ዋንጫ ዓለም 2026፡ ስጳኛ ንኻልኣይ ግዜ ዋንጫ ዓለም ዓቲራ

ስጳኛ ትማሊ ሰንበት ኣብ ዝተኻየደ ናይ ፍጻመ ጸወታ ዋንጫ ዓለም 2026፡ ንኣርጀንቲና ሓደ ንባዶ ብምስዓር እቲ ዝዓበየ ሽልማት ኩዕሶ እግሪ ዳግማይ ተዓዊታትሉ።

ክልአቲን ሃገራዊያን ጋንታታት ክሳብ ተወሳኺ ሰዓት ብዘይ ሸቶ እኳ እንተ ተፈላለያ፡ ድሕሪ ተወሳኺ ግዜ ኣከፋፋሊ ሃገራዊት ጋንታ ስጳኛ ፈራን ቶረዝ ብዘቝጸራ ሸቶ ኣርጀንቲና ተሳዒራ።

እዚ ፍጹም ዓብላልነት ስጳኛ ዝተራእየሉ፡ ልዑል ውጥረት ዝመልኦ ፍጻመ ዋንጫ ዓለም ኣብ ሜዳ ይዅን ካብ ሜዳ ወጻኢ፡ ኣብ ተወሳኺ ሰዓት ልዑል ንሕንሕን ድራማታትን ዝተራእዮ ኰይኑ ሓሊፉ ኣሎ።

ፈራን ቶረዝ ብዘመዝገባ ወሳኒት ሸቶ እቲ ንዝሓለፈ ዓወት ዋንጫ ዓለም ንምውሓስ ዝግበር ዝነበረ ጻዕሪ ኣርጀንቲና ኣብቂዑ ንስጳኛ ድሕሪ 16 ዓመታት ካልኣይቲ ዋንጫ ዓለም ከተረክባ ተገዲዳ።

እዚ ስዕረት ብፍላይ ነቲ ኣብ ዋንጫ ዓለም ናይ መወዳእታ ጸወታኡ ክኸውን ትጽቢት ዝግበረሉ እናነብዐ ካብ ሜዳ ዝወጽአ ኣርጀንቲናዊ ሊዮነል መሲ መሪር ስዕረት እዩ።

ፕረዚደንት ኣመሪካ ዶናልድ ትራምፕን ፕረዚደንት ፊፋ ጂያኒ ኢንፋንቲኖን ነቶም ተጻወትቲ ሜዳልያን ዋንጫን ክህቡ እንከለዉ፡ መራሕቲ ሓባራዊ ኣአንገድቲ ሃገራት ካናዳን ሜክሲኮን ድማ ኣብ ፍጻመ ተረኺቦም።

ወዲ 19 ዓመት ኩባርሲ ብሉጽ መንእሰይ ተጻዋታይ ናይዚ ውድድር ክኸውን ከሎ፡ ወዲ ጋንታኡ ባርሴሎና ላሚነ ያማል ኣብ ቅድሚኡ ብሉጻት ዓመታት ዝጽበዮ ዘለዎ ይመስል።

ላሚነ ያማል ወዲ 19 ዓመትን ሽዱሽተ መዓልትን ኰይኑ፡ ድሕሪ ፔለ ኣብ 1958፡ ጁሰፐ በርጎሚ ድማ ኣብ 1982 ኣብ ፍጻመ ዋንጫ ዓለም ዝተጻወተ ሳልሳይ ብዕድመ ዝነኣሰ ተጻዋታይን ሳልሳይ ዝነኣሰ ተዓዋቲን ኰይኑ ኣሎ።

ስጳኛ ኣብ ጸወታ ዋንጫ ዓለም እዚ ዓመት ዝነበራ ኣጀማምራ ዝሕል ዝበለ ኰይኑ፡ ኣንጻር ኬፕ ቨርደ ኣብ ዝገበረቶ ጸወታ ብዘይ ሸቶ ማዕረ ምፍልላያ ይዝከር።

ኣብ ፍርቂ ፍጻመ ንሃገራዊት ጋንታ ፈረንሳ ክትስዕራ ዝኸኣለት ስጳኛ፡ ብሓቂ ድማ ነዚ ድኹም ናይ መወዳእታ ዋንጫ ዓለም ብዘእምን ብቕዓት ኩዕሶ እግሪ ክትዕወተሉ ክኢላ እያ።

ኣሰልጣኒኣ ልዊስ ደ ላ ፉኤንተ ብዝነኣድ ህድኣት እዩ ነታ ጋንታ መሪሑዋ፤ ንሱ ኣብ በርሊን - ጀርመን፡ ንእንግሊዝ ስዒራ ፍጻመ ዩሮ 2024 ክትዕወት ​​እንከላ'ውን መሪሕዋ'ዩ።

ተጻዋቲ ሃገራዊት ጋንታ ኣርጀንቲና ፈርናንደዝ ብቐይሕ ካርድ ካብ ሜዳ ምስ ወጽአ ስጳኛ ዝያዳ ብልጫ ነይሩዋ። ኣብ ምክልኻል ድማ ሳሕቲ ትሽገር ነይራ፣ ዊልያምስ ከም ተቐያሪ ምእታው ድማ እቲ ጸወታ ክቕየር ጀሚሩ።

እዚ ምስ ገለ ካብቲ ኣብዚ ውድድር ዝተራእየ ሕሉፍ ጸወታታት ዝዳረግ'ኳ እንተዘይኰነ፡ ዋንጫ ዓለም ግን ዝግብኦ ተዓወቲ ረኺቡ።

ወዲ 39 ዓመት ሜሲ ኣብዚ ዋንጫ ዓለም ሸሞንተ ሸቶታት ከመዝግብ ከሎ፡ ዳግማይ መራሒን መነቓቕሕን ኣርጀንቲና ኰይኑ ኣሎ፤ ኣብ ፍርቂ ፍጻመ ኣንጻር እንግሊዝ ኣብ ዘካየደቶ ጸወታ፡ 2ብ1 ከም ዝተዓወተት ይዝከር።

ክንዮ'ቲ ጸወታ፡ ሓደ ካብቲ ዓቢ መዛረቢ ነጥብታት እቲ ምሸት፡ ብሱፐር ቦውል ዝተደገፈ ናይ ዕረፍቲ ምርኢት'ዩ ነይሩ።

ሻኪራ፡ ማዶና፡ ቢቲኤስ፡ ጃስቲን ቢበርን በርና ቦይን ኣብቲ ብኮልድፕለይ'ስ ክሪስ ማርቲን ዝተዳለወ ዝተናውሐ ዕረፍቲ መድረኽ ተረኺቦም ሙዚቃዊ ምርኢት ኣቕሪቦም'ዮም።

ስጳኛ ኣብ ጸወታ ደቂ ተባዕትዮን ደቂ ኣንስትዮን ዘለዋ መስተንክር ዓብላልነት ይቕጽል ኣሎ።

ቅድሚ ክልተ ዓመት ኣብ በርሊን ሻምፕዮን ኤውሮጳ ኰይና እያ፤ ብሰንበት ኣብ ኒውጀርሲ ኣብ ዝተኻየደ ፍጻመ ዋንጫ ዓለም ድማ ንኣርጀንቲና 1ብ0 ብምስዓር ሻምፕዮን ዓለም ኰይና ኣላ።

ብኽልቲኡ ጾታ ተዓወቲት ​​ዋንጫ ዓለም ዝዀነት ቀዳመይቲ ሃገር እያ፤ ኣብ 2023 ኣብ ሲድኒ ኣብ ዝተኻየደ ፍጻመ ዋንጫ ዓለም ደቂ ኣንስትዮ ንእንግሊዝ ስዒራታ።

እዚ ጥራይ ኣይኰነን፤ ደቂ ተባዕትዮ ኣብ 2023 ንኔሽንስ ሊግ፡ ኣብ ኦሎምፒክ 2024 ድማ ወርቂ ክዕወቱ እንከለዉ፡ ደቂ ኣንስትዮ ድማ ኣብ ክልቲኡ 2024ን 2025ን ኔሽንስ ሊግ ተዓዊተን።

ብሓቂ ኣብ ዝሓለፈ ሓሙሽተ ዓመታት ስጳኛ ካብ ትሕቲ 17 ዓመት ክሳብ ላዕለዋይ ደረጃ ብዘገርም 16 ዋንጫ ዓለምን ኤውሮጳን ተዓዊታ ኣላ።