ጋናዊ መንእሰይ፡ ኽጥመቕ እንከሎ ኣብ ሩባ ጠሊቑ ሞይቱ

ወዲ 20 ዓመት ጋናዊ መንእሰይ ሓደ ሰባኺ ስርዓተ ጥምቀት ኣብ ዘካይደሉ እዋን፡ ኣብቲ ሩባ ምስጠሓለ ህይወቱ ክሓልፍ ክኢሉ።

እዚ ኣብ ማሕበራዊ ሚድያ ክቃላሕ ዝቐነየ ተንቀሳቓሲ ምስሊ፡ ኣብ ከባቢ ደቡብ ርእሰ ከተማ ጋና (ኣክራ) ዝርከብ ሓደ ሩባ ብሓደ ሰባኺ እንትጥመቕ ተታሒዞም ከምዝጠለቑ እዩ ዘርኢ።

ድሕሪ ሓፂር ፀሎት ምግባር እቲ ዝጥመቕ ዝነበረ መንእሰይ፡ ንኻልኣይ ግዜ ዝጠለቐ እንትኸውን ከይተመለሰ ብአኡ ኣቢሉ ጥሒሉ ተሪፉ።

ወሃቢት ቃል ናይቲ ከባቢ ፖሊስ ጣብያ፡ ንቢቢሲ ከምዝገለፀቶ፡ ኣብቲ ተግባር ዝተሳተፈ ሰባኺ'ኳ ክርከብ እንተዘይኸኣለ፡ ካሊእ ንኡስ ሰባኺ ኣብ ቀይዲ ውዒሉ እዩ። እቲ ኣብቲ ተግባር ዝተሳተፈ ዓብይ ሰባኺ ድማ ይእለሽ ኣሎ።

እዚ ኣብ ዝሓለፈ ሰንበት ዘጓነፈ ፍፃመ ስዒቡ፡ ብዙሓት ነበርቲ ንሃይማኖት ክበሃል ስለምንታይ ሰባት ህይወቶም ይስእኑ ዝብል ቅረታ ይቐርብ'ሎ።

ስድራ ናይዚ ግዳይ ግና በቲ ፍፃመ ዝኮነ ተሓታቲ ዝገብሩዎ ሰብ ከምዘየለ እዮም ንመራኸቢ ሓፋሽ ተዛሪቦም።