غزہ میں سمندر کنارے واقع کیفے پر اسرائیلی حملے میں 20 فلسطینی ہلاک: ریسکیو کارکنان، عینی شاہدین

لائیو کوریج

1. 29 جون 2025انڈیا نے میر علی خود کش حملے میں ملوث ہونے کا الزام مسترد کر دیا

   انڈیا کی وزارت خارجہ نے پاکستانی فوج کی جانب سے انڈیا کے جنوبی وزیرستان میں ہونے والے خودکش حملے میں ملوث کے الزام کے جواب میں کہا ہے کہ ’ہم نے پاکستانی فوج کا سرکاری بیان دیکھا ہے، جس میں 28 جون کو وزیرستان میں ہونے والے حملے کا ذمہ دار انڈیا کو ٹھہرایا گیا ہے۔‘

   انڈیا کی وزارت خارجہ نے اپنے بیان میں کہا ہے کہ ’ہم اسے مکمل طور پر مسترد کرتے ہیں۔‘

   پاکستان فوج کے شعبہ تعلقات عامہ (آئی ایس پی آر) کے مطابق، سنیچر کے روز صوبہ خیبرپختونخوا میں شمالی وزیرستان کے علاقے میر علی میں شدت پسندوں کے حملے میں سکیورٹی فورسز کے 13 اہلکار ہلاک ہو گئے جبکہ کلیئرنس آپریشن کے دوران فائرنگ کے تبادلے میں 14 شدت پسند مارے گئے۔

   حملے کے بعد آئی ایس پی آر نے دعویٰ کیا تھا کہ یہ حملہ انڈیا کے سپانسرڈ شدت پسندوں نے کیا ہے۔

2. 29 جون 2025میر علی خودکش حملے میں 13 اہلکار ہلاک، کلیئرنس آپریشن میں 14 شدت پسند بھی مارے گئے: آئی ایس پی آر

   

   ،تصویر کا ذریعہGetty Images

   پاکسان کے صوبہ خیبرپختونخوا میں شمالی وزیرستان کے علاقے میر علی میں شدت پسندوں کے حملے میں سکیورٹی فورسز کے 13 اہلکار ہلاک ہو گئے ہیں۔

   پاکستان کی فوج کے شعبہ تعلقات عامہ (آئی ایس پی آر) کے مطابق، میر علی میں سکیورٹی فورسز کے قافلے پر خود کش حملے کی کوشش کی گئی اور حملہ آور نے بارود سے بھری گاڑی سے فورسز کے قافلے کو نشانہ بنانے کی کوشش کی۔

   آئی ایس پی آر کے مطابق، قافلے کے آگے موجود دستے نے بروقت کارروائی کرتے ہوئے اس منصوبے کو ناکام بنایا تاہم بارود سے لیس گاڑی کے سکیورٹی فورسز کی ایک گاڑی سے ٹکرانے کے نتیجے میں 13 اہلکار ہلاک ہو گئے۔

   آئی ایس پی آر کے مطابق اس واقعے میں تین عام شہری بھی زخمی ہوئے ہیں جن میں دو بچے اور ایک خاتون شامل ہیں۔

   آئی ایس پی آر کا دعویٰ ہے کہ یہ حملہ انڈیا کے سپانسرڈ دہشتگردوں نے کیا۔

   آئی ایس پی آر کے مطابق سکیورٹی فورسز نے واقعے کے بعد علاقے میں کلیئرنس آپریشن کے دوران دہشتگردوں کا پیچھا کیا اور فائرنگ کے تبادلے میں 14 شدت پسند ہلاک ہو گئے۔

3. 29 جون 2025گذشتہ روز کی اہم خبریں

   • بلوچستان کے ضلع ژوب میں سیلابی ریلے میں بہہ جانے سے ایک ہی خاندان کے چار افراد ہلاک ہوگئے جن میں دو خواتین اور دو بچیاں شامل ہیں۔
   • نیشنل ایمرجنسی آپریشن سینٹر کے مطابق سندھ کے جنوبی علاقوں سجاول، ٹھٹہ، بدین، کراچی، حیدرآباد، میرپور خاص اور پنجاب میں راولپنڈی، اسلام آباد، گوجرانوالہ، گجرات، سیالکوٹ اور لاہور کے نشیبی علاقوں میں اربن فلڈنگ کا خطرہ ہے۔
   • جمعے کے روز سوات میں سیلابی ریلے میں بہہ جانے والے 10 افراد کی ہلاکت کے بعد خیبرپختونخوا حکومت نے مبینہ غفلت پر ڈپٹی کمشنر سمیت چھ افسران کو معطل کر دیا ہے۔
   • امریکی صدر ڈونلڈ ٹرمپ نے ان میڈیا رپورٹس کی تردید کی ہے کہ ان کی انتظامیہ سویلین جوہری پروگرام بنانے کے لیے ایران کو 30 ارب ڈالر تک کی مالی امداد فراہم کرنے پر غور کر رہی ہے۔
   • سنیچر کے روز اسرائیلی حملوں میں ہلاک ہونے والے ایرانی فوجی افسران اور جوہری سائنسدانوں کی نمازِ جنازہ تہران میں ادا کر دی گئی۔

4. 29 جون 2025بی بی سی کے لائیو پیج میں خوش آمدید!

   بی بی سی کے لائیو پیج میں خوش آمدید۔ پاکستان سمیت دنیا بھر کی اہم خبروں اور تجزیوں کے متعلق جاننے کے لیے بی بی سی کی لائیو پیج کوریج جاری ہے۔

   گذشتہ روز تک کی خبریں جاننے کے لیے یہاں کلک کریں۔