ብመስተ ተሰኒፉ መኪና ዝመርሕ ዝነበረ ሰብኣይ፡ ኣቦ ምስ ክልተ ደቁ ከም ዝቐተለ ተኣሚኑ

ስድራ ፍሊን

ምንጪ ስእሊ, Family handout

መግለጺ ስእሊ, ብዘጋጠሞም ሓደጋ መኪና ህይወቶም ዝሓለፈ ወዲ 37 ዓመት ጆሽዋ ፍሊን፡ ወዲ 15 ዓመት ኮቢ-ጃይ ከምኡውን ንጓል 12 ዓመት ስካይላር
Published

ኣብ ብሪጣንያ፡ ብመስተ ተሰኒፉ መኪና ዝመርሕ ዝነበረ ዴቪድ ሎጋን ዝተባህለ ሰብኣይ፡ ብዝፈጸሞ ሓደጋ ሓደ ኣቦ ምስ ክልተ ደቁ ከም ዝቐተለ ተኣሚኑ።

ወዲ 47 ዓመት ዴቪድ፡ ጥሪ 21 ናይ ዝሓለፈ ዓመት እዩ ኣብ ከተማ ዳልተን-ኢን-ፈርነስ ብእግሪ ንዝጉዓዙ ዝነበሩ፡ ኣባላት ሓንቲ ስረራ ዝኾኑ፡ ወዲ 37 ዓመት ጆሽዋ ፍሊን፡ ወዲ 15 ዓመት ኮቢ-ጃይ ከምኡውን ንጓል 12 ዓመት ስካይላር ብመኪና ሓሪምዎም።

በቲ ስድራ ንዝውነን ዝነበረ ከልቢ'ውን ዝቐተለ እቲ ሓደጋ፡ ነበርቲ ኣዝዩ ዘሰንብድ ክብሉ ገሊጾምዎ።

Presentational grey line
Presentational grey line

ዴቪድ ልዕሊ ዓቐን ሰትዩ ከም ዝነበረ ዝገለጸ ኣኽባር ሕጊ፡ ኣብቲ እዋን ሓደጋ ኣብ ዝተገብረሉ መርመራ ኣብ 100 ሚሊሊትር 141 ማይክሮግራም ኣልኮል ከምዝጸንሐ ሓቢሩ። እቲ ብሕጊ ዝፍቀድ ዓቐን 35 እዩ።

እቲ ገበን ብእስራት ከምዘቕጽዕ ዝገለጸ ዳኛ ቤትፍርዲ ፕሪስተን ክራውን፡ እቲ ዝወሃብ ብይን "ጽኑዕ" ከም ዝኸውን ንተኸሳሲ ኣተንቢሁሉ።

ስድራ ግዳያት ኣብ ዝሓለፈ ዓመት ነዚ ዘሕዝና ዜና ድሕሪ ምስምዖም ኣብ ዝሃብዎ መግለጺ፡ "ነዚ ዘጉህይ ዜና ካብ ዝሰማዕናሉ ደቓይቕ ጀሚሩ፡ ዓለም ቁልቁል ኣፋ እያ ተገምጢላትና፤ ክሳዕ ክንደይ ከም ዝጓሃና ክገልጸልና ዝኽእል ቃል የሎን" ኢሎም።