لائیو, ہم عمان کے ساتھ معاہدے کے قریب ہیں، لیکن اس کا یہ مطلب نہیں کہ آبنائے ہرمز کھل جائے گی: ایرانی وزیرِ خارجہ

لائیو کوریج

1. 12 منٹ قبللامرد پر پھینکے گئے بموں میں فاسفورس استعمال کیا گیا تھا: ایرانی وزیرِ صحت کا دعویٰ

   ایران کی وزارتِ صحت کے تحقیقاتی شعبے کے نائب سربراہ کا کہنا ہے کہ صوبہ فارس کے شہر لامرد پر بمباری کے حوالے سے ایسے شواہد ملے ہیں جن سے ظاہر ہوتا ہے کہ پھینکے گئے بموں میں فاسفورس استعمال کیا گیا تھا۔

   شاہین آخوندزادہ کا کہنا ہے کہ ایرانی وزارتِ صحت نے اس بمباری کے متعلق تحقیقات کی ہیں اور امید ہے کہ ان کے نتائج بین الاقوامی فورمز پر شائع کیے جائیں گے۔

   انھوں نے زور دے کر کہا کہ لامرد پر حملے میں شہری آبادی کو نشانہ بنایا گیا۔

   وزارتِ صحت کے عہدیدار کے مطابق بموں میں فاسفورس شامل ہونے کے باعث ’زخم دائمی نوعیت اختیار کر سکتے ہیں اور انھیں بھرنے میں کئی ہفتے لگ سکتے ہیں۔‘

   ایران کے خلاف امریکہ اور اسرائیل کی جنگ کے پہلے روز، لامرد کے علاقے ایثار میں کئی رہائشی عمارتوں کے علاوہ شہر کے شہید نعیمی سپورٹس ہال کو بھی میزائلوں سے نشانہ بنایا گیا تھا۔ لامرد کے گورنر کے مطابق حملے کے وقت سپورٹس ہال میں طلبہ کا ایک گروپ مشق کر رہا تھا۔

   سرکاری رپورٹس کے مطابق ان حملوں میں 21 افراد ہلاک ہوئے تھے، جن میں بچے اور خواتین بھی شامل تھیں۔

2. 26 منٹ قبلتیل کی برآمدات میں سہولت کے لیے ایران سے مذاکرات جاری ہیں: عراقی وزیرِ تیل

   عراق کے وزیرِ تیل کا کہنا ہے کہ ان کا ملک تیل کی برآمدات کے لیے ایک طریقۂ کار پر تہران کے ساتھ مذاکرات کر رہا ہے۔

   تاہم عراقی وزیر باسم محمد نے اس طریقۂ کار کی تفصیلات بیان نہیں کیں، جن میں مجوزہ راستہ، برآمدات کی ممکنہ مقدار اور اس کا متوقع وقت شامل ہیں۔

   انھوں نے ایک پریس کانفرنس میں بتایا کہ عراق اس وقت یومیہ تقریباً 27 لاکھ بیرل تیل پیدا کر رہا ہے، جس میں سے لگ بھگ نصف برآمد کیا جاتا ہے۔

   عراقی وزیرِ تیل نے مزید کہا کہ اس ماہ عراقی تیل کی برآمدات کی حد یومیہ 15 لاکھ سے 17 لاکھ 50 ہزار بیرل کے درمیان ہے۔

3. 36 منٹ قبلایران نے آبنائے ہرمز میں ابوظہبی نیشنل آئل کمپنی کے ٹینکر پر میزائل حملہ کیا ہے: متحدہ عرب امارات کا دعویٰ

   متحدہ عرب امارات نے سنیچر کے روز دعویٰ کیا ہے کہ ایران نے آبنائے ہرمز سے گزرنے والے ایک اماراتی آئل ٹینکر کو نشانہ بنایا ہے۔

   متحدہ عرب امارات کی وزارتِ خارجہ نے ایک بیان جاری کرتے ہوئے آبنائے ہرمز سے گزرنے والے ابوظہبی نیشنل آئل کمپنی کے ایک ٹینکر پر ایرانی میزائل حملے کی مذمت کی ہے۔

   بیان کے مطابق اس حملے میں کسی کے ہلاک یا زخمی ہونے کی اطلاع نہیں ملی۔

   جمعہ کے روز ابوظہبی نیشنل آئل کمپنی نے کہا تھا کہ جنگ شروع ہونے کے بعد سے آبنائے ہرمز سے گزرتے ہوئے اس کے 15 جہازوں کو میزائل اور ڈرون حملوں کا نشانہ بنایا گیا، جن میں سے تین حملے گذشتہ ایک ہفتے کے دوران ہوئے۔

4. 3 گھنٹے قبلہم عمان کے ساتھ معاہدے کے قریب ہیں، لیکن اس کا یہ مطلب نہیں کہ آبنائے ہرمز کھل جائے گی: ایرانی وزیرِ خارجہ

   ایران کے وزیرِ خارجہ عباس عراقچی نے کہا ہے کہ عمان کے ساتھ مذاکرات حتمی مراحل میں ہیں، لیکن مسقط کے ساتھ طے پانے والی مفاہمت کا یہ مطلب نہیں کہ آبنائے ہرمز کو کھول دیا جائے گا۔

   عباس عراقچی نے صحافیوں کو بتایا: ’آبنائے ہرمز سے گزرنے والے ٹریفک کے راستے کے تعین اور اس کے قانونی طریقہ کار و انتظام کے حوالے سے عمان کے ساتھ مذاکرات جاری ہیں اور ہم معاہدے کے بہت قریب ہیں۔‘

   اُن کا کہنا تھا کہ آبنائے ہرمز کا کھلنا دیگر شرائط سے مشروط ہے، جن میں امریکہ کی جانب سے ’اسلام آباد مفاہمت نامے‘ کی خلاف ورزیوں کے ازالے (ہرجانے کی ادائیگی) کا معاملہ بھی شامل ہے۔

   عراقچی نے کہا کہ آبنائے ہرمز سے ٹریفک کے راستے پر اتفاق رائے کے معاملے میں ’تکنیکی اور قانونی پیچیدگیوں‘ کے باعث، ایران اور عمان فی الحال ایک ایسے عارضی راستے پر اتفاق کرنے کی کوشش کر رہے ہیں جسے بعد میں ’مرکزی راستے کی بنیاد‘ سمجھا جائے گا۔

   اس سے قبل، پاسدارانِ انقلاب نے اعلان کیا تھا کہ آبنائے ہرمز صرف اسی صورت میں کھولی جائے گی جب امریکہ ایران کی تمام شرائط تسلیم کر لے گا۔

5. 5 گھنٹے قبلآبنائے ہرمز اُسی وقت کھلے گی جب امریکہ ایران کی تمام شرائط تسلیم کر لے گا: پاسدارانِ انقلاب

   ایرانی پاسدارانِ انقلاب کا کہنا ہے کہ آبنائے ہرمز اسی وقت کھلے گی جب امریکہ ایران کی تمام شرائط تسلیم کر لے گا۔

   اگرچہ اطلاعات کے مطابق ایران اور عمان آبنائے ہرمز کے معاملے پر کسی مفاہمت کے قریب ہیں اور امریکی حکام اس آبی گزرگاہ کے جلد کھلنے کا کہہ رہے ہیں، تاہم پاسدارانِ انقلاب کے ترجمان حسین محبی نے اس بات پر زور دیا کہ آبنائے ہرمز کا کھلنا مسقط کے ساتھ ہونے والے مذاکرات سے کوئی تعلق نہیں رکھتا۔

   حسین محبی نے نامہ نگاروں کو بتایا: ’ہمارے لیے آبنائے ہرمز محض ایک تجارتی آبی گزرگاہ نہیں بلکہ طاقت اور قوت کا وہ ذریعہ ہے جو جغرافیائی اعتبار سے اسلامی جمہوریہ کے اختیار میں ہے اور دشمن اس آبنائے کو کھلوانے کے لیے ایران کی شرائط تسلیم کرنے پر مجبور ہے۔‘

   اُنھوں نے مذاکرات میں کسی بھی قسم کی مداخلت کے خلاف بھی خبردار کیا اور نشاندہی کی کہ عمان کے ساتھ مذاکرات تکمیل کے مراحل میں ہیں۔

   اس سے قبل امریکی نیوز ویب سائٹ ایگزیوس کے نامہ نگار باراک راویڈ نے ایک ثالث ملک کے سفارت کار کا حوالہ دیتے ہوئے رپورٹ کیا تھا کہ ایرانی مذاکرات کار عمان اور امریکہ کے ساتھ معاہدے کو حتمی شکل دینے کے لیے اپنے ملک کی ’سپریم نیشنل سکیورٹی کونسل‘ کی منظوری کے منتظر ہیں۔

6. 5 گھنٹے قبلمسلم لیگ ن پاکستان کے زیرِ انتظام کشمیر میں دو تہائی اکثریت سے حکومت بنائے گی: رانا ثنا اللہ کا دعویٰ

   وزیرِ اعظم پاکستان کے مشیر رانا ثنا اللہ نے دعویٰ کیا ہے کہ مسلم لیگ ن پاکستان کے زیرِِ انتظام کشمیر میں دو تہائی اکثریت سے حکومت بنائے گی۔

   سنیچر کو باغ میں انتخابی ریلی سے خطاب کرتے ہوئے رانا ثنا اللہ کا کہنا تھا کہ پاکستان کے زیرِِ انتظام کشمیر میں دو تہائی اکثریت کے لیے مسلم لیگ ن صرف چھ نشستیں دُور ہے۔

   رانا ثنا اللہ کا کہنا تھا کہ کشمیر میں حکومت بنانے کے بعد عوامی ایکشن کمیٹی کے ساتھ بات چیت کی جائے گی۔ اُن کا کہنا تھا کہ ’ایکشن کمیٹی میں 99 فیصد لوگ نہ صرف محب وطن کشمیری بلکہ محب وطن پاکستانی بھی ہیں۔‘

   رانا ثنا اللہ کا مزید کہنا تھا کہ اگر ایک آدھ فیصد لوگ جن کا ایجنڈا کچھ اور ہے، ہم سب مل کر انھیں شکست دیں گے۔

   رانا ثنا اللہ نے بلاول بھٹو کا نام لیے بغیر کہا کہ جو اُلٹی گنتی گننا چاہتے ہیں، ان کی گنتی بھی سیدھی ہو جائے گی اور وہ خود بھی سیدھے ہو جائیں گے۔

   خیال رہے کہ پاکستان کے زیرِ انتظام کشمیر کے انتخابات کے تیسرے مرحلے میں 10 اگست کو پونچھ ڈویژن کے صرف چار حلقوں میں پولنگ ہو گی۔

   پاکستان کے زیر انتظام کشمیر کے چیف الیکشن کمشنر نے جمعے کو بی بی سی کو بتایا تھا کہ راولاکوٹ اور پلندری کے سات حلقوں میں انتخابات ملتوی کر دیے گئے ہیں، جبکہ چار حلقوں میں پولنگ اپنے شیڈول کے مطابق 10 اگست کو منعقد ہو گی۔

   چیف الیکشن کمشنر کے مطابق ملتوی کیے جانے والے حلقوں سے متعلق حتمی فیصلہ مختلف درخواستوں اور زمینی صورتحال کا جائزہ لینے کے بعد کیا گیا۔

   واضح رہے کہ ضلع باغ کے تین اور ضلع حویلی کے ایک حلقے میں انتخابی مقابلہ خاص اہمیت اختیار کر گیا ہے، جہاں ایک موجودہ وزیراعظم اور دو سابق وزرائے اعظم میدان میں ہیں۔

7. 8 گھنٹے قبلیوکرین: دارالحکومت کیئو کے قریب روسی حملوں میں کم از کم تین افراد ہلاک

   یوکرین کے دارالحکومت کیئو کے قریب رات بھر ہونے والے روسی حملوں میں ایک بچے سمیت کم از کم تین افراد ہلاک ہو گئے ہیں، یہ بات ایک مقامی عہدیدار نے بتائی۔

   سنیچر کی صبح سویرے دارالحکومت کے مشرق میں میزائل گرے، اور عینی شاہدین نے طاقتور دھماکوں کی آوازیں سننے کی اطلاع دی۔ یہ حملے ایسے وقت میں ہوئے ہیں جب چند روز قبل پورے یوکرین میں ہونے والے حملوں میں 21 افراد ہلاک ہوئے تھے۔

   علاقائی فوجی انتظامیہ کے سربراہ تیمور تکاچینکو نے کہا کہ بیلسٹک میزائل حملوں میں تین افراد ہلاک اور مزید تین زخمی ہوئے۔ انہوں نے مزید بتایا کہ گرنے والے ملبے سے رہائشی عمارتوں اور گاڑیوں کو نقصان پہنچا، جبکہ ایک الگ عمارت میں آگ بھی لگ گئی۔

   کیئو کے میئر ویتالی کلچکو نے ٹیلیگرام پر لکھا کہ ہنگامی امدادی ٹیمیں شہر میں ایک عمارت اور ایندھن کے ٹینک میں لگی آگ بجھانے میں مصروف ہیں۔

   یوکرین کی سرکاری ہنگامی سروس ڈی ایس این ایس نے تصاویر جاری کیں جن میں کیئو میں گیراج، ایک کاروباری مقام اور ایک عمارت کو آگ کی لپیٹ میں دیکھا جا سکتا ہے۔ سروس نے کہا ’متاثرین کی تعداد کا تعین کیا جا رہا ہے۔‘

   صدر وولودیمیر زیلنسکی اپنے پہلے دورے پر سربیا کے دارالحکومت بلغراد پہنچ گئے ہیں۔ وہ سربیا کے صدر الیگزینڈر ووچیچ سے ملاقات کریں گے، جس میں اقتصادی تعلقات، سکیورٹی کے مسائل اور یورپی یونین کے ساتھ تعلقات پر بات ہوگی۔

   سربیا یورپی یونین میں شامل ہونے کی کوشش کر رہا ہے اور اس نے یوکرین کو امداد فراہم کی ہے، جبکہ جنگ کے بعد ملک کی تعمیرِ نو میں مدد کرنے کا وعدہ بھی کیا ہے۔

   ہفتے کے آغاز میں زیلنسکی نے کہا تھا کہ شراکت دار ممالک کی جانب سے اینٹی بیلسٹک نظاموں کی فراہمی میں تاخیر ’خوفناک جانی نقصان اور تباہی‘ کا سبب بن رہی ہے۔ ان کا کہنا تھا کہ زیادہ مضبوط دفاعی صلاحیت حالیہ مہلک حملوں میں ’جانیں بچا سکتی تھی‘۔

   بعد میں صدر نے کہا کہ اتحادی ممالک کی جانب سے دفاعی میزائلوں کی فراہمی میں اس سال ’نمایاں کمی‘ آئی ہے۔

   یہ بیان اس وقت سامنے آیا جب یوکرین نے روس کے اندر دو آئل ریفائنریوں اور بحیرہ اسود میں ماسکو سے منسلک جہازوں کو نشانہ بنایا۔ زیلنسکی کے مطابق اس کا مقصد تیل سے حاصل ہونے والی ان آمدنیوں کو محدود کرنا تھا جنہیں روس یوکرین میں جنگ کی ’مالی معاونت‘ کے لیے استعمال کرتا ہے۔

   حالیہ ثالثی مذاکرات میں پیش رفت نہ ہونے کے باعث دونوں فریقوں کے درمیان حملوں میں مزید شدت آ گئی ہے۔

8. 9 گھنٹے قبلپاکستان میں ہفتہ وار مہنگائی میں 9.29 فیصد اضافہ، ملک میں خوردنی تیل، گھی، دودھ کی بڑی تعداد معیار سے کم پائی گئی: حکام, تنویر ملک، صحافی

   پاکستان میں ہفتہ وار بنیادوں پر مہنگائی کی شرح میں 9.29 فیصد کا اضافہ ریکارڈ کیا گیا ہے، جس کی بڑی وجہ خوردنی تیل، گھی اور گندم کے آٹے کی قیمتوں میں اضافہ ہے جبکہ گزشتہ ہفتے پٹرولیم مصنوعات کی قیمتوں میں مسلسل اضافے کے باعث نقل و حمل کے اخراجات میں بھی اضافہ ہوا۔

   پاکستان بیورو آف شماریات (پی بی ایس) کے مطابق حساس قیمتوں کے اشاریے (ایس پی آئی) سے پیمائش کی جانے والی ہفتہ وار مہنگائی میں گزشتہ سال کے اسی ہفتے کے مقابلے میں 9.29 فیصد اضافہ ہوا۔

   ہفتہ وار بنیادوں پر بھی قیمتوں کے اشاریے میں 0.28 فیصد اضافہ ریکارڈ کیا گیا۔

   دریں اثنا وزارتِ سائنس و ٹیکنالوجی نے نیشنل پرائس مانیٹرنگ کمیٹی کے اجلاس میں پیک شدہ خوردنی تیل، گھی اور دودھ کی مصنوعات کے معیار سے متعلق رپورٹ پیش کی ہے۔

   وزارت منصوبہ بندی کے اعلامیے میں کہا گیا ہے کہ رپورٹ کے مطابق پاکستان کونسل آف سائنٹیفک اینڈ انڈسٹریل ریسرچ (پی سی ایس آئی آر) نے پیک شدہ خوردنی تیل، گھی اور دودھ کی مصنوعات کے مجموعی طور پر 491 نمونے جمع کرکے ان کا تجزیہ کیا۔

   پاکستان سٹینڈرڈز اینڈ کوالٹی کنٹرول اتھارٹی (پی ایس کیو سی اے) کو موصول ہونے والی مجموعی رپورٹ کے مطابق 315 نمونے مقررہ قومی معیار پر پورے اترے، جبکہ 176 نمونے مطلوبہ معیار پر پورے نہیں اتر سکے۔

   رپورٹ کے مطابق تقریباً 36 فیصد نمونے مقررہ معیار کے مطابق نہیں تھے۔

   اعداد و شمار کے مطابق بناسپتی گھی کے 204 نمونوں میں سے 98 معیار پر پورے نہیں اترے۔ اسی طرح بلینڈڈ کوکنگ آئل کے 146 میں سے 40، پیک شدہ مائع دودھ کے 104 میں سے 26 اور ملک پاؤڈر کے 18 میں سے آٹھ نمونے مطلوبہ معیار کے مطابق نہیں تھے۔

   ریفائنڈ پام آئل کے چار نمونوں میں سے تین جبکہ ریفائنڈ کینولا آئل کے 13 میں سے ایک نمونہ بھی مقررہ معیار پر پورا نہیں اترا۔

   کھلے خوردنی تیل، گھی اور دودھ کا ملک گیر سروے

   منصوبہ بندی و ترقی کے وفاقی وزیر احسن اقبال نے نوجوان پاکستانیوں میں دل کے امراض اور دیگر غیر متعدی بیماریوں کے بڑھتے ہوئے واقعات کے پیش نظر ملک بھر میں کھلے خوردنی تیل، گھی اور دودھ کے معیار کا سروے کرنے کی ہدایت کی ہے۔

   اس سروے کا مقصد کھلے عام فروخت ہونے والی ان اشیائے خورونوش کے معیار کا جائزہ لینا اور یہ معلوم کرنا ہے کہ آیا وہ مقررہ معیار پر پورا اترتی ہیں یا نہیں۔

9. 8 اگست 2026ہنگو میں سکیورٹی آپریشن کے دوران پاکستانی فوج کے ایک کیپٹن اور سات شدت پسند ہلاک: آئی ایس پی آر

   پاکستانی فوج کے شعبۂ تعلقاتِ عامہ (آئی ایس پی آر) کا کہنا ہے کہ ضلع ہنگو میں انٹیلیجنس کی بنیاد پر کیے گئے ایک آپریشن میں سات مبینہ شدت پسند ہلاک کر دیے گئے ہیں جبکہ اس کارروائی کے دوران 27 سالہ کیپٹن حمزہ اکرم ہلاک ہو گئے۔

   آئی ایس پی آر کے مطابق سات اگست 2026 کو سکیورٹی فورسز نے ہنگو میں شدت پسندوں کی موجودگی کی اطلاع پر کارروائی کی۔

   فوج کے بیان کے مطابق ’سکیورٹی آپریشن کے دوران سکیورٹی فورسز نے شدت پسندوں کے ٹھکانے کو نشانہ بنایا جس کے بعد مبینہ شدت پسند ایک مسجد میں چلے گئے۔‘

   بیان کے مطابق ’بعد میں ہونے والے فائرنگ کے تبادلے میں سات شدت پسند ہلاک ہوئے۔‘

   آئی ایس پی آر نے کہا ہے کہ اس کارروائی کے دوران 27 سالہ کیپٹن حمزہ اکرم بھی ہلاک ہو گئے۔

   فوج کے مطابق کیپٹن حمزہ اکرم ضلع نارووال کے رہائشی تھے اور آپریشن کے دوران اپنے دستے کی قیادت کر رہے تھے۔

   بیان میں کہا گیا ہے کہ ہلاک افراد کے قبضے سے اسلحہ اور گولہ بارود بھی برآمد کیا گیا۔ فوج کے مطابق یہ افراد سکیورٹی فورسز، قانون نافذ کرنے والے اداروں اور شہریوں کے خلاف مختلف کارروائیوں میں ملوث تھے۔

   آئی ایس پی آر کا مزید کہنا ہے کہ علاقے میں کلیئرنس آپریشن جاری ہے تاکہ وہاں موجود دیگر مبینہ شدت پسندوں کا سراغ لگایا جا سکے۔

10. 8 اگست 2026یمن کے صوبے مارب میں حوثی حملے، کم از کم 10 افراد ہلاک

    یمن کے تیل سے مالا مال صوبے مارب میں حوثی باغیوں کے حملوں میں اضافے کے بعد کم از کم 10 افراد ہلاک ہو گئے ہیں۔

    بی بی سی فارسی کے مطابق ایک یمنی فوجی زرائع نے خبر رساں ادارے اے ایف پی کو بتایا کہ حوثیوں کے تازہ حملوں میں سرکاری فورسز کے آٹھ اہلکار ہلاک اور 12 زخمی ہوئے۔

    سعودی حمایت یافتہ یمنی حکومت کے وزیر صحت کے مطابق مارب شہر میں رہائشی علاقوں اور پناہ گزینوں کے کیمپوں پر گولہ باری کے نتیجے میں دو شہری ہلاک اور 14 زخمی ہوئے ہیں۔

    حوثی باغیوں کا کہنا ہے کہ انھوں نے صوبہ مارب میں سرکاری فوج کے ایک کیمپ کو نشانہ بنایا ہے۔

    یہ حملے اس واقعے کے ایک روز بعد ہوئے ہیں جب مارب میں حوثیوں کے میزائل حملوں میں سرکاری فورسز کے کم از کم 58 اہلکار ہلاک ہوئے تھے۔

    ایران کے حمایت یافتہ حوثیوں اور سعودی حمایت یافتہ یمنی حکومت کے درمیان 2022 میں ہونے والی جنگ بندی گزشتہ ماہ ختم ہو گئی تھی۔

    یمن کے لیے اقوام متحدہ کے خصوصی ایلچی ہانس گرنڈ برگ نے خبردار کیا ہے کہ ملک کو اپریل 2022 میں جنگ بندی کے بعد کے کسی بھی وقت کے مقابلے میں اب دوبارہ بڑے پیمانے پر جنگ شروع ہونے کا زیادہ خطرہ ہے۔

11. 8 اگست 2026جنوبی لبنان میں اسرائیلی حملوں میں کمی: اقوام متحدہ

    اقوام متحدہ کا کہنا ہے کہ دو روز تک اسرائیلی حملوں میں اضافے کے بعد جمعے کو جنوبی لبنان میں فوجی سرگرمیاں کم ہو گئی ہیں۔

    اقوام متحدہ کے نائب ترجمان فرحان حق نے اپنے بیان میں کہا کہ لبنان میں اقوام متحدہ کی امن فوج (یونیفل) نے اس سے قبل جمعرات کو اسرائیلی فوج کی جانب سے داغے گئے 129 میزائل ریکارڈ کیے جو جون کے آخر کے بعد ایک دن میں سب سے زیادہ تعداد ہے۔

    ان کے مطابق زیادہ تر حملے المنصوری کے علاقے میں ہوئے تھے اور یہ حملے ایسے وقت میں ہوئے جب اس ہفتے ایک واقعے میں دو اسرائیلی فوجی ہلاک اور کئی زخمی ہوئے تھے۔

    یونیفل نے کہا کہ رات کے وقت مزید فائرنگ ریکارڈ کی گئی، تاہم دن میں کئی گھنٹوں تک کوئی حملہ نہیں دیکھا گیا۔ فرحان حق نے اسے ’فوجی سرگرمیوں میں نمایاں کمی‘ قرار دیا۔

    یونیفل نے اسرائیل پر لبنانی فضائی حدود کی خلاف ورزیوں کا الزام بھی عائد کیا۔

12. 8 اگست 2026امریکہ نے دبئی میں قائم کرپٹو کرنسی ایکسچینج شیلبِٹ پر بھی پابندیاں عائد کر دیں

    امریکی محکمہ خزانہ نے دبئی میں قائم کرپٹو کرنسی پلیٹ فارم شیلبِٹ سمیت کئی کمپنیوں پر پابندیاں عائد کر دی ہیں۔

    امریکی محکمہ خزانہ کے مطابق شیلبِٹ نے ایرانی حکومت سے منسلک اداروں کے لیے کرپٹو کرنسی کی صورت میں لاکھوں ڈالر منتقل کیے۔

    تاہم شیلبِٹ نے ان تمام الزامات کی تردید کی ہے اور کہا ہے کہ اس نے جنوری 2026 میں اپنی سرگرمیاں بند کر دی تھیں۔

    یہ اقدام 31 جولائی کو شائع ہونے والی روئٹرز کی ایک تحقیق کے بعد سامنے آیا ہے۔ اس تحقیق میں دبئی میں قائم ایکسچینج شیلبِٹ کو ایک ایسے نیٹ ورک کا اہم حصہ قرار دیا گیا تھا جس کے ذریعے مبینہ طور پر ایران پر عائد پابندیوں سے بچنے کے لیے چار ارب ڈالر منتقل کیے گئے۔

    روئٹرز کے مطابق شیلبِٹ نے ایران کے مرکزی بینک کے لیے کرپٹو کرنسی منتقل کی۔

    تحقیق میں یہ بھی کہا گیا کہ اس کا تعلق ایک بڑے غیر قانونی آن لائن جوئے کے نیٹ ورک سے تھا اور اس نے ایسے کرپٹو کوائن استعمال کیے جنھیں اسرائیلی حکومت پاسداران انقلاب سے منسلک سمجھتی ہے۔

    امریکہ اس سے پہلے دو جون کو ایران کے سب سے بڑے کرپٹو کرنسی ایکسچینج نوبی ٹیکس پر بھی پابندیاں عائد کر چکا ہے۔

    دوسری جانب شیلبِٹ نے ان الزامات کو مسترد کرتے ہوئے کہا ہے کہ اس نے جان بوجھ کر منی لانڈرنگ، دہشت گردی کی مالی معاونت، غیر قانونی جوا، پابندیوں سے بچنے کی کوششوں یا کسی پابندی زدہ ادارے، فوجی تنظیم یا سرکاری ادارے کی جانب سے کام نہیں کیا۔

    کمپنی کا یہ بھی دعویٰ ہے کہ اس نے جنوری 2026 میں اپنی سرگرمیاں بند کر دی تھیں۔

13. 8 اگست 2026’جنگ کے بجائے مذاکرات سے حقوق حاصل کرنا چاہتے ہیں: ایرانی صدر مسعود پزشکیان

    ایرانی صدر مسعود پزشکیان نے اپنے ایک خطاب میں واضح کیا ہے کہ ایران اپنے مؤقف سے پیچھے نہیں ہٹے گا، تاہم جنگ کے بجائے بات چیت سے بھی اپنے حقوق حاصل کر سکتے ہیں۔

    بی بی سی فارسی کے مطابق اپنی حلف برداری کے دو سال مکمل ہونے پر ایرانی صدر مسعود پزشکیان نے امریکہ کے ساتھ جاری مذاکرات کا دفاع کرتے ہوئے کہا کہ ’جب ہم بات چیت سے اپنے حقوق حاصل کر سکتے ہیں تو ہم کیوں لڑیں؟‘

    انھوں نے کہا کہ ایران اپنے مؤقف سے پیچھے نہیں ہٹے گا تاہم ان کے بقول اسرائیل چاہتا ہے کہ جنگ کا سلسلہ جاری رہے تاکہ ایران پر دباؤ ڈال کر اسے ہتھیار ڈالنے پر مجبور کیا جا سکے۔

    مسعود پزشکیان نے کہا کہ مذاکرات کے ذریعے ایران لبنان میں جنگ روکنے، ناکہ بندی ختم کروانے اور بعض پابندیوں میں نرمی کروانے میں کامیاب رہا ہے۔

    اپنی تقریر کے ایک اور حصے میں انھوں نے کہا کہ پارلیمنٹ کے سپیکر محمد باقر قالیباف سے ایران کی مذاکراتی ٹیم میں شامل ہونے کی درخواست کی گئی تھی جسے انھوں نے قبول کر لیا تھا۔

    صدر پزشکیان کے مطابق عدلیہ، پارلیمنٹ، مسلح افواج اور دیگر اداروں کے نمائندے بھی اس ٹیم کا حصہ ہیں تاکہ یہ دکھایا جا سکے کہ ’ہم سب اس معاملے میں ایک ساتھ ہیں۔

14. 8 اگست 2026اہم خبروں کا خلاصہ

    بی بی سی اردو کے لائیو پیج پر خبروں کا سلسلہ آگے بڑھانے سے قبل ایک نظر گزشتہ روز کی اہم خبروں پر ذال لیتے ہیں۔

    • پاکستان، سعودی عرب اور ترکی نے ’مکہ مشترکہ دفاعی معاہدے‘ پر دستخط کر دیے ہیں، جس کے تحت ان تینوں ممالک میں سے ’کسی ایک ملک پر مسلح حملہ، سب پر حملہ تصور کیا جائے گا۔‘
    • جمعے کے روز عالمی منڈیوں میں تیل کی قیمتوں میں دوبارہ اضافہ دیکھا جا رہا ہے جس کی وجہ آبنائے ہرمز میں آمدورفت کی صورتحال کے حوالے سے بڑھتے ہوئے خدشات ہیں۔
    • پاکستان کے زیر انتظام کشمیر کے چیف الیکشن کمشنر نے بی بی سی سے گفتگو میں تصدیق کی ہے کہ راولاکوٹ اور پلندری کے سات حلقوں میں انتخابات ملتوی کر دیے گئے ہیں، جبکہ چار حلقوں میں پولنگ اپنے شیڈول کے مطابق 10 اگست کو منعقد ہو گی۔
    • پاکستان، سعودی عرب اور ترکی کے مشترکہ دفاعی معاہدے پر ردعمل دیتے ہوئے ایرانی قومی سلامتی اور خارجہ پالیسی کمیٹی کے رکن ابراہیم رضائی نے کہا ہے: ’سعودیوں کو یہ جان لینا چاہیے کہ ترکی اور پاکستان کے ساتھ کاغذی معاہدے ان کے لیے سلامتی کی ضمانت نہیں بن سکتے، جس طرح برسوں تک امریکہ کا یکطرفہ ساتھ دینے سے بھی انھیں سلامتی حاصل نہیں ہوئی۔‘
    • بینکاک کے ڈیبسرین سکول میں پیش آنے والے فائرنگ کے نتیجے میں پانچ اساتذہ ہلاک ہو گئے ہیں۔ تھائی لینڈ کے وزیرِ صحت کے مطابق مبینہ حملہ آور نے سکول جانے سے پہلے اپنے دادا دادی کو بھی مبینہ طور پر قتل کر دیا تھا۔
    • امریکی صدر ڈونلڈ ٹرمپ نے امریکہ میں پیدائش کی بنیاد پر ملنے والی شہریت کو محدود کرنے کی ایک اور کوشش کی ہے۔ یہ اقدام ایسے وقت میں سامنے آیا ہے جب چند ہفتے قبل سپریم کورٹ نے ان کی سابقہ کوشش کو مسترد کر دیا تھا، جس کا مقصد اس حق کو ختم کرنا تھا۔

15. 8 اگست 2026ایران کے ’رہبر بینکاری نظام‘ کی مدد کا الزام، امریکہ کا کئی مالیاتی نیٹ ورکس کے خلاف کارروائی کا اعلان

    امریکی محکمۂ خزانہ کے دفتر برائے غیر ملکی اثاثہ جات کنٹرول (او ایف اے سی) نے کئی ممالک میں سرگرم ایسے نیٹ ورکس کے خلاف کارروائی کا اعلان کیا ہے جن پر ایران کے مبینہ ’رہبر بینکاری نظام‘ کے ذریعے کروڑوں ڈالر منتقل کرنے میں مدد دینے کا الزام ہے۔

    امریکی محکمۂ خزانہ کی پریس ریلیز کے مطابق ایران پر زیادہ سے زیادہ دباؤ ڈالنے کے لیے کی گئی اس کارروائی کا مقصد ایران کی مالیاتی اور تیل کے شعبے سے منسلک نیٹ ورکس کو نشانہ بنانا ہے۔

    امریکی وزیرِ خزانہ سکاٹ بیسنٹ نے ایک بیان میں کہا کہ ایران کا شیڈو بینکنگ سسٹم شدید دباؤ کا شکار ہے اور حکومت کے پاس رقوم کی منتقلی کے ذرائع محدود ہوتے جا رہے ہیں۔

    بیان میں کہا گیا ہے کہ ایران کے شہر بینک اور اس سے منسلک ادارے بیرونِ ملک تیل کی فروخت سے حاصل ہونے والی آمدنی ایران منتقل کرنے میں اہم کردار ادا کرتے رہے ہیں۔ امریکی حکام کے مطابق اس نیٹ ورک سے قومی ایرانی آئل کمپنی، نفتیران انٹرٹریڈ، ٹرائلیئنس پیٹروکیمیکل اور دیگر ایرانی ادارے مستفید ہوتے رہے ہیں۔

    امریکہ نے دبئی میں قائم ٹائٹن ایکسچینج اور ایلپس انٹرنیشنل سمیت متعدد کمپنیوں کو پابندیوں کی فہرست میں شامل کیا ہے۔ واشنگٹن کا الزام ہے کہ یہ ادارے ایرانی مالیاتی نیٹ ورکس کے لیے رقوم کی منتقلی اور لین دین میں مدد فراہم کرتے تھے۔

    بیان کے مطابق ہانگ کانگ، سنگاپور اور متحدہ عرب امارات میں رجسٹرڈ کئی کمپنیوں اور متعدد ایرانی شہریوں کو بھی پابندیوں کا نشانہ بنایا گیا ہے۔

    امریکی محکمۂ خزانہ نے ایک عراقی شہری، بشیر عبدالقاظم علوان الشبانی، پر بھی پابندیاں عائد کی ہیں۔ امریکہ کا الزام ہے کہ وہ ایرانی پاسدارانِ انقلاب کی قدس فورس کے لیے مالی اور تکنیکی معاونت فراہم کرتے رہے ہیں۔

    پابندیوں کے نتیجے میں نامزد افراد اور اداروں کے امریکہ میں موجود تمام اثاثے منجمد ہو جائیں گے اور امریکی شہریوں اور کمپنیوں کو ان کے ساتھ مالی لین دین سے روک دیا جائے گا۔ امریکی حکام نے خبردار کیا ہے کہ ان اداروں کے ساتھ کاروبار کرنے والے غیر ملکی مالیاتی ادارے بھی ثانوی پابندیوں کی زد میں آ سکتے ہیں۔

16. 7 اگست 2026ایران نے دنیا کی سب سے مہنگی فوج کے مقابلے میں اپنی صلاحیت کا مظاہرہ کیا: عباس عراقچی

    ایرانی وزیر خارجہ عباس عراقچی کا کہنا ہے کہ ان کے ملک کی ’طاقتور فوج نے دنیا کی سب سے مہنگی فوجی طاقت کے مقابلے میں اپنی تیاری، صلاحیت اور قوت کا مظاہرہ کیا ہے۔‘

    سوشل میڈیا پلیٹ فارم ایکس پر پوسٹ میں انھوں نے لکھا: ’جب مسلمان متحد ہو جائیں تو وہ بیرونی عناصر کی جانب سے پیدا کیے گئے ہر چیلنج کا ڈٹ کر مقابلہ کر سکتے ہیں۔‘

    عباس عراقچی کا کہنا تھا کہ ’اب وقت آ گیا ہے کہ ہم صرف اپنی قوت پر بھروسہ کریں اور حقیقی بھائی چارے کو فروغ دیں۔‘

17. 7 اگست 2026یمن میں سعودی حمایت یافتہ فورسز کے اڈے کو نشانہ بنایا: حوثیوں کا دعویٰ

    یمن کے حوثیوں نے جمعے کے روز صوبہ مأرب میں ایک فوجی اڈے پر حملہ کرنے کا دعویٰ کیا ہے۔ یہ علاقہ یمن کی سعودی حمایت یافتہ حکومت کے کنٹرول میں ہے۔

    خبر رساں ادارے اے ایف پی کے مطابق ایک یمنی فوجی ذریعے نے بھی اس صوبے میں آٹھ فوجیوں کی ہلاکت کی اطلاع دی ہے۔

    حوثی ترجمان یحییٰ سریع نے ایک بیان میں اس فوجی اڈے کا حوالہ دیتے ہوئے کہا کہ سعودی عرب ’اپنی حمایت یافتہ فورسز کو متحرک اور مشتعل کرتا رہا، جس کے نتیجے میں صحن الجن کے فوجی اڈے پر موجود اہلکاروں، اسلحہ خانے، گاڑیوں اور فوجی ساز و سامان کو متعدد میزائلوں اور ڈرونز سے نشانہ بنایا گیا۔‘

    حالیہ دنوں میں حوثیوں اور سعودی عرب کے درمیان کشیدگی میں اضافہ دیکھا گیا ہے۔

    ایران کے حمایت یافتہ حوثی یمن کے شمالی علاقوں کے بڑے حصے پر کنٹرول رکھتے ہیں اور وہ سعودی قیادت میں قائم اتحاد کی حمایت یافتہ یمنی حکومتی فورسز کے خلاف برسوں سے برسرِ پیکار ہیں۔

18. 7 اگست 2026عراق کی سر زمین کسی دوسرے ملک کے خلاف استعمال نہیں ہونے دیں گے: وزیر اعظم علی الزیدی

    عراق کے وزیر اعظم علی الزیدی نے کہا ہے کہ وہ اپنے ملک کی سر زمین کسی دوسرے ملک کے خلاف استعمال نہیں ہونے دیں گے۔

    وزیرِ اعظم کے دفتر سے جاری بیان کے مطابق علی الزیدی نے یہ بات سعودی عرب کے محکمۂ انٹیلی جنس کے سربراہ خالد بن علی الحمیدان سے کہی، جنھوں نے جمعے کو ایک وفد کے ہمراہ بغداد میں ان سے ملاقات کی۔

    دفتر کی جانب سے جاری بیان کے مطابق وزیرِ اعظم الزیدی نے کہا کہ عراقی حکومت سعودی عرب کے ساتھ تعلقات کو مزید مضبوط بنانے کی خواہاں ہے تاکہ دونوں ممالک اور عوام کے مشترکہ مفادات کا تحفظ کیا جا سکے اور خطے میں امن و استحکام کے فروغ میں مدد ملے۔

    انھوں نے بغداد کے اس عزم کا بھی اعادہ کیا کہ عراق اپنی خود مختاری کا تحفظ کرے گا اور خطے میں کشیدگی بڑھنے سے روکنے کی کوشش جاری رکھے گا۔

    بی بی سی فارسی کے مطابق یہ ملاقات ایک ایسے وقت میں ہوئی ہے جب ایک روز قبل ایک سینیئر سعودی عہدے دار نے کہا تھا کہ سعودی عرب کو شمال میں عراقی مسلح گروہوں اور جنوب میں یمن کے حوثیوں کی جانب سے مربوط حملوں کا خدشہ ہے۔

19. 7 اگست 2026سعودی عرب کے علاقے نجران پر حوثیوں کے حملے کی مذمت کرتے ہیں: قطر

    قطر کی وزارت خارجہ کی جانب سے جاری ایک بیان میں کہا گیا ہے کہ ’ریاست قطر سعودی عرب کے علاقے نجران پر حوثیوں کے حملوں کی مذمت کرتی ہے۔‘

    بیان کے مطابق ان حملوں میں ’متعدد شہری زخمی ہوئے۔‘

    قطر نے ان حملوں کو خود مختاری اور بین الاقوامی قانون کی سنگین خلاف ورزی قرار دیتے ہوئے کہا ہے کہ یہ ایک خطرناک کشیدگی ہے جو خطے کے امن و استحکام کے لیے خطرہ بن سکتی ہے۔

    قطر کی وزارتِ خارجہ نے اپنے بیان میں شہریوں، سویلین انفراسٹرکچر اور اہم تنصیبات کو نشانہ بنانے کی مذمت کی ہے۔

    بیان میں سعودی عرب کی جانب سے اپنی سلامتی اور استحکام برقرار رکھنے کے لیے اٹھائے جانے والے تمام اقدامات کی حمایت کا اعلان کیا گیا ہے۔

20. 7 اگست 2026پاکستانی وزیر اعظم، سعودی ولی عہد اور ترک صدر نے مکہ میں نمازِ جمعہ ادا کی: تصاویر

    وزیر اعظم پاکستان کے دفتر کی جانب سے جاری بیان کے مطابق شہباز شریف، سعودی ولی عہد محمد بن سلمان اور ترک صدر رجب طیب اردوغان نے مکہ میں نمازِ جمعہ ادا کی۔

    اس موقع پر پاکستان کے نائب وزیرِ اعظم و وزیرِ خارجہ سینیٹر اسحاق ڈار، آرمی چیف اور چیف آف ڈیفینس فورسز فیلڈ مارشل عاصم منیر، اعلی سعودی و ترک حکام بھی موجود تھے۔

    پاکستان، سعودی عرب اور ترکی کے سربراہان نے آج ’مکہ مشترکہ دفاعی معاہدے‘ پر دستخط کیے ہیں، جس کے تحت ان تینوں ممالک میں سے ’کسی ایک ملک پر مسلح حملہ، سب پر حملہ تصور کیا جائے گا۔‘