ኣብ ኢትዮጵያ ኣብ ዝሓለፈ 24 ሰዓታት 268 ሰባት ኮሮናቫይረስ ተረኸቢብዎም

ቀጥታዊ ሸፈነ

1. 12 ሰነ 2020ኣብ ኣሜሪካ ኣብ ውሽጢ ሓደ መዓልቲ ልዕሊ 900 ሰባት ሞይቶም

   

   ምንጪ ስእሊ, Getty Images

   ኣብ ኣሜሪካ ኣብ ውሽጢ ዝሓለፉ 24 ሰዓታት ጥራይ 941 ሰባት ብኮሮናቫይረስ ሞይቶም።

   እዚ ድማ ንቑጽሪ ብሓፈሻ ኣብታ ሃገር ዝሞቱ ሰባት ናብ 113 ሽሕን 803 ኣብጺሕዎ'ሎ።

   ኣብታ ሃገር ብኮሮናቫይረስ ዝተትሓዙ ሰባት 2 ሚልዮንን 22 ሽሕን 488 ከምዝበጽሑ መረዳእታ ዩኒቨርሲቲ ጆንስ ሆፕኪንስ የመልክት።

   መዓልታዊ ልዕሊ ፍርቂ ሚልዮን ቅምሶታት እትምርምር ኣሜሪካ ዛጊድ ልዕሊ 23 ሚልዮን ሰባት ምርመራ ኣካይዳ'ላ።

   ኣብ ዓለም በቲ ቫይረስ እተትሓዙ ዝበዝሑ ሰባት ክህልውዋ ዝኸኣለ ድማ ብዝሒ ምርመራ ክተካይድ ብምኽኣላ ከምዝኾነ ይግለጽ።

2. 12 ሰነ 2020ኣባላት ስድራ ግዳያት ኮሮናቫይረስ ንቐዳማይ ሚንስትር ጣልያን ክኸሱ እዮም

   

   ምንጪ ስእሊ, Getty Images

   ዓቃቢ ሕጊ ምርመራ ንምጅማር ንቐዳማይ ሚንስትር ጁሰፐ ኮንተ ንሎሚ ዓርቢ ቆጸሮ ኣትሒዝዎ'ሎ።

   ስድራ ግዳያት "መንግስቲ ቅልጡፍ ስጉምቲ ኣይወሰደን፤ ኣባላት ስድራና ዝሰኣንና መንግስቲ ብዝነበሮ ዕሽሽታ'ዩ" ዝብል ክሲ ኣቕሪቦም።

   እቲ ሎሚ መዓልቲ ምስ ቀዳማይ ሚንስትር ኮንተ ዝራኸብ ዓቃቢ ሕጊ፡ ለበዳ ኮሮናቫይረስ ንመጀመርታ ኣብ ዝተርኣየሉ እዋን ብዛዕባ ዝተወሰዱን ክውሰዱ ዝነበሮምን ስጉምትታት ኣመልኪቱ ሕቶታት ከቕርበሉ ትጽቢት ይግበር።

3. 12 ሰነ 2020ስግኣት ደግሲ ለበዳ ኮሮናቫይረስ ኣብ ዋጋታት መሸጣ ብርክታት ምንቁልቋል ኣኸቲሉ

   

   ምንጪ ስእሊ, AFP

   ስግኣት ደግሲ ለበዳ ኮሮናቫይረስ ዘንቀሎ ኣብ ዋጋታት ዓለምለኻዊ መሸጣ ብርክታት ምንቁልቋል ተራእዩ።

   ኣሜሪካ ቁጠባኣ ናብ ንቡር ንኽምለስ ነዊሕ ከምዝወስደላ ድሕሪ ምግላጻ ዋጋታት ዓለምለኻዊ መሸጣ ብርክታት ኣዝዮም ከምዘንቆልቆሉ እዩ ዝግለጽ ዘሎ።

   ኣብታ ሃገር እተን ዓበይቲ ዝባሃላ ሸየጥቲ ብርክታት ኣብዚ ሰሙን እዚ ዋግአን ብ7 ሚእታዊት ብምንቁልቋል ዝሓሰረ ዋጋ ኣመዝጊበን ኣለዋ።

   እቲ ምንቁልቋል ዋጋታት ኣብ ጃፓን፤ ሆንግኮንግን ቻይናን ’ውን ተራእዩ እዩ።

   ምንቁልቋል ዋጋ ነዳዲ ስዒቡ፤ መሸጣ ብርክታት ጽላታት ጸዓትን መጓዓዝያን ካብቲ ቀንዲ ዋግኡ ዝሓሰረ ኮይኑ ኣሎ።

   ምሉእ ትሕዝቶ ንምንባብ -

   ስግኣት ደግሲ ለበዳ ኮሮናቫይረስ ኣብ ዋጋታት ዓለምለኻዊ መሸጣ ብርክታት ምንቁልቋል ኣኸቲሉ

4. 12 ሰነ 2020ኣወስትራልያ ክሳብ 10 ሽሕ ሰባት ምትእኽኻብ ክተፍቅድ'ያ

   

   ምንጪ ስእሊ, EPA

   ኣወስትራልያ ልዕሎ 100 ሰባት ምትእኽኽብ ዘይፈቅድ ኣዋጃ ዝቕጽል ሰሙን ክተልዕሎ እያ።

   እታ ሃገር ካብ ወርሒ ሓምለ ጀሚሩ ክሳብ 10 ሽሕ ሰባት ዝተኣኻኸቡሎም መድረኻት ክተፍቅድ ምዃና ቀዳማይ ሚንስትር ስኮት ማሪሰን ተዛሪቡ።

   እዚ ድማ ብፍላይ ንስፖርታዊ ምትእኽኻባት ናብ ዝነበሮ ንምምላስ ዝዓለመ ከምዝኾነ ሓቢሩ።

5. 12 ሰነ 2020ሰላም ከመይ ሓዲርኩም

   

   ኣብዚ ዝዕለት ዝህልዉ ምዕባለታት ኮሮናቫይረስ ኣብ ቀጥታዊ ፈነወና ክትከታተሉ ብኽብሪ ንዕድመኩም።