ትራምፕ፡ ኣብ መደረ ዓወቱ እንታይ ኢሉ?
ምንጪ ስእሊ, Getty Images
ኣብ ፕረዚደንታዊ መረጻ ኣመሪካ ድሮ ዓወቱ ዝኣወጀ ዶናልድ ትራምፕ፡ ንደገፍቱ ሰፊሕ መደረ ኣስሚዑ፤
ንሱ ኣብቲ ኣብቲ ኣብ ፍሎሪዳ ዝተኻየደ ጽንብል፡
- ንኣድመጽቱ ኣመስጊኑ፤ “ህዝቢ ኣመሪካ፡ መበል 47፤ ቅድሚ ሕጂ ድማ መበል 45 [ኣብ 2016] ፕረዚደንት ክኸውን ንዝሃበኒ ድምጺ ዓቢይ ክብሪ ኣለኒ - ክብረት ይሃበለይ!” ኢሉ
- ህዝባዊ ድምጺ ከምዝዕወት ገሊጹ፤ ኣብቲ ገና ዝካየድ ዘሎ ምቝጻር ድምጺ፡ ኣብዝሓ ህዝባዊ ድምጺ’ውን ክዕወተሉ ከምዝኽእል ገሊጹ ኣሎ። ኣብ 2016 ብጠቕላላ ብዝሒ ድምጺ፤ ሂላሪ ክሊንተን በሊጻቶ ከምዝነበረት ኣይርሳዕን። ሕጂ ግን ብዅሉ ኵሉ እዩ ዝመርሕ ዘሎ። “ኣመሪካ፡ መዳርግቲ ዘይብሉ ጽኑዕ ሓላፍነት ሂባትና ኣላ” ኢሉ።
- ጀዲ ቫንስ “ቅኑዕ ምርጫ እዩ!”፤ ምክትሉ ክኸውን ንዝሓረዮ ጀዲ ቫንስ ዘመጐሰ ትራምፕ፡ ንዕኡ ምምራጽ ዝወሰዶ ስጕምቲ ቅኑዕ ምዃኑ ኣስሚሩሉ። ቫንስ ብወገኑ፡ “ዝዓበየ ታሪኻዊ ፖለቲካዊ ምልሶት” ክብል ነቲ ዛጊት ተጐናጺፎምዎ ዘለዉ ዓወት ጸንቢሉ።
- ኢሎን መስክ “ኮኾብ” እዩ፤ ክፋል መደረ ትራምፕ፡ ነቲ ኣብዚ መረጻ ምርኡይ ዝዀነ ቢልዮነር ኢሎን መስክ ዝተወፈየ ኰይኑ፡ “ዓጀብ ዝዀነ ሰብኣይ!” ክብል ወዲስዎ።
