Dalalka laga soomay maanta iyo kuwa berri soomi doona

Tebin toos ah

1. 16 Febraayo 2026Booliiska Sydney oo codsanaya in dib loosoo celiyo 85 jir si qalad ah loo afduubay

   Booliiska Sydney ayaa jeediyay codsi ku aadan soo celinta oday 85 jir ah oo ay rumeysan yihiin in si qalad ah loo afduubay.

   Chris Baghsarian, oo keligiis noolaa, ayaa waxaa soo weeraray ugu yaraan saddex qof kuwaas oo ka kaxeystay gurigiisa oo ku yaalla xaafadda North Ryde subaxnimadii hore ee Jimcaha.

   "Waxay doonayeen inay qof afdubtaan, laakiin waxay wateen qof qaldan," ayuu yiri ku-simaha xarunta Det Andrew Marks oo sidaasi u sheegay suxufiyiinta isniintii, isagoo intaas ku daray inaysan jirin wax lacag madax-furasho ah oo la weydiistay.

   "Qoysku waxay ku sugan yihiin dhibaato. Waxa kaliya ee ay rabaan waa in aabbahood loo soo celiyo, awoowgood in loo celiyo," ayuu yiri, isagoo ka codsaday dadka inay soo sheegaan dhaqdhaqaaq kasta oo aan caadi ahayn oo lagu arko agagaarka guryaha la og yahay in ay faaruq yihiin.

   Codsiga ayaa yimid iyadoo Sydney Morning Herald (SMH) ay sheegtay in muuqaallo iyo sawira Baghsarian oo si xun u dhaawacmay oo aan la garanayn ay ku wareegayeen Sydney.

2. 16 Febraayo 2026Warqada sirta ah ee Maxamed Siyaad Barre qoray kahor geeridiisa ee laga helay madxafka Ingiriiska

   Maalinnimadii Talaadada ee bishii Oktoobar ay ahayd 10-ka, sannadka 2023, waxa aan baaritaan cilmi-baariseed u tagay keydka lagu keydiyo dokumentiyada taariikhiga ah ee dalka Ingiriiska (UK National Archives).

   Waxaan daba-joogay dhammeystirka daraasad ku saabsan dagaalladii sokeeye ee Soomaaliya ka billowday dhammaadkii toddobaatameeyadii illaa iyo billowgii sagaashameeyadii.

   Waxaan halkaas ka helay faylal sir ahaan jiray oo Wasaaradda Arrimaha Dibada ee Ingiriisku ay ku keydisay wixii xog ahaa, ee ay ka heli jirtay arrimaha dowladdii militariga ahayd ee Soomaaliya iyo jabhadihii hubeysnaa ee la dagaallamayey.

   Faylka waxaa kaloo ku jirta warqad aad u xiise badneyd, oo uu Maxamed Siyaad Barre u diray kaaba-qabiillada Soomaaliyeed bishii Oktoobar, 1992dii Warqadda, oo ka kooban saddex bog, waxaa magaalada Nairobi ka soo diray safaaradda Ingiriisku uu ku leeyahay Kenya.

   Halkan ka sii akhirso sheekada dhamaystiran

3. 16 Febraayo 2026Sawirrada dayax-gacmeedka ayaa muujinaya goobta uu ku sugan yahay markabka diyaaradaha qaada ee Maraykanka

   BBC Verify ayaa toddobaadyadii la soo dhaafay la socotay kordhinta joogitaanka milatari ee Maraykanka ee Bariga Dhexe, iyadoo Washington ay sii waddo cadaadiska ay saarayso dowladda Iiraan ee ku saabsan barnaamijkeeda nukliyeerka.

   Kadib warar sheegayay in markabka diyaaradaha qaada ee Maraykanka, USS Abraham Lincoln, uu gaaray gobolka Khaliijka 26-kii Janaayo, waxaan ku aragnay sawirro dayax-gacmeed oo la qabtay shalay. Markabkan ku shaqeeya tamarta nukliyeerka hore uma muuqan sawirradii aan dib u eegnay ilaa waqtigaas.

   Anagoo adeegsanayna sawirro si guud loo heli karo oo ka yimid dayax-gacmeedyada Yurub ee Sentinel-2, oo si ballaaran loogu adeegsado raadinta maraakiibta, waxaan ku aqoonsannay Abraham Lincoln Badda Carabta — qiyaastii 150 u jirta xeebaha Cumaan.

   Saraakiil Maraykan ah ayaa sidoo kale sheegay in markab kale oo qaada diyaaradaha, USS Gerald R. Ford, la diri doono si uu ugu biiro Abraham Lincoln iyo qalab kale oo milatari oo dhawaan la geeyay gobolka.

4. 16 Febraayo 2026Hooyada dhashay Alexei Navalny oo sheegtay in sunta la helay ay xaqiijinayso in la dilay wiilkeeda

   Hooyada dhashay hoggaamiyihii geriyooday ee mucaaradka Ruushka Alexei Navalny ayaa sheegtay in qiimeynta in uu wiilkeeda u dhintay sunta ay xaqiijisay in ay aaminsantahay in la dilay.

   Sabtidii, UK iyo xulafada Yurub waxay soo saareen bayaan sheegaya in Navalny, oo dhintay 2024, lagu dilay sun ka soo baxday sunta raha , iyo in "dawladda Ruushka oo keliya ay lahayd awoodda, ujeeddada iyo fursadda ay ku geyn karto suntan halista ah".

   "Tani waxay xaqiijinaysaa waxa aan garanaynay bilowgii hore," Lyudmila Navalnaya ayaa tiri iyadoo booqanaysa qabriga wiilkeeda ee Moscow Isniintii - sannad-guuradii labaad ee dhimashadiisa. "Waan ogeyn in wiilkayagu uusan si fudud ugu dhiman xabsiga, waa la dilay." ayey tiri.

   Ruushka ayaa si adag u diiday eedeymahaas.

   "Dabcan, ma aqbaleyno eedeymahan oo kale. Waanu ku khilaafsanahay iyaga, waxaan u aragnaa inay yihiin eex iyo kuwo aan sal lahayn, dhab ahaantii, si adag ayaan u diidnay," ayuu yiri afhayeenka Kremlin Dmitry Peskov Isniintii.

   Xaaska uu ka dhintay Navalny, Yulia ayaa sidoo kale xustay sano guuradii labaad ee ka soo wareegatay dhimashadiisa, iyadoo qoraal ay soo dhigtay baraha bulshada ku tiri: "Waxaan gaarnay run, waxaanan sidoo kale gaari doonnaa caddaalad maalin uun ."

5. 16 Febraayo 2026Iran oo ogolaatay in hay'adda tamarta adduunku kormeerto xarumaheeda Nukleerka

   Xoghayaha Golaha Sare ee Amniga Qaranka Iran, Ali Larijani, ayaa sheegay in Tehran ay ogolaan doonto booqashooyinka dhulka hoostiisa ah iyo xarumaha ku yaala buuraha si loo caddeeyo in barnaamijkeeda Nukliyeerka uu yahay ujeedo nabadeed.

   Wareysi uu siiyay Al Jazeera, Larijani wuxuu yiri "si aan wax uga qabanno walaacyada ay qabaan dadka kale, waa inaan aqbalnaa mabaadi'da Hay'adda Tamarta Nukliyeerka ee Caalamiga ah (IAEA). Markii aan aqbalnay heshiiska NPT, waxaan sidoo kale aqbalnay nidaamka kormeerka ee Hay'adda. Baaritaannada waa la bedeli karaa; bil kasta ama xitaa maalin kasta, si loo ogaado dhaqdhaqaaq kasta oo shaki leh."

   Xoghayaha Golaha Amniga Qaranka Iran ayaa yiri: "Xitaa haddii tignoolajiyada ay ku jirto dhulka hoostiisa ama buuraha, ma jiraan wax dhibaato ah, ururka ayaa la socon kara, waana ogolaaneynaa kormeerka."

   Waxa uu ku nuuxnuuxsaday in “Arrinta la xiriirta gantaallada aysan wax shaqo ah ku lahayn wada-hadallada, loogamana hadli doono wadahadalladan”.

   Geesta kale, Madaxweynaha Maraykanka Donald Trump ayaa sheegay in gantaalaha Iran uu yahay mid ka mid ah shuruudaha uu kula xaajoonayo Iran.

   Ra’iisul wasaaraha Israa’iil Benjamin Netanyahu ayaa sidoo kale carabka ku adkeeyay in heshiis kasta oo lala galo Iran ay tahay in lagu daro arrinta gantaalada balaastikada ah.

6. 16 Febraayo 2026Shaqa joojin dib u dhac ku keentay duulimaadyadii garoonka caalamiga ee Kenya

   Duulimaadyada ka soo dagaya iyo kuwa ka dhoofaya garoonka diyaaradaha ee caalamiga ah ee Kenya ayey dib u dhac ku yimaadeen ka dib shaqo joojin ay qorsheeyeen shaqaalaha duulista hawada, sida ay sheegeen maamulka hawada iyo duulimaadyada qaranka.

   Duulimaadyadii ka dhoofi lahaa garoonka caalamiga ah ee Jomo Kenyatta ee magaalada Nairobi - oo ka mid ah xarumaha ugu mashquulka badan Afrika - ayaa dib loo dhigay illaa afar saacadood.

   Qaar ka mid ah rakaabka ayaa sheegaya in ay sii fadhiyaan gudaha diyaaradda muddo dheer, iyada oo duuliyayaashu ay sugayaan fasax ay ku duulaan.

   War qoraal ah oo ay soo saartay Kenya Airways ayay ku sheegtay in ay la kulmeyso "dib u dhac dhanka maamulka hawada ah oo saameeynaya qaar ka mid ah dadka dhoofaya iyo kuwa soo degaya". Waxay intaas ku dartay inay kala shaqaynayso mas'uuliyiinta si loo yareeyo carqaladaha iyo in la sameeyo hawlgallada nabdoon.

   "Rakaabka aya lagula talinay n ay fishaan dib u qaabeeyn lagu sameeyo jadwalka, oo ay ku jiraan dib u dhac," ayay tiri shirkaddu, iyada oo raaligelin ka bixinaysa dhibaataad dhacday.

   Hadalkan ayaa daba socda digniin todobaad ka hor uu soo saatray Ururka Shaqaalaha Duulimaadka Kenya ee loo soo gaabiyo (KAWU) taas oo ku aadanayd qorshe ay ku doonayaan in ay ku sameeyaan shaqo joojin ka dhalatay mushaaraadka iyo xaaladaha shaqo oo liidata.

   Xoghayaha guud ee KAWU Moss Ndiema ayaa u sheegay Daily Nation in shaqo joojintu ay bilaabatay 06:00 wakhtiga maxaliga ah (03:00 GMT) taas oo saamaysay rakaabka iyo shirkadaha diyaaradaha ee dalka.

7. 16 Febraayo 2026Soomaaliya iyo Tanzania oo kala saxiixday heshiis iskaashi oo dhanka socdaalka ah

   Soomaaliya iyo Tanzania ayaa kala saxiixday heshiis iskaashi oo dhanka socdaalka ah si loo fududeeyo isu socodka iyo xoojinta xiriirka labada dal.

   Warkan oo lagu daabacay bogga Diblumaasiyadda ee wasaaradda Arimaha Dibadda Soomaaliya ayaa lagu sheegay in Wasiirka Amniga Gudaha Soomaaliya, C/llaahi Sheekh Ismaaciil Fartaag iyo Wasiirka Arrimaha Gudaha Tanzania, Patrobas Paschal Katambi ay heshiiska saxiixeen, iyadoo ay goobjoog ka ahaayeen madaxda socdaalka labada dal, Mudane Mustafa Dhuxulow iyo Dr. Anna P. Makakala iyo sidoo kale safiirka Soomaaliya ee Tanzania, Amb. Ilyaas Cali Xasan.

   Sida ku cad Is-afgaradka, dadka sita baasaboorrada diblomaasiga ah iyo kuwa rasmiga ah waxay ka faa'iidaysan doonaan qabanqaabada gelitaanka fudud, halka kuwa haysta baasaboorka caadiga ah ay ku heli doonaan fiisaha 24 saac gudahood, taas oo gacan ka geysaneysa taageerada dhaqdhaqaaqa fudud ee muwaadiniinta iyo ganacsatada.

8. 16 Febraayo 2026kiiska nin 23 sano xabsi ugu qaatay dembi dil ah ayaa muujinaya in booliska ay kiiskaasi sameeyeen

   Caddeymo cusub oo ku saabsan kiiska nin 23 sano oo xabsi ah ku qaatay kiis dil ah oo lagu xukumay ayaa muujinaya in uu booliska sameeyay kiiskaas, sida ay ogaatay BBC Panorama.

   13 qof oo kale oo marqaati ah ayaa hadda BBC u sheegay in booliisku ay ku cadaadiyeen inay hadalkooda qurxiyaan ama ay ka been sheegaan maxkamadda.

   Jong-Ok Shin - oo loo yaqaanay Oki - ayaa lagu dilay middi xilli ay usoo lsocotay gurigeeda iaydoo ka timid caweys ku yaal Bournemouth 2002. Benguit, oo ah qof balwad leh oo taariikh u leh dambiyada daroogada iyo middiyeeynta, ayaa lagu helay maxkamad saddexaad sannadkii 2005, ka dib markii laba xeerbeegti hore ay ku guuldareysteen inay go'aan ka gaaraan.

   BBC-da ayaa kiiskan baaritaan ku sameysay muddo sagaal sano ah, iyadoo horay u sheegtay in qaar ka mid ah markhaatiyaasha ay sheegeen inay bixiyeen caddeymo been abuur ah ka dib markii ay cadaadis kala kulmeen booliiska. Laakiin baaritaankii ugu dambeeyay ee Panorama ayaa muujinaya sidan:

   Diiwaanada taleefoonka ayaa muujinya in Benguit uu lahaa marmarsiiyo taas oo meesha ka saartay caddayntiisa markhaati ee ugu weyn taas oo ay booliisku qariyeen

   ·Booliisku waxay kiiskooda ku dhiseen markhaati beenaale la xaqiijiyay, in kasta oo ay ogaayeen in muuqaalka CCTV uu khilaafsan yahay sheekadeeda.

   ·Labo marqaati oo dheeri ah ayaa sheegay in ay been ka sheegeen maxkamada kadib markii ay booliisku cadaadis ku saareen

   ·Afar qof oo kale ayaa BBC-da u sheegay in boolisku ay isku dayeen in ay keenaan cadeymo been abuur ah oo ay diideen

   ·Caddaynta dhammaan marqaatiyaasha xeer-ilaalinta muhiimka ah ayaa hadda la duray ama la sumcad-dilay

   Markhaatigu wuxuu ahaa mid muhiim u ah dacwad oogista maadaama aysan jirin CCTV ama cadaymo dambi baaris ah oo Benguit ku xiraya dembiga.

   Kadib markii dib loo eegay cadaymaha Panorama, baaraha hawlgabka ah ee kooxda dilka Brian Murphy waxa uu ugu baaqay Xafiiska Madaxbanaan ee Anshaxa Booliska inuu baaro sida Booliska Dorset u maareeyeen kiiska.

9. 16 Febraayo 2026Nin soo celiyay shidaal uu dowladda ka dhacay 1991

   Muumin Fiidow Rooble, ayaa dib dawladda Soomaaliya dib ugu celiyay shidaal uu 33 sano ka hor ka bililiqeystay magaalada Muqdisho.

   Muumin oo dhowr siddeetan jir ah haddana ku nool degmada Maxaas ee gobolka Hiiraan ayaa Septeembar 2024-kii maamulka dawladda ee degmadaas ku wareejiyay 50 liitar oo shidaal ah oo uu ka qaatay xerada Afisyooni 1991-kii, isaga oo sheegay in uu culimada kala tashaday dib u celinta shidaalkaas.

   “Maalintaas waxaan qaatay 50 litir oo layga siistay 600 oo shilin Soomaali ah, iyada muggaas ay ila qummanayd inkasta oo ay xoolo xaaran ah ay ahaayeen,” ayuu Muumin u sheegay BBC-da.

   “Lacagtaas qaraabada iyo qoyska ayaa raashin u siiyey,” ayuu sii raaciyey.

   Muumin ayaa dhanka kale sheegay in maalintaa ay xaaladdu qasnayd ee dhinac walba bililiqadu ka socotay ay ahayd “wax aan la suuraysan karin”.

   “Waxa Alla wixii dawlad ama shacab lahaa waa la bililiqaystay maalintaas,” ayuu yidhi Muumin.

   Muumin ayaa iska guday xoolihii kaddib markii uu la tashaday culimada diinta, isaga oo meel la wada arko iskaga guday qaantaas.

   “Markii aan ogaaday in waxan danbi yahayna sharciga Islaamka ayaan u kuur galay oo aan ogaaday in waxani xoolo shacab yihiin oo ay tahay in la iska bixiyo, meel fagaare ah ayaanan ku dhiibay,” ayuu Muumin BBC-da u sheegay.

   Sii akhri

10. 16 Febraayo 2026Goorta iyo halka ay Somaliland ka qodeyso shidaal

    Jamhuuriyadda Iskeed ugu dhawaaqday Madaxbannaanida ee Somaliland ayaa ku dhawaaqday qodista ceel shidaal oo hore looga sahamiyey deegaanka XOOD oo ka tirsan degmada Qoryaalle ee Gobolka Togdheer.

    Madaxweynaha Somaliland, Cabdirahman Maxamed Cabdilaahi (Cirro) oo hadal ka jeediyay munaasabad lagu furayay shidaalka Somaliland ayaa ku dhawaaqay in Somaliland ay bilaabeyso qodista shidaalka dalka.

    Madaxweyne Cirro ayaa sheegay in shacabka Somaliland uu ugu bishaareynayo in "dalka shidaal laga soo saarayo maadaama ay in badan is weydiinayeen goorta uu dalka shidaal yeelanayo".

    "Waxaan ugu bishaareynaa ugu dambeyn in qodista shidaalka Somaliland uu bilaabmayo 2027".

    Madaxweynaha ayaa sidoo kale sheegay in xitaa ay suuragal tahay in waqiga uu sheegay uu ka soo hormaro oo la bilaabo sanadka soo socda ee 2026.

    Madaxweynaha ayaa sidoo kale sheegay in dalka ay ku jiraan macdano badan oo dunida qaali ka ah, taas oo in ay soo saaraan ay u furan tahay cid kastsa oo lagu "kalsoonaan karo" oo diyaar u ah in ay iskaashi kala sameyso Somaliland.

    Barnaamijka looga dhawaaqay qodista shidaalka Somaliland oo ka dhacay Hargeysa ayaa waxaa ka hadlay wasiirka tamata iyo macdanta Somaliand, Axmed Jaamac Barre, oo sheegay in shirkadaha waday sahanka Shidaalka ay bilaabeen howlaha lagu bixinayo qandaraasyada la xiriira qodista shidaalka.

    "Waxaan ku rajo-weynahay in shirkadihii ka shaqeyanayey shidaalka Somaliland ee heshiiska kula jiray wasaaradda ay xayeesiiyeen qandaraasyada riigagga lagu qodi lahaa shidaalka".

    Sii akhri

11. 16 Febraayo 2026Dalkii ugu horeeyay ee Muslim ah oo shaaciyay tirada ciidamada uu u dirayo Qaza

    Ciidanka Indonesia ayaa sheegay inay diyaarinayaan inay horraanta bisha Abriil ciidamo horudhac ah u diraan Gaza.

    Afhayeen ayaa sheegay in go'aanka kama dambeysta ah ee ciidanka la dirayo ay gaari doonto dowladda.

    Jakarta ayaa soo bandhigtay ilaa siddeed kun oo askari si ay uga qeyb galaan ciidan caalami ah oo nabad ilaalin ah oo loo qorsheeyay Gaza.

    Ciidanka ayaa door muhiim ah ku yeelan doona wejiga xiga ee qorshaha xabad joojinta ee Madaxweyne Trump.

    Indooniisiya waxay ku biirtay Golaha Nabadda ee uu aasaasay Madaxweynaha Maraykanka Donald Trump, kaas oo uu ku dhawaaqay bishii la soo dhaafay.

    Golahan waxa uu leeyahay masuuliyad la mid ah middii Golaha Amniga Qaramada Midoobay si loo abuuro ciidan caalami ah oo xasillooni ah oo gacan ka geysan doona sugidda xuduudaha Qaza iyo hubinta in laga dhigo Qaza aag hubka ka caaggan, oo ay ku jirto hub ka dhigista ururka Xamaas.

    Hase yeeshee madaxweynaha Indonesia, Prabowo waxa uu ku doodaa in Indooniisiya, oo ah waddanka ugu badan ee Muslimiinta adduunka, ay tahay inay gacan ka geysato xasilloonida Qaza, isaga oo intaa ku daray in ka qaybqaadadkeedu uu ugu dambayn noqon doono dadaal lagu gaadho xalka laba dawladood ee khilaafka Israa'iil iyo Falastiin.

    Taliyaha guud ee ciidanka, General Maruli Simanjuntak, ayaa ka hadlay bilawga tababarka askarta iyadoo diiradda la saarayo hawlgallada caafimaad iyo injineernimada ee Qaza.

    Warbaahinta dawladda Israa'iil ayaa sheegtay in aag u dhaxeeya Rafax iyo Khan Yuunis ee koonfurta Qaza loo qoondeeyay inay ciidanka Indooniisiya degi doonaan, kana heli doonaan dhismaha xeryo loogu talagalay dhowr kun oo askari.

    Waddammo kale oo Muslimiin ah sida Turkiga iyo Baakistaan ayaa sidoo kale ka fiirsanaya oo qorshaynaya dirista ciidankooda, laakiin waxay caddeeyeen inay noqon doonto oo keliya ilaalinta nabadda, isla markaana aanay faragelin doonin hawsha hub ka dhigista Xamaas.

12. 16 Febraayo 2026Maxay yihiin gantaalada guuxooda ka dheereeya ee aadka looga baqo?

    Dabayaaqadii sanadkii 2021-kii, wax u eg gantaal ayaa lagu arkay hawada Shiinaha iyaga oo xawaare aad u sarreeya ku duulaya.

    Gantaalkan ayaa la sheegay inuu ku dhacday qiyaastii meel 40 mayl ka horaysa bartilmaameedkii.

    Sida laga soo xigtay khubarada, waxa uu ahaa nooc cusub oo ah gantaalada guuxooda ka dheereeya ee loo yaqaano hypersonic, inkastoo Shiinaha uu beeniyay.

    Gantaalkan guuxiisa uu ka dheerayo dhanka xawaaraha ayaa waxaa uu sii kordhiyay loolanka dhanka hubka ah ee u dhaxeeya Mareykanka, Shiinaha iyo Ruushka.

    Bal aan eegno waxa ay yihiin gantaallada hypersonic iyo sababta ay muhiimada gaarka ah u leeyihiin?

    Cilmiga gantaalada

    Marka la ego cilmiga sameynta gantaalada ayaa ah mid muddo dheer soo jiray.

    Waqtiyadii hore, waxaa jiray hub ay ka mid yihiin gantaalada iyo baasuukayaasha.

    Hal-abuurkii in awood loo yeesho in hub xoog badan hawada la sii mariyo ayaa waxaa ka dhashay tignoolajiyada gantaalada dheereeya.

    Sii akhri

13. 16 Febraayo 2026Mareykanka oo markab kale gacanta ku dhigay

    Ciidamada Mareykanka ayaa qabtay markab shidaal oo la yiraahdo Veronica III, kaas oo ku safrayay calanka Panama oo xili uu marayay Badweynta Hindiya.

    Ciidamadan ayaa ku daba jiray markabka marayay Badda Caribbean-ka.

    Mareykanka ayaa ku eedeeyay markabka inuu jebiyay cunaqabataynta saaran shixnadaha saliidda ee ka imanaya Venezuela.

    Kani wuxuu ahaa faragelintii labaad ee Mareykanku ku sameeyo Badweynta Hindiya usbuucii la soo dhaafay.

    Mareykanka ayaa dhawaan kordhiyay cadaadiska saaran Venezuela ee ku aaddan cunaqabataynta saaran dhoofinta shidaalka.

    "Masaafada kuma ilaalinayso," ayuu Pentagon-ka Mareykan ku yiri bayaan uu soo saaray, iyagoo dhanka kalena soo dhigay muuqaal iyo sawirro la rumaysan yahay inay muujinayaan xilligii la qabtay markabka.

    Mareykanka ayaa tan iyo sannadkii hore qabtay ugu yaraan toddobo markab oo shidaal qaada, taasoo qayb ka ah dadaalladiisa lagu xakameynayo sahayda saliidda ee Venezuela.

14. 16 Febraayo 2026Turkiga iyo Mareykanka oo iska kaashanaya soo saaridda shidaalka Soomaaliya

    Shirkadda tamarta ee dawladda Turkiga, Turkish Petroleum Corp oo loo soo gaabiyo TPAO, ayaa wadahadal kula jirta Chevron Corporation CVX si ay si wadajir ah ugu sahamiyaan kheyraadka saliidda iyo gaaska, taas oo calaamad u ah tallaabo kale oo Turkiga ku riixayo xoojinta wax soo saarka tamarta gudaha.

    Wadahadallada oo ah kuwo aan shaaca laga qaadin ayaa sida ay ku warramayso shabakadda Bloomberg waxaa diiradda lagu saaray iskaashiga suurtagalka ah ee daraasadaha dhulka iyo hawlgallada qodista ee gobollada muhiimka ah ee xeebaha.

    Haddii la dhammeeyo iskaashigu wuxuu Chevron ku dari doonaa liiska sii kordhaya ee shirkadaha tamarta ee Maraykanka ee la shaqeeya Turkiga, ka dib heshiiskii Janaayo ee TPAO iyo Exxon Mobil Corporation XOM ee sahaminta wadajirka ah ee Badda Madow iyo Mediterranean. Sida ku cad heshiiskan, XOM waxay aqoonsan doontaa saliidda iyo gaaska dabiiciga ah ee ku jira meelaha aan laga faa'iidaysan ee Badda Madow iyo Mediterranean-ka.

    Sida laga soo xigtay saraakiisha aqoonta u leh arrintan, TPAO iyo Chevron waxay qiimeynayaan shaqada wadajirka ah ee sahaminta dhulka iyo qodista, inkastoo mashaariicda gaarka ah aan la shaacin. Chevron ayaa la xaqiijiyay inay sii wadeyso qiimeynta fursadaha sahaminta caalamiga ah laakiin wuxuu diiday khabiirkaas in uu ka hadlo faahfaahinta ganacsiga.

    Sii akhri

15. 16 Febraayo 2026Israa'iil oo dirtay dalab la xirriira heshiiska nukliyeerka Iran

    Raysal wasaaraha Israa'iil ayaa dalbaday in meesha laga saaro dhamaan uranium-ka la kobciyay ee Iran iyada oo qayb ka ah heshiis kasta oo laga gaaro barnaamijka nukliyeerka Texran.

    Benjamin Netanyahu ayaa hadalkaan jeediyay, iyadoo wasiirka arrimaha dibadda Iran uu u safray Switzerland, si uu uga qayb galo wareeggii ugu dambeeyay ee wadahadallada aan tooska ahayn ee lala yeelanayo Mareykanka.

    Wadahadallada Talaadada dhacaya ayaa waxaa ka qeyb gali doona ergeyga gaarka ah ee Mareykanka, Steve Witkoff iyo wiilka uu sodogga u yahay madaxweyne Trump, Jared Kushner.

    Horaantii, ku xigeenka wasiirka arrimaha dibadda Iran ayaa sheegay, in dowladdiisu ay u furan tahay tanaasul haddii cunaqabateynta la qaado, balse aysan ka hadli doonin barnaamijkeeda gantaalaha ballistic-ga - dalab kale oo muhiim ah oo Israa'iil ay waddo.

    Netanyahu waxa uu sheegay in uu ka walwalsan yahay heshiiska Mareykanka iyo Iraan ee hubka nukliyeerka, laakiin waa in uu ku jiraa in laga saaro uranium-ka la kobciyay ee Iiraan ayuu yiri.

    Dhanka kale, ciidamada Mareykanka ayaa isu diyaarinaya suurtagalnimada hawlgallo joogto ah oo toddobaadyo ah oo ka dhan ah Iiraan haddii Madaxweyne Donald Trump uu amro weerar, sida ay u sheegeen laba sarkaal oo Mareykan ah wakaaladda wararka ee Reuters, taasoo noqon karta iskahorimaad aad uga daran sidii hore loogu arkay dalalka dhexdooda.

    Milatariga Mareykanka ayaa isu diyaarinaya suurtagalnimada hawlgallo joogto ah oo socon kara toddobaadyo ka dhan ah Iran haddii Madaxweyne Donald Trump amro weerar, sida ay laba masuul oo Mareykan ah u sheegeen Reuters, arrin noqon karta iska horimaad aad uga culus kuwii hore ee dhex maray labada dal.

    Waxaad sidoo kale akhrisan kartaa:

    Xog cusub oo ka soo korortay qorshaha Maraykanka ee Iran

    Trump oo ku dhawaaqay inuu markabkii labaad oo ah kuwa diyaaradaha xambaara u dirayo Bariga Dhexe

    Iiraan oo adkaysay agagaarka xarumaha Nukliyeerka ee dhulka hoostiisa ku yaalla

16. 16 Febraayo 2026Wasiirkii hore ee tamarta ee Ukraine oo la xiray isagoo isku dayaya inuu dalka ka baxo

    Wasiirkii hore ee tamarta ee Ukraine ayaa la xiray xilli uu isku dayay inuu dalka ka baxo, sida ay sheegeen mas’uuliyiinta dalkaasi. Jarmalka.

    German Galushchenkoo,oo sanadkii hore lagu qasbay inuu ka tago shaqadiisa dowladeed ka dib markii uu ka mid ahaa mas'uuliyiin lagu magacaabay fadeexad musuqmaasuq, ayaa la sheegay in la qabtay xilli uu saarnaa tareen ka tagay Ukraine. Ma cadda halka uu damacsanaa inuu u safro.

    Waxa uu ka mid ahaa dhowr qof oo xubnaha dawladda ah oo lagu eedeeyay musuqmaasuq $100m (£75m).

    Fadeexadan ayaa halis galisay in ay harayso maamulka madaxweynaha Ukraine Volodymyr Zelensky, kaas oo xukunka la wareegay ka hor intii aanu Ruushku duulaanka buuxa ku qaadin kaas oo balanqaadkiisu ahaa in uu meesha ka saarayo musuqmaasuqa. bishii November.

    Madaxii shaqaalaha ee Zelensky Andriy Yermak - lataliyihiisii ​​ugu dhawaa intii uu dagaalku socday - ayaa is casilay kadib markii gurigiisa la baaray.

    Madaxweynaha iyo Yermak midna laguma eedayn wax khalad ah. Fadeexadan ayaa si kastaba ha ahaatee, sii kordhisay cadaadiska Maraykanka ee ku aadan qabashada doorashada, taasoo hakad ku jirtay tan iyo markii uu dagaalka bilowday 2022-ka, sababo la xiriira qodobo ku jira dastuurka Ukraine.

17. 16 Febraayo 2026Koow iyo toban qof oo lagu dilay duqeymo ay Israa'iil ka geysatay Qaza

    Koow iyo toban Falastiiniyiin ah ayaa lagu dilay duqeymo ay Israa’iil ka geysatay Qasa subaxnimadii Axadda, sida ay sheegeen saraakiisha difaaca rayidka iyo caafimaadka Falastiin.

    IDF waxa ay sheegtay in ay duqaysay bartilmaameedyo argagixisanimo oo ay kaga jawaabaysay xad-gudubyada xabbad joojinta ee Xamaas, iyo in maleeshiyaad la dilay ka dib markii ay ka soo baxeen godka aagga ay ka taliyaan millatariga Israa’iil.

    Bisha Cas ee Falastiin ayaa sheegtay in weerar lagu qaaday xero teendho ah oo ku taal waqooyiga Qasa ay ku dhinteen ugu yaraan lix qof, halka weerar kale oo ka dhacay koonfurta marinka ay ku dhinteen shan.

    Labada dhinac Israa'iil iyo Xamaas ayaa midba midka kale ku eedeeya xadgudubyo maalinle ah oo ka dhan ah heshiis xabbad-joojin ah oo jilicsan tan iyo markii uu dhaqan galay 10kii Oktoobar.

    Waaxda Difaaca Rayidka ee Gaza ayaa sheegtay in 11 qof lagu dilay duqeymaha, halka shaqaalaha isbitaalka Al-Shifa ay sheegeen in qof 12aad lagu dilay rasaas, marka laga reebo duqeymaha cirka.