Hii ni tovuti ya maandishi pekee ambayo inatumia data kidogo. Tazama toleo kuu la tovuti likijumuisha picha na video zote.
Pata maelezo zaidi kuhusu toleo hili la linalotumia kiasi kidogo cha data
Dunia yaomboleza kifo cha Rais wa Jamuhuri ya Muungano wa Tanzania John Pombe Magufuli.
Asha Juma and Dinah Gahamanyi
Jaji mkuu mstaafu mzee Joseph Sinde Warioba ameiambia BBC ana imani na Mama Samia na hana shaka lolote juu ya namna mabadiliko ya utawala yatakavyofanyika kwani katiba ya Tanzania iko wazi na itafuatwa. Zuhura Yunus alimtembelea nyumbani kwake jijini Dar es Salaam na kuzungumza naye na swali la kwanza alimuuliza ameupokeaje msiba wa rais Magufuli.
Rais wa Nigeria Muhammadu Buhari amejiunga na serikali na watu wa Tanzania katika maombolezo ya kifo cha Rais John Pombe Magufuli, aliyefariki dunia akiwa na umri wa miaka 61.
Kiongozi huyo wa Nigeria amesema Magafuli “urithi wa uzalendo na kujitolea kwa ajili ya Uafrika itaendelea kukumbukwa kote barani .”
Rais Buhari anasema Hayati rais wa Tanzania “alitumia muda wake mwingi zaidi wa maisha yake kulitumikia taifa na ubinadamu .”
Taarifa kutoka katika ofisi ya rais ya Nigeria inasema Bw Buhari “anaamini ujasiri na upendo kwa nchi wa Hayati rais wa Tanzania vilihamasisha mageuzi mbalimbali ambayo vizazi vitaendelea kuyakumbuka ”
Kwa mujibu wa Bw Buhari, John Magufuli atakumbukwa kwa mambo mbali mbali ikiwa ni pamoja na “ kupunguza ukubwa na gharama za utawala, kusisitiza kuhusu bajeti inayowalenga watu, yenye vipaumbele vya wazi kuhusu elimu na afya, na kupambana wakati wote na ubadhirifu katika matumizi ya umma.”
Kiongozi huyo wa Nigeria ametoa salamu za rambi rambi kwa familia ya marehemu “ kiongozi mwenye maono wa Tanzania”, marafiki na washirika wake, pamoja na wananchi wote wa Tanzania.
Rais Buhari amesema anaimbea roho ya marehemu ipumzike kwa Amani.
Spika wa Bunge Mheshimiwa Job Ndugai ameagiza Kamati zote za Bunge zilizokuwa katika ziara za ukaguzi wa miradi ya maendeleo mikoani kurejea Dodoma mara moja.
Hatua hiyo imechukuliwa baada ya kutangazwa kwa kifo cha Dkt. John Pombe Magufuli, Rais wa Jamhuri ya Muungano wa Tanzania kilichotokea hospitali ya Mzena, jijini Dar es Salaam.
Mheshimiwa Job Ndugai, amesema kuwa amepokea kwa huzuni na masikitiko makubwa taarifa za kifo cha Rais Magufuli.
‘’Tumempoteza Rais wetu kipenzi aliyejitoa kuwatumikia Watanzania wote kwa uadilifu, umahiri, bidii na moyo wa uzalendo wa hali ya juu. Kwa niaba ya Bunge natoa pole kwa Janeth Magufuli na familia ya marehemu, makamu wa rais pamoja na Watanzania wote kufuatia msiba huu mzito wa kitaifa.’’
Baadhi ya Wasanii wa muziki nchini Tanzania wamekuwa wakielezea hisia zao za huzuni kuhusu kifo cha rais wa nchi hiyo Dkt John Pombe Magufuli ambaye amefariki dunia jana kutokana na maradhi ya moyo.
Wasanii hao ambao ni pamoja na Diamond Platnumz, RayVanny, Jux, Marioo, Malkia Karen, Zuchu, Khadija Kopa, Christina Shusho, wamejikusanya na kuingia studio kuandaa wimbo wa pamoja wa kumuaga Rais Dkt. John Pombe Magufuli
Baadhi ya wasanii hao walielezea hisia zao kuhusu kifo cha Bw Magufuli kwenye mtandao wa kijamii wa Instagram:
Mwalimu aliyestaafu Kasara Mnaku amemkumbuka aliyekuwa mwanafunzi mwenzake – Hayati mzee John Magufuli, ambaye amefariki dunia akiwa na umri wa miaka 61.
Katika mahojiano na mwandishi wa BBC Aboubakar Famau, Bwana Mnaku amesema:
''Tuliishi katika kijiji kimoja. Tulikuwa darasa moja na tukaketi dawati moja. Katika maisha yake ya awali, hadi alipokuwa rais, tulikuwa pamoja na alikuwa rafiki yangu. Kila alipohitaji ushauri angenipigia simu na tungezungumza''.
Bw Mnaku Aliongeza: ''Tulipokuwa watoto tulikuwa na uhusiano wa karibu kweli na kusaidiana na tulipenda mno kusoma.Hili lilitusaidia kufika tulipofika, Nikawa mwalimu na yeye pia akawa mwalimu lakini hatimaye akaamua kuacha taaluma hiyo na kuhudumia nchi."
Mwanafunzi mwingine aliyesoma naye, Elias Kwaswahili, amesema:
''Tuliishi kijiji kimoja cha Rubambangwe na sote tulisomea katika shule ya msingi ya Chato. Na baadaye tukakutana katika shule ya sekondari ya Lake Mwanza''.
Elias Kwaswahili: ''Alikuwa mwanafunzi mzuri sana darasani hasa katika sayansi. Tuliona masomo ya sayansi yakiwa magumu hasa hisabati. Lakini alikuwa mzuri sana katika hesabu na hili ndili lililo msukuma kufanya masomo ya sayanasi. Hivyo ndivyo nilivyo mfahamu".
Bwana Magufuli alikuwa na shahada ya uzamili ya kemia na aliwahi kufanya kazi kama mwalimu wa sayansi na hisabati. Alikuwa mbunge mwaka 1995 na kupanda cheo hadi kuwa rais mwaka 2015.
Serikali imesema Bwana Magufuli amefariki dunia kutokana na maradhi ya moyo.
"Ni pigo kwa Afrika," asema Rais wa Malawi Lazarus Chakwera baada ya kupokea taarifa za kifo cha Rais wa Tanzania John Magufuli, 61.
"Rais Magufuli walikuwa ishara kuu ya ufufuo wa uchumi wa Afrika, na kifo chake ni pigo kubwa kwa bara hili," Bw. Chakwera aliongeza katika ujumbe wake wa Twitter.
Wakuu wa Chama cha Mapinduzi (CCM) wanatarajia kufanya kikao maalumu Jumamosi Machi 20, kufuatia kifo cha mwenyekiti wa CCM na rais wa Jamuhuri ya Muungano wa Tanzania John Pombe Magufuli.
Philip Mangula makamu mwenyekiti Tanzania bara na Mzee Ali Mohamed Shein makamu mwenyekiti Tanzania visiwani wamekubaliana kufanya kikao maalumu na kamati kuu ya halmashauri kuu ya taifa Jumamosi katika ukumbi wa Lumumba jijini Dar es salaam.
Aidha chama kitakuwa katika maombolezo kwa siku 21 sambamba na tangazo la serikali.
Maelezo zaidi:
Ni nadra kwa kiongozi wa nchi yoyote kufariki akiwa angali madarakani. Katika kipindi cha miaka 20 iliopita mkosi huo umeathiri mataifa mengi barani Afrika .
Lakini ni kwa nini vifo kama hivi vinatokea sana barani Afrika?
Raisi wa Burundi Evariste Ndayishimiye ameelezea kusikitishwa na kifo cha Rais wa Tanzania John Pombe Magufuli.
Ametuma salamu za rambirambi na dua kwa serikali,familia na watanzania kwa kumpoteza kiongozi shupavu na mzalendo wa kweli.
Shirikisho la mpira wa miguu nchini Tanzania TFF limesimamisha mechi zake zote za ndani kwa wiki mbili ili kuungana na watanzania katika maombolezo.
Aidha Kenya imehairisha mechi ya pili ya kirafiki dhidi ya Tanzania iliyopangwa kuchezwa Alhamisi hii jijini Nairobi.
Kocha Jacob Mulee,ameeleza kuwa mechi hiyo imeitishwa kufuatia kifo cha raisi wa Jamuhuri ya muungano wa Tanzania John Magufuli.
Hakuweka wazi ikiwa mechi hiyo itachezwa siku gani.
Mechi hiyo ya kirafiki ilikuwa sehemu ya maandalizi ya Kenya kushiriki michuano ya kombe la mataifa ya Afrika dhidi ya Misri na Togo zilizopangwa baadae mwezi huu.
Rais wa Rwanda, Paul Kagame ametuma salamu zake za rambirambi kupitia kurasa ya Twitter.
"Tunasikitika kumpoteza kaka na rafiki yangu, Rais Magufuli , Mchango wake katika taifa lake na kwa bara la Afrika hautasahaulika.
Salamu zangu za dhati ziende kwa familia na Watanzania.
Wanyaruanda wako pamoja na Watanzania katika wakati huu mgumu.
Rais Magufuli alifanikiwa kurudisha uhusiano mzuri na taifa la Rwanda na Tanzania baada ya mvutano wa miaka miwili kati ya mataifa hayo uliokuepo wakati wa utawala wa rais Jakaya Kikwete.
Katika safari yake nchini Rwanda, bwana Magufuli alisema alialikwa maeneo mengi na hakwenda lakini wakati rais Kagame alivyomualika ,aliamua kwenda”.
Rais Kagame alimpa rais Magufuli ng'ombe watano wakati alipotembelea Rwanda ikiwa ishara ya urafiki wa kweli na imara.
Mama Samia Suluhu Hassan ambaye amekuwa Makamu wa Rais toka mwaka 2015 sasa atakuwa mrithi wa rais John Magufuli ambaye amefariki jana Jumatano Machi 17.
Aliyekuwa mgombea urais wa chama cha upinzani nchini Uganda Robert Kyagulanyi almaarufu Bobi Wine atuma salamu za rambirambi kwa raia wa Jamuhuri ya muungano wa Tanzania.
Raisi wa Afrika Kusini, Cyril Ramaphosa, ameeleza masikitiko yake kufuatia kifo cha Rais wa Tanzania, John Magufuli.
Katika taarifa yake, raisi Ramaphosa amesema amezungumza na Makamo wa Raisi wa Tanzania, Samia Suluhu Hassan akimweleza huzuni yake na kwa niaba ya raia wa Afrika Kusini.
‘’Afrika Kusini inaungana na serikali na watu wa Tanzania katika kipindi hiki kigumu’’alisema.
Rais wa Uganda, Yoweri Mseveni ametuma salamu za rambirambi katika ukurasa wake wa Twitter.
Rais Museveni amesema, amesikitishwa sana na kifo cha Rais Magufuli.
Alikuwa kiongozi ambaye anaongoza kwa uhalisia na aliyeamini katika kukuza uchumi wa Afrika Mashariki.
Tunajumuika na Watanzania kuomboleza kifo cha mtoto wa Afrika.
Roho yake ipumzike kwa amani.
Rais wa Kenya Uhuru Kenyatta amesema kwamba amepokea kwa masikitiko makubwa kifo cha Rais wa Tanzania John Pombe Magufuli, na kutuma salamu za rambi rambi kwa mjane Janet Magufuli, serikali na watu wa Tanzania.
Rais Kenyatta amesema Magufuli alikuwa was kiongozi wa Afrika mwenye maono. ‘Nimempoteza rafiki, mwenzangu na mshirika wa karibu, alisema.
Rais Kenyatta ambaye ni mwenyekiti wa sasa wa Jumuiya ya Afrika Mashariki, ametangaza siku saba ya maombolezo kitaifa nchini Kenya kwa heshima ya hayati Rais John Magufuli.
Bendera ya Jumuiya ya Afrika Mashariki na Bendera ya Kenya zitapeperushwa nusu mlingoti katika majengo yote ya serikali nchini Kenya na katika balozi zake nje ya nchi, hadi siku Magufuli atakapozikwa.