فریقین تحمل کا مظاہرہ کریں، پاکستان مخلص ثالث اور سہولت کار کا کردار جاری رکھے گا: وزیر اعظم شہباز شریف کی ایرانی وزیر داخلہ سے گفتگو

لائیو کوریج

1. 20 جولائی 2026ایرانی وزیرِ داخلہ کی دو روزہ سرکاری دورے پر اسلام آباد آمد

   

   ،تصویر کا ذریعہIRNA

   ایران کے وزیرِ داخلہ سکندر مومنی اپنے پاکستانی ہم منصب سید محسن نقوی کی دعوت پر دو روزہ سرکاری دورے پر پیر کے روز اسلام آباد پہنچ گئے ہیں، جہاں وہ دونوں ممالک کے درمیان تجارت، سرحدی سلامتی اور زرعی تعاون کے فروغ پر بات چیت کریں گے۔

   نور خان ایئربیس پر وفاقی وزیرِ داخلہ سید محسن نقوی اور پاکستان میں ایران کے سفیر رضا امیری مقدم نے ایرانی وزیرِ داخلہ اور ان کے وفد کا استقبال کیا۔

   ایرانی وفد میں وزارتِ داخلہ، وزارتِ خارجہ، وزارتِ شہری ترقی، وزارتِ زراعت، ایران کی قانون نافذ کرنے والی فورس اور کسٹمز انتظامیہ کے اعلیٰ حکام شامل ہیں۔

   ایرانی وزارتِ داخلہ کے مطابق وفد میں وزارتِ پیٹرولیم، صنعت، معیشت و خزانہ کے نمائندے اور صوبہ سیستان و بلوچستان کے سینئر حکام بھی شامل ہیں۔

   دورے کے دوران دونوں ممالک کے درمیان دوطرفہ تعلقات کے فروغ، سرحدی تعاون کو مضبوط بنانے، اقتصادی، ٹرانزٹ اور زرعی شعبوں میں تعاون بڑھانے سے متعلق امور پر تبادلۂ خیال متوقع ہے۔

   یہ دورہ ایرانی صدر مسعود پزشکیان کی اس ہدایت کے تحت کیا جا رہا ہے جس میں ایران اور پاکستان کے درمیان سالانہ تجارتی حجم کو تین ارب ڈالر سے بڑھا کر 10 ارب ڈالر تک لے جانے کا ہدف مقرر کیا گیا ہے۔

2. 20 جولائی 2026بریکنگ, فضائی دفاعی نظام ایرانی میزائل اور ڈرون حملوں کا مقابلہ کر رہا ہے: کویتی فوج کا دعویٰ

   کویت کی فوج نے دعویٰ کیا ہے کہ ’ملک کے فضائی دفاعی نظام نے ایران کی جانب سے کیے گئے میزائل اور ڈرون حملوں کا مقابلہ شروع کر دیا ہے۔‘

   کویت کی فوج کے جنرل سٹاف کی جانب سے ایکس پر جاری بیان میں کہا گیا ہے کہ ’اگر دھماکوں کی آوازیں سنائی دیں تو یہ دشمن کے حملوں کو روکنے کے لیے فضائی دفاعی نظام کی کارروائی کا نتیجہ ہیں۔‘

   بیان میں شہریوں سے اپیل کی گئی ہے کہ وہ متعلقہ حکام کی جانب سے جاری کردہ حفاظتی اور سکیورٹی ہدایات پر عمل کریں۔

3. 20 جولائی 2026کویت اور بحرین میں امریکی افواج کو تین مرحلوں میں نشانہ بنایا گیا: ایرانی پاسدارانِ انقلاب کا دعویٰ

   ایران کے پاسدارانِ انقلاب نے دعویٰ کیا ہے کہ انھوں نے کویت اور بحرین میں موجود امریکی افواج کو ’بڑے پیمانے پر میزائلوں اور ڈرونز‘ کے ذریعے نشانہ بنایا ہے۔

   پاسدارانِ انقلاب کے شعبہ تعلقاتِ عامہ کے بیان کے مطابق بحریہ نے ’آپریشن نصر 2 کی 23ویں لہر‘ کے تحت تین مرحلوں میں خطے میں موجود امریکی تنصیبات کو ’بھاری نقصان‘ پہنچایا۔

   بیان میں کہا گیا ہے کہ ’پہلے اور دوسرے مرحلے میں بحرین کے السخیر ایئرپورٹ پر موجود امریکی یونٹس کے ڈرونز کی دیکھ بھال اور مرمت کی تنصیبات، جبکہ سلمان پورٹ میں امریکی ٹی ایف-59 یونٹ کی تیاری کی سہولیات کو نشانہ بنایا گیا۔‘

   پاسدارانِ انقلاب کے مطابق ’تیسرے مرحلے میں کویت کے عریفجان اڈے پر موجود سپیشل فورسز کے میرینز کی تعیناتی، معاونت اور سازوسامان سے متعلق تنصیبات کو ہدف بنایا گیا۔‘

   بیان میں مزید کہا گیا ہے کہ ’خطے میں امریکی افواج کے خلاف کارروائیاں جاری ہیں۔‘

   دوسری جانب بحرین کی وزارتِ داخلہ نے مُلک میں سائرن بجائے جانے کے حوالے سے ایکس پر جاری بیان میں کہا ہے کہ ’شہریوں اور رہائشیوں سے اپیل کی ہے کہ وہ پُرسکون رہیں اور فوری طور پر قریبی محفوظ مقام پر منتقل ہو جائیں۔‘

   بیان میں عوام کو ہدایت کی گئی ہے کہ وہ حکام کی جانب سے جاری کردہ حفاظتی ہدایات پر عمل کریں۔

4. 20 جولائی 2026بریکنگ, حماس نے خلیل الحیہ کو اپنا نیا سربراہ منتخب کر لیا

   

   ،تصویر کا ذریعہReuters

   فلسطینی تنظیم حماس نے ایک بیان میں اعلان کیا ہے کہ خلیل الحیہ کو تنظیم کا نیا سربراہ منتخب کر لیا گیا ہے۔ وہ یحییٰ سنوار کے جانشین ہوں گے، جو اکتوبر سنہ 2024 میں غزہ میں اسرائیلی فوج کے ایک حملے میں مارے گئے تھے۔

   حماس کے سابقہ رہنماؤں بشمول اسماعیل ہنیہ، یحییٰ سنوار اور محمد ضیف سمیت تنظیم کے دیگر اہم رہنماؤں کی اسرائیلی حملوں میں ہلاکت کے بعد خلیل الحیہ کا کردار اور اثر و رسوخ نمایاں طور پر بڑھا ہے۔

   خلیل الحیہ کون ہیں؟

   خلیل الحیہ سنہ 1960 میں غزہ پٹی میں پیدا ہوئے اور سنہ 1987 میں حماس کے قیام کے وقت سے ہی اس تنظیم کے رکن رہے ہیں۔

   یحییٰ سنوار کے نائب اور حماس کے سینیئر عہدیدار خلیل الحیہ کو اس عہدے کے لیے ایک مضبوط امیدوار سمجھا جا رہا تھا۔

   غزہ سے باہر موجود حماس کی قیادت میں خلیل الحیہ ایک انتہائی سینیئر عہدیدار ہیں۔ قطر میں خلیل الحیہ نے حماس اور اسرائیل کے درمیان جنگ بندی کے لیے ہونے والے مذاکرات میں حماس کے وفد کی قیادت بھی کی ہے۔

   خلیل الحیہ کے بارے میں کہا جاتا ہے کہ وہ غزہ کی صورتحال کے بارے میں گہری معلومات، رابطے اور تفہیم رکھتے ہیں۔

   یحییٰ سنوار کے بعد خلیل الحیہ نے سیاسی و خارجی امور کی ذمہ داری سنبھالیں۔ وہ اب تک غزہ کے معاملات کی براہِ راست نگرانی کر رہے تھے۔

   واضح رہے کہ گذشتہ سال ستمبر میں دوحہ میں حماس کے رہنماؤں پر اسرائیلی حملہ ہوا تھا جس میں اسرائیلی فوج نے خلیل الحیہ اور اُن کے ساتھیوں کو نشانہ بنایا گیا تھا۔

5. 20 جولائی 2026یمن: حوثی گروہ کا سعودی عرب کے خلاف بحری ناکہ بندی کا اعلان

   

   ،تصویر کا ذریعہReuters

   یمن کے حوثی جنگجوؤں کے فوجی ترجمان یحییٰ سریع نے سعودی عرب کے خلاف بحری ناکہ بندی کا اعلان کر دیا ہے۔

   یحییٰ سریع کے بیان میں کہا گیا ہے کہ ’دشمن سعودی عرب‘ یمن کا ’ناانصافی پر مبنی اور ظالمانہ‘ محاصرہ جاری رکھے ہوئے ہے، اس لیے اب سے ’آنکھ کے بدلے آنکھ‘ کے اصول کے تحت کارروائی کی جائے گی۔

   بیان میں سعودی عرب کو کشیدگی میں اضافے سے خبردار کرتے ہوئے کہا گیا ہے کہ ’حوثی گروپ تمام ممکنہ حالات کے لیے تیار ہے۔‘

   یمن کے حوثی جو خود کو ’انصار اللہ‘ کہتے ہیں ملک کے مغربی حصے کے تقریباً ایک تہائی علاقے پر قابض ہیں۔ خلیج کے ساحلی علاقوں اور عدن کی بندرگاہ کے علاوہ بیشتر علاقوں پر ان کا کنٹرول ہے، جبکہ یہ مقامات سابق یمنی حکومت کی حمایت یافتہ فورسز کے زیرِ اثر ہیں۔

   حوثیوں کے پاس دارالحکومت صنعا، اہم بندرگاہ حدیدہ اور بحیرۂ احمر کے بیشتر ساحلی علاقے موجود ہیں۔

   یہ اعلان ایسے وقت میں سامنے آیا ہے جب چار جولائی کو ایران کی ماہان ایئر کی ایک پرواز تہران سے صنعا پہنچی، تاہم چند گھنٹے بعد واپس تہران روانہ ہو گئی۔ یہ گیارہ برس بعد تہران سے صنعا کے لیے پہلی پرواز تھی۔

   گزشتہ ہفتے تہران سے آنے والی دوسری پرواز صنعا کے ہوائی اڈے کے رن ویز پر بمباری کے باعث حدیدہ ایئرپورٹ پر اتری اور چند گھنٹے بعد واپس تہران روانہ ہو گئی۔

   عدن میں قائم سعودی عرب کی حمایت یافتہ یمنی حکومت کا مؤقف ہے کہ ماہان ایئر کی صنعا کے لیے پرواز اس کی فضائی حدود کی خلاف ورزی ہے۔ دوسری جانب ایران کے اتحادی حوثی صنعا پر عائد ’فضائی ناکہ بندی‘ کو غیر قانونی قرار دیتے ہیں۔

   ماہرین کا خیال ہے کہ یمن، بحیرۂ احمر میں واقع آبنائے باب المندب کو بند کر کے ایران کی جانب سے خلیج فارس میں آبنائے ہرمز پر عائد پابندیوں جیسی صورتحال پیدا کر سکتا ہے، جس کے نتیجے میں عالمی توانائی کی منڈیوں کو بڑا دھچکا لگ سکتا ہے۔

   ماہرین کے مطابق باب المندب کی بندش عالمی تجارت اور تیل کی ترسیل پر نمایاں اثر ڈال سکتی ہے، کیونکہ یہ دنیا کے اہم ترین بحری راستوں میں شمار ہوتی ہے۔

6. 20 جولائی 2026کاکروچ جنتا پارٹی کے جنتر منتر پر موجود مظاہرین اور پولیس کے درمیان جھڑپوں کی تصویری جھلکیاں

   

   ،تصویر کا ذریعہReuters

   دہلی میں کاکروچ جنتا پارٹی کے احتجاج کے مقام کو پولیس نے خالی کرانا شروع کر دیا ہے۔

   انڈیا کے دارالحکومت نئی دہلی میں پولیس اس مقام کو خالی کرا رہی ہے جہاں کاکروچ جنتا پارٹی جون سے احتجاجی دھرنا دیے بیٹھی تھی۔

   کاکروچ جنتا پارٹی کی جانب سے تعلیمی نظام میں اصلاحات کے مطالبے پر دی گئی احتجاجی کال پر وسطی دہلی میں ہزاروں افراد جمع ہوئے تھے۔

   

   ،تصویر کا ذریعہReuters

   

   ،تصویر کا ذریعہReuters

   

   ،تصویر کا ذریعہReuters

   

   ،تصویر کا ذریعہReuters

7. 20 جولائی 2026کاکروچ جنتا پارٹی کا احتجاج: پولیس اور مظاہرین کے درمیان جھڑپیں، جنتر منتر پر کیا ہوتا رہا؟

   نئی دہلی سے بی بی سی ہندی کی نامہ نگار گیتا پانڈے نے جنتر منتر پر کاکروچ جنتا پارٹی کے احتجاج اور مظاہرین کو منتشر کرنے کے لیے پولیس کی جانب سے جاری کارروائی سے متعلق بتایا ہے کہ ’مظاہرین اور پولیس کے درمیان حالات اب بھی کشیدہ ہیں۔

   گیتا پانڈے نے بتایا ہے کہ ’ہنگامہ آرائی سے نمٹنے والے حفاظتی لباس میں موجود پولیس اہلکاروں اور مظاہرین کے درمیان اب بھی مختلف مقامات پر جھڑپیں ہو رہی ہیں۔‘

   تاہم اب سے کُچھ دیر قبل انڈیا کے وفاقی وزیرِ صحت جے پی نڈا نے ’کاکروچ جنتا پارٹی‘ کے مظاہرین سے اپیل کی ہے کہ وہ اپنا احتجاج ختم کریں اور دارالحکومت میں ’معمول کے حالات‘ بحال کرنے میں مدد کریں۔

   فریقوں کے درمیان مذاکرات کی کوششیں جاری دکھائی دے رہی ہیں، تاہم اس دوران ہجوم کی جانب سے نعرے بازی بھی مسلسل جاری ہے۔

   تقریباً ایک گھنٹہ قبل پولیس کی جانب سے مظاہرین کو منتشر کرنے کے لیے آنسو گیس اور لاٹھیوں کے استعمال کے بعد صورتحال بدستور کشیدہ ہے۔

8. 20 جولائی 2026وزیرِ صحت کی مظاہرین سے احتجاج ختم کرنے کی اپیل: ’ہم اُس وقت تک خاموش نہیں بیٹھیں گے جب تک ہمارے مطالبات پورے نہیں ہوتے‘، سی جے پی

   

   ،تصویر کا ذریعہJP Nadda/X

   انڈیا کے وفاقی وزیرِ صحت جے پی نڈا نے ’کاکروچ جنتا پارٹی‘ کے مظاہرین سے اپیل کی ہے کہ وہ اپنا احتجاج ختم کریں اور دارالحکومت میں ’معمول کے حالات‘ بحال کرنے میں مدد کریں۔

   ایکس پر جاری اپنے بیان میں وزیرِ صحت نے کہا کہ احتجاج میں شامل تنظیم کے نمائندوں نے آج صبح پہلی بار حکومت سے مذاکرات کے لیے رابطہ کیا تھا۔‘

   انھوں نے بتایا کہ ’ملاقات خوشگوار ماحول میں ہوئی، جبکہ ’کاکروچ جنتا پارٹی‘ کے مظاہرین نے اپنے مطالبات پر مشتمل ایک تحریری درخواست بھی پیش کی۔‘

   نڈا نے مظاہرین پر زور دیا کہ وہ احتجاج ختم کر کے دارالحکومت میں معمولاتِ زندگی کی بحالی میں تعاون کریں۔

   تاہم اب سے کُچھ دیر قبل دلی میں ’کاکروچ جنتا پارٹی‘ سے منسلک دو رہنماؤں نے آج وفاقی وزیرِ صحت جے پی نڈا سے مختصر ملاقات کی تصدیق کی۔

   ’کاکروچ جنتا پارٹی‘ کے ایک ترجمان سورَو داس نے کچھ دیر قبل ایکس پر جاری بیان میں کہا کہ انھوں نے وزیرِ صحت کے سامنے اپنے مطالبات رکھے ہیں، جن میں ’دھرمیندر پردھان کے فوری استعفے یا برطرفی‘ کا مطالبہ بھی شامل ہے۔

   سورَو داس نے لکھا کہ ’وزیر کی جانب سے ہمیں یقین دہانی کرائی گئی ہے کہ وہ اس معاملے پر مناسب سطح پر بات کریں گے، تاہم اب تک کوئی وعدہ نہیں کیا گیا۔ پُرامن مظاہرین اس وقت تک خاموش نہیں بیٹھیں گے جب تک ان کا مطالبہ پورا نہیں ہوتا۔‘

   جے پی نڈا نے تاحال اس ملاقات پر کوئی تبصرہ نہیں کیا، جبکہ وزیرِ تعلیم دھرمیندر پردھان نے بھی آج کے احتجاج پر کوئی ردِعمل ظاہر نہیں کیا۔

   واضح رہے کہ گزشتہ ماہ ایک انٹرویو میں دھرمیندر پردھان نے ’کاکروچ جنتا پارٹی‘ کو ’انتشار پسند عناصر کی بی ٹیم‘ قرار دیا تھا۔

9. 20 جولائی 2026’کاکروچ جنتا پارٹی‘ کے جنتر منتر کے مقام پر بنے سٹیج کو ہٹا دیا گیا

   

   ،تصویر کا ذریعہGetty Images

   انڈیا کے دارالحکومت نئی دہلی میں جنتر منتر نامی ایک اہم سڑک پر موجود ہزاروں مظاہرین کو اس مقام سے ہٹایا جا رہا ہے۔

   پولیس اور قانون نافذ کرنے والے اداروں کے اہلکاروں کی جانب سے مظاہرین کو احتجاج ختم کرنے اور سڑک کو خالی کرنے کے دوران جھڑپیں بھی ہوئیں جن میں متعدد افراد کے زخمی ہونے کی بھی اطلاعات ہیں۔

   اب سے کُچھ دیر قبل احتجاج کے مقام پر موجود بی بی سی ہندی کی نامہ نگار گیتا پانڈے کو پولیس کی جانب سے محفوظ مقام کی جانب جانے کو کہا گیا۔

   گیتا پانڈے کے مطابق پولیس اہلکاروں کی جانب مسلسل طلبہ کو احتجاج کے مقام کو خالی کرنے کی ہدایت کی جا رہی ہے۔

   اس دوران عارضی طور پر بنائے جانے والے سٹیج کو بھی مظاہرین سے خالی کروانے کے بعد ہٹا دیا گیا ہے۔

   واضح رہے کہ یہ وہی سٹیج تھا کہ جہاں معروف سماجی کارکن سونم وانگچک نے بھوک ہڑتال کی تھی اور جہاں سے احتجاج کے منتظمین تقاریر کر رہے تھے۔

10. 20 جولائی 2026ایران نے ملک کے ائیر نیویگیشن سسٹم کو نشانہ بنایا ہے: سول ایوی ایشن اتھارٹی بحرین

    بحرین کے سرکاری خبر رساں ادارے نے مُلک کی سول ایوی ایشن اتھارٹی کے حوالے سے دعویٰ کیا ہے کہ ایران نے بحرین کے ائیر نیویگیشن سسٹم پر حملہ کیا ہے۔

    رپورٹ کے مطابق اس حملے کے باوجود ائیر نیویگیشن سسٹم کا کام متاثر نہیں ہوا اور یہ معمول کے مطابق کام جاری رکھے ہوئے ہے۔

    اس سے چند گھنٹے قبل ایرانی میڈیا نے بحرین میں دھماکوں کی اطلاعات نشر کی تھیں۔

    حالیہ دنوں میں ایران نے کویت اور بحرین میں موجود امریکی فوج کی تنصیبات کو متعدد بار نشانہ بنانے کا دعویٰ کیا ہے۔

11. 20 جولائی 2026نئی دہلی میں ’کاکروچ جنتا پارٹی‘ کے احتجاج میں مظاہرین اور پولیس کے درمیان جھڑپیں، تازہ صورتحال کی چند تصاویر

    انڈیا کے دارالحکومت نئی دہلی میں جنتر منتر پر اب بھی ہزاروں افراد موجود ہیں، جہاں گزشتہ چند منٹوں کے دوران پولیس اہلکار ہنگامہ آرائی سے نمٹنے والے حفاظتی لباس میں پہنچے اور لاؤڈ سپیکر کے ذریعے مظاہرین کو علاقہ خالی کرنے کی ہدایت دی۔

    واضح رہے کہ اس مقام پر ’کاکروچ جنتا پارٹی‘ کی قیادت میں دسیوں ہزار طلبہ، نوجوان اور سماجی کارکن پارلیمنٹ کی جانب مارچ کر رہے ہیں۔

    پولیس کا کہنا ہے کہ مظاہرین کو ایک مخصوص مقام سے آگے بڑھنے کی اجازت نہیں۔

    اب تک اس احتجاج سے سامنے آنے والی اطلاعات میں بتایا جا رہا ہے کہ بعض مقامات پر پولیں کی جانب سے مظاہرین پر لاٹھیاں بھی برسائی گئی ہیں اور مظاہرین اور پولیں کے درمیان جھڑپوں کی بھی اطلاعات ہیں۔

    نئی دہلی میں جنتر منتر نامی اس اہم سمجھی جانے والی سڑک پر سے سامنے آنے والی تصاویر میں مظاہرین کی بڑی تعداد اور حالات کا اندازہ لگایا جا سکتا ہے۔

    

    ،تصویر کا ذریعہReuters

    

    ،تصویر کا ذریعہGetty Images

    

    ،تصویر کا ذریعہReuters

    

    ،تصویر کا ذریعہReuters

    

    ،تصویر کا ذریعہGetty Images

12. 20 جولائی 2026کاکروچ جنتا پارٹی کیا ہے؟

    

    ،تصویر کا ذریعہGetty Images

    ایک آن لائن مہم کے طور پر شروع ہونے والی ’کاکروچ جنتا پارٹی‘ دیکھتے ہی دیکھتے انڈیا میں نوجوانوں کی نمایاں احتجاجی تحریک بن گئی ہے۔

    نام کے برعکس ’کاکروچ جنتا پارٹی‘ کوئی سیاسی جماعت نہیں بلکہ ایک عوامی اور سماجی تحریک ہے۔ اس کا آغاز اس وقت ہوا جب انڈین سپریم کورٹ کے جج جسٹس سوریہ کانت نے ایک سماعت کے دوران بعض بے روزگار نوجوانوں کو ’کاکروچ‘ سے تشبیہ دی۔

    اس تشبیہ کو مسترد کرنے کے بجائے، بے روزگاری اور مسابقتی امتحانات میں مبینہ بے ضابطگیوں پر برہم نوجوانوں نے اسی لقب کو اپنی شناخت بنا لیا اور کاکروچ کو مزاحمت کی علامت میں تبدیل کر دیا۔

    انٹرنیٹ پر اس کے نام سے ایک ویب سائٹ بن چکی ہے اور انسٹاگرام پر اس کے 40 لاکھ سے زیادہ فالوورز ہو چکے ہیں اور بتایا جا رہا ہے کہ دو لاکھ سے زیادہ لوگوں نے ویب سائٹ پر اس کی رکنیت کے لیے خود کو رجسٹر بھی کر لیا۔

    کاکروچ جنتا پارٹی کی ویب سائٹ پر اس کے بانی اور کنوینر کی معلومات دی گئی ہیں اور ان کا نام ابھیجیت دیپکے ہے۔

    ابھیجیت دیپکے کی قیادت میں چلنے والی اس تحریک کا مطالبہ ہے کہ انڈیا کے تعلیمی نظام میں جامع اصلاحات کی جائیں، امتحانی پرچوں کے مبینہ لیک ہونے کے معاملات کی شفاف تحقیقات اور ذمہ داروں کا احتساب کیا جائے، جبکہ وزیرِ تعلیم دھرمیندر پردھان اپنے عہدے سے مستعفی ہوں۔

    دوسری جانب وزیرِ تعلیم دھرمیندر پردھان نے سی جے پی اور اس کے حامیوں کو ’انتشار پسند عناصر کی بی ٹیم‘ قرار دیتے ہوئے تحریک کو مسترد کر دیا ہے۔

13. 20 جولائی 2026نئی دہلی میں ’کاکروچ جنتا پارٹی‘ کا احتجاج: ہزاروں کی تعداد میں مظاہرین کا تعلیمی نظام میں اصلاحات اور وزیرِ تعلیم کے استعفے کا مطالبہ

    

    ،تصویر کا ذریعہGetty Images

    انڈیا کے دارالحکومت نئی دہلی میں امتحانی پرچوں کے مبینہ لیک ہونے، تعلیمی نظام میں اصلاحات اور وزیرِ تعلیم دھرمیندر پردھان کے استعفے کے مطالبے پر شروع ہونے والا احتجاج شدت اختیار کر گیا ہے۔

    کاکروچ جنتا پارٹی کی قیادت میں دسیوں ہزار طلبہ، نوجوان اور سماجی کارکن پارلیمنٹ کی جانب مارچ کر رہے ہیں، جبکہ سکیورٹی فورسز نے راستوں پر سخت ناکہ بندی کر رکھی ہے۔

    احتجاج کے دوران پولیس اور مظاہرین کے درمیان کشیدگی، مذاکرات کی کوششوں اور معروف سماجی کارکن سونم وانگچک کی بھوک ہڑتال نے اس تحریک کو قومی سطح پر توجہ کا مرکز بنا دیا ہے۔

    کاکروچ جنتا پارٹی کی جانب سے یہ الزام عائد کیا گیا ہے کہ انڈین پارلیمنٹ ہاؤس کے قریب جمع ہونے والے بعض مظاہرین پر پولیس نے لاٹھی چارج کیا ہے۔

    تاہم پولیس نے ان مخصوص الزامات پر تاحال کوئی ردِعمل نہیں دیا۔ البتہ اس سے قبل ایکس پر جاری ایک بیان میں پولیس نے جنتر منتر میں ’وقفے وقفے سے تشدد یا حراست میں لینے‘ سے متعلق میڈیا رپورٹس کو بے بنیاد قرار دیا تھا۔

    

    ،تصویر کا ذریعہReuters

    انڈیا میں ہزاروں طلبہ کے احتجاجی مارچ میں شرکت کی تیاریوں کے دوران گزشتہ 24 گھنٹوں میں سوشل میڈیا پر غیر معمولی سرگرمی دیکھنے میں آئی، جہاں مظاہرین نے موسیقی کے کسی بڑے فیسٹیول کی طرح سامان کی فہرستیں، حفاظتی ہدایات اور ملاقات کے منصوبے ایک دوسرے سے شیئر کیے۔

    اس کے علاوہ مظاہرین کے اجتماع کے مقامات کے نقشے، قانونی معاونت کے لیے ہیلپ لائن نمبرز اور گرفتاری کی صورت میں اختیار کیے جانے والے اقدامات سے متعلق معلومات بھی شیئر کی گئیں۔

    کاکروچ جنتا پارٹی نے بھی شرکا کے لیے ہدایات جاری کرتے ہوئے مارچ کو پُرامن رکھنے، صرف انڈین قومی پرچم ساتھ لانے اور پولیس کے ساتھ کسی بھی قسم کی محاذ آرائی سے گریز کرنے کی اپیل کی ہے۔

    

    ،تصویر کا ذریعہEPA

    کاکروچ جنتا پارٹی کے بانی ابھیجیت دیپکے کا کہنا ہے کہ انڈین حکومت نے احتجاجی تحریک سے مذاکرات کے لیے رابطہ کیا ہے۔

    بی بی سی سے گفتگو کرتے ہوئے ابھیجیت دیپکے نے بتایا کہ حکومت کے ساتھ ممکنہ مذاکرات کے سلسلے میں ان کا مطالبہ ہے کہ معروف سماجی کارکن سونم وانگچک کو دوبارہ احتجاجی مقام پر واپس لایا جائے۔

    واضح رہے کہ سونم وانگچک کو بھوک ہڑتال کے اکیسویں روز پولیس نے زبردستی ہسپتال منتقل کر دیا تھا، تاہم ان کے اہلِ خانہ کے مطابق وہ اسپتال میں بھی اپنی بھوک ہڑتال جاری رکھے ہوئے ہیں۔

14. 20 جولائی 2026کشیدگی میں کمی کے لیے ایران کو ثالثوں کی تجاویز موصول: سفارتی کوششوں کے ساتھ ساتھ فوجی کارروائیاں بھی جاری رکھیں گے، اسماعیل بقائی

    

    ،تصویر کا ذریعہLightRocket via Getty Images

    ایران نے تصدیق کی ہے کہ اسے امریکہ کے ساتھ کشیدگی میں کمی کے لیے مختلف ثالثوں کی جانب سے تجاویز ہوئی ہیں۔

    ایرانی وزارت خارجہ کے ترجمان اسماعیل بقائی کا کہنا ہے کہ تہران سفارتی کوششوں کے ساتھ ساتھ فوجی ردِ عمل بھی جاری رکھے گا۔

    پیر کو دفترِ خارجہ کی ہفتہ وار پریس بریفنگ کے دوران سرکاری خبر رساں ادارے ارنا نے قطر کی جانب سے مذاکرات کی بحالی کے لیے نئی تجاویز بشمول تہران اور واشنگٹن کے درمیان 10 روزہ جنگ بندی کے متعلق سوال کیا۔

    ارنا کی جانب سے پوچھے گئے سوال میں ایرانی وزیر خارجہ عباس عراقچی کے حالیہ دورۂ قطر کا حوالہ بھی دیا گیا۔

    سوال کے جواب میں بقائی کا کہنا تھا یہ بات واضح ہے کہ ثالث مزید کشیدگی کو روکنے کے لیے سرگرم ہیں۔

    ’اسی دوران ایران امریکہ کے جرائم کو روکنے میں کوئی کسر نہیں چھوڑے گا۔‘

    ان کا کہنا تھا کہ جہاں ایک طرف ایران کی مسلح افواج پوری قوت کے ساتھ امریکی جارحیت کا جواب دے رہی ہے وہیں ملک کا سفارتی نظام بھی مکمل طور پر متحرک ہے۔

    اسماعیل بقائی نے اس بات کی تصدیق کی کہ ثالثوں کے ذریعے پیش کی جانے والی تجاویز تہران کو موصول ہو چکی ہیں تاہم ان کا کہنا تھا کہ وہ فی الوقت ان کی تفصیلات بیان کرنا مناسب نہیں سمجھتے۔

15. 20 جولائی 2026خیبر پختونخوا میں سیلابی ریلے میں بہہ جانے والے تین افراد کی لاشیں نکال لی گئیں

    پاکستان کے صوبہ خیبر پختونخوا کے ضلع خیبر میں سیلابی ریلے میں بہہ جانے والے تین افراد کی لاشیں نکال لی گئی ہیں۔

    ہنگامی امداد کے ادارے ریسکیو 1122 کی جانب سے جاری بیان میں کہا گیا ہے کہ ضلع خیبر کی تحصیل لنڈی کوتل میں سیلابی ریلے ایک ویگن اور ایک کار بہہ گئی تھی۔

    ریسکیو 1122 کے مطابق گاڑی سے ایک خاتون اور ایک مرد کی لاش جمرود جبہ خوڑ قدم سے ریسکیو 1122 کی غوطہ خور ٹیموں اور مقامی افراد نے مشترکہ کاوشوں سے نکال لیں جبکہ ایک بچے کی لاش ریسکیو 1122 کی ٹیم نے پڑانگ سنگ کے مقام پر مقامی افراد سے نکالی۔

    بیان کے مطابق پاک افغان شاہراہ پر ویگن اور کار سیلابی ریلے میں بہہ گئی تھی جس کے بعد 12 سے زائد بچوں کو سیلابی پانی سے بحفاظت ریسکیو کر لیا گیا۔

    ریسکیو 1122 کا کہنا ہے کہ آٹھ زخمیوں کو ڈسٹرکٹ ہیڈکوراٹر ہسپتال منتقل کر دیا گیا ہے۔

    ضلع خیبر میں شدید بارشوں اور فلیش فلڈ کے باعث مختلف علاقوں میں رابطہ سڑکیں متاثر ہیں جبکہ متعدد کچے مکانات کو بھی جزوی نقصان پہنچا ہے۔

16. 20 جولائی 2026ایرانی حکام کی امریکی حملوں میں کم از کم ایک شخص کی ہلاکت اور متعدد کے زخمی ہونے کی تصدیق

    

    ،تصویر کا ذریعہIrna

    ایرانی حکام کا کہنا ہے کہ پیر کے روز ہونے والے امریکی حملوں میں اب تک کم از کم ایک شخص کے ہلاک اور متعدد کے زخمی ہونے کی تصدیق ہو چکی ہے۔

    ایران کے صوبے مشرقی آذربائیجان کے ہنگامی صورتحال سے نمٹنے کے ذمہ دار محکمے کا کہنا ہے کہ شمال مغربی ایران میں امریکی حملوں کے نتیجے میں ایک شخص ہلاک جبکہ متعدد افراد زخمی ہوئے ہیں۔

    محکمے کے مطابق اتوار اور پیر کی درمیانی شب تقریباً 2 بج کر 35 منٹ پر تبریز کے جنوب مغرب میں واقع ایک فوجی علاقے پر امریکی حملے میں ایک شخص ہلاک اور کئی دیگر زخمی ہوئے ہیں۔

    ادھر مغربی آذربائیجان کے محکمہ کرائسس مینجمنٹ کے ڈائریکٹر جنرل حامد سفری کا کہنا ہے کہ پیر کی صبح ارومیہ کے ضلع سلوانا کے قریب ایک مقام کو میزائل سے نشانہ بنایا گیا۔

    ایرانی ذرائع ابلاغ نے حامد سفری کے حوالے سے بتایا ہے کہ اس حملے میں متعدد افراد زخمی ہوئے ہیں۔

    ایران کے صوبہ بوشہر کے گورنر محمد مظفری کا کہنا ہے کہ کچھ دیر قبل ایرانی شہر بوشہر پر دو مرتبہ حملہ کیا گیا۔

    تاہم ان کا کہنا ہے کہ اب تک اس حملے کے نتیجے میں کسی جانی نقصان کی اطلاع موصول نہیں ہوئی۔

    یہ حملہ امریکی سینٹرل کمانڈ کی جانب سے ایران پر حملوں کے نویں مرحلے کی تکمیل کے کئی گھنٹوں بعد ہوا ہے۔

    حملے کے بارے میں تاحال مزید تفصیلات جاری نہیں کی گئیں۔

17. 20 جولائی 2026زیرِ تعمیر نیوکلیئر پاورت پلانٹ پر امریکی حملہ: عدم استحکام کے نتیجے میں پیدا ہونے والی صورتحال کی ذمہ داری امریکہ پر عائد ہوتی ہے، ایران

    ایران کے نائب وزیرِ خارجہ کاظم غریب آبادی کا کہنا ہے کہ دارخوین میں زیرِ تعمیر جوہری بجلی گھر پر امریکی حملہ ایران کے پُرامن انفراسٹرکچر پر ایک خطرناک حملہ ہے۔

    ایکس پر جاری ایک بیان میں کاظم غریب آبادی نے خبردار کیا کہ بڑھتی ہوئی بدامنی اور عدم استحکام کے نتیجے میں پیدا ہونے والی صورتحال کی ذمہ داری مکمل طور پر امریکی حکومت پر عائد ہوتی ہے۔

    ان کا کہنا تھا کہ ایران اس جارحیت کی سخت مذمت کرتا ہے اور اپنے قومی مفادات اور سلامتی کے دفاع کے لیے مناسب اقدامات کرے گا۔

    گذشتہ روز بین الاقوامی جوہری توانائی ایجنسی (آئی اے ای اے) نے اعلان کیا تھا کہ اس نے دارخوین میں زیرِ تعمیر جوہری بجلی گھر کی تعمیراتی سائٹ پر ہونے والے مبینہ حملے کی رپورٹس کا جائزہ لینا شروع کر دیا ہے۔

    ایجنسی کی جانب سے ایکس پر جاری بیان میں کہا گیا تھا کہ ’یہ تنصیب ابھی تعمیر کے ابتدائی مراحل میں ہے اور آئی اے ای اے کے آخری معائنے کے وقت وہاں کوئی جوہری مواد موجود نہیں تھا۔‘

    آئی اے ای اے کا کہنا تھا کہ کہ ’مبینہ حملے سے تابکاری کے کسی خطرے کا امکان نہیں ہے۔‘ ادارے کے ڈائریکٹر جنرل رافائل ماریانو گروسی نے تمام جوہری تنصیبات کے اطراف فوجی کارروائیوں میں تحمل کا مظاہرہ کرنے کی اپیل کو دہرایا ہے۔

18. 20 جولائی 2026ایرانی پاسدارانِ انقلاب کا کویت میں امریکی اہداف کو نشانہ بنانے کا دعویٰ

    

    ،تصویر کا ذریعہGetty Images

    ایرانی پاسدارانِ انقلاب کا کہنا ہے کہ اس نے کویت میں امریکی فوجی اہداف کو نشانہ بنایا ہے جن میں ’ابتدائی وارننگ ریڈار سسٹم‘ بھی شامل ہے۔

    پیر کے روز پاسدارانِ انقلاب کی جانب سے جاری بیان میں کہا گیا ہے کہ ڈرون حملے میں ریڈار سسٹم ’مکمل طور پر تباہ‘ ہو گیا ہے۔

    بیان میں پاسدارانِ انقلاب کا مزید کہنا ہے کہ ’علی السالم اڈے پر امریکی ایم کیو 9 ڈرونز کے لیے استعمال ہونے والے آلات اور پرزہ جات کے شیڈ اور ایک ہینگر‘ کو بھی نشانہ بنایا گیا ہے۔

    پاسدارانِ انقلاب کے مطابق یہ امریکہ کی جانب سے بارہا حملوں کے جواب میں کیا گیا ہے۔

    کویتی فوج کا کہنا ہے کہ ملک کا فضائی دفاعی نظام ایرانی ڈرونز کو روکنے میں مصروف ہے۔ کویت کا کہنا ہے کہ ملک میں سنائی دی جانے والی دھماکوں کی آوازیں ایرانی ڈرونز کو روکنے کے لیے کی جانے والی کارروائیوں کا نتیجہ ہیں۔

    دوسری جانب بحرین میں خطرے کے سائرن کی آوازیں سنی گئی ہیں۔ بحرین کی وزارتِ داخلہ نے لوگوں سے پر سکون رہنے کی اپیل کرتے ہوئے انھیں قریبی محفوظ مقامات پر جانے کا مشورہ دیا ہے۔

    یاد رہے کہ حالیہ دنوں میں امریکہ کے ساتھ کشیدگی میں دوبارہ اضافے کے بعد سے ایران متعدد بار کویت اور بحرین میں امریکی ٹھکانوں پر حملوں کا اعلان کر چکا ہے۔

19. 20 جولائی 2026پاکستان کے زیر انتظام کشمیر کی قانون ساز اسمبلی کے انتخابات: سرکاری ملازمین آج اپنا حق رائے دہی استعمال کریں گے

    

    ،تصویر کا ذریعہAPP

    پاکستان کے زیر انتظام کشمیر کی قانون ساز اسمبلی کے انتخابات میں آج سرکاری ملازمین اپنا حق رائے دہی استعمال کریں گے۔

    پولنگ کا عمل آٹھ اضلاع میں ہوگا جبکہ راولاکوٹ اور سدنوتی ضلعے میں امن وامان کی صورت حال کی وجہ سے پولنگ نہیں ہوگی۔

    پاکستان کے زیر انتظام کشمیر کے الیکشن کمیشن کے ایک اہلکار کے مطابق کشمیر میں ایک لاکھ 20 ہزار کے قریب سرکاری ملازمین ہیں مختلف محکموں میں اپنے فرائض سر انجام دے رہے ہیں۔

    راولاکوٹ میں قانون ساز اسمبلی کی پانچ نشستیں ہیں تاہم امن و امان کی صورت حال اور کالعدم قرار دی گئی تنظیم جموں کشمیر جوائینٹ عوامی ایکشن کمیٹی کی جانب سے گذشتہ ایک ماہ سے زیادہ عرصے سے جاری احتجاج کے باعث امیدوار اپنی انتخابی مہم مکمل آزادی کے ساتھ نہیں چلا سکے ہیں۔ تاہم اس کے باوجود الیکشن کمیشن کے حکام کا کہنا ہے کہ ابھی تک انھیں کسی امیدوار کی جانب سے اس ضمن میں کوئی شکائت موصول نہیں ہوئی۔

    پاکستان کے زیر انتظام کشمیر کی قانون ساز اسمبلی کے انتخابات 27 جولائی کو طے ہیں جبکہ انتخابی مہم 25 جولائی رات بارہ بجے ختم ہو جائے گی۔

20. 20 جولائی 2026پاسدارانِ انقلاب کا اردن میں امریکی فوج کو نشانہ بنانے کا دعویٰ

    ایرانی پاسدارانِ انقلاب نے دعویٰ کیا ہے کہ آپریشن نصر-2 کی 21ویں لہر کے تحت اردن کے عقبہ ایئرپورٹ پر موجود ’جارح امریکی فوج‘ کے سی-17 ٹرانسپورٹ طیارے اور پی-8 کمانڈ اینڈ کنٹرول طیارے کو نشانہ بنایا گیا ہے۔

    ایرانی خبر رساں ادارے تسنیم کے مطابق، پاسدارانِ انقلاب کی جانب سے جاری بیان میں کہا گیا ہے کہ اردن کی ’عوام اور فوج‘ سے حاصل ہونے والی درست معلومات کی بنیاد پر الأزرق کے علاقے میں واقع 20 ہینگرز کو نشانہ بنایا گیا جن میں امریکی فوجی موجود تھے۔

    پاسدارانِ انقلاب کے مطابق اس حملے میں ’امریکی فوج کے درجنوں اہلکار ہلاک‘ ہوئے ہیں۔

    ایرانی خبر رساں ادارے ارنا کا کہنا ہے کہ اس حملے میں بیلسٹک میزائل استعمال کیے گئے تھے۔