యుక్రెయిన్, రష్యా మధ్య ఏయే
ప్రాంతాల్లో యుద్ధం జరుగుతోందో డిఫెన్స్ థింక్టాంక్ ద రాయల్ యునైటెడ్ సర్వీసెస్
ఇన్స్టిట్యూట్ రీసెర్చ్ ఫెలో జస్టిన్ బ్రోంక్ బీబీసీ టుడే ప్రోగ్రాంలో చెప్పారు.
మధ్య కీయెవ్లో రష్యా ఇప్పటికీ
క్రూయిజ్, బాలిస్టిక్ క్షిపణులను ప్రయోగిస్తున్నారు. కీయెవ్ ఉత్తర శివార్లలో భీకర
యుద్ధం కొనసాగుతోంది. కానీ, రష్యా సైనిక సామర్థ్యం పరిమితంగా ఉంది.
రష్యా ఆర్మీ సింగిల్ బెటాలియన్
ద్వారా చిన్న చిన్న దాడులు చేస్తోంది. దీంతో అది మరింత ముందుకు వెళ్లడానికి వీలు
కావడం లేదు.
బ్రోంక్ వివరాల ప్రకారం రష్యా
ప్రస్తుతం కీయెవ్ సిటీ సెంటర్ను చేజిక్కించుకునే స్థితిలో లేదు. రష్యా ఆర్మీ దగ్గర
ప్రస్తుతం పోరాడ్డానికి ఉన్న బలగాలతో అది సాధ్యం అయ్యేలా కనిపించడం లేదు.
అయితే, కాల్పుల విరమణ చర్చల్లో
యుక్రెయిన్ మీద ఆధిపత్యం సాధించడానికి కీయెవ్ మీద తమ ఒత్తిడి పెంచడాన్ని రష్యా
కొనసాగిస్తోంది.
మంగళవారం రష్యా నావికాదళం మరింత
ముందుకెళ్లి రేవు నగరం ఒడెసాపై భీకరంగా బాంబుల వర్షం కురిపించింది. ఆ తర్వాత
వెనక్కు వెళ్లింది. కానీ, బుధవారం అది మరోసారి నగరానికి దగ్గరగా వచ్చింది.
ఒడెసాపై రష్యా పూర్తి సామర్థ్యంతో
దాడులు జరిగితే యుక్రెయిన్కు ముప్పు ముంచుకురావచ్చు. కానీ, నావికాదళానికి సాయం అందించాల్సిన
పదాతి దళం దానికి చాలా దూరంలో ఉండడంతో రష్యా ఇప్పటికీ అలాంటి దాడులు చేసే స్థితిలో
లేదు.
మికొలేవ్ నగరంలో యుక్రెయిన్
సైన్యం నుంచి రష్యా ఆర్మీకి తీవ్ర సవాలు ఎదురవుతోంది. అది ఒడెసా మీద సముద్రంలోంచి దాడులు
చేస్తే, యుక్రెయిన్ సైన్యానికి భారీ నష్టం కలగవచ్చు. రష్యా ఇప్పుడు అలా దాడులు
చేస్తుందా లేదా చూడాలి.
రష్యా ఆక్రమణలో ఉన్న లుహాన్స్క్
చుట్టుపక్కల భీకర పోరు కొనసాగుతోంది. రష్యా సైన్యం ఇక్కడ నుంచి పశ్చిమ ప్రాంతంలోని
నిప్రో వైపు ముందుకెళ్లే ప్రయత్నం చేస్తోంది.
అది దక్షిణాన తమ సైన్యంతో కాంటాక్ట్
కొనసాగించడానికి ఈ చర్యలు చేపడుతోంది.
అది ఇందులో సఫలమైతే, దోన్బస్లో
రష్యా దళాలు యుక్రెయిన్ సైన్యాన్ని చుట్టుముట్టే ప్రమాదం ఉంది.