காணொளி: குத்த வைத்து அமர்வது ஒருசிலருக்கு கடினமாக இருப்பது ஏன்?

'ஏசியன் ஸ்குவாட்' அல்லது குத்த வைத்து அமர்வது, இது இந்தியா, சீனா, ஜப்பான் மற்றும் ஆசியாவின் பெரும்பாலான பகுதிகளில் உள்ள மக்களின் ஒரு வகையான ஓய்வு நிலை ஆகும்.

சுற்றுலாப் பயணிகள் இந்த ஸ்குவாட்டை செய்ய முயற்சிக்கும் வீடியோக்கள் இணையத்தில் வெளியாகி வருகின்றன.

ஏன் சிலருக்கு மட்டும் இப்படிச் செய்வது எளிதாக உள்ளது, அதே சமயம் சிலருக்கு ஏன் சிரமமாக இருக்கிறது?

ஆசிய-அமெரிக்கரான மேட் சூ என்ற மொபிலிட்டி பயிற்சியாளர், 'ஏசியன் ஸ்குவாட்' என்பது மரபியல் சம்பந்தப்பட்டது அல்ல என்று கூறுகிறார்.

"உண்மை என்னவென்றால், இந்த ஸ்குவாட் அனைவருக்குமானது. ஏனெனில் நாற்காலிகள் வருவதற்கு முன்பு, அனைவரின் குளியலறைகளிலும் மேற்கத்திய பாணி கழிப்பறைகள் வருவதற்கு முன்பு, கழிவறையிலும் இதைத் தான் செய்ய வேண்டியிருந்தது. ஆனால் கடந்த 150 ஆண்டுகளில் மக்கள் சற்று உயரத்தில் அமரத் தொடங்கிவிட்டார்கள், அதனால் இந்த நிலையில் அமர்வதற்கு அவர்கள் பயிற்சி எடுப்பதில்லை." என்பது அவரது கருத்து.

இந்த நிலை டீப் ஸ்குவாட் என்றும் அழைக்கப்படுகிறது. பாதங்கள் தரையில் தட்டையாக இருக்கும், தொடைகளின் பின்புறம் கெண்டைக்கால்களின் மீது சாய்ந்திருக்கும்.

ஆசியாவில், ரயிலுக்காகக் காத்திருக்கும் போதோ அல்லது நண்பர்களுடன் இருக்கும்போதோ பலர் இப்படித்தான் அமர்ந்து ஓய்வெடுக்கிறார்கள்.

இது பெரும்பாலான மனிதர்கள் சிறுபிள்ளைகளாக இருக்கும்போது இயல்பாகவே செய்யக்கூடிய ஒரு நிலையாகும், பின்னர் படிப்படியாக இந்தத் திறனை அவர்கள் இழக்கிறார்கள்.

இந்தத் திறன் பிற்காலத்தில் உடல் இயக்கத்திற்கு பயனுள்ளதாக இருக்கும் என்று இயக்கவியல் நிபுணர்கள் கூறுகிறார்கள்.

ஆனால், ஒரு டீப் ஸ்குவாட் என்பது அனைவருக்குமானது அல்ல என்று பிசியோதெரபிஸ்டுகள் கூறுகின்றனர், குறிப்பாக முழங்கால், இடுப்பு அல்லது முதுகு வலி உள்ளவர்களுக்கு.

முழு விவரம் காணொளியில்...

-இது, பிபிசிக்காக கலெக்டிவ் நியூஸ்ரூம் வெளியீடு