ਪਾਕਿਸਤਾਨ: ਨੈਸ਼ਨਲ ਅਸੈਂਬਲੀ ਭੰਗ ਕਰਨ ਦੇ ਸਾਰੇ ਹੁਕਮਾਂ ਤੇ ਕਾਰਵਾਈ ਬਾਰੇ ਫੈਸਲਾ ਅਦਾਲਤ ਕਰੇਗੀ - ਸੁਪਰੀਮ ਕੋਰਟ

ਲਾਈਵ ਕਵਰੇਜ

ਪ੍ਰਿਅੰਕਾ ਧੀਮਾਨ and ਅਨੁਰੀਤ ਸ਼ਰਮਾ

1. 3 ਅਪ੍ਰੈਲ 2022ਪੁਤਿਨ ਅਤੇ ਜ਼ੇਲੇਂਸਕੀ ਵਿਚਕਾਰ ਗੱਲਬਾਤ ਦੀ ਸੰਭਾਵਨਾ - ਯੂਕਰੇਨੀ ਵਾਰਤਾਕਾਰ

   ਯੂਕਰੇਨ ਦੇ ਮੁੱਖ ਵਾਰਤਾਕਾਰ ਨੇ ਸ਼ਨੀਵਾਰ ਨੂੰ ਕਿਹਾ ਕਿ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਅਤੇ ਉਨ੍ਹਾਂ ਦੇ ਰੂਸੀ ਹਮਰੁਤਬਾ ਵਲਾਦੀਮੀਰ ਪੁਤਿਨ ਦੀ ਸੰਭਾਵਿਤ ਗੱਲਬਾਤ ਸਬੰਧੀ ਚਰਚਾ ਹੁਣ ਕਾਫੀ ਅੱਗੇ ਵਧ ਗਈ ਹੈ।

   ਡੇਵਿਡ ਅਰਾਖਮੀਆ ਨੇ ਜਾਣਕਾਰੀ ਦਿੱਤੀ ਕਿ ਸ਼ੁੱਕਰਵਾਰ ਨੂੰ ਇੱਕ ਵੀਡੀਓ ਲਿੰਕ ਦੁਆਰਾ ਦੋਵੇਂ ਦੇਸ਼ਾਂ ਦੇ ਵਫਦਾਂ ਵਿਚਕਾਰ ਗੱਲਬਾਤ ਹੋਈ। ਇਸਦੇ ਨਾਲ ਹੀ ਉਨ੍ਹਾਂ ਕਿਹਾ ਕਿ ਰੂਸ ਨੇ ਕ੍ਰੀਮੀਆ ਨੂੰ ਛੱਡ ਕੇ ਬਾਕੀ ਸਾਰੇ ਮੁੱਦਿਆਂ 'ਤੇ ਯੂਕਰੇਨ ਦੇ ਮਤਿਆਂ ਨੂੰ ਸਵੀਕਾਰ ਕਰ ਲਿਆ ਹੈ।

   ਉਨ੍ਹਾਂ ਕਿਹਾ ਕਿ ਡਰਾਫਟ ਦਸਤਾਵੇਜ਼ ਅਜਿਹੇ ਪੜਾਅ 'ਤੇ ਸਨ ਕਿ ਦੋਵੇਂ ਰਾਸ਼ਟਰਪਤੀ ਸਿੱਧੇ ਤੌਰ 'ਤੇ ਸਲਾਹ-ਮਸ਼ਵਰਾ ਕਰ ਸਕਦੇ ਸਨ, ਪਰ ਦਸਤਾਵੇਜ਼ ਤੋਂ ਇਲਾਵਾ ਵੀ ਕਈ ਮੁੱਦਿਆਂ 'ਤੇ ਕੰਮ ਜਾਰੀ ਸੀ।

   ਦੂਜੇ ਪਾਸੇ ਰੂਸ ਦੇ ਮੁੱਖ ਵਾਰਤਾਕਾਰ, ਵਲਾਦੀਮੀਰ ਮੇਡਿੰਸਕੀ ਨੇ ਸ਼ੁੱਕਰਵਾਰ ਦੀ ਗੱਲਬਾਤ ਤੋਂ ਬਾਅਦ ਕਿਹਾ ਕਿ ਕ੍ਰੀਮੀਆ ਅਤੇ ਡੋਨਬਾਸ 'ਤੇ ਰੂਸ ਦੀ ਸਥਿਤੀ ਨਹੀਂ ਬਦਲੀ ਹੈ।

2. 3 ਅਪ੍ਰੈਲ 2022ਰੂਸੀ ਫੌਜਾਂ ਦੇ ਪਿੱਛੇ ਹਟਣ ਨਾਲ ਸਾਹਮਣੇ ਆ ਰਹੇ ਕਤਲਾਂ ਦੇ ਸਬੂਤ

   ਯੂਕਰੇਨ ਵੱਲੋਂ ਕਿਹਾ ਗਿਆ ਹੈ ਕਿ ਉਸ ਦੀਆਂ ਫੌਜਾਂ ਨੇ ਰਾਜਧਾਨੀ ਕੀਵ ਦੇ ਆਲੇ-ਦੁਆਲੇ ਵਾਲੇ ਪੂਰੇ ਖੇਤਰ ਨੂੰ ਮੁੜ ਆਪਣੇ ਕਬਜ਼ੇ ਵਿੱਚ ਲੈ ਲਿਆ ਹੈ ਅਤੇ ਰੂਸੀ ਫੌਜਾਂ ਕਈ ਪ੍ਰਮੁੱਖ ਕਸਬਿਆਂ ਤੋਂ ਪਿੱਛੇ ਵੱਲ ਨੂੰ ਹਟ ਗਈਆਂ ਹਨ।

   ਕੀਵ ਦੇ ਨੇੜੇ ਹੋਸਟੋਮੇਲ ਹਵਾਈ ਅੱਡਾ ਪਹਿਲੇ ਹੀ ਦਿਨ ਤੋਂ ਜੰਗ ਪ੍ਰਭਾਵਿਤ ਸੀ ਅਤੇ ਹੁਣ ਉਹ ਵੀ ਮੁੜ ਯੂਕਰੇਨ ਦੇ ਕਬਜ਼ੇ 'ਚ ਆ ਗਿਆ ਹੈ।

   ਪਰ ਜਿਵੇਂ-ਜਿਵੇਂ ਰੂਸੀ ਫੌਜਾਂ ਪਿੱਛੇ ਹਟ ਰਹੀਆਂ ਹਨ, ਨਾਗਰਿਕਾਂ ਦੇ ਕਤਲਾਂ ਦੇ ਸਬੂਤ ਵੀ ਸਾਹਮਣੇ ਆ ਰਹੇ ਹਨ।

   ਖ਼ਬਰ ਏਜੰਸੀ ਏਐੱਫਪੀ ਮੁਤਾਬਕ ਉਨ੍ਹਾਂ ਨੇ ਸ਼ਨੀਵਾਰ ਨੂੰ ਬੁਚਾ ਸ਼ਹਿਰ ਦੀ ਸਿਰਫ਼ ਇੱਕ ਗਲੀ ਵਿੱਚ ਘੱਟੋ-ਘੱਟ 20 ਲਾਸ਼ਾਂ ਦੇਖੀਆਂ ਹਨ।

   ਇਸ ਦੌਰਾਨ, ਕਸਬੇ ਦੇ ਮੇਅਰ ਨੇ ਕਿਹਾ ਕਿ ਬੁਚਾ ਵਿੱਚ 280 ਲੋਕਾਂ ਨੂੰ ਇੱਕ ਸਮੂਹਿਕ ਕਬਰ ਵਿੱਚ ਦਫ਼ਨਾਇਆ ਗਿਆ ਸੀ ਅਤੇ ਇਹ ਸ਼ਹਿਰ ਲਾਸ਼ਾਂ ਨਾਲ ਭਰਿਆ ਪਿਆ ਸੀ।

3. 3 ਅਪ੍ਰੈਲ 2022ਹੁਣ ਤੱਕ ਦੇ ਅਹਿਮ ਘਟਨਾਕ੍ਰਮ

   • ਯੂਕਰੇਨ ਦਾ ਦਾਅਵਾ ਹੈ ਕਿ ਰੂਸੀ ਬਲ ਰਾਜਧਾਨੀ ਕੀਵ ਦੇ ਆਲੇ-ਦੁਆਲੇ ਵਾਲੇ ਇਲਾਕਿਆਂ ਤੋਂ "ਤੇਜ਼ੀ ਨਾਲ ਪਿੱਛੇ ਹਟ" ਗਏ ਹਨ।
   • ਯੂਕਰੇਨੀ ਅਧਿਕਾਰੀਆਂ ਅਨੁਸਾਰ, ਦੇਸ਼ ਦੀਆਂ ਫੌਜਾਂ ਨੇ ਕੀਵ ਦੇ ਆਲੇ-ਦੁਆਲੇ ਦੇ ਪੂਰੇ ਖੇਤਰ 'ਤੇ ਮੁੜ ਕਬਜ਼ਾ ਕਰ ਲਿਆ ਹੈ। ਇਨ੍ਹਾਂ ਵਿੱਚ ਮੁੱਖ ਤੌਰ 'ਤੇ ਇਰਪਿਨ, ਬੁਚਾ ਅਤੇ ਹੋਸਟੋਮੇਲ ਹਵਾਈ ਅੱਡਾ ਸ਼ਾਮਲ ਹਨ।
   • ਖ਼ਬਰ ਏਜੰਸੀ ਏਐੱਫਪੀ ਦੁਆਰਾ ਕਿਹਾ ਗਿਆ ਹੈ ਕਿ ਉਨ੍ਹਾਂ ਨੇ ਸ਼ਨੀਵਾਰ ਨੂੰ ਬੁਚਾ ਸ਼ਹਿਰ ਦੀ ਸਿਰਫ ਇੱਕ ਗਲੀ ਵਿੱਚ ਘੱਟੋ-ਘੱਟ 20 ਲਾਸ਼ਾਂ ਦੇਖੀਆਂ ਹਨ।
   • ਕਸਬੇ ਦੇ ਮੇਅਰ ਨੇ ਕਿਹਾ ਕਿ ਬੁਚਾ ਵਿੱਚ 280 ਲੋਕਾਂ ਨੂੰ ਇੱਕ ਸਮੂਹਿਕ ਕਬਰ ਵਿੱਚ ਦਫ਼ਨਾਇਆ ਗਿਆ ਸੀ ਅਤੇ ਇਹ ਸ਼ਹਿਰ ਲਾਸ਼ਾਂ ਨਾਲ ਭਰਿਆ ਪਿਆ ਸੀ।
   • ਇਸੇ ਸਬੰਧੀ, ਇੱਕ ਯੂਕਰੇਨੀ ਕਮਾਂਡਰ ਨੇ ਕਿਹਾ ਕਿ ਮਾਸਕੋ ਦੇ ਸੈਨਿਕਾਂ ਨੇ 18 ਤੋਂ 60 ਸਾਲ ਦੀ ਉਮਰ ਦੇ ਸਾਰੇ ਆਦਮੀਆਂ ਨੂੰ ਘੇਰ ਲਿਆ ਅਤੇ ਮਾਰ ਦਿੱਤਾ।
   • ਯੂਕਰੇਨ ਦੇ ਅਧਿਕਾਰੀਆਂ ਮੁਤਾਬਕ, ਕੀਵ ਦੇ ਨੇੜਲੇ ਖੇਤਰ ਵਿੱਚ ਇੱਕ ਮਸ਼ਹੂਰ ਫੋਟੋਗ੍ਰਾਫਰ ਮੈਕਸ ਲੇਵਿਨ ਦੀ ਲਾਸ਼ ਮਿਲੀ ਹੈ।
   • ਮਾਰੀਓਪੁਲ ਦੇ ਸੈਂਕੜੇ ਵਸਨੀਕ ਨਿੱਜੀ ਕਾਰਾਂ ਵਿੱਚ ਸ਼ਹਿਰ ਤੋਂ ਨਿਕਲਣ ਵਿੱਚ ਕਾਮਯਾਬ ਹੋ ਗਏ ਹਨ।
   • ਯੂਕਰੇਨ ਦੇ ਮੁੱਖ ਵਾਰਤਾਕਾਰ ਨੇ ਕਿਹਾ ਕਿ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਅਤੇ ਉਨ੍ਹਾਂ ਦੇ ਰੂਸੀ ਹਮਰੁਤਬਾ ਵਲਾਦੀਮੀਰ ਪੁਤਿਨ ਦੀ ਗੱਲਬਾਤ ਦੀ ਸੰਭਾਵਨਾ ਵਧ ਗਈ ਹੈ।
   • ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਨੇ ਚੇਤਾਵਨੀ ਦਿੱਤੀ ਹੈ ਕਿ ਰੂਸ ਯੂਕਰੇਨ ਦੇ ਪੂਰਬੀ ਅਤੇ ਦੱਖਣੀ ਖੇਤਰਾਂ 'ਤੇ ਕਬਜ਼ਾ ਕਰਨਾ ਚਾਹੁੰਦਾ ਹੈ।

4. 3 ਅਪ੍ਰੈਲ 2022ਬੀਬੀਸੀ ਪੰਜਾਬੀ ਦੇ ਲਾਈਵ ਪੇਜ ’ਤੇ ਤੁਹਾਡਾ ਸਵਾਗਤ ਹੈ

   ਬੀਬੀਸੀ ਪੰਜਾਬੀ ਦੇ ਅੱਜ ਦੇ ਲਾਈਵ ਪੇਜ ਉੱਤੇ ਤੁਹਾਡਾ ਸਵਾਗਤ ਹੈ। ਅੱਜ ਦਾ ਇਹ ਲਾਈਵ ਪੇਜ ਰੂਸ-ਯੂਕਰੇਨ ਵਿਚਾਲੇ ਚੱਲ ਰਹੀ ਜੰਗ ਅਤੇ ਪਾਕਿਸਤਾਨ ਵਿੱਚ ਪ੍ਰਧਾਨ ਮੰਤਰੀ ਇਮਰਾਨ ਖ਼ਾਨ ਖ਼ਿਲਾਫ਼ ਲਿਆਂਦੇ ਗਏ ਬੇਭਰੋਸਗੀ ਮਤੇ ਬਾਰੇ ਹੈ।

   2 ਅਪ੍ਰੈਲ ਦੀਆਂ ਅਹਿਮ ਘਟਨਾਵਾਂ ਜਾਨਣ ਲਈ ਤੁਸੀਂ ਇੱਥੇ ਕਲਿੱਕ ਕਰ ਸਕਦੇ ਹੋ।