریں گے، صدرٹرمپ

   

   ،تصویر کا ذریعہGetty Images

   امریکہ کے صدر ڈونلڈ ٹرمپ نے کہا ہے کہ مشرقِ وسطیٰ کے اہم رہنماؤں کی درخواست پر ایران پر متوقع فوجی حملہ مؤخر کر دیا گیا ہے۔

   ایک بیان میں ڈونلڈ ٹرمپ کا کہنا تھا کہ قطر کے امیر شیخ تمیم بن حمد آل ثانی، سعودی عرب کے ولی عہد محمد بن سلمان اور متحدہ عرب امارات کے صدر شیخ محمد بن زاید النہیان نے ان سے اپیل کی کہ ایران کے خلاف طے شدہ کارروائی روک دی جائے کیونکہ اس وقت اہم سفارتی مذاکرات جاری ہیں۔

   ڈونلڈ ٹرمپ کے مطابق ان رہنماؤں کی رائے ہے کہ مذاکرات کے نتیجے میں ایسا معاہدہ ممکن ہے جو نہ صرف امریکہ بلکہ مشرقِ وسطیٰ اور دیگر ممالک کے لیے بھی قابلِ قبول ہوگا۔ ان کا کہنا تھا کہ مجوزہ معاہدے میں یہ بات یقینی بنائی جائے گی کہ ایران جوہری ہتھیار حاصل نہیں کرے گا۔

   ٹرمپ نے مزید کہا کہ ان رہنماؤں کے احترام میں انھوں نے امریکی حکام اور فوج کو ہدایت دی ہے کہ ایران پر کل متوقع حملہ نہ کیا جائے۔ تاہم انھوں نے یہ بھی واضح کیا کہ اگر قابل قبول معاہدہ نہ ہو سکا تو امریکی فوج کو کسی بھی وقت بڑے پیمانے پر کارروائی کے لیے تیار رہنے کو کہا گیا ہے۔

4. 19 مئ 2026پاکستان میں رواں مالی سال غیر ملکی سرمایہ کاری 31 فیصد کم ہو کر 1.4 ارب ڈالر رہ گئی، سٹیٹ بینک آف پاکستان, تنویر ملک، صحافی

   پاکستان میں جاری مالی سال کے پہلے 10 ماہ کے دوران براہِ راست غیر ملکی سرمایہ کاری (ایف ڈی آئی) میں 31 فیصد کمی ریکارڈ کی گئی ہے۔ پیر کو جاری کردہ مرکزی بینک کے اعداد و شمار کے مطابق جولائی تا اپریل کے عرصے میں ایف ڈی آئی کم ہو کر 1.409 ارب ڈالر رہ گئی۔

   اعداد و شمار کے مطابق اپریل میں پاکستان میں خالص غیر ملکی سرمایہ کاری 5 کروڑ 45 لاکھ ڈالر رہی، جبکہ گزشتہ سال اسی مدت میں یہ سرمایہ کاری 17 کروڑ 88 لاکھ ڈالر تھی۔

   سٹیٹ بینک آف پاکستان کے مطابق بجلی کے شعبے میں غیر ملکی سرمایہ کاری، جو مجموعی ایف ڈی آئی میں سب سے بڑا حصہ رکھتی ہے، مالی سال 2026 کے جولائی تا اپریل کے دوران کم ہو کر 78 کروڑ 60 لاکھ ڈالر رہ گئی، جبکہ گذشتہ سال اسی مدت میں یہ ایک ارب ڈالر تھی۔

   دوسری جانب تیل و گیس کی تلاش کے شعبے میں رواں مالی سال کے پہلے 10 ماہ کے دوران 52 لاکھ ڈالر کا انخلا ریکارڈ کیا گیا، جبکہ گزشتہ سال اسی مدت میں اس شعبے میں 11 کروڑ 16 لاکھ ڈالر کی سرمایہ کاری آئی تھی۔

   تاہم مالیاتی خدمات کے شعبے میں غیر ملکی سرمایہ کاری میں اضافہ دیکھا گیا۔ مالی سال 2026 کے جولائی تا اپریل کے دوران اس شعبے میں ایف ڈی آئی بڑھ کر 65 کروڑ 90 لاکھ ڈالر ہو گئی، جو گزشتہ مالی سال کی اسی مدت میں 59 کروڑ 36 لاکھ ڈالر تھی۔

5. 18 مئ 2026مشرق وسطیٰ میں جنگ کی وجہ سے تیل کی قیمتوں میں اضافے کے بعد پاکستان کا کرنٹ اکاؤنٹ اپریل میں خسارے میں رہا, تنویر ملک، صحافی

   

   ،تصویر کا ذریعہGetty Images

   موجودہ مالی سال میں اپریل کے مہینے کے دوران پاکستان کا کرنٹ اکاؤنٹ خسارہ 32 کروڑ ڈالر سے زائد ریکارڈ کیا گیا، جبکہ مارچ میں کرنٹ اکاؤنٹ سرپلس میں تھا۔ اپریل میں اس خسارے کی بڑی وجوہات مشرقِ وسطیٰ میں جاری جنگ کے باعث تیل کی قیمتوں اور درآمدات میں اضافہ ہیں۔

   پاکستان کے مرکزی بینک کی جانب سے پیر کو جاری کردہ اعداد و شمار کے مطابق اپریل 2026 میں کرنٹ اکاؤنٹ خسارہ 32 کروڑ 40 لاکھ ڈالر رہا، جبکہ گذشتہ برس اسی مہینے یہ خسارہ محض ایک کروڑ 20 لاکھ ڈالر تھا۔

   مالی سال 2026 کے پہلے 10 ماہ کے دوران مجموعی خسارہ 25 کروڑ 20 لاکھ ڈالر رہا، جب کہ گذشتہ مالی سال کے اسی عرصے میں ایک ارب 70 کروڑ ڈالر کا سرپلس ریکارڈ کیا گیا تھا۔

   ماہرین کے مطابق کرنٹ اکاؤنٹ میں یہ تبدیلی عالمی معاشی دباؤ، درآمدات میں اضافے اور برآمدات کی کمزور رفتار کا نتیجہ ہے۔ خدمات کے شعبے میں سرپلس میں کمی اور بیرونِ ملک مقیم پاکستانیوں کی ترسیلاتِ زر میں معمولی کمی نے بھی خسارے میں اضافہ کیا ہے۔

   ماہرین نے خبردار کیا ہے کہ اگر عالمی سطح پر تیل کی قیمتیں بلند رہیں تو پاکستان کا درآمدی بل مزید بڑھ سکتا ہے، جس سے تجارتی اور بیرونی خسارے پر دباؤ برقرار رہے گا۔ پاکستان اپنی مجموعی درآمدات کا تقریباً ایک چوتھائی حصہ پیٹرولیم مصنوعات پر خرچ کرتا ہے۔

   جے ایس گلوبل کے تجزیہ کار وقاص غنی کے مطابق پاکستان کی ادائیگیوں کے توازن کی صورتحال فی الحال مستحکم ہے، تاہم یہ زیادہ تر قرضوں اور بیرونی فنانسنگ پر انحصار کرتی ہے، نہ کہ غیر قرضہ جاتی سرمایہ کاری پر۔

   ان کا کہنا ہے کہ حالیہ پانڈا بانڈ کے اجرا سے ظاہر ہوتا ہے کہ عالمی سرمایہ کار پاکستان کی معیشت پر اعتماد رکھتے ہیں، تاہم حکومت کو اس موقع سے فائدہ اٹھاتے ہوئے معیشت کی بنیادی مسابقتی کمزوریوں کو دور کرنا ہوگا، جو تجارتی خسارے اور بیرونی شعبے کی نازک صورتحال کی بڑی وجوہات ہیں۔

   بین الاقوامی مالیاتی فنڈ (آئی ایم ایف) نے بھی اپنی حالیہ رپورٹ میں مالی سال 2026 کے لیے معمولی کرنٹ اکاؤنٹ خسارے کی پیش گوئی کی ہے، جس کی بنیادی وجہ درآمدات میں اضافہ قرار دی گئی ہے۔

6. 18 مئ 2026ایران کا سعودی عرب کی جانب سے عدم جارحیت کے معاہدے کی تجویز کی تصدیق سے انکار

   ایران نے اس بات کی تصدیق کرنے سے انکار کر دیا ہے کہ سعودی عرب نے عدم جارحیت کے معاہدے پر دستخط کی تجویز دی ہے۔

   ایرانی وزارتِ خارجہ کے ترجمان اسماعیل بقائی سے اس حوالے سے سوال کیا گیا تو ان کا کہنا تھا کہ ’میں اس بات کی تصدیق نہیں کر سکتا کہ اس متعلق کوئی مخصوص منصوبہ تجویز کیا گیا ہے۔‘

   حالیہ دنوں میں امریکی جریدے وال سٹریٹ جنرل سمیت متعدد ذرائع ابلاغ کے اداروں نے خبر دی تھی کہ سعودی عرب نے ایران کو عدم جارحیت کے ایک معاہدے پر دستخط کی پیشکش کی تھی۔

   یار رہے کہ 28 فروری کو امریکہ اور اسرائیل کے حملوں کے نتیجے میں شروع ہونے والی جنگ کے دوران ایران نے اپنے متعدد پڑوسی ممالک کو بھی ڈرون اور میزائلوں سے نشانہ بنایا ہے۔

7. 18 مئ 2026ایران کو پرامن مقاصد کے لیے یورینیم افزودہ کرنے کا پورا حق حاصل ہے: روسی وزیر خارجہ

   

   ،تصویر کا ذریعہAFP via Getty Images

   روس کے وزیر خارجہ سرگئی لاوروف کا کہنا ہے کہ ایران کو پرامن مقاصد کے لیے یورینیم کی افزودگی کا پورا حق حاصل ہے۔

   روس کی سرکاری خبر رساں ایجنسی تاس کے مطابق لاروف کا کہنا تھا کہ ’بنیادی اصول یہ ہے کہ جوہری ہتھیاروں کے عدم پھیلاؤ کے معاہدے کے کسی بھی دوسرے فریق کی طرح ایران کو بھی پرامن توانائی کے مقاصد کے لیے یورینیم کی افزودگی کا پورا حق حاصل ہے۔‘

   یورینیم کی افزودگی ایران اور امریکہ کے درمیان مذاکرات میں ایک اہم نکتہ ہے۔

   سوموار کے روز ہی ایرانی وزارت خارجہ کے ترجمان اسماعیل بقائی نے کہا تھا کہ ’ایران یورینیم افزودگی کے اپنے حق پر نہ تو کسی قسم کی بات چیت کرے گا اور نہ ہی کوئی سمجھوتہ۔‘

   انھوں نے یورینیم کی افزودگی کے معاملے پر بات کرتے ہوئے کہا کہ ’یہ بات قطعی ہے کہ یہ کوئی ایسا موضوع نہیں جس پر ہم بات چیت یا سمجھوتہ کریں۔ معاہدہ عدم پھیلاؤ کے تحت ایران کے افزودگی کے حق کو تسلیم کیا جا چکا ہے۔‘

   اس سے قبل گذشتہ روز ایران خبر رساں ادارے فارس نے خبر دی تھی کہ امریکہ نے مذاکرات کی بحالی کے لیے 400 کلو گرام افزودہ یورینیم کی امریکہ کو حوالگی سمیت پانچ شرطیں عائد کر رکھی ہیں۔

8. 18 مئ 2026باجوڑ میں پولیو مہم پر مامور پولیس اہلکاروں پر فائرنگ کے دو مختلف واقعات میں دو اہلکار ہلاک, بلال احمد، بی بی سی اردو، پشاور

   

   ،تصویر کا ذریعہAFP via Getty Images

   پاکستان کے صوبہ خیبر پختونخوا کے قبائلی ضلع باجوڑ میں پولیو ٹیم کی حفاظت پر مامور پولیس اہلکاروں پر فائرنگ کے دو مختلف واقعات پیش آئے ہیں جن میں دو پولیس اہلکار ہلاک ہو گئے ہیں۔

   ڈسٹرکٹ پولیس افسر (ڈی پی او) باجوڑ محمد خالد خان نے ان واقعات کی تصدیق کرتے ہوئے بی بی سی کو بتایا کہ پولیس اہلکار سید عزیز کو تحصیل سلارزئی کے علاقے ڈاگ قلعہ جبکہ سید قادر کو تبئی کے مقام پر پولیو ڈیوٹی سے واپسی پر فائرنگ کر کے ہلاک کر دیا گیا ہے۔

   ڈی پی او کے مطابق ان واقعات کے بعد علاقے کی ناکہ بندی کر دی گئی ہے اور سرچ آپریشن جاری ہے۔

   ان کا کہنا تھا کہ آج پولیو مہم کا پہلا روز تھا جو کہ 24 مئی تک جاری رہے گی اور اس کے لیے ضلع باجوڑ میں 1500 سے زائد اہلکار تعینات ہیں۔

   بعد ازاں دونوں اہلکاروں کی نماز جنازہ باجوڑ پولیس لائن گراؤنڈ میں ادا کر دی گئی۔

   خیبرپختونخوا کے وزیر اعلیٰ سہیل آفریدی اور گورنر فیصل کریم کنڈی نے باجوڑ میں پولیو ٹیموں پر فائرنگ کا نوٹس لیتے ہوئے واقعے کی شدید مذمت کی ہے۔

   دوسری جانب خیبر پختونخوا کے آئی جی پولیس نے ان حملوں کی تفصیلی رپورٹ طلب کر لی ہے۔

9. 18 مئ 2026اسرائیلی فوج نے غزہ سے 450 کلو میٹر دور صمود فلوٹیلا میں شامل کشتیوں کو روکنا شروع کر دیا

   

   ،تصویر کا ذریعہGlobal Sumud Flotilla

   فلسطین حامی کارکنوں کا کہنا ہے کہ اسرائیلی فوج قبرص کے مغرب میں بین الاقوامی پانیوں میں غزہ کے لیے امداد لے جانے والی 50 سے زائد کشتیوں پر مشتمل ایک بیڑے کو روک رہی ہیں۔

   گلوبل صمود فلوٹیلا (جی ایس ایف) کی جانب سے جاری بیان میں کہا گیا ہے کہ اس کے بیڑے کو غزہ سے تقریباً 250 ناٹیکل میل (460 کلومیٹر) دور روکا جا رہا ہے۔ انھوں نے اسرائیل کے اس اقدام کو غیرقانونی قزاقی قرار دیا ہے۔

   جی ایس ایف کی ویڈیو نشریات میں مسلح کمانڈوز کو کئی کشتیوں پر چڑھتے دیکھا جا سکتا ہے۔

   اسرائیل کی جانب سے فوری طور پر کوئی ردِعمل سامنے نہیں آیا۔ اس سے قبل اسرائیل کی وزارت خارجہ نے فلوٹیلا کو ’محض اشتعال دلانے کا اقدام‘ قرار دیا تھا اور الزام لگایا تھا کہ اس میں ’دو پرتشدد ترک گروہ‘ شامل ہیں۔

   اس سے قبل اس بیڑے میں شام ایک کشتی پر سوار پاکستانی شہری سعد ایدھی نے ایک ویڈیو بیان جاری کرتے ہوئے بتایا تھا کہ اسرائیلی فوج کی کشتیاں صبح سے صمود فلوٹیلا میں شامل کشتیوں کا پیچھا کر رہی تھیں اور انھوں نے کشتیوں کا روکنا شروع کر دیا ہے۔

   گذشتہ ماہ اسرائیلی افواج نے اسی فلوٹیلا کی 22 کشتیوں کو یونانی جزیرے کریٹ کے قریب روک لیا تھا۔

   اس واقعے میں کشتیوں پر سوار تقریباً 175 کارکنوں کو حراست میں لے لیا گیا تھا، جن میں سے دو کے علاوہ باقی سب کو اگلے ہی روز شدید بین الاقوامی ردِعمل کے بعد یونان کے جزیرے پر رہا کر دیا گیا تھا۔

10. 18 مئ 2026جرمنی کی متحدہ عرب امارات اور دیگر شراکت داروں پر حالیہ ایرانی فضائی حملوں کی مذمت: ’جوہری تنصیبات پر حملے پورے خطے کے عوام کی سلامتی کے لیے خطرہ ہیں‘

    جرمنی کے چانسلر فریڈرک مرز کا کہنا ہے کہ جرمنی ’متحدہ عرب امارات اور دیگر شراکت داروں پر ایران کے حالیہ فضائی حملوں کی شدید مذمت‘ کرتا ہے۔

    ایکس پر جاری ایک بیان میں جرمن چانسلر نے ’جوہری تنصیبات‘ پر حملے کو پورے خطے کے عوام کی سلامتی کے لیے خطرہ قرار دیا۔

    متحدہ عرب امارات نے گذشتہ روز کہا تھا کہ ابو ظہبی کے قریب براکہ جوہری بجلی گھر کے باہر ایک ڈرون حملے کے نتیجے میں بجلی پیدا کرنے والے ایک جنریٹر میں آگ لگ گئی۔

    متحدہ عرب امارات کی جانب سے جاری بیانات میں کسی ملک کا نام نہیں لیا اور صرف یہ کہا تھا کہ ڈرون ’مغربی سرحد‘ سے داخل ہوئے تھے۔

    جرمن چانسلر کا مزید کہنا تھا کہ ایران کو چاہیے کہ وہ امریکہ کے ساتھ سنجیدہ مذاکرات کرے، اپنے پڑوسیوں کو دھمکیاں دینا بند کرے اور آبنائے ہرمز کو بغیر کسی پابندی کے کھولے۔

11. 18 مئ 2026مذاکرات کی بحالی کے لیے امریکی شرائط کا جواب بھیج دیا ہے اور پاکستانی ثالث کے ذریعے مذاکراتی عمل جاری ہے: اسماعیل بقائی

    ایرانی وزارت خارجہ کے ترجمان اسماعیل بقائی کا کہنا ہے کہ تہران نے امریکی شرائط کا جواب بھیج دیا ہے اور پاکستانی ثالث کے ذریعے مذاکرات جاری ہیں۔

    سوموار کے روز اسماعیل بقائی نے ہفتہ وار پریس کانفرنس کے دوران امریکی تجویز کے مندرجات کے بارے میں بتایا کہ جب تہران نے 14 نکاتی منصوبہ پیش کیا تو امریکہ نے اس پر اپنے خدشات کا اظہار کیا اور اس کے جواب میں ہم نے بھی اپنی تحفظات سامنے رکھے۔

    ان کا کہنا تھا کہ گذشتہ ہفتے امریکی فریق نے عوامی طور پر 14 نکاتی منصوبے کو مسترد کر دیا جس کے بعد ہمیں پاکستانی ثالث کے ذریعے ان کے نکات اور شرائط کا ایک مجموعہ موصول ہوا۔

    ایرانی وزارت خارجہ کے ترجمان کا کہنا تھا تہران کی جانب سے 14 نکاتی منصوبہ بھیجے جانے کے اگلے ہی دن انھیں امریکی شرائط موصول ہوئیں۔

    ’گذشتہ چند دنوں میں ان نکات کا جائزہ لیا گیا اور اس کے جواب میں ہماری طرف سے ردِعمل بھی فراہم کر دیا گیا ہے، جبکہ پاکستانی ثالث کے ذریعے مذاکرات جاری ہیں۔‘

12. 18 مئ 2026پنجاب سے گندم کی ترسیل کا معاملہ: خیبر پختونخوا کی عوام کے ساتھ امتیازی سلوک سے قومی یکجہتی کو نقصان پہنچ رہا ہے، سہیل آفریدی

    

    ،تصویر کا ذریعہAFP via Getty Images

    خیبرپختونخوا کے وزیرِ اعلیٰ سہیل آفریدی پنجاب سے خیبر پختونخوا گندم کی ترسیل پر پابندی کو صوبے کی عوام کے ساتھ امتیازی سلوک قرار دیتے ہوئے کہا ہے کہ اس سے قومی یکجہتی کو نقصان پہنچ رہا ہے۔

    پشاور میں گورنر خیبر پختونخوا کے گورنر فیصل کریم کنڈی کے ہمراہ پریس کانفرنس کرتے ہوئے کہا ہے کہ آئین کے آرٹیکل 151 کے تحت کوئی بھی صوبہ خوراک کی ترسیل بند نہیں کر سکتا اور یہ فری ٹریڈ ہو گا۔

    ان کا کہنا ہے کہ پنجاب حکومت خیبر پختونخوا کے ساتھ زیادتی کر رہی ہے اور ’وفاقی حکومت کے علم میں لانے کے باوجود کوئی پنجاب حکومت کو اس سے منع نہیں کر رہا ہے۔،

    سہیل آفریدی کا کہنا ہے کہ آج خیبرپختونخوا کا رہائشی پاکستان میں سب سے مہنگا آٹا خرید رہا ہے۔

    ’تیل، بجلی، گیس، منرل اور مائنز خیبر پختونخوا پیدا کر رہا لیکن جس چیز کی ہمیں ضرورت ہے یہ اس میں سیاسی تعصب سے کام لے رہے ہیں۔‘

    وزیرِ اعلیٰ نے کہا کہ خیبر پختونخوا کی عوام کے ساتھ امتیازی سے قومی یکجہتی کو نقصان پہنچ رہا ہے۔

    ’یہ آیسا ہے کہ آپ خیبر پختونخوا کی عوام کو مجبور کر رہے ہیں کہ وہ کوئی فیصلہ کریں جس سے آپ کو نقصان ہو۔‘

13. 18 مئ 2026انڈیا نے اقلیتوں اور میڈیا کی آزادی کے متعلق نیدرلینڈز کی تشویش مستر د کردی: ’انڈیا شاید واحد ایسا ملک ہے جہاں یہودیوں کو کبھی ستایا نہیں گیا‘

    گذشتہ ہفتے جب انڈیا کے وزیرِ اعظم نریندر مودی نیدرلینڈز کے دو روزہ دورے پر پہنچے تو نریندی مودی سے ملاقات سے قبل نیدر لینڈز کے وزیر اعظم راب جیٹن نے انڈین وزیرِ اعظم کے دورے سے متعلق سوالوں کا جواب دیتے ہوئے کہا کہ نیدر لینڈز اور یوروپی یونین کے رکن ممالک کو انڈیا میں ہونے والی تبدیلیوں کے بارے میں تشویش ہے۔

    مقامی اخبار ’ڈی فوکسکرانٹ‘ کے مطابق راب جیٹن نے ایک سوال کے جواب میں کہا کہ ’یہ تشویش صرف پریس کی آزادی کے بارے میں نہیں بلکہ یہ اقلیتوں کے حقوق کے بارے میں بھی ہے جو اس وقت شدید دباؤ میں ہیں۔ اس کا تعلق مسلمانوں اور دوسری چھوٹی اقلیتی برادریوں سے ہے۔‘

    ’ہمیں اس بارے میں تشویش لاحق ہے کہ انڈیا کس حد تک ایک ایسے جمہوری ملک کے طور پر قائم رہتا ہے جہاں تمام مذہبی گروپوں کے لیے یکساں حقوق ہوں۔‘

    نیدر لینڈرز کے وزیر اعظم نے کہا کہ انڈیا کی حکومت کو اس بارے میں آگاہ کیا جاتا رہا ہے۔

    تاہم انڈیا نے نیدرلینڈرز کی تشویش کو یہ کہہ کر مستر کر دیا ہے یہ انڈیا کے جمہوری نظام، تہذیبی اختلاط اور مذہبی رواداری کے بارے میں سمجھ کی کمی کا نتیجہ ہے۔

    یوروپی ممالک سے متعلق انڈیا کی وزارت خارجہ کے ترجمان سیبی جارج نے کہا کہ انھوں نے نیدر لینڈز کے وزیر اعظم کا بیان نہیں دیکھا ہے۔ ’میں نے انڈیا میں اقلیتوں کے حقوق اور آزادی اظہار سے متعلق وسیع تر سوالات کا جواب دیا ہے۔‘

    انھوں نے کہا کہ ’دنیا میں کوئی بھی انڈیا جیسا ملک نہیں جہاں اتنے سارے مذاہب۔ ہندوازم، بدھ ازم، جین ازم، سکھ ازم وجود میں آئے اور بدستور فروغ پا رہے ہیں۔‘

    ان کا کہنا تھا کہ انڈیا شاید واحد ایسا ملک ہے جہاں یہودیوں کو کبھی ستایا نہیں گیا۔

    ’یہاں مسیحی حضرت عیسی اور مسلمان پیغمبر حضرت محمد کے عہد میں ہی آ گئے تھے اور آج کروڑوں کی تعداد میں یہاں موجود ہیں اور انڈیا کے جمہوری نظام میں فروغ پا رہے ہیں۔‘

14. 18 مئ 2026ایران یورینیم افزودگی کے اپنے حق پر نہ تو بات چیت کرے گا اور نہ ہی کوئی سمجھوتہ: اسماعیل بقائی

    

    ،تصویر کا ذریعہGetty Images

    ایرانی وزارت خارجہ کے ترجمان اسماعیل بقائی نے کہا ہے کہ ’ایران یورینیم افزودگی کے اپنے حق پر نہ تو کسی قسم کی بات چیت کرے گا اور نہ ہی کوئی سمجھوتہ۔‘

    انھوں نے یورینیم کی افزودگی کے معاملے پر بات کرتے ہوئے کہا کہ ’یہ بات قطعی ہے کہ یہ کوئی ایسا موضوع نہیں جس پر ہم بات چیت یا سمجھوتہ کریں۔ معاہدہ عدم پھیلاؤ کے تحت ایران کے افزودگی کے حق کو تسلیم کیا جا چکا ہے۔‘

    بقائی نے امریکہ اور ایران کے درمیان شرائط کے تبادلے سے متعلق ایک سوال کے جواب میں کہا کہ ’ایران کے مطالبات واضح ہیں۔‘ ان کے مطابق ’مثال کے طور پر ایران کے منجمد اثاثوں پر سے پابندیاں ختم ہونے کو اپنی شرط کہتے ہیں جبکہ ہم اسے اپنا مطالبہ قرار دیتے ہیں۔‘

    انھوں نے مزید کہا کہ ’امریکہ اب بین الاقوامی سطح پر قابلِ اعتبار نہیں رہا‘، اور خطے کے ممالک، بشمول متحدہ عرب امارات، کو حالیہ مہینوں کے واقعات سے سبق سیکھنا چاہیے۔ ان کے بقول امریکی موجودگی نے خطے کے امن کو بہتر بنانے کے بجائے اسے شدید خطرات سے دوچار کر دیا ہے۔‘

15. 18 مئ 2026متحدہ عرب امارات کے جوہری بجلی گھر پر ڈرون حملہ، پاکستان اور انڈیا کی مذمت

    

    ،تصویر کا ذریعہenec.ae

    پاکستان نے 17 مئی 2026 کو متحدہ عرب امارات کے شہر براکہ میں قائم نیوکلیئر پاور پلانٹ پر ڈرون حملے کی شدید مذمت کی ہے اور کہا ہے کہ وہ امارات کی حکومت اور عوام کے ساتھ مکمل یکجہتی کا اظہار کرتا ہے۔

    پاکستانی وزارتِ خارجہ کی جانب سے جاری ہونے والے بیان میں کہا گیا ہے کہ ’کسی بھی جوہری تنصیب کو جان بوجھ کر نشانہ بنانا بین الاقوامی قانون، بین الاقوامی انسانی قانون، اقوام متحدہ کے چارٹر اور عالمی ایٹمی توانائی ایجنسی کے اصولوں کی سنگین خلاف ورزی ہے۔‘

    وزارتِ خارجہ کے بیان میں مزید کہا گیا ہے کہ ’پاکستان کا موقف ہے کہ جوہری تنصیبات کو کسی بھی صورت نشانہ نہیں بنایا جانا چاہیے، کیونکہ ایسے اقدامات انسانی جانوں، ماحول اور علاقائی و عالمی امن و سلامتی کے لیے تباہ کن اور ناقابلِ تلافی نتائج کا باعث بن سکتے ہیں۔‘

    بیان میں کہا گیا ہے کہ ’سویلین نیوکلیئر انفراسٹرکچر کا تحفظ ایک تسلیم شدہ بین الاقوامی اصول ہے جس پر ہر صورت میں عمل ہونا چاہیے۔‘

    پاکستان نے تمام فریقین پر زور دیا کہ ’وہ زیادہ سے زیادہ ضبط و تحمل کا مظاہرہ کریں، بین الاقوامی قانون کی پاسداری کریں اور ایسے اقدامات سے گریز کریں جو کشیدگی میں مزید اضافے کا باعث بن سکتے ہیں۔‘

    بیان کے مطابق خطے میں پائیدار امن، استحکام اور کشیدگی میں کمی کے لیے اقوام متحدہ کے چارٹر کے اصولوں کے مطابق مذاکرات اور سفارت کاری ہی واحد مؤثر راستہ ہیں۔

    دوسری جانب انڈیا کی وزارتِ خارجہ نے متحدہ عرب امارات کے براکہ کے قریب ڈرون حملے کے نتیجے میں جوہری بجلی گھر میں لگنے والی آگ کے بعد فوری طور پر ضبط و تحمل کا مظاہرہ کرنے کی اپیل کی ہے۔

    انڈین وزارت خارجہ کے بیان میں کہا گیا ہے کہ ’انڈیا متحدہ عرب امارات میں براکہ کے جوہری بجلی گھر کو نشانہ بنانے والے حملے پر گہری تشویش رکھتا ہے۔ اس نوعیت کے اقدامات ناقابلِ قبول ہیں اور خطرناک حد تک کشیدگی میں اضافہ کرتے ہیں۔”

    بیان میں مزید کہا گیا کہ فوری طور پر تحمل کا مظاہرہ کیا جائے اور تنازع کے حل کے لیے مکالمے اور سفارت کاری کی جانب واپسی کی جائے۔

    واضح رہے کہ گزشتہ شب متحدہ عرب امارات کی ریاست ابوظہبی کے حکام کی جانب سے یہ بیان سامنے آیا تھا کہ ایک ڈرون حملے کے نتیجے میں الظفرہ ریجن میں براکہ جوہری بجلی گھر کے اندرونی حصار کے باہر موجود ایک جنریٹر میں آگ بھرک اٹھی تھی۔

    ابوظہبی میڈیا آفس کی جانب سے ایکس پر جاری ایک بیان میں کہا گیا تھا کہ ’اس واقعے کے نتیجے میں کسی کے زخمی یا ہلاک ہونے ہونے کی اطلاع نہیں اور نہ ہی کسی قسم کی تابکاری کی اطلاع ہے۔‘

16. 18 مئ 2026ایبولا وائرس کیا ہے اور یہ کیسے پھیلتا ہے؟

    

    ،تصویر کا ذریعہGetty Images

    اب سے کُچھ دیر قبل ہم نے آپ کو یہ خبر دی تھی کہ عالمی ادارہ صحت نے جمہوریہ کانگو میں ایبولا کے پھیلاؤ کو عالمی سطح پر صحت عامہ کے لیے ہنگامی صورتحال قرار دے دیا ہے۔ ایبولا کیا ہے اور یہ کیسے پھیلتا ہے؟ آئیے اس بارے میں جانتے ہیں۔

    ایبولا کیا ہے؟

    ایبولا ایک خطرناک اور مہلک بیماری ہے جو ایک وائرس کے باعث ہوتی ہے۔ یہ بیماری نایاب ہے مگر شدید نوعیت کی ہوتی ہے اور اکثر جان لیوا ثابت ہوتی ہے۔ ایبولا وائرس کی تین اقسام ایسی ہیں جو وباؤں کا سبب بنتی ہیں اور موجودہ وبا ’بنڈی بوجیو‘ وائرس سے پھیل رہی ہے۔

    ایبولا کیسے منتقل ہوتا ہے؟

    یہ وائرس انسانوں کے درمیان متاثرہ جسمانی رطوبتوں، جیسے خون، قے اور دیگر رطوبتوں کے ذریعے منتقل ہوتا ہے۔

    یہ کتنا خطرناک ہے؟

    ماضی میں بنڈی بوجیو ایبولا وائرس سے ہونے والی وباؤں میں تقریباً 30 فیصد متاثرہ افراد ہلاک ہوئے۔

    علامات ظاہر ہونے میں کتنا وست لگتا ہے؟

    وائرس سے متاثر ہونے کے بعد 2 سے 21 دن کے اندر علامات ظاہر ہو سکتی ہیں۔

    اس کی علامات ہیں کیا؟

    ابتدائی علامات اچانک ظاہر ہوتی ہیں اور فلو جیسی ہوتی ہیں، جن میں بخار، سر درد اور تھکن شامل ہیں۔ تاہم بیماری کے بڑھ جانے پر قے، اسہال شروع ہو جاتا ہے اور جسم کے اعضا متاثر ہونے لگتے ہیں۔ بعض مریضوں میں اندرونی اور بیرونی خون بہنے کی علامات بھی پیدا ہو سکتی ہیں۔

    ایبولا کہاں سے شروع ہوتا ہے؟

    یہ بیماری عموماً متاثرہ جانوروں سے انسانوں میں منتقل ہوتی ہے، خاص طور پر پھل کھانے والی چمگادڑوں سے۔

    کیا اس سے بچاؤ کی ویکسین موجود ہے؟

    ایبولا کی تین میں سے ایک قسم ’زئیر‘ کے لیے ویکسین دستیاب ہے، تاہم اس وائرس کی جو قسم اس وقت پھیل رہی ہے یعنی ’بنڈی بوجیو‘ اس کے لیے تاحال کوئی منظور شدہ ویکسین موجود نہیں ہے۔

17. 18 مئ 2026عالمی ادارہِ صحت نے کانگو میں ایبولا وائرس کے پھیلاؤ کو عالمی سطح پر صحت عامہ کے لیے ہنگامی صورتحال قرار دے دیا

    

    ،تصویر کا ذریعہAFP via Getty Images

    عالمی ادارہ صحت نے جمہوریہ کانگو میں ایبولا کے پھیلاؤ کو عالمی سطح پر صحت عامہ کے لیے ہنگامی صورتحال قرار دے دیا ہے۔

    ادارے کے مطابق کانگو کے مشرقی صوبے اتوری میں پھیلنے والی اس وبا میں اب تک تقریباً 246 مشتبہ کیسز اور 80 اموات رپورٹ ہو چکی ہیں تاہم یہ صورتحال عالمی وبا یعنی پینڈیمک کے معیار پر پورا نہیں اترتی۔

    ڈبلیو ایچ او نے خبردار کیا ہے کہ اصل تعداد کے مقابلے میں رپورٹ ہونے والے کیسز کم ہو سکتے ہیں اور یہ وبا اس وقت کی صورت حال سے کہیں زیادہ بڑے پیمانے پر پھیل سکتی ہے جس کے باعث مقامی اور علاقائی سطح پر اس کے پھیلاؤ کا خدشہ موجود ہے۔

    ادارے کے مطابق اس وقت ایبولا کی جو قسم پھیل رہی ہے وہ ’بنڈی بوجیو وائرس‘ سے پیدا ہوتی ہے، جس کے خلاف تاحال نہ تو کوئی منظور شدہ دوا موجود ہے اور نہ ہی ویکسین دستیاب ہے۔

    ایبولا کی ابتدائی علامات میں بخار، پٹھوں میں درد، تھکن، سر درد اور گلا خراب ہونا شامل ہیں جبکہ بعد میں قے، اسہال، جسم پر خارش اور خون بہنے جیسی علامات ظاہر ہوتی ہیں۔

    ڈبلیو ایچ او کے مطابق وائرس کے آٹھ کیسز لیبارٹری میں تصدیق شدہ ہیں جبکہ دیگر مشتبہ کیسز اور اموات اتوری کے دارالحکومت بونیا سمیت تین دیگر علاقوں، اور سونے کی کانوں والے شہروں مونگوالو اور روامپارا میں سامنے آئے ہیں۔

    دارالحکومت کنشاسا میں بھی وائرس کے ایک کیس تصدیق ہو چکی ہے جس کے بارے میں خیال ظاہر کیا جا رہا ہے کہ متاثرہ شخص اتوری سے واپس آیا تھا۔

    ادارے نے مزید بتایا کہ یہ وائرس کانگو سے باہر بھی پھیل چکا ہے اور ہمسایہ ملک یوگنڈا میں دو کیسز رپورٹ ہوئے ہیں۔ یوگنڈا کے حکام کے مطابق جمعرات کے روز وفات پانے والے 59 سالہ شخص میں ایبولا وائرس کی تصدیق ہوئی تھی۔

18. 18 مئ 2026جنگ میں ہونے والی ’ذلت‘ کا ازالہ کرنے کے لیے کسی بھی ’احمقانہ اقدام‘ کو دہرانے کا نتیجہ مزید سخت اور فیصلہ کن ہوگا: ترجمان پاسدارنِ انقلاب

    

    ،تصویر کا ذریعہFARS

    پاسداران انقلاب سے منسلک سمجھی جانے والی فارس نیوز ایجنسی نے کے مطابق ایرانی مسلح افواج کے سینئر ترجمان بریگیڈیئر جنرل ابوالفضل شکارچی نے امریکی صدر کی جانب سے ایران کے خلاف بار بار دی جانے والی دھمکیوں کے ردِعمل میں خبردار کیا ہے کہ ’ایران کے خلاف جنگ میں امریکہ کو ہونے والی ’ذلت‘ کا ازالہ کرنے کے لیے کسی بھی ’احمقانہ اقدام‘ کو دہرانے کا نتیجہ اسلامی جمہوریہ کی جانب سے مزید سخت اور فیصلہ کن حملوں کی صورت میں سامنے آئے گا۔‘

    جنرل شکارچی نے صحافیوں سے گفتگو میں کہا کہ ’ایران کے خلاف مسلط کی گئی تیسری جنگ میں امریکہ کی رسوائی کو چھپانے کے لیے کسی بھی حماقت کو دہرانا، اس کے سوا کوئی نتیجہ نہیں دے گا کہ اس ملک کو مزید شدید اور تباہ کن حملوں کا سامنا کرنا پڑے گا۔‘

    انھوں نے مزید کہا کہ ’مایوس امریکی صدر کو یہ جان لینا چاہیے کہ اگر یہ دھمکیاں یا ایران کے خلاف کوئی نئی جارحیت حقیقت کا روپ دھارتی ہے تو اس کے ملک کے اثاثے اور اس کی بدنام فوج نئے، طوفانی، غیر متوقع اور جارحانہ حالات کا سامنا کریں گے۔‘

    ترجمان نے خبردار کیا کہ ’ایران کے خلاف کسی بھی اقدام کا جواب دیتے ہوئے امریکہ اپنی ہی دلدل میں مزید دھنستا چلا جائے گا، جو اُن کے صدر کی مہم جو پالیسیوں کا نتیجہ ہے۔‘

    واضح رہے کہ اس سے قبل امریکی صدر ڈونلڈ ٹرمپ نے ایران کو خبردار کرتے ہوئے کہا تھا کہ ’جنگ کے خاتمے کے لیے جاری مذاکرات تعطل کا شکار ہونے پر وقت تیزی سے ختم ہو رہا ہے۔‘

    ٹروتھ سوشل پر اپنی پوسٹ میں ٹرمپ نے لکھا تھا کہ ’ایران کو جلدی کرنا ہو گی، ورنہ ان کے لیے کچھ نہیں بچے گا۔‘

19. 18 مئ 2026پراجیکٹ فریڈم پاکستان کی جانب سے اس یقین دہانی پر روکا کہ ایسا کرنے سے ہم کسی معاہدے تک پہنچ سکتے ہیں: مارکو روبیو

    

    ،تصویر کا ذریعہGetty Images

    امریکی وزیرِ خارجہ مارکو روبیو نے امریکی نشریاتی ادارے این بی سی کو دیے جانے والے ایک انٹرویو کے دوران کہا کہ امریکی صدر نے پاکستان کے کہنے پر پراجیکٹ فریڈم روکا۔

    امریکی وزیرِ خارجہ سے جب یہ سوال ہوا کہ کیا پراجیکٹ فریڈم دوبارہ شروع ہو سکتا ہے اور کیا ایران پر حملوں کا آغاز ایک مرتبہ پھر ہو سکتا ہے؟

    تو اس کے جواب میں اُن کا کہنا تھا کہ ’پراجیکٹ فریڈم کے روکے جانے کی وجہ یہ تھی کہ ایسا کرنے کے لیے پاکستان کی جانب سے درخواست کی گئی تھی اور انھوں نے یعنی پاکستان نے یہ کہا تھا کہ اگر آپ پراجیکٹ فریڈم کو روکتے ہیں تو ہمیں یہ لگتا ہے کہ ہم ایک مُمکنہ ’ڈیل‘ یا معاہدے تک پہنچ سکتے ہیں۔‘

    اُن کا مزید کہنا تھا کہ ہمارے بھی خیال میں یعنی امریکی صدر بھی یہی چاہتے ہیں کہ ’اس معاملے کا حل سفارتی انداز میں نکالا جائے، ہم نے کہا کہ ٹھیک ہے ہم اپنے بیڑے خلیجِ فارس سے نکال لیتے ہیں، اور آپ نے یہ بھی دیکھا کہ اس کے باوجود اُن پر ایران کی جانب سے حملے کیے گیے۔‘

    مارکو روبیو کا کہنا تھا کہ ’امریکی صدر اب بھی اس بات کو ترجیح دیتے ہیں کہ ’ایران کے ساتھ موجود مسائل کا ’سفارتی حل‘ نکالا جائے۔ ہماری جانب سے ایرانی حکومت اور انتظامیہ کو ہر قسم کا موقع دیا جائے مگر ایران میں ایک تقسیم کی فضا پائی جاتی ہے، یعنی وہاں فیصلہ کس نے کرنا ہے اس بارے میں ابھی تک ابہام موجود ہے۔‘

    مارکو روبیو سے انٹرویو کے دوران ایک اور سوال کہ کیا ایران کے نئے رہبرِ اعلیٰ امریکہ کے ساتھ ہونے والے مذاکرات کا حصہ ہیں کیا اور ایرانی انتظامیہ کی رہنمائی کر رہے ہیں؟ اس کے جواب میں اُن کا کہنا تھا کہ مذاکرت میں تو ایرانی وزیرِ خارجہ سامنے آتے ہیں اور اب اس بات کا واضح طور پر علم نہیں ہے کہ وہ ایران واپس جا کر وہاں کی انتظامیہ، سپریم کونسل یا نئے رہبرِ اعلیٰ کس سے بات کرتے ہیں اور فیصلہ کون کرتا ہے۔‘

    انھوں نے مزید کہا کہ ’اسی وجہ سے ہماری جانے سے تجاویز کے بعد اس پر جواب میں ایران کی جانب سے چار سے پانچ دن لگ جاتے ہیں، کیونکہ یہ واضح نہیں ہوتا کہ وہ کس سے بات کرتے ہیں اور امریکہ کو جواب دینے کے لیے انھیں کسی کی اجازت کی ضرورت ہوتی ہے۔‘

20. 18 مئ 2026عراق سے مُلکی فضائی حدود میں داخل ہونے والے تین ڈرونز کو ناکارہ بنا دیا گیا: سعودی وزارت دفاع

    

    ،تصویر کا ذریعہGetty Images

    سعودی عرب انتظامیہ کا کہنا ہے کہ انھوں نے اتوار کے روز عراقی فضائی حدود سے داخل ہونے والے تین ڈرونز کو تباہ کر دیا۔

    سعودی وزارت دفاع کی جانب سے ایکس پر جاری بیان کے مطابق 17 مئی کو سعودی عرب کی فضائی حدود میں داخل ہونے والے تین ڈرون روک کر تباہ کر دیا گیا۔

    وزارتِ دفاع کے ترجمان میجر جنرل ترکی المالکی کی جانب سے جاری بیان کے مطابق یہ ڈرون عراق کی فضائی حدود سے داخل ہوئے تھے۔

    میجر جنرل المالکی نے کہا کہ ’ ہماری وزارتِ دفاع مناسب وقت اور مقام پر جواب دینے کا حق محفوظ رکھتی ہے اور مملکت کی خودمختاری، سکیورٹی اور اس کی سر زمین پر موجود شہریوں اور رہائشیوں کی سلامتی کے خلاف کسی بھی کوشش کے جواب میں تمام ضروری اقدامات کرے گی۔‘

    خطے میں ایران پر امریکہ اور اسرائیل کی جانب سے حملوں کے بعد سے حالات کشیدہ ہیں، اگرچہ اپریل میں جنگ بندی نافذ ہونے کے بعد بڑی حد تک اس قسم کے واقعات میں کمی ہوئی ہے تاہم عراق سے خلیجی ممالک کی جانب ڈرون حملوں کا سلسلہ جاری ہے، جن میں سعودی عرب اور کویت بھی شامل ہیں۔