Priya Aggarwal: Bibi harusi wa Kihindi aliyepanda farasi na kuvunja miko

Priya Aggarwal alipofika kwenye ukumbi wa harusi yake akiwa amepanda farasi mweupe, hakuwa tu umbo zuri katika vazi lake ya manjano ya dhahabu na kilemba chekundu na njano lakini pia alikuwa pigo kwa mfumo dume.

Sherehe za kijana huyo mwenye umri wa miaka 27, mapema mwezi huu, ziligonga vichwa vya habari katika mji alikozaliwa wa Ambala, katika jimbo la kaskazini mwa India la Haryana.

Video ya tukio hilo ambayo ilisambaa kwa kasi mitandaoni ilimuonyesha akiwa ameketi juu ya farasi, mikono iliyonyooshwa, akicheka, wakati familia na marafiki wakitembea kando kwenye msafara, wakisimama kucheza kila dakika chache huku bendi ikicheza muziki.

"Nilifurahi. Kila bwana harusi anajua kwamba atapanda farasi kwa ajili ya msafara wa harusi yake, lakini si jambo ambalo mabibi harusi hufanya," Priya aliambia BBC.

"Nilijihisi kama malkia, kamanda, anayeongoza msafara wangu," aliongeza huku akicheka.

Priya sio bibi harusi wa kwanza wa Kihindi kupanda farasi hadi kwenye harusi yake, kumekuwa na matukio machache katika miaka ya hivi karibuni lakini yanaweza kuwa machache sana.

Mtaalamu wa masuala ya harusi Neeta Raheja anasema ingawa bi harusi wa India mwenye haya amekuwa akionyesha mabadiliko kwa zaidi ya muongo mmoja sasa, bibi harusi anayepanda farasi "ni kauli tu".

"Sioni tena bibi-harusi ambaye anakuja ameinamisha kichwa, akiungwa mkono na marafiki na jamaa. Siku hizi, bibi harusi wanakuja na wasichana wa maua, au wamezungukwa na wasichana wanaobeba taa za udongo, wanakuja kwa magari ya kifahari au ndani ya mabehewa au magari yaliyopambwa kwa maua na muziki utakaopigwa anapoingia huchaguliwa kwa uangalifu."

Lakini kwa kuchagua kupanda farasi kwenye harusi yake, Bi Raheja asema, Priya anatoa kauli ya ufeministi.

" Anachosema hapa ni kwamba 'mimi ni sawa'," anaongeza.

Priya anasema ni babake Narinder Aggarwal aliyependekeza apande farasi kwenye harusi yake.

Mfanyabiashara, Bw Aggarwal aliambia BBC kutoka nyumbani kwake Ambala kwamba alikuwa muumini thabiti wa usawa wa kijinsia.

"Sijawahi kumtendea binti yangu kwa namna yoyote tofauti na mwanangu. Katika harusi yake mwaka jana, mwanangu alipanda farasi hivyo ilikuwa inafaa binti yangu kufanya hivyo pia," alisema.

"Ilikuwa ni kutuma ujumbe kwa jamii kwamba binti ni wa thamani kama mtoto wa kiume na kwamba atafanya mengi ikiwa wazazi wangemuunga mkono," aliongeza.

Huko Haryana, jimbo ambalo limekita mizizi katika mfumo dume, kauli yake inadhihirika - zaidi kwa vile Ambala limejulikana kwa muda mrefu kwa kukosa fadhili kwa mtoto wa kike.

Katika muongo wa 1990 wakati Priya alizaliwa, mauaji ya wanawake yalikuwa yamekithiri katika wilaya hiyo. Familia zinazotaka watoto wa kiume zilikuwa zikitumia utambuzi wa kabla ya kuzaa ili kutoa mimba za watoto wa kike na kama Sensa ya mwaka 2001 ilionyesha, katika kikundi cha umri wa sifuri hadi sita, Ambala ilikuwa na wasichana 781 pekee kwa kila wavulana 1,000.

Lakini Priya alipozaliwa, Bw Aggarwal anasema "alifurahi sana" na alisherehekea kwa kusambaza peremende hospitalini.

"Baadhi ya wanawake wazee waliokuwa pale na binti zao wajawazito au wakwe zao waliitupa mbali walipogundua kuwa nilikuwa nikisherehekea kuzaliwa kwa mtoto wa kike. Walifikiri nimerukwa na akili."

Bw Aggarwal - ambaye anamchukulia binti yake kuwa "hirizi yake ya bahati" na kwa miaka mingi amezipa biashara zake zote jina lake - anasema alipomwona akiendesha gari, alijisikia "fahari sana".

Wakati msafara wa Priya ukipitia vichochoro vidogo vya mji huo, aliyekuwa akiutazama moja kwa moja kwenye simu ya video alikuwa bwana harusi wake Arav Gupta, ambaye pia ni wakili.

Priya na wazazi wake walikuwa wameficha mpango wao hivyo Arav hakujua kuhusu kuingia kwake kusiko kawaida, aliniambia huku akicheka.

"Nilikuwa nikiitazama na wazazi wangu, ndugu, jamaa na marafiki. Sote tulishangaa, hata kushtuka, lakini kwa njia nzuri.

"Sote tulikuwa tunashangaa nini kinaendelea? Ilikuwa ni jambo jipya kuona bibi-arusi ameketi juu ya farasi, lakini ilifanya mabadiliko ya kuburudisha na kila mtu alipenda. Na nilijivunia sana kwamba ninaoa mwanamke ambaye ni jasiri sana," alisema.