You’re viewing a text-only version of this website that uses less data. View the main version of the website including all images and videos.
அமெரிக்க அதிபர் தேர்தல் முடிவுகள் இன்னும் முழுமையாக அறிவிக்கப்படாத போதும் அதிபராவதற்கு தேவையான 270 தேர்தல் சபை வாக்குகளின் எண்ணிக்கையை கடந்து மேலும் பல வாக்குகள் பைடனுக்கு சாதகமாக கிடைத்துள்ளன.
அமெரிக்க அதிபராக தன்னை தேர்வு செய்த நாட்டு மக்களுக்கு ஜனநாயக கட்சி வேட்பாளர் ஜோ பைடன் நன்றி தெரிவித்துள்ளார்.
இது தொடர்பாக அவர் தனது ட்விட்டர் பக்கத்தில், நமக்கு முன்னால் உள்ள பணிகள் கடினமாக இருக்கும். ஆனால் இதை நான் உங்களுக்கு உறுதியளிக்கிறேன்: நீங்கள் எனக்கு வாக்களித்தாலும் வாக்களித்திருக்காவிட்டாலும் நான் எல்லா அமெரிக்கர்களுக்குமான ஒரு அதிபராக இருப்பேன் . நீங்கள் என் மீது வைத்திருக்கும் நம்பிக்கைக்கு பாத்திரமாக நான் இருப்பேன் என்று கூறியுள்ளார்.
2016ஆம் ஆண்டில் நடந்த அமெரிக்க அதிபர் தேர்தலின்போதும் தற்போதைய அதிபர் தேர்தலின்போதும் களத்தில் இருந்த குடியரசு கட்சி, ஜனநாயக கட்சி வேட்பாளர்களின் வாக்கு சதவீதம் மிக முக்கிய கவனத்தை பெற்றுள்ளது.
நடந்து முடிந்த இரு தேர்தல்களிலுமே இரு கட்சி வேட்பாளர்களுக்கும் இடையிலான வாக்குகள் சதவீத இடைவெளி மிகவும் குறைவு.
2016இல் ஜனநாயக கட்சி வேட்பாளர் ஹிலாரி கிளின்டன் 47.5 சதவீத வாக்குகளும், குடியரசு கட்சி வேட்பாளர் டொனால்ட் டிரம்ப் 48.2 சதவீத வாக்குகளும் பெற்றிருந்தனர்.
2020-ஆம் ஆண்டு தேர்தலில் ஜோ பைடன் 49.6 சதவீத வாக்குகளையும் டொனால்ட் டிரம்ப் 49.1 சதவீத வாக்குகளையும் பெற்றுள்ளனர்.
அமெரிக்காவில் 2021ஆம் ஆண்டில் அதிபராவதற்கு தகுதி பெற்றுள்ள ஜோ பைடனின் அரசில் துணை அதிபராகும் தகுதியைப் பெற்றிருக்கிறார் கமலா ஹாரிஸ்.
இதன் மூலம் அமெரிக்க துணை அதிபர் பதவிக்கு தேர்வான முதல் கருப்பின மற்றும் முதல் ஆசிய அமெரிக்க பெண்ணாகிறார் தமிழகத்தை பூர்வீகமாக கொண்ட கமலா ஹாரிஸ்.
அவர் கடந்து வந்த பாதை இதோ: அமெரிக்க துணை அதிபராகும் இந்திய வம்சாவளி பெண் - யார் இவர்?
அமெரிக்க அதிபர் பதவிக்கான போட்டியில் மூன்றாவது முயற்சியாக முதலிடத்துக்கு தகுதி பெற்றிருக்கிறார் ஜோ பைடன். ஆனால், அதற்கு அவர் கொடுத்த விலைகள் ஒன்றிரண்டு தசாப்தங்கள் அல்ல.
1987ஆம் ஆண்டில் ஒரு முறையும், 2008ஆம் ஆண்டில் இரண்டாவது முறையும் அதிபராகும் போட்டியில் இருந்த அவரால், தனது 77ஆவது வயதில்தான் அப்பதவிக்கான போட்டியில் முதலிடத்துக்கு முன்னேற முடிந்திருக்கிறது.
அமெரிக்க அதிபர் தேர்தலில் ஜோ பைடன் வெற்றி பெறுவதற்கான தேர்தல் சபை வாக்குகளை பெற்றுள்ளார். பெரும்பான்மைக்கு தேவையான 270 வாக்குகளின் பலத்தை கடந்து அவருக்கு 273 தேர்தல் சபை வாக்குகள் இருப்பதாக பிபிசி கணித்துள்ளது.
அமெரிக்க தேர்தலில் நானே அதிக அளவில் வென்றேன் என்ற ஒற்றை வரியை தனது ட்விட்டர் பக்கத்தில் குறிப்பிட்டுள்ளார் டொனால்ட் டிரம்ப். முன்னதாக, மற்றொரு பதவில் தனது வழக்கறிஞர்கள் அமெரிக்க நேரப்படி காலை 11.3 மணியளவில் செய்தியாளர்கள் சந்திப்பை நடத்துவார்கள் என்று குறிப்பிட்டிருந்தார் டிரம்ப். பிறகு அந்த பதிவை நீக்கி விட்டு, மிகப்பெரிய செய்தியாளர் சந்திப்பு நடக்கப்போவதாக அவர் கூறியுள்ளார்.
பென்சில்வேனியா மாகாணத்தில் கிட்டத்தட்ட வாக்குகள் முழுமையாக எண்ணி முடிக்கப்பட்டுள்ள நிலையில், அதன் முடிவுகள் எப்போது வேண்டுமானாலும் வரலாம் என்ற நிலை உள்ளது. அந்த மாகாணத்தில் ஜோ பைடனுக்கு சாதகமாக முடிவுகள் வந்தால், அவர் அமெரிக்க அதிபராவது கிட்டத்தட்ட உறுதியாகி விடும்.
இந்த நிலையில், டிரம்ப் தரப்பு நடத்தவிருக்கும் செய்தியாளர் சந்திப்பு முக்கியத்துவம் வாய்ந்ததாக கருதப்படுகிறது.
அமெரிக்க அதிபர் டொனால்ட் டிரம்ப் தரப்பு, இன்னும் சில நிமிடங்களில் பென்சில்வேனியாவில் செய்தியாளர்களை சந்திக்கப் போகிறது. இந்த தகவலை டிரம்ப் தனது ட்விட்டர் பக்கத்தில் அறிவித்துள்ளார்.
இது தொடர்பாக தனது வழக்கறிஞர்கள் செய்தியாளர் சந்திப்பை நடத்துவார்கள் என்று முதலில் கூறியிருந்த டிரம்ப், அந்த ட்விட்டர் பதிவை நீக்கினார்.
ஜனநாயக கட்சியின் துணை அதிபர் வேட்பாளரான கமலா ஹாரிஸ், தனது அத்தையை (கணவரின் தாய்) முதன் முதலாக சந்தித்தபோது அவர் எப்படி நடந்து கொண்டார் என்பதை ஒரு நேர்காணலில் விவரிக்கும் காணொளி, சமூக ஊடகங்களில் வைரலாகி வருகிறது.
அந்த காணொளியில், தனது கணவரின் தாய் பார்பரா எமோஃப் தன்னை முதலில் சந்தித்தபோது, தனது கன்னத்தில் கை வைத்ததாகவும் அப்போது அவர், "ஓ இவளை பாருங்களேன். தொலைக்காட்சியில் பார்ப்பதை விட இவள் அழகாக இருக்கிறாள். மைக் இவளை பாருங்களேன்," என்று அவரைப் போலவே பேசி சிரிப்பை அடக்க முடியாமல் விழுந்து, விழுந்து சிரிக்கும் காட்சி இடம்பெற்றிருந்தது.
இந்த ட்விட்டர் பகிர்வு காணொளியை சனிக்கிழமை பார்த்த ஆயிரக்கணக்கானோரும் அதற்கு லைக்குகளை குறிப்பிட்டு தங்களின் உணர்வுகளை வெளிப்படுத்தி வருகிறார்கள்.
அமெரிக்கர்கள் சனிக்கிழமை காலையில் விழித்தெழத் தொடங்கிய நிலையில், பென்சில்வேனியா வாக்கு எண்ணிக்கையில் ஒரு வகை மோசடி தொடருவதாக டொனால்ட் டிரமப் ஆதாரமின்றி குற்றச்சாட்டுகளை முன்வைத்தார்.
இதற்கிடையே, பென்சில்வேனியா மாகாணத்தில் தேர்தல் நாளுக்கு பிறகு, வாக்குப்பதிவு நாளில் பதிவான வாக்குகள் என்ற குறிப்புடன் வரும் வாக்குகளை தொடர்ந்து எண்ணலாம் என்று அங்குள்ள நீதிமன்றம் அனுமதி அளித்துள்ளது.
அதே சமயம், பென்சில்வேனியா வாக்கு எண்ணிக்கையை நெருக்கமாக கண்காணிக்க அனுமதிக்கக் கோரிய டிரம்ப் பிரசார அணியின் கோரிக்கையை நீதிமன்றம் ஏற்றுக்கொண்டது.
இதேவேளை வாக்கு எண்ணிக்கை மோசடி தொடர்பாக டிரம்பின் இடுகை பதிவிட்ட அரை மணி நேரத்தில், அதற்கு மேலே "இந்த கருத்துகள் விவாதிக்கத்துக்குரியது. அது தேர்தல் அல்லது உள்ளூர் நடைமுறைகள் பற்றி தவறாக வழிநடத்துவதாக இருக்கலாம்" என்ற எச்சரிக்கை குறிப்பை ட்விட்டர் நிறுவனம் வெளியிட்டது.
அமெரிக்க அதிபர் தேர்தலில் இதுவரை தெளிவான முடிவுகள் வெளிவராத நிலையில், டென்மார்க்கின் முன்னாள் பிரதமர் லார்ஸ் லுக்கே ராஸ்முசென் டொனால்டு டிரம்புக்கு அறிவுரை வழங்கியுள்ளார்.
கடந்த ஆண்டு நடந்த தேர்தலில் தோல்வியடைந்தவுடன், தனது அலுவலகத்திலிருந்து வெளியேறியதை குறிக்கும் புகைப்படத்தை ட்விட்டரில் பதிவிட்டு டிரம்பை டேக் செய்துள்ள அவர், "ஒரு சிறு அறிவுரை... நீங்கள் தேர்தலில் தோல்வி அடைந்தால் இப்படி வெளியேறுவதே மரியாதையுடன் கூடிய சரியான வழியாக இருக்கும்" என்று அவர் குறிப்பிட்டுள்ளார்.
அமெரிக்க அதிபர் தேர்தலில் மக்கள் எந்த பிரச்சனைகளை முதலாக கொண்டு தங்களது விருப்பத்திற்குரிய வேட்பாளரை முடிவு செய்து வாக்களித்தார்கள் என்ற கேள்விக்கான பதில் தேர்தலுக்கு பிந்தைய கருத்துக்கணிப்பின் மூலம் தெரியவந்துள்ளது.
கொரோனா வைரஸால் கடுமையாக பாதிக்கப்பட்டுள்ள நாட்டை மீட்டெடுப்பேன் என்று கூறி ஜனநாயக கட்சியின் வேட்பாளர் ஜோ பைடன் பிரசாரம் செய்த நிலையில், அமெரிக்க மக்களில் பலர் கொரோனாவால் பாதிக்கப்பட்டுள்ள பொருளாதாரத்தை சீரமைப்பதற்கே அதிக முக்கியத்துவம் கொடுத்ததாக தெரியவந்துள்ளது.
அதற்கடுத்தடுத்த இடங்களை இன சமத்துவமின்மை, கொரோனா வைரஸ் பெருந்தொற்று, பாதுகாப்பு, சுகாதாரம் உள்ளிட்டவை பிடித்துள்ளன.
அமெரிக்க அதிபர் தேர்தலில் முடிவை நிர்ணயிக்கும் முக்கிய மாகாணங்களில் ஒன்றாக விளங்கும் நெவாடாவில் ஜனநாயக கட்சியின் வேட்பாளர் ஜோ பைடன் டிரம்பை விட 22,657 வாக்குகள் அதிகம் பெற்று தொடர்ந்து முன்னிலை வகித்து வருகிறார். இந்த மாகாணத்தில் இதுவரை 91 சதவீத வாக்குகள் எண்ணப்பட்டுள்ளதாக பிபிசிக்கு கிடைத்துள்ள தகவல்கள் தெரிவிக்கின்றன.
குறிப்பாக, இந்த மாகாணத்திலுள்ள கிராமப்புற பகுதிகளில் டிரம்புக்கு ஆதரவு அதிகமாக காணப்படுகிறது. அதேபோன்று, மக்கள் தொகை அதிகமுள்ள பகுதிகளில் பைடன் தொடர்ந்து வாக்குகளை பெற்று வருகிறார்.
இந்த நிலையில், நெவாடா மாகாணத்தில் இன்னும் எண்ணப்பட வேண்டியுள்ள பெரும்பாலான வாக்குகள் கிளார்க் என்னும் பகுதியை சேர்ந்தவை என்றும் அது பைடனுக்கு ஆதரவு மிகுந்து காணப்படும் இடங்களில் ஒன்றாக உள்ளதாகவும் கூறப்படுகிறது.
இந்தியாவுக்கும் அமெரிக்காவுக்கும் இடையிலான உறவு எப்போதும் இல்லாத வகையில் புதிய உச்சத்தை தொட்டிருக்கும் நிலையில், தற்போது அமெரிக்காவின் அடுத்த அதிபரை தேர்ந்தெடுப்பதற்கான தேர்தல் முடிவு கட்டத்தை நெருங்கியுள்ளது.
வெற்றி பெறுவது டிரம்பாக இருந்தாலும், ஜோ பைடனாக இருந்தாலும், அடுத்த அதிபரால் இந்தியாவுக்கு என்ன செய்ய முடியும்?
அமெரிக்க அதிபரின் அதிகாரபூர்வ இல்லமான வெள்ளை மாளிகையின் தலைமை பணியாளர் மார்க் மெடோஸுக்கு கொரோனா வைரஸ் நோய்த்தொற்று பாதிப்பு இருப்பது உறுதிசெய்யப்பட்டுள்ளது.
அடிக்கடி பொதுவெளியில் முகக்கவசம் அணியாமல் காணப்பட்டு வந்த இவர்தான் டிரம்பின் நெருங்கிய வட்டத்தில் கோவிட்-19 நோய்த்தொற்றுக்கு உள்ளாகும் சமீபத்திய நபராவார்.
அமெரிக்க அதிபர் தேர்தலில் பதிவான வாக்குகளை எண்ணும் பணி கடந்த நவம்பர் 3ஆம் தேதி முதல் நடந்து வந்தாலும் இன்னமும் ஒரு தெளிவான முடிவு கிடைக்காதது பலரது பொறுமையையும் சோதித்து இருக்கலாம்.
ஆனால், அமெரிக்க அதிபர் தேர்தல் வரலாற்றில் முடிவுகள் வெளியாவதில் தாமதம் ஏற்படுவது இது முதல் முறையல்ல. ஆம், கடந்த 2000ஆவது ஆண்டு நடந்த தேர்தலில் ஜனநாயக கட்சியின் வேட்பாளர் அல் கோருக்கும், குடியரசு கட்சியின் வேட்பாளர் ஜார்ஜ் டபிள்யூ புஷூக்கும் இடையே கடுமையான போட்டி நிலவியது. முடிவுகளில் சர்ச்சை ஏற்பட்டதால், வேட்பாளர்கள் நீதிமன்றத்துக்கு செல்ல 35 நாட்களுக்கு பிறகே தீர்ப்பு வெளிவந்து, அதிபராக புஷ் பதவி ஏற்றார்.
எனினும், அமெரிக்க அதிபர் தேர்தல் வரலாற்றிலேயே முடிவுகள் வெளிவர அதிக காலம் பிடித்த தேர்தல் நடந்தது 1876ஆம் ஆண்டில்தான். அப்போது, முடிவுகள் வெளிவர நான்கு மாதங்கள் ஆகின.
அமெரிக்க அதிபர் தேர்தலில் இன்னும் இறுதி முடிவுகள் வெளிவராத நிலையில், ஜனநாயக கட்சியின் வேட்பாளர் ஜோ பைடனுக்கு பிஜி நாட்டின் பிரதமர் பிராங்க் பைனிமராமா வாழ்த்துத் தெரிவித்து ட்விட்டரில் பதிவிட்டுள்ளார்.
மேலும், பருவநிலை மாற்றத்திலிருந்து உலகை காக்கும் பணியிலும், கொரோனாவிலிருந்து பொருளாதாரத்தை மீள்கட்டமைக்கும் முயற்சியிலும் அமெரிக்கா இணையும் என்று அவர் தனது நம்பிக்கையையும் வெளிப்படுத்தியுள்ளார்.
தற்போதைய நிலவரப்படி மாகாணங்களின் சமீபத்திய நிலவரம் இதுதான்: பிபிசியின் நியூயார்க் செய்தியாளர் நிக் பிரையன்ட், பென்சில்வேனியாவில் மேலதிக முடிவுகளை எதிர்பார்ப்பதாக கூறியுள்ளார். அந்த முடிவும் ஜோ பைடனுக்கு சாதகமாகவே இருக்கலாம் என்று அவர் கணித்துள்ளார். பிபிசி கணிப்புகளின்படி அந்த மாகாணத்தில் 96 சதவீத வாக்குகள் எண்ணப்பட்டுள்ளன.
அமெரிக்க தேர்தல் முடிவுகள் தொடர்பான தகவல்களை அறிய இப்போதுதான் நீங்கள் இந்த பக்கத்தில் இணைந்தீர்கள் என்றால், இதுதான் இதுவரை நடந்த சமீபத்திய முன்னேற்றங்கள்.
அதிபராக தகுதி பெற தேவைப்படும் தேர்தல் சபை (எலக்டோரல் காலேஜ்) வாக்குகள் 270 என்ற எண்ணை எட்டும் போட்டியில், டொனால்ட் டிரம்பை விட 17 வாக்குகள் கூடுதலாக பெற்று முன்னிலை வகிக்கிறார் ஜோ பைடன்.
தேர்தலில் பதிவான வாக்குகள் எண்ணப்பட்டு தனக்கு முன்னிலை நிலவரம் தொடரும் வேளையிலும், தான்தான் வெற்றியாளர் என்ற வார்த்தையை பயன்படுத்தாமல் ஜோ பைடன் தவிர்த்து வருகிறார். அனைத்து வாக்குகளும் எண்ணப்படும்வரை அமைதி காக்குமாறு அவர் தொடர்ந்து கேட்டுக் கொண்டு வருகிறார். ஆனாலும், முடிவில் தனக்கே வெற்றி கிடைக்கும் என்ற நம்பிக்கையை அவர் வெள்ளிக்கிழமை இரவு கட்சித் தொண்டர்களிடையே பேசியபோது பைடன் வெளியிட்டார்.
கோபத்தையும் ஆர்ப்பாட்ட உணர்வையும் பின்னுக்குத் தள்ளுமாறு கூறிய பைடன், நாம் எதிரெதிர் அணிகளில் இருக்கலாம் ஆனால், எதிரிகள் அல்ல என்றும் தெரிவித்தார்.
போர்க்கள மாகாணங்களில் டிரம்பை விட பைடனே தற்போதைய நிலவரப்படி முன்னிலை வகிக்கிறார்.
பென்சில்வேனியா: சமீபத்திய நிலவரப்படி பைடன் தற்போது 28,883 வாக்குகள் வித்தியாசத்தில் முன்னிலை வகிக்கிறார். இந்த மாகாணத்தில்தான் அதிகபட்சமாக தேர்தல் சபை வாக்குகள் உள்ளன.
அரிசோனா: இந்த மாகாணத்திலும் டிரம்பை விட பைடன் 29,861 வாக்குகள் பெற்று முன்னிலை வகிக்கிறார்.
நெவாடா: ஜனநாயக கட்சி வேட்பார் 22,657 வாக்குகள் பெற்று முன்னிலை வகிக்கிறார்.
ஜோர்ஜா: இங்கு இரு வேட்பாளர்கள் இடையே 7,248 வாக்குகள் வித்தியாசத்தில் உள்ளனர். அங்கு மெல்லிய இடைவெளி மட்டுமே நிலவுவதால், மறுவாக்குப்பதிவு நடக்கும் என்பதை அதிகாரிகள் உறுதிப்படுத்தியுள்ளனர்.
அதிபர் தேர்தலில் ஜோ பைடன் வெற்றி பெற்றது உறுதிப்படுத்தப்பட்டால், நிச்சயமாக ஆட்சியை ஒப்படைக்கும் நடைமுறைகள் அமைதியான முறையில் நடக்கும் என்று ஆளும் குடியரசு கட்சி எம்.பி மிட்ச் மெக் கொனெல் தெரிவித்துள்ளார்.
கென்டக்கி பகுதியில் செய்தியாளர்களிடம் பேசிய அவரிடம், ஆட்சிப்பொறுப்பு ஒப்படைப்பு தொடர்பாக தொடர்ச்சியாக கேள்விகள் எழுப்பப்பட்டன.
அதற்கு பதில் அளித்த அவர், "நிச்சயமாக. 1792 முதல் ஒவ்வொரு நான்கு ஆண்டுகளுக்கு ஒரு முறை ஆட்சி ஒப்படைப்பு நடைமுறை அமைதியாகவே நடந்துள்ளது" என்று கூறினார்.
ஜனநாயக கட்சியின் வேட்பாளர் ஜோ பைடனின் வீட்டுக்கு மேல் விமானங்கள் பறக்க விதிக்கப்பட்டிருந்த தடை நவம்பர் 11 வரை நீட்டிக்கப்பட்டுள்ளது.
அவரது இல்லம் டெலவேர் மாகாணம் வில்மிங்டனில் உள்ளது.
அவர் ஜனநாயக கட்சியின் அதிபர் வேட்பாளராக அறிவிக்கப்பட்டதில் இருந்து, அவரது வீட்டை சுற்றியுள்ள ஒரு கிலோ மீட்டர் சுற்றளவு வான் பரப்பில் விமானங்கள் பறக்க ரகசிய பாதுகாப்பு படையின் வேண்டுகோளின் பேரில் இந்தத் தடை விதிக்கப்பட்டது.
நவம்பர் 4 அன்று இது மூன்று கிலோ மீட்டராக விரிவுபடுத்தப்பட்டது.