ਯੂਕਰੇਨ ਰੂਸ ਜੰਗ: ਸੰਯੁਕਤ ਰਾਸ਼ਟਰ ਵਿੱਚ ਰੂਸ ਦੇ ਖ਼ਿਲਾਫ਼ ਮਤਾ ਪਾਸ, ਭਾਰਤ ਨੇ ਨਹੀਂ ਕੀਤਾ ਵੋਟ

ਯੂਕਰੇਨ ਅਤੇ ਰੂਸ ਵਿਚਾਲੇ ਸਤਵੇਂ ਦਿਨ ਵੀ ਜੰਗ ਜਾਰੀ ਹੈ। ਯੂਕਰੇਨ ਵਿੱਚੋਂ ਹੁਣ ਤੱਕ ਸੈਂਕੜੇ ਭਾਰਤੀਆਂ ਨੂੰ ਬਾਹਰ ਕੱਢਿਆ ਗਿਆ ਹੈ ਪਰ ਅਜੇ ਵੀ ਕੁਝ ਥਾਵਾਂ 'ਤੇ ਵਿਦਿਆਰਥੀ ਫਸੇ ਹੋਏ ਹਨ।

ਲਾਈਵ ਕਵਰੇਜ

  1. ਯੂਕਰੇਨ ਦੇ ਖਾਰਕੀਵ ਸ਼ਹਿਰ ਵਿੱਚ ਰਾਕੇਟ ਹਮਲਾ, ਅੱਗ ਦੀਆਂ ਲਪਟਾਂ ਵਿੱਚ ਇਮਾਰਤਾਂ

    ਯੂਕਰੇਨ ਦੇ ਸ਼ਹਿਰ ਖਾਰਕੀਵ ਸ਼ਹਿਰ ਵਿੱਚ ਪੁਲਿਸ ਵਿਭਾਗ ਦੀ ਇਮਾਰਤ ’ਤੇ ਰਾਕੇਟ ਨਾਲ ਹਮਲਾ ਹੋਇਆ ਹੈ।

    ਯੂਐਨਆਈਏਐਨ ਸਮਾਚਾਰ ਏਜੰਸੀ ਨੇ ਇਹ ਰਿਪੋਰਟ ਦਿੱਤੀ ਹੈ। ਯੂਕਰੇਨ ਦੀ ਸਰਕਾਰ ਦੇ ਟੈਲੀਗ੍ਰਾਮ ਚੈਨਲ ’ਤੇ ਇੱਕ ਵੀਡੀਓ ਪੋਸਟ ਕੀਤੀ ਗਈ ਹੈ। ਜਿਸ ਵਿੱਚ ਇੱਕ ਇਮਾਰਤ ਨੂੰ ਅੱਗ ਦੀਆਂ ਲਪਟਾਂ ਵਿੱਚ ਦੇਖਿਆ ਜਾ ਸਕਦਾ ਹੈ।

    ਯੂਕਰੇਨ ਵਿੱਚ ਗ੍ਰਹਿ ਮੰਤਾਲੇ ਦੇ ਸਲਾਹਕਾਰ ਐਂਟਨ ਗੈਰਾਸਚੇਨਕੋ ਨੇ ਕਿਹਾ ਹੈ ਕਿ ਹਮਲੇ ਤੋਂ ਬਾਅਦ ਕਰਾਜਡਿਨ ਨੈਸ਼ਨਲ ਯੂਨੀਵਰਸਿਟੀ ਦੀ ਇਮਾਰਤ ਵਿੱਚ ਵੀ ਅੱਗ ਲੱਗ ਗਈ ਹੈ। ਬੀਬੀਸੀ ਇਸ ਵੀਡੀਓ ਦੀ ਸੁਤੰਤਰ ਰੂਪ ਵਿੱਚ ਪੁਸ਼ਟੀ ਨਹੀਂ ਕਰਦਾ।

    ਰੂਸ ਯੂਕਰੇਨ ਜੰਗ

    ਤਸਵੀਰ ਸਰੋਤ, Anton Gerashchenko

  2. ਯੂਕਰੇਨ ਦੇ ਬੰਕਰਾਂ ਵਿੱਚ ਰਹਿ ਰਹੀਆਂ ਭਾਰਤੀ ਕੁੜੀਆਂ ਨੇ ਦੱਸੀਆਂ ਆਪਣੀਆਂ ਮੁਸ਼ਕਿਲਾਂ

    ਵੀਡੀਓ ਕੈਪਸ਼ਨ, ਯੂਕਰੇਨ ਦੇ ਬੰਕਰਾਂ ਵਿੱਚ ਭਾਰਤੀ ਕੁੜੀਆਂ ਕਿਸ ਹਾਲ ਵਿੱਚ, ਭਾਰਤ ਸਰਕਾਰ ਨੂੰ ਮਦਦ ਦੀ ਗੁਹਾਰ

    ਰੂਸ ਤੇ ਯੂਕਰੇਨ ਵਿਚਾਲੇ ਜੰਗ ਜਾਰੀ ਹੈ। ਰੂਸ ਵੱਲੋਂ ਯੂਕਰੇਨ ਵਿੱਚ ਹਮਲੇ ਕੀਤੇ ਜਾ ਰਹੇ ਹਨ।

    ਯੂਕਰੇਨ ਵਿੱਚ ਭਾਰਤੀ ਮੂਲ ਦੇ ਕਈ ਵਿਦਿਆਰਥੀ ਫ਼ਸੇ ਹੋਏ ਹਨ।

    ਬੀਬੀਸੀ ਨੇ ਅਜਿਹੀਆਂ ਹੀ ਦੋ ਵਿਦਿਆਰਥਣਾਂ ਨਾਲ ਗੱਲਬਾਤ ਕੀਤੀ ਜੋ ਉੱਥੇ ਐੱਮਬੀਬੀਐੱਸ ਦੀ ਪੜ੍ਹਾਈ ਕਰ ਰਹੀਆਂ ਹਨ।

  3. ਯੂਕਰੇਨ ਵਿੱਚ 13 ਬੱਚਿਆਂ ਸਮੇਤ ਘੱਟੋ-ਘੱਟ 136 ਨਾਗਰਿਕਾਂ ਦੀ ਮੌਤ: ਸੰਯੁਕਤ ਰਾਸ਼ਟਰ

    ਰੂਸ - ਯੂਕਰੇਨ ਜੰਗ

    ਤਸਵੀਰ ਸਰੋਤ, EPA

    ਸੰਯੁਕਤ ਰਾਸ਼ਟਰ ਦਾ ਕਹਿਣਾ ਹੈ ਕਿ ਪਿਛਲੇ ਵੀਰਵਾਰ ਨੂੰ ਯੂਕਰੇਨ 'ਤੇ ਰੂਸੀ ਹਮਲੇ ਦੇ ਸ਼ੁਰੂ ਹੋਣ ਤੋਂ ਬਾਅਦ ਘੱਟੋ-ਘੱਟ 136 ਨਾਗਰਿਕਾਂ ਦੀ ਮੌਤ ਹੋ ਗਈ ਹੈ।

    ਮੰਨਿਆ ਜਾ ਰਿਹਾ ਹੈ ਕਿ ਮਰਨ ਵਾਲਿਆਂ ਵਿੱਚ 13 ਬੱਚੇ ਵੀ ਸ਼ਾਮਲ ਹਨ।

    ਪਰ, ਮਨੁੱਖੀ ਅਧਿਕਾਰਾਂ ਲਈ ਸੰਯੁਕਤ ਰਾਸ਼ਟਰ ਹਾਈ ਕਮਿਸ਼ਨਰ ਦੇ ਬੁਲਾਰੇ, ਲਿਜ਼ ਥਰੋਸੇਲ ਨੇ ਕਿਹਾ ਕਿ ਅਸਲ ਵਿੱਚ ਮਰਨ ਵਾਲਿਆਂ ਦੀ ਗਿਣਤੀ ਕਿਤੇ ਜ਼ਿਆਦਾ ਹੋ ਸਕਦੀ ਹੈ।

    ਥਰੋਸੇਲ ਨੇ ਕਿਹਾ ਕਿ ਜ਼ਿਆਦਾਤਰ ਮੌਤਾਂ ਭਾਰੀ ਤੋਪਾਂ ਦੀ ਗੋਲਾਬਾਰੀ, ਹਵਾਈ ਹਮਲੇ ਅਤੇ ਹੋਰ ਵਿਆਪਕ ਪ੍ਰਭਾਵ ਵਾਲੇ ਵਿਸਫੋਟਕਾਂ ਕਾਰਨ ਹੋਈਆਂ ਹਨ।

    ਸੰਯੁਕਤ ਰਾਸ਼ਟਰ ਨੇ ਇਹ ਵੀ ਕਿਹਾ ਕਿ ਇਸ ਲੜਾਈ ਵਿੱਚ ਹੁਣ ਤੱਕ ਲਗਭਗ 400 ਲੋਕ ਜ਼ਖਮੀ ਹੋਏ ਹਨ।

    ਹਾਲਾਂਕਿ, ਯੂਕਰੇਨ ਦੀ ਸਰਕਾਰ ਦੁਆਰਾ ਜਾਰੀ ਕੀਤੇ ਗਏ ਅੰਕੜੇ ਦੱਸਦੇ ਹਨ ਕਿ ਲਗਭਗ 352 ਨਾਗਰਿਕ ਮਾਰੇ ਗਏ ਹਨ ਅਤੇ 1,684 ਜ਼ਖਮੀ ਹੋਏ ਹਨ।

  4. ਯੂਕਰੇਨ ਰੂਸ ਸੰਕਟ - ਨਾਟੋ ਕੀ ਹੈ ਅਤੇ ਰੂਸ ਇਸ ਉੱਤੇ ਭਰੋਸਾ ਕਿਉਂ ਨਹੀਂ ਕਰ ਰਿਹਾ

    ਰੂਸ - ਯੂਕਰੇਨ ਜੰਗ

    ਤਸਵੀਰ ਸਰੋਤ, Getty Images

    ਯੂਕਰੇਨ ਇੱਕ ਸਾਬਕਾ ਸੋਵੀਅਤ ਗਣਰਾਜ ਹੈ, ਜੋ ਰੂਸ ਅਤੇ ਯੂਰਪੀ ਸੰਘ ਦੀਆਂ ਸਰਹੱਦ ਨਾਲ ਲੱਗਦਾ ਹੈ।

    ਇਹ ਨਾਟੋ ਦਾ ਮੈਂਬਰ ਨਹੀਂ ਹੈ, ਪਰ ਇਹ ਇੱਕ "ਭਾਈਵਾਲ ਦੇਸ਼" ਹੈ। ਇਸ ਦਾ ਮਤਲਬ ਹੈ ਕਿ ਇਹ ਹੈ ਕਿ ਯੂਕਰੇਨ ਨੂੰ ਭਵਿੱਖ ਵਿੱਚ ਕਿਸੇ ਸਮੇਂ ਗਠਜੋੜ ਵਿੱਚ ਸ਼ਾਮਲ ਹੋਣ ਦੀ ਇਜਾਜ਼ਤ ਦਿੱਤੀ ਜਾ ਸਕਦੀ ਹੈ।

    ਰੂਸ ਪੱਛਮੀ ਸ਼ਕਤੀਆਂ (ਦੇਸ਼ਾਂ) ਤੋਂ ਭਰੋਸਾ ਚਾਹੁੰਦਾ ਹੈ ਕਿ ਅਜਿਹਾ ਕਦੇ ਨਹੀਂ ਹੋਵੇਗਾ।

    ਨਾਟੋ ਕੀ ਹੈ ਅਤੇ ਰੂਸ ਇਸ ਉੱਤੇ ਭਰੋਸਾ ਕਿਉਂ ਨਹੀਂ ਕਰ ਰਿਹਾ, ਪੜ੍ਹੋ ਇਹ ਖਾਸ ਰਿਪੋਰਟ

  5. ਪੰਜਾਬੀਆਂ ਸਣੇ ਕਈ ਭਾਰਤੀ ਯੂਕਰੇਨ ਵਿੱਚ ਡਾਕਟਰੀ ਦੀ ਪੜ੍ਹਾਈ ਲਈ ਕਿਉਂ ਜਾਂਦੇ ਹਨ

    ਯੂਕਰੇਨ ਵਿੱਚ ਇਸ ਵੇਲੇ ਜੰਗ ਦਾ ਮਾਹੌਲ ਹੈ। ਯੂਕਰੇਨ ਵਿੱਚ ਬਹੁਤ ਸਾਰੇ ਭਾਰਤੀ ਵਿਦਿਆਰਥੀ ਡਾਕਟਰੀ ਦੀ ਪੜ੍ਹਾਈ ਲਈ ਜਾਂਦੇ ਹਨ ਜੋ ਅਜੇ ਉੱਥੇ ਫਸੇ ਹੋਏ ਹਨ। ਕਈ ਕਾਰਨ ਹਨ ਜਿਨ੍ਹਾਂ ਕਰਕੇ ਯੂਕਰੇਨ ਡਾਕਟਰੀ ਦੀ ਪੜ੍ਹਾਈ ਲਈ ਭਾਰਤੀਆਂ ਦੀ ਪਸੰਦ ਬਣ ਗਿਆ ਹੈ। ਇਸ ਵੀਡੀਓ ਵਿੱਚ ਉਨ੍ਹਾਂ ਕਾਰਨਾਂ ਬਾਰੇ ਦੱਸਿਆ ਗਿਆ ਹੈ। ਐਡਿਟ - ਸ਼ਾਹਨਵਾਜ਼ ਅਹਿਮਦ

    ਵੀਡੀਓ ਕੈਪਸ਼ਨ, ਪੰਜਾਬੀਆਂ ਸਣੇ ਕਈ ਭਾਰਤੀ ਯੂਕਰੇਨ ਵਿੱਚ ਡਾਕਟਰੀ ਦੀ ਪੜ੍ਹਾਈ ਲਈ ਕਿਉਂ ਜਾਂਦੇ ਹਨ
  6. ਖਾਰਕੀਵ 'ਤੇ ਕਬਜ਼ੇ ਦੀ ਲੜਾਈ ਸ਼ੁਰੂ, ਰੂਸ ਨੇ ਪੈਰਾਟਰੂਪਰਜ਼ ਉਤਾਰੇ

    ਰੂਸ - ਯੂਕਰੇਨ ਜੰਗ

    ਤਸਵੀਰ ਸਰੋਤ, Getty Images

    ਯੂਕਰੇਨ ਦੀ ਫੌਜ ਨੇ ਪਿਛਲੀਆਂ ਰਿਪੋਰਟਾਂ ਦੀ ਪੁਸ਼ਟੀ ਕਰਦਿਆਂ ਕਿਹਾ ਹੈ ਕਿ ਰੂਸੀ ਪੈਰਾਟਰੂਪਰਜ਼ ਸ਼ਹਿਰ ਨੂੰ ਕਬਜ਼ੇ 'ਚ ਲੈਣ ਦੀ ਕੋਸ਼ਿਸ਼ ਵਿੱਚ ਖਾਰਕਿਵ ਵਿੱਚ ਉਤਰੇ ਹਨ।

    ਯੂਕਰੇਨੀ ਫੌਜ ਅਨੁਸਾਰ, ਖਾਰਕੀਵ ਅਤੇ ਨੇੜੇ-ਤੇੜੇ ਦੇ ਇਲਾਕੇ ਵਿੱਚ ਹਵਾਈ ਹਮਲੇ ਦੇ ਸਾਇਰਨ ਵੱਜਣ ਦੇ ਨਾਲ ਹੀ ਹਵਾਈ ਹਮਲਾ ਸ਼ੁਰੂ ਹੋਇਆ।

    ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਰੂਸੀ ਸੈਨਿਕਾਂ ਨੇ ਇਲਾਕੇ ਦੇ ਫੌਜੀ ਹਸਪਤਾਲ 'ਤੇ ਹਮਲਾ ਕੀਤਾ ਅਤੇ ਲੜਾਈ ਅਜੇ ਵੀ ਜਾਰੀ ਹੈ।

    ਹਾਲ ਹੀ ਦੇ ਦਿਨਾਂ ਵਿੱਚ ਯੂਕਰੇਨ ਵਿੱਚ ਦੇਖੀ ਗਈ ਜ਼ਿਆਦਾਤਰ ਹਿੰਸਾ ਦਾ ਕੇਂਦਰ ਖਾਰਕੀਵ ਰਿਹਾ ਹੈ।

    ਮੰਗਲਵਾਰ ਨੂੰ, ਸਥਾਨਕ ਸਮੇਂ ਅਨੁਸਾਰ 08:00 ਵਜੇ ਦੇ ਨੇੜੇ ਇੱਕ ਮਿਜ਼ਾਈਲ ਯੂਕਰੇਨ ਦੇ ਦੂਜੇ ਸਭ ਤੋਂ ਵੱਡੇ ਸ਼ਹਿਰ ਦੇ ਸਥਾਨਕ ਸਰਕਾਰੀ ਹੈੱਡਕੁਆਰਟਰ 'ਤੇ ਮਾਰੀ ਗਈ, ਜਿਸ ਨਾਲ ਅਸਮਾਨ ਵਿੱਚ ਇੱਕ ਵਿਸ਼ਾਲ ਅੱਗ ਦਾ ਗੋਲ਼ਾ ਉੱਠਿਆ ਅਤੇ ਨੇੜੇ-ਤੇੜੇ ਦੀਆਂ ਕਾਰਾਂ ਅਤੇ ਇਮਾਰਤਾਂ ਸੜ ਗਈਆਂ।

    ਖਾਰਕਿਵ ਦੇ ਇੱਕ ਰਿਹਾਇਸ਼ੀ ਇਲਾਕੇ ਵਿੱਚ ਮੰਗਲਵਾਰ ਨੂੰ ਬਾਅਦ ਵਿੱਚ ਇੱਕ ਹੋਰ ਹਮਲਾ ਹੋਇਆ। ਯੂਕਰੇਨ ਦੇ ਰਾਸ਼ਟਰਪਤੀ ਜ਼ੇਲੇਂਸਕੀ ਨੇ ਇਸ ਹਮਲੇ ਨੂੰ ਜੰਗੀ ਅਪਰਾਧ ਕਿਹਾ।

    ਐਮਰਜੈਂਸੀ ਅਧਿਕਾਰੀਆਂ ਮੁਤਾਬਕ ਮੰਗਲਵਾਰ ਨੂੰ ਖਾਰਕਿਵ 'ਚ ਘੱਟੋ-ਘੱਟ 17 ਲੋਕ ਮਾਰੇ ਗਏ ਅਤੇ ਦਰਜਨਾਂ ਜ਼ਖਮੀ ਹੋ ਗਏ।

    ਰੂਸ ਯੂਕਰੇਨ ਜੰਗ

    ਤਸਵੀਰ ਸਰੋਤ, EPA

  7. ਪੈਟਰੋਲ ਬੰਬ ਬਣਾਉਣ ਵਿੱਚ ਕਰੈਸ਼ ਕੋਰਸ ਕਰ ਰਹੇ ਯੂਕਰੇਨ ਦੇ ਲੋਕ

    ਇਸ ਸਮੇਂ ਪੂਰੇ ਯੂਕਰੇਨ ਵਿੱਚ ਆਮ ਨਾਗਰਿਕ ਘਰੇਲੂ ਪੈਟਰੋਲ ਬੰਬ ਬਣਾਉਣਾ ਅਤੇ ਵਰਤਣਾ ਸਿੱਖ ਰਹੇ ਹਨ।

    ਕੀਵ ਦੇ ਪੱਛਮ ਵੱਲ ਇੱਕ ਸ਼ਹਿਰ ਜ਼ਾਇਟੋਮਿਰ ਵਿੱਚ, ਮਰਦਾਂ ਅਤੇ ਔਰਤਾਂ ਦੇ ਇੱਕ ਸਮੂਹ ਨੂੰ ਸਿਖਲਾਈ ਦਿੱਤੀ ਗਈ ਕਿ ਮੋਲੋਟੋਵ ਕਾਕਟੇਲਜ਼ ਨੂੰ ਬਾਲ਼ ਕੇ ਰੂਸੀ ਫੌਜੀ ਦੇ ਨਿਰਧਾਰਿਤ ਨਿਸ਼ਾਨੀਆਂ 'ਤੇ ਕਿਵੇਂ ਸੁੱਟਿਆ ਜਾਵੇ।

    ਰੂਸ ਫੌਜੀ ਦੇ ਹਮਲੇ ਮੁਕਾਬਲੇ ਦੀ ਤਿਆਰੀ ਲਈ ਸੜਕਾਂ 'ਤੇ ਹੀ ਹਜ਼ਾਰਾਂ ਪੈਟਰੋਲ ਬੰਬ ਬਣਾ ਰਹੇ ਹਨ।

    ਯੂਕਰੇਨ-ਰੂਸ ਜੰਗ

    ਤਸਵੀਰ ਸਰੋਤ, Reuters

    ਯੂਕਰੇਨ-ਰੂਸ ਜੰਗ

    ਤਸਵੀਰ ਸਰੋਤ, Reuters

    ਯੂਕਰੇਨ-ਰੂਸ ਜੰਗ

    ਤਸਵੀਰ ਸਰੋਤ, Reuters

  8. ਹਮਲੇ ਲਈ "ਇਕੱਲੇ ਵਲਾਦੀਮੀਰ ਪੁਤਿਨ" ਜ਼ਿੰਮੇਵਾਰ ਹਨ: ਬਾਇਡਨ

    ਜੋਅ ਬਾਇਡਨ

    ਤਸਵੀਰ ਸਰੋਤ, Getty Images

    ਆਪਣੇ ਭਾਸ਼ਣ ਵਿੱਚ ਰਾਸ਼ਟਰਪਤੀ ਬਾਇਡਨ ਨੇ ਕਿਹਾ ਹੈ ਕਿ ਯੂਕਰੇਨ ਦੇ ਹਮਲੇ ਲਈ "ਇਕੱਲੇ ਵਲਾਦੀਮੀਰ ਪੁਤਿਨ" ਜ਼ਿੰਮੇਵਾਰ ਹਨ ਅਤੇ ਉਨ੍ਹਾਂ ਨੇ ਵਾਅਦਾ ਕੀਤਾ ਹੈ ਕਿ ਰੂਸੀ ਆਗੂ "ਲੰਬੇ ਸਮੇਂ ਤੱਕ ਲਗਾਤਾਰ ਉੱਚੀ ਕੀਮਤ ਅਦਾ ਕਰਨਗੇ"।

    ਉਨ੍ਹਾਂ ਅੱਗੇ ਕਿਹਾ ਕਿ ਪੁਤਿਨ ਦਾ ਸ਼ਾਸਨ ਕੁਲੀਨ ਵਰਗ ਅਤੇ ਹੋਰ ਭ੍ਰਿਸ਼ਟ ਅਧਿਕਾਰੀਆਂ ਦੁਆਰਾ ਸਮਰਥਿਤ ਹੈ "ਜਿਨ੍ਹਾਂ ਨੇ ਇਸ ਹਿੰਸਕ ਸ਼ਾਸਨ ਨਾਲ ਅਰਬਾਂ ਡਾਲਰ [ਚੋਰੀ] ਕੀਤੇ ਹਨ''।

    ਇਸਦੇ ਨਾਲ ਹੀ ਬਾਇਡਨ ਨੇ ਰੂਸੀ ਯਾਟ, ਜੈੱਟ ਅਤੇ ਹੋਰ ਲਗਜ਼ਰੀ ਚੀਜ਼ਾਂ ਨੂੰ ਜ਼ਬਤ ਕਰਨ ਲਈ ਯੂਰਪੀਅਨ ਸਹਿਯੋਗੀਆਂ ਨਾਲ ਮਿਲ ਕੇ ਕੰਮ ਕਰਨ ਦਾ ਵਾਅਦਾ ਕੀਤਾ।

    ਯੂਐੱਸ ਅਤੇ ਈਯੂ ਨੇ ਪਹਿਲਾਂ ਹੀ ਕੁਲੀਨ ਵਰਗ ਦੀਆਂ ਸੂਚੀਆਂ ਜਾਰੀ ਕਰ ਦਿੱਤੀਆਂ ਹਨ, ਜਿਨ੍ਹਾਂ ਵਿਰੁੱਧ ਪਾਬੰਦੀਆਂ ਲਗਾਈਆਂ ਗਈਆਂ ਹਨ।

    ਇਸ ਦੇ ਨਾਲ ਹੀ ਰਾਸ਼ਟਰਪਤੀ ਬਾਇਡਨ ਨੇ ਪੁਸ਼ਟੀ ਕੀਤੀ ਹੈ ਕਿ ਉਨ੍ਹਾਂ ਦਾ ਪ੍ਰਸ਼ਾਸਨ ਯੂਐੱਸ ਏਅਰਸਪੇਸ ਵਿੱਚ ਰੂਸ ਦੀਆਂ ਸਾਰੀਆਂ ਵਪਾਰਕ ਅਤੇ ਨਿੱਜੀ ਉਡਾਣਾਂ 'ਤੇ ਪਬੰਦੀ ਲਗਾ ਰਿਹਾ ਹੈ।

    ਬਾਇਡਨ ਅਨੁਸਾਰ, ਇਹ ਪਾਬੰਦੀ ਰੂਸ ਨੂੰ ਹੋਰ ਅਲੱਗ-ਥਲੱਗ ਕਰ ਦੇਵੇਗੀ ਅਤੇ ਇਸਦੀ ਆਰਥਿਕ ਸਥਿਤੀ 'ਤੇ ਹੋਰ ਦਬਾਅ ਪਾਵੇਗੀ।

    ਉਨ੍ਹਾਂ ਕਿਹਾ ਕਿ ਰੂਸੀ ਰੂਬਲ (ਮੁਦਰਾ) ਅਤੇ ਸ਼ੇਅਰ ਬਜ਼ਾਰ ਪਹਿਲਾਂ ਹੀ ਆਪਣੇ ਮੁੱਲ ਦਾ ਕ੍ਰਮਵਾਰ 30% ਅਤੇ 40% ਗੁਆ ਚੁੱਕੇ ਹਨ।

  9. ਜੋਅ ਬਾਇਡਨ ਦੇ ਭਾਸ਼ਣ ਦੀਆਂ 10 ਵੱਡੀਆਂ ਗੱਲਾਂ

    ਰੂਸੀ ਸ਼ੇਅਰ ਬਾਜ਼ਾਰ ਵਿੱਚ 40 ਫੀਸਦ ਦੀ ਗਿਰਾਵਟ

    ਅਮਰੀਕਾ ਆਪਣੀ ਫੌਜ ਯੂਕਰੇਨ ਵਿੱਚ ਨਹੀਂ ਭੇਜੇਗਾ

    ਅਮਰੀਕਾ ਨੇ ਰੂਸ ਦੇ ਖਿਲਾਫ਼ ਪਾਬੰਦੀਆਂ ਵਧਾਈਆਂ ਹਨ

    ਯੂਕਰੇਨ ਦੀ 1 ਬਿਲੀਅਨ ਡਾਲਰ ਦੀ ਮਦਦ ਕਰਾਂਗੇ

    ਅਮਰੀਕਾ ਨੇ ਆਪਣਾ ਏਅਰਸਪੇਸ ਰੂਸ ਫਲਾਈਟ ਲਈ ਬੰਦ ਕੀਤਾ

    ਆਰਥਿਕ ਪਾਬੰਦੀਆਂ ਨਾਲ ਰੂਸ ਦਾ ਲੱਕ ਤੋੜਾਂਗੇ

    ਅਸੀਂ ਨਾਟੋ ਦੇਸਾਂ ਦੀ ਸੁਰੱਖਿਆ ਲਈ ਵਚਨਬੱਧ ਹਾਂ

    6 ਦਿਨ ਪਹਿਲਾਂ ਪੁਤਿਨ ਨੇ ਗ਼ਲਤ ਕਦਮ ਚੁੱਕਿਆ, ਰੂਸ ਨੂੰ ਕੀਮਤ ਚੁਕਾਉਣੀ ਪਵੇਗੀ

    ਯੂਰੋਪੀਅਨ ਯੂਨੀਅਨ ਪੂਰੀ ਤਰ੍ਹਾਂ ਇੱਕਜੁੱਟ ਹੈ

    ਤਾਨਾਸ਼ਾਹ ਨੂੰ ਉਸਦੇ ਕੀਤੇ ਦੀ ਸਜਾ ਦੇਣੀ ਜ਼ਰੂਰੀ ਹੈ

  10. ਬਾਇਡਨ ਬੋਲੇ- 'ਪੁਤਿਨ ਗ਼ਲਤ ਸੀ, ਅਸੀਂ ਤਿਆਰ ਸੀ'

    ਅਮਰੀਕਾ ਦੇ ਰਾਸ਼ਟਰਪਤੀ ਨੇ ਯੂਕਰੇਨ-ਰੂਸ ਜੰਗ ’ਤੇ ਆਪਣੇ ਦੇਸ ਨੂੰ ਸੰਬੋਧਿਤ ਕੀਤਾ।

    ਉਨ੍ਹਾਂ ਕਿਹਾ, "ਛੇ ਦਿਨ ਪਹਿਲਾਂ, ਰੂਸ ਦੇ ਵਲਾਦੀਮੀਰ ਪੁਤਿਨ ਨੇ ਆਜ਼ਾਦ ਦੁਨੀਆ ਦੀ ਨੀਂਹ ਨੂੰ ਹਿਲਾਉਣ ਦੀ ਕੋਸ਼ਿਸ਼ ਕੀਤੀ, ਇਹ ਸੋਚ ਕੇ ਕਿ ਉਹ ਇਸ ਨੂੰ ਆਪਣੇ ਡਰਾਉਣੇ ਤਰੀਕਿਆਂ ਨਾਲ ਮੋੜ ਸਕਦੇ ਹਨ।"

    "ਪਰ ਉਨ੍ਹਾਂ ਨੇ ਗਲਤ ਹਿਸਾਬ ਲਗਾਇਆ"।

    ਬਾਇਡਨ ਨੇ ਆਪਣੇ ਯੂਕਰੇਨੀ ਹਮਰੁਤਬਾ ਵੋਲੋਦੀਮੀਰ ਜ਼ੇਲੇਂਸਕੀ ਅਤੇ ਯੂਕਰੇਨੀ ਨਾਗਰਿਕਾਂ ਦੀ "ਉਨ੍ਹਾਂ ਦੀ ਨਿਡਰਤਾ, ਉਨ੍ਹਾਂ ਦੀ ਹਿੰਮਤ, ਉਨ੍ਹਾਂ ਦੀ ਦ੍ਰਿੜਤਾ, [ਜੋ] ਦੁਨੀਆ ਨੂੰ ਪ੍ਰੇਰਿਤ ਕਰਦੀ ਹੈ" ਲਈ ਸ਼ਲਾਘਾ ਕੀਤੀ।

    ਉਨ੍ਹਾਂ ਨੇ ਅਮਰੀਕਾ ਵਿੱਚ ਯੂਕਰੇਨ ਦੇ ਰਾਜਦੂਤ, ਜੋ ਚੈਂਬਰ ਵਿੱਚ ਬੈਠੇ ਸਨ, ਨੂੰ ਖੜ੍ਹੇ ਹੋਣ ਅਤੇ ਪਛਾਣੇ ਜਾਣ ਲਈ ਕਿਹਾ।

    ਰਾਸ਼ਟਰਪਤੀ ਬਾਇਡਨ ਨੇ ਕਿਹਾ ਕਿ ਅਮਰੀਕਾ ਅਤੇ ਨਾਟੋ ਨੇ ਦਿਖਾਇਆ ਹੈ ਕਿ ਪੱਛਮ ਯੂਕਰੇਨ ਦੇ ਨਾਲ ਖੜ੍ਹਾ ਹੈ।

    ਉਨ੍ਹਾਂ ਹਮਲੇ ਦੀ ਨਿੰਦਾ ਕਰਦਿਆਂ ਕਿਹਾ, ਇਤਿਹਾਸ ਨੇ ਦਿਖਾਇਆ ਹੈ ਕਿ "ਜਦੋਂ ਤਾਨਾਸ਼ਾਹ ਆਪਣੇ ਹਮਲੇ ਦੀ ਕੀਮਤ ਅਦਾ ਨਹੀਂ ਕਰਦੇ, ਤਾਂ ਉਹ ਹੋਰ ਅਰਾਜਕਤਾ ਪੈਦਾ ਕਰਦੇ ਹਨ"।

    "ਪੁਤਿਨ ਗਲਤ ਸੀ। ਅਸੀਂ ਤਿਆਰ ਸੀ''।

    ਜੋਅ ਬਾਇਡਨ

    ਤਸਵੀਰ ਸਰੋਤ, Getty Images

  11. ਯੂਕਰੇਨ ਦੇ ਦੱਖਣੀ ਸ਼ਹਿਰ ਖੇਰਸਨ 'ਤੇ ਕਥਿਤ ਤੌਰ 'ਤੇ ਰੂਸ ਦੇ ਕਬਜ਼ੇ ਦੀਆਂ ਖ਼ਬਰਾਂ

    ਰੂਸ - ਯੂਕਰੇਨ ਜੰਗ

    ਤਸਵੀਰ ਸਰੋਤ, Getty Images

    ਯੂਕਰੇਨ ਵਿੱਚ ਲੜਾਈ ਅਜੇ ਵੀ ਜਾਰੀ ਹੈ ਅਤੇ ਇਸ ਦੌਰਾਨ ਦੇਸ਼ ਦੇ ਦੱਖਣੀ ਸ਼ਹਿਰ ਖੇਰਸਨ 'ਤੇ ਕਥਿਤ ਤੌਰ 'ਤੇ ਰੂਸੀਆਂ ਦੇ ਕਬਜ਼ੇ ਦੀਆਂ ਖ਼ਬਰਾਂ ਮਿਲ ਰਹੀਆਂ ਹਨ।

    ਸ਼ਹਿਰ ਦੇ ਮੇਅਰ ਕੌਮੀ ਸਰਕਾਰ ਅਤੇ ਸਹਾਇਤਾ ਏਜੰਸੀਆਂ ਤੋਂ ਮਦਦ ਦੀ ਅਪੀਲ ਕਰ ਰਹੇ ਹਨ ਤਾਂ ਜੋ ਭੋਜਨ ਅਤੇ ਦਵਾਈਆਂ ਸਮੇਤ ਜ਼ਰੂਰੀ ਸਪਲਾਈ ਅਤੇ ਜ਼ਖਮੀਆਂ ਨੂੰ ਬਾਹਰ ਕੱਢਣ ਨੂੰ ਯਕੀਨੀ ਬਣਾਇਆ ਜਾ ਸਕੇ।

    ਸਥਾਨਕ ਕੌਂਸਲ ਦੇ ਇੱਕ ਮੈਂਬਰ ਨੇ ਬੀਬੀਸੀ ਨੂੰ ਦੱਸਿਆ ਕਿ 200 ਲੋਕ ਮਾਰੇ ਗਏ ਸਨ, ਜਿਨ੍ਹਾਂ ਵਿੱਚੋਂ ਬਹੁਤ ਸਾਰੇ ਆਮ ਨਾਗਰਿਕ ਸਨ।

    ਇਸ ਦੌਰਾਨ, ਯੂਕਰੇਨ ਦੇ ਉੱਤਰ-ਪੱਛਮ ਵਿੱਚ ਜ਼ਾਇਟੋਮਿਅਰ ਸ਼ਹਿਰ ਵਿੱਚ, ਐਮਰਜੈਂਸੀ ਕਰਮਚਾਰੀ ਇੱਕ ਮਿਜ਼ਾਈਲ ਹਮਲੇ ਨਾਲ ਪ੍ਰਭਾਵਿਤ ਰਿਹਾਇਸ਼ੀ ਇਮਾਰਤਾਂ ਵਿੱਚ ਅੱਗ ਨਾਲ ਨਜਿੱਠ ਰਹੇ ਹਨ।

    ਅਧਿਕਾਰੀਆਂ ਨੇ ਦੱਸਿਆ ਕਿ (ਇਸ ਹਮਲੇ 'ਚ) ਚਾਰ ਲੋਕ ਮਾਰੇ ਗਏ ਸਨ।

  12. ਬਾਇਡਨ ਦੀ ਪੁਤਿਨ ਨੂੰ ਚੇਤਾਵਨੀ: ਜਦੋਂ ਤਾਨਾਸ਼ਾਹ ਆਪਣੇ ਹਮਲੇ ਦੀ ਕੀਮਤ ਅਦਾ ਨਹੀਂ ਕਰਦੇ, ਉਹ ਹੋਰ ਅਰਾਜਕਤਾ ਪੈਦਾ ਕਰਦੇ ਹਨ''

    ਅਮਰੀਕੀ ਰਾਸ਼ਟਰਪਤੀ ਜੋਅ ਬਾਇਡਨ

    ਤਸਵੀਰ ਸਰੋਤ, Getty Images

    ਅਮਰੀਕੀ ਰਾਸ਼ਟਰਪਤੀ ਜੋਅ ਬਾਇਡਨ ਨੇ ਮੰਗਲਵਾਰ ਰਾਤ ਨੂੰ (ਅਮਰੀਕੀ ਸਮੇਂ ਅਨੁਸਾਰ) ਕਾਂਗਰਸ ਨੂੰ ਆਪਣਾ ਪਹਿਲਾ ਪ੍ਰਾਈਮ ਟਾਈਮ ਸਟੇਟ ਆਫ ਦਿ ਯੂਨੀਅਨ ਭਾਸ਼ਣ ਦੇ ਰਹੇ ਹਨ।

    ਵ੍ਹਾਈਟ ਹਾਊਸ ਦੁਆਰਾ ਜਾਰੀ ਕੀਤੇ ਗਏ ਉਨ੍ਹਾਂ ਦੇ ਭਾਸ਼ਣ ਦੇ ਅੰਸ਼ਾਂ ਦੇ ਅਨੁਸਾਰ, ਬਾਇਡਨ ਰੂਸ ਦੁਆਰਾ ਆਪਣੇ ਦੱਖਣੀ ਗੁਆਂਢੀ ਦੇਸ਼ 'ਤੇ ਹਮਲਾ ਕਰਨ ਲਈ ਵਲਾਦੀਮੀਰ ਪੁਤਿਨ ਦੇ ਫੈਸਲੇ ਦੀ ਨਿੰਦਾ ਕਰਨਗੇ।

    ਉਹ ਕਹਿਣਗੇ, "ਸਾਡੇ ਇਤਿਹਾਸ ਦੌਰਾਨ ਅਸੀਂ ਇਹ ਸਬਕ ਸਿੱਖਿਆ ਹੈ - ਜਦੋਂ ਤਾਨਾਸ਼ਾਹ ਆਪਣੇ ਹਮਲੇ ਦੀ ਕੀਮਤ ਅਦਾ ਨਹੀਂ ਕਰਦੇ, ਤਾਂ ਉਹ ਹੋਰ ਅਰਾਜਕਤਾ ਪੈਦਾ ਕਰਦੇ ਹਨ।''

    "ਉਹ ਅੱਗੇ ਵਧਦੇ ਰਹਿੰਦੇ ਹਨ। ਅਤੇ, ਅਮਰੀਕਾ ਅਤੇ ਦੁਨੀਆ ਲਈ ਕੀਮਤਾਂ ਅਤੇ ਖਤਰੇ ਵਧਦੇ ਰਹਿੰਦੇ ਹਨ।"

    ਉਹ ਨਾਟੋ ਫੌਜੀ ਗਠਜੋੜ ਦੀ ਪ੍ਰਸ਼ੰਸਾ ਕਰਦੇ ਹੋਏ ਅੱਗੇ ਕਹਿਣਗੇ, ਇਹ "ਦੂਜੇ ਵਿਸ਼ਵ ਯੁੱਧ ਤੋਂ ਬਾਅਦ ਯੂਰਪ ਵਿੱਚ ਸ਼ਾਂਤੀ ਅਤੇ ਸਥਿਰਤਾ ਨੂੰ ਸੁਰੱਖਿਅਤ ਕਰਨ ਲਈ ਬਣਾਇਆ ਗਿਆ ਸੀ"।

    ਉਹ ਯੂਐੱਸ ਦੇ ਸੰਸਦ ਮੈਂਬਰਾਂ ਅਤੇ ਉੱਚ ਦਰਜੇ ਦੇ ਮਹਿਮਾਨਾਂ ਨੂੰ ਦੱਸਣਗੇ ਕਿ "ਪੁਤਿਨ ਦੀ ਲੜਾਈ ਪਹਿਲਾਂ ਤੋਂ ਸੋਚੀ ਗਈ ਅਤੇ ਬਿਨਾਂ ਭੜਕਾਏ ਹੋਏ ਸੀ,"

    "ਉਨ੍ਹਾਂ ਨੇ ਕੂਟਨੀਤੀ ਦੀਆਂ ਕੋਸ਼ਿਸ਼ਾਂ ਨੂੰ ਰੱਦ ਕਰ ਦਿੱਤਾ। ਉਨ੍ਹਾਂ ਨੇ ਸੋਚਿਆ ਕਿ ਪੱਛਮ ਅਤੇ ਨਾਟੋ ਜਵਾਬ ਨਹੀਂ ਦੇਣਗੇ। ਅਤੇ ਉਨ੍ਹਾਂ ਨੇ ਸੋਚਿਆ ਕਿ ਉਹ ਸਾਨੂੰ ਇੱਥੇ ਸਾਡੇ ਘਰ ਵਿੱਚ ਵੰਡ ਸਕਦੇ ਹਨ।''

    "ਪੁਤਿਨ ਗਲਤ ਸੀ। ਅਸੀਂ ਤਿਆਰ ਸੀ।"

  13. ਯੂਕਰੇਨ ਰੂਸ ਜੰਗ: ਹੁਣ ਤੱਕ ਕੀ ਕੀ ਹੋਇਆ

    • ਯੂਕਰੇਨ ਦੇ ਅਧਿਕਾਰੀਆਂ ਨੇ ਕਿਹਾ ਕਿ ਕੀਵ ਵਿੱਚ ਇੱਕ ਟੀਵੀ ਟਾਵਰ 'ਤੇ ਰੂਸੀ ਹਮਲੇ ਤੋਂ ਬਾਅਦ ਘੱਟੋ-ਘੱਟ ਪੰਜ ਵਿਅਕਤੀਆਂ ਦੀ ਮੌਤ ਹੋ ਗਈ ਹੈ।
    • ਯੂਕਰੇਨ ਦੇ ਸ਼ਹਿਰ, ਕੇਂਦਰੀ ਖਾਰਕੀਵ ਵਿੱਚ ਫ੍ਰੀਡਮ ਸਕੁਆਇਰ 'ਤੇ ਇੱਕ ਹਮਲਾ ਹੋਇਆ, ਜਿਸ ਵਿੱਚ ਘੱਟੋ-ਘੱਟ 10 ਨਾਗਰਿਕਾਂ ਦੀ ਮੌਤ ਹੋ ਗਈ ਹੈ।
    • ਇਸ ਗੱਲ ਦਾ ਖਦਸ਼ਾ ਹੈ ਕਿ ਮਾਸਕੋ ਇਸ ਗੱਲ ਬਾਰੇ ਨਿਰਾਸ਼ਾ ਨੂੰ ਲੈ ਕੇ ਕਿ ਰੂਸ ਹਮਲੇ ਦੇ 6 ਦਿਨਾਂ ਬਾਅਦ ਵੀ ਆਪਣੀ ਉਮੀਦ ਮੁਤਾਬਕ ਅੱਗੇ ਨਹੀਂ ਵਧਿਆ, ਨਾਗਰਿਕ ਟੀਚਿਆਂ ਨੂੰ ਨਿਸ਼ਾਨਾ ਬਣਾਵੇਗਾ।
    • ਯੂਕਰੇਨ ਦੇ ਸ਼ਹਿਰਾਂ, ਖਾਸ ਕਰਕੇ ਕੀਵ ਵਿੱਚ ਤਣਾਅ ਬਹੁਤ ਜ਼ਿਆਦਾ ਹੈ। ਸੈਟੇਲਾਈਟ ਤਸਵੀਰਾਂ ਵਿੱਚ ਰਾਜਧਾਨੀ ਦੇ ਬਿਲਕੁਲ ਬਾਹਰ ਇੱਕ ਵਿਸ਼ਾਲ ਰੂਸੀ ਹਥਿਆਰਬੰਦ ਕਾਫਲਾ ਦਿਖਾਈ ਦਿੱਤਾ ਹੈ।
    • ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਅਤੇ ਅਮਰੀਕੀ ਰਾਸ਼ਟਰਪਤੀ ਜੋਅ ਬਾਇਡਨ ਦਰਮਿਆਨ ਫੋਨ 'ਤੇ ਗੱਲ ਹੋਈ ਹੈ।
    • ਭਾਰਤ ਦੇ ਇੱਕ ਵਿਦਿਆਰਥੀ ਨਵੀਨ ਸ਼ੇਖਰਅੱਪਾ ਦੀ ਖਾਰਕੀਵ ਵਿਖੇ ਮੌਤ ਹੋਈ ਹੈ।
    • ਭਾਰਤ ਦੇ ਵਿਦੇਸ਼ ਮੰਤਰਾਲੇ ਮੁਤਾਬਕ ਕੀਵ ਵਿੱਚ ਕੋਈ ਭਾਰਤੀ ਨਹੀਂ ਹੈ। ''ਆਪਰੇਸ਼ਨ ਗੰਗਾ'' ਰਾਹੀਂ ਸੈਂਕੜੇ ਭਾਰਤੀ ਵਾਪਸ ਪਹੁੰਚੇ ਹਨ ਅਤੇ ਹਜ਼ਾਰਾਂ ਹੁਣ ਵੀ ਇੰਤਜ਼ਾਰ 'ਚ।
    • ਯੂਕਰੇਨ ਦੇ ਰਾਸ਼ਟਰਪਤੀ ਨੇ ਯੂਕਰੇਨ ਲਈ ਯੂਰਪੀਅਨ ਯੂਨੀਅਨ ਸੰਸਦ ਵਿੱਚ ਮੈਂਬਰਸ਼ਿਪ ਦੀ ਅਪੀਲ ਕੀਤੀ ਹੈ।
    • ਯੂਕਰੇਨ ਨੇ ਦਾਅਵਾ ਕੀਤਾ ਹੈ ਕਿ 5700 ਰੂਸੀ ਫ਼ੌਜੀ ਛੇ ਦਿਨਾਂ ਵਿੱਚ ਮਾਰੇ ਗਏ ਹਨ।
  14. ਬੀਬੀਸੀ ਪੰਜਾਬੀ ਦੇ ਲਾਈਵ ਪੇਜ 'ਤੇ ਤੁਹਾਡਾ ਸਵਾਗਤ ਹੈ। ਯੂਕਰੇਨ 'ਤੇ ਰੂਸ ਦਾ ਹਮਲਾ ਸਤਵੇਂ ਦਿਨ ਵੀ ਜਾਰੀ ਹੈ। ਇਸ ਪੇਜ ਰਾਹੀਂ ਅਸੀਂ ਤੁਹਾਡੇ ਤੱਕ ਇਸ ਜੰਗ ਬਾਰੇ ਅਹਿਮ ਜਾਣਕਾਰੀ ਪਹੁੰਚਾ ਰਹੇ ਹਾਂ।

    ਤੁਸੀਂ ਇਸ ਸਬੰਧ 1 ਮਾਰਚ ਦੀਆਂ ਖ਼ਬਰਾਂ ਪੜ੍ਹਨ ਲਈ ਇੱਥੇ ਕਲਿੱਕ Link ਕਰ ਸਕਦੇ ਹੋ।