ናይጀርያ፡ ሓይልታት ጸጥታ 13 ሽሕ ሰላማውያን ሰባት ቀቲሎም - ጸብጻብ

ሓይልታት ጸጥታ ናይጀርያ ኣብ ዝሓለፉ 10 ዓመታት ልዕሊ 13 ሽሕ ሰላማውያን ሰባት ከም ዝቐተሉ ሓደ መጽናዕቲ ገሊጹ።

እዚ ኣብ ኣፍሪቃ ዴሞክራስን ሰብኣዊ መሰላትን ኣብ ምዕባይ ዝሰርሕ ማእከል ልምዓትን ዴሞክራስን ዝተባህለ ዘይመንግስታዊ ትካል ዝተኻየደ መጽናዕቲ እዩ።

እቲ ማእከል ኣብ ዘውጽኦ ጸብጻብ ድማ ኣሽሓት ሰባት ግዳያት ስቅያት፣ ዘይሕጋዊ ማእሰርትን ቕትለትን ከም ዝኾኑ ብምግላጽ እዚ ብዘይምሕረት "ልሙድ" ይኸውን ኣሎ ኢሉ።

ሰብ መዚ ናይጄሪያ ክሳብ ሕጂ ነዚ ጸብጻብ ዝምልከት ዝሃቡዎ ርኢይቶ የለን።

እቶም መጽናዕቲ ዘካየዱ ሰባት ግን ንዝሓለፉ ክልተ ዓሰርታት ዓመታት ኣብ ብርክት ዝበሉ ከባቢታት እታ ሃገር ሰብኣዊ መሰላት፣ ናጽነት ፕረስን ተሳትፎ ህዝቢ ኣብ ምሕደራን ኣመልኪቱ መጽናዕቲ ገይሮም።

ኣብቲ ጸብጻብ ድማ ሓይልታት ጸጥታ እታ ሃገር ኣብ ልዕሊ ተገንጸልቲ ሓይልታትን "ኣሸበተርትን" ከምኡ'ውን ሰላማውያን ሰልፍታት ተቓውሞምን ንምቅላስ "ልዕሊ ዓቐን ሓይሊ" ይጥቀሙ'ዮም ይብል።

ብተወሳኺ ሰብ መዚ ነቲ ኣብ ዝሓለፈ ዓመት #EndSARS ብዝብል ጎስጓስ ዝተኻየደ ተቓውሞ ዝነበረ ጭካነ ፖሊስ ዳህሲሱ ኣሎ።

ናይጄሪያውያን፡ እቲ ሳርስ ብዝብል ዝፍለጥን ስርቂ ከወግድ ዝተጣየሰን ፍሉይ ሓይሊ ፖሊስ ክውገድ ይጠልቡ። #EndSARS ዝብል 'ሃሽታግ' ድማ ቅድሚ ክልተ ዓመት እዩ ጀሚሩ።

ሕቶ ተቓወምቲ ሳርስ እንታይ'ዩ?

'#EndSARS' ወይ ድማ ሳርስ የብቅዕ፡ ዝብል ጎስጓስ ነዞም ዝስዕቡ ሓሙሽቶ ሕቶታት የልዕል

እቲ ማእከል ስርጸት ዴሞክራሲ እዞም ክስተታት ኣብ ሞንጎ ዜጋታት እታ ሃገር ፍርሒ ክዓስል ገይሮም እዩ ኢሉ።

ስለ ዝኾነ ድማ ሓይልታት ጸጥታ ኣብ ዙርያ ኣተሓሕዛ ሰብኣዊ መሰላት ስልጠና ክወሃቦምን ግህሰት ዝፈጸሙ ተሓተትቲ ክኾኑን ክጽውዕ እንከሎ ዜጋታት ሙሉእ ንሙሉእ ኣብ ምሕደራን ልምዓትን ተሳተፍቲ ክኾኑን ኣለዎም ክብል ተላብዩ።