ኣብ ፍሎሪዳ ካብ መኪና ዝተኻዕወ ቢራ ጽርግያ ዓጽዩ

ኣብ ፍሎሪዳ፡ ሓሙሽተ ዓበይቲ መካይን ድሕሪ ምግጫወን ሓደ ቀንዲ መንገዲ ብታኒካታት ቢራ ከምዝተዓጸወ ተገሊጹ።

እቲ ሓደጋ ብረቡዕ ዘጋጠመ ኰይኑ፡ ‘ኩልስ ላይት’ ዝተባህለ ቢራ ጽዒና ዝነበረት ዓባይ መኪና፡ ኣብ ደረት ጽርግያ ተጸጊዐን ምስ ዝነበራ መካይን ድሕሪ ምግጫዋ እዩ ተኸሲቱ።

ምክትታል ጽርግያታት ፍሎሪዳ ዝዘርግሖ ስእሊ፡ እቲ ታኒካታት ቢራ ካብ ምብዝሑ ዝተላዕለ እቲ ጽርግያ ተሸፊኑ የርኢ።

ኣብ ሰብ ግን ዝበጽሐ ጉድኣት ቀሊል ምዃኑ ተገሊጹ።

ብመሰረት ጸብጻብ ‘ታምፓ ቤይ ታየምስ’፡ ኣብቲ ጽዑቕ ምንቅስቓስ ዘለዎ መስመር፡ ክልተ ተሰሓቢ ዘለወን ዓበይቲ መካይን ረቡዕ ንግሆ ድሕሪ ምግጫወን ተጸጊዐን ነይረን።

ድሒረን ካልኦት ክልተ ዓበይቲ መካይንን ሓንቲ ፒክኣፕን ክውሰኽአን እንከለዋ፡ እታ ሓምሸይቲ፡ ነቲ ቢራ ጽዒና ዝነበረት ዓባይ መኪና፡ ኣቐዲማ ደው ክትብል ብዘይምኽኣላ ምስ’ተን ተጸጊዐን ዝነበራ መካይን ከምዝተጋጨወት ተፈሊጡ።

ብዘይካ እቲ ቢራ፡ ሓንቲ ካብተን መካይን፡ ባዕጢ ስሚንቶ ጽዒና ብምንባራ’ውን ኣብቲ ጽርጊያ ከምዝተኻዕወ ተገሊጹ።

እቲ ጽርግያ ድሕሪ ሰዓታት ኣገልግሎት ምሃብ ከምዝጀመረ’ውን ተገሊጹ።