You’re viewing a text-only version of this website that uses less data. View the main version of the website including all images and videos.
ਰੂਸ ਤੇ ਯੂਕਰੇਨ ਵਿਚਕਾਰ ਤਣਾਅ ਜਾਰੀ ਹੈ। ਯੂਕਰੇਨ ਦੇ ਰਾਸ਼ਟਰਪਤੀ ਨੇ ਕਿਹਾ ਕਿ ਰੂਸ ਨੇ ਯੂਕਰੇਨ ਦੀ ਸਰਹੱਦ 'ਤੇ ਦੋ ਲੱਖ ਫੌਜੀ ਤਾਇਨਾਤ ਕੀਤੇ ਹਨ।
ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਯੂਕਰੇਨ ਉੱਪਰ ਰੂਸ ਦੀ ਕਾਰਵਾਈ ਨੂੰ ''ਘੋਰ ਭਿਅੰਕਰ ਹਮਲੇ'' ਕਹਿੰਦਿਆਂ ਇਸ ਦੀ ਨਿੰਦਾ ਕੀਤੀ ਹੈ।
ਟਰੂਡੋ ਨੇ ਆਪਣੇ ਟਵੀਟ ਵਿੱਚ ਲਿਖਿਆ, ਕੈਨੇਡਾ ਸਭ ਤੋਂ ਸਖ਼ਤ ਸੰਭਵ ਸ਼ਬਦਾਂ ਵਿੱਚ ਰੂਸ ਦੇ ਯੂਕਰੇਨ ਉੱਪਰ ਘੋਰ ਭਿਅੰਕਰ ਹਮਲੇ ਦੀ ਨਿੰਦਾ ਕਰਦਾ ਹੈ। ਇਹ ਅਣਭੜਕਾਈਆਂ ਕਾਰਵਾਈਆਂ ਯੂਕਰੇਨ ਦੀ ਪ੍ਰਭੂਸੱਤਾ ਅਤੇ ਭੂਗੋਲਿਕ ਅਖੰਡਤਾ ਅਤੇ ਰੂਸ ਦੀ ਕੌਮਾਂਤਰੀ ਕਾਨੂੰਨਾਂ ਅਧੀਨ ਜ਼ਿੰਮੇਵਾਰੀ ਦੀ ਸਪਸ਼ਟ ਉਲੰਘਣਾ ਹਨ।''
ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਵੱਲੋਂ ਪੂਰਬੀ ਯੂਕਰੇਨ ਵਿੱਚ ਫੌਜੀ ਕਾਰਵਾਈ ਦੇ ਐਲਾਨ ਤੋਂ ਬਾਅਦ ਸੰਯੁਕਤ ਰਾਸ਼ਟਰ ਸੁਰੱਖਿਆ ਪਰਿਸ਼ਦ ਦੀ ਐਮਰਜੈਂਸੀ ਬੈਠਕ ਬੁਲਾਈ ਗਈ ਹੈ। ਇਸ ਬੈਠਕ 'ਚ ਭਾਰਤ ਦੇ ਸਥਾਈ ਪ੍ਰਤੀਨਿਧੀ ਟੀਐੱਸ ਤਿਰੁਮੂਰਤੀ ਨੇ ਫਿਰ ਉਹੀ ਗੱਲ ਦੁਹਰਾਈ ਹੈ ਕਿ ਤੁਰੰਤ ਤਣਾਅ ਨੂੰ ਘਟਾਉਣ ਦੀ ਲੋੜ ਹੈ।
ਤਿਰੁਮੂਰਤੀ ਨੇ ਕਿਹਾ, ''ਦੋ ਦਿਨ ਪਹਿਲਾਂ ਦੀ ਸੁਰੱਖਿਆ ਪਰਿਸ਼ਦ 'ਚ ਯੂਕਰੇਨ ਦੀ ਸਥਿਤੀ 'ਤੇ ਗੱਲ ਹੋਈ ਸੀ ਅਤੇ ਭਾਰਤ ਨੇ ਤੁਰੰਤ ਤਣਾਅ ਘੱਟ ਕਰਨ ਅਤੇ ਕੂਟਨੀਤੀ ਰਾਹੀਂ ਸਾਰੇ ਮੁੱਦਿਆਂ ਨੂੰ ਹੱਲ ਕਰਨ ਦੀ ਗੱਲ ਕਹੀ ਸੀ। ਪਰ ਅਫਸੋਸ ਹੈ ਕਿ ਤਣਾਅ ਘਟਾਉਣ ਦੇ ਯਤਨਾਂ ਨੂੰ ਸਮਾਂ ਦੇਣ ਦੀ ਅੰਤਰਰਾਸ਼ਟਰੀ ਭਾਈਚਾਰੇ ਦੀ ਮੰਗ ਨਹੀਂ ਸੁਣੀ ਗਈ। ਸਥਿਤੀ ਖ਼ਤਰਨਾਕ ਹੈ ਅਤੇ ਡੂੰਘੇ ਸੰਕਟ ਵੱਲ ਵਧ ਰਹੀ ਹੈ।''
ਉਨ੍ਹਾਂ ਕਿਹਾ, “ਅਸੀਂ ਇਸ ਬਾਰੇ ਡੂੰਘੀ ਚਿੰਤਾ ਪ੍ਰਗਟ ਕਰਦੇ ਹਾਂ। ਜੇਕਰ ਸਥਿਤੀ ਨੂੰ ਸਾਵਧਾਨੀ ਨਾਲ ਨਾ ਸੰਭਾਲਿਆ ਗਿਆ ਤਾਂ ਖੇਤਰ ਦੀ ਸ਼ਾਂਤੀ ਅਤੇ ਸਥਿਰਤਾ ਖ਼ਤਰੇ ਵਿੱਚ ਪੈ ਜਾਵੇਗੀ। ਅਸੀਂ ਤਣਾਅ ਨੂੰ ਤੁਰੰਤ ਘਟਾਉਣ ਦੀ ਮੰਗ ਕਰਦੇ ਹਾਂ। ਅਸੀਂ ਕਿਸੇ ਵੀ ਅਜਿਹੀ ਕਾਰਵਾਈ ਤੋਂ ਬਚਣ ਦੀ ਸਲਾਹ ਦਿੰਦੇ ਹਾਂ ਜਿਸ ਨਾਲ ਸਥਿਤੀ ਵਿਗੜ ਸਕਦੀ ਹੈ।''
''ਮੈਂ ਸਾਰੇ ਪੱਖਾਂ ਨੂੰ ਅਪੀਲ ਕਰਦਾ ਹਾਂ ਕਿ ਆਪਣੇ ਹਿੱਤਾਂ ਨੂੰ ਲੈ ਕੇ ਜੋ ਆਪਸੀ ਮਤਭੇਦ ਹਨ, ਉਹ ਉਨ੍ਹਾਂ ਨੂੰ ਘੱਟ ਕਰਨ ਦੀ ਕੋਸ਼ਿਸ਼ ਕਰਨ। ਭਾਰਤ ਸਾਰੀਆਂ ਧਿਰਾਂ ਦੇ ਜਾਇਜ਼ ਸੁਰੱਖਿਆ ਹਿੱਤਾਂ ਦਾ ਖਿਆਲ ਰੱਖਣ ਦੀ ਅਪੀਲ ਕਰਦਾ ਹੈ। ਭਾਰਤ ਸਦਾ ਤੋਂ ਅੰਤਰਰਾਸ਼ਟਰੀ ਨਿਯਮਾਂ ਅਤੇ ਸਬੰਧਤ ਦੇਸ਼ਾਂ ਦੇ ਸਮਝੌਤਿਆਂ ਦੇ ਆਧਾਰ 'ਤੇ ਵਿਵਾਦਾਂ ਨੂੰ ਹੱਲ ਕਰਨ ਦੀ ਵਕਾਲਤ ਕਰਦਾ ਰਿਹਾ ਹੈ।''
ਅਮਰੀਕੀ ਰਾਸ਼ਟਰਪਤੀ ਜੋਅ ਬਾਇਡਨ ਨੇ ''ਰੂਸੀ ਫ਼ੌਜਾਂ ਦੀ ਕਾਰਵਾਈ ਨੂੰ ਅਣਭੜਕਾਈ ਅਤੇ ਨਾਵਾਜਬ'' ਦੱਸਿਆ ਹੈ।
ਉਨ੍ਹਾਂ ਨੇ ਕਿਹਾ, ''ਪੂਰੀ ਦੁਨੀਆਂ ਦੀਆਂ ਅਰਦਾਸਾਂ ਯੂਕਰੇਨ ਵਾਸੀਆਂ ਦੇ ਨਾਲ ਹਨ।''
''ਰਾਸ਼ਟਰਪਤੀ ਪੁਤਿਨ ਨੇ ਇੱਕ ਸੋਚੀ ਸਮਝੀ ਜੰਗ ਚੁਣੀ ਹੈ ਜੋ ਮਨੁੱਖੀ ਦੁੱਖਾਂ ਅਤੇ ਜ਼ਿੰਦਗੀ ਦਾ ਵਿਨਾਸ਼ਕਾਰੀ ਘਾਟਾ ਲੈਕੇ ਆਵੇਗੀ।''
''ਇਹ ਹਮਲਾ ਜੋ ਵੀ ਮੌਤ ਅਤੇ ਤਬਾਹੀ ਲੈਕੇ ਆਵੇਗਾ ਉਸ ਲਈ ਇਕੱਲਾ ਰੂਸ ਹੀ ਜ਼ਿੰਮੇਵਾਰ ਹੈ। ਅਮਰੀਕਾ ਅਤੇ ਇਸ ਦੇ ਸਾਥੀ ਇੱਕਜੁਟਤਾ ਨਾਲ ਅਤੇ ਫ਼ੈਸਲਾਕੁਨ ਤਰੀਕੇ ਨਾਲ ਜਵਾਬ ਦੇਣਗੇ। ਦੁਨੀਆਂ ਰੂਸ ਦੀ ਜਵਾਬਦੇਹੀ ਤੈਅ ਕਰੇਗੀ''
ਰਾਸ਼ਟਰਪਤੀ ਬਾਇਡਨ ਨੇ ਕਿਹਾ ਕਿ ਉਹ ਵੀਰਵਾਰ ਨੂੰ ਅਮਰੀਕੀਆਂ ਨੂੰ ਆਪਣੇ ਸੰਬੋਧਨ ਵਿੱਚ ਦੱਸਣਗੇ ਕਿ ਰੂਸ ਨੂੰ ਇਸ ਦੇ ਕੀ ਸਿੱਟੇ ਭੁਗਤਣੇ ਪੈਣਗੇ।
ਉਨ੍ਹਾਂ ਨੇ ਕਿਹਾ ਕਿ ਉਨ੍ਹਾਂ ਦੀ ਸਥਿਤੀ ਉੱਪਰ ਨਜ਼ਰ ਹੈ ਅਤੇ ਉਹ ਰੂਸ ਲਈ ''ਅਗਲੇਰੇ ਸਿੱਟੇ'' ਐਲਾਨਣ ਤੋਂ ਪਹਿਲਾਂ ਜੀ7 ਆਗੂਆਂ ਨਾਲ ਚਰਚਾ ਕਰਨਗੇ।
ਉਨ੍ਹਾਂ ਨੇ ਕਿਹਾ, ''ਅੱਜ ਰਾਤ ਮੈਂ ਤੇ ਜਿਲ ਯੂਕਰੇਨ ਦੇ ਬਹਾਦਰ ਤੇ ਮਾਣਮੱਤੇ ਵਾਸੀਆਂ ਲਈ ਪ੍ਰਰਥਨਾ ਕਰ ਰਹੇ ਹਾਂ।''
ਉਨ੍ਹਾਂ ਤੋਂ ਪਹਿਲਾਂ ਅਮਰੀਕੀ ਵਿਦੇਸ਼ ਮੰਤਰੀ ਐਂਟੋਨੀ ਬਲਿੰਕਨ ਨੇ ਬੀਬੀਸੀ ਨੂੰ ਕਿਹਾ ਜੇ ਰੂਸ ਜਾਰੀ ਰਹਿੰਦਾ ਹੈ ਤਾਂ ਅਸੀਂ ਵੀ ਚੜ੍ਹਾਂਗੇ। ਇਸ ਲਈ ਉਹ ਜੋ ਵੀ ਸੋਚ ਰਹੇ ਹਨ ਉਨ੍ਹਾਂ ਨੂੰ ਉਸ ਵਿੱਚ ਇਸ ਪੱਖ ਸ਼ਾਮਲ ਕਰਨਾ ਪਏਗਾ।''
ਯੂਕਰੇਨ ਦੇ ਵਿਦੇਸ਼ ਮੰਤਰੀ ਦਮਿਟਰੋ ਕੁਲੇਬਾ ਨੇ ਟਵੀਟ ਕਰਕੇ ਕਿਹਾ ਹੈ ਕਿ "ਪੁਤਿਨ ਨੇ ਹੁਣੇ-ਹੁਣੇ ਯੂਕਰੇਨ 'ਤੇ ਪੂਰੇ ਪੈਮਾਨੇ 'ਤੇ ਹਮਲਾ ਕੀਤਾ ਹੈ।"
ਕੁਲੇਬਾ ਨੇ ਜ਼ੋਰ ਦਿੰਦਿਆਂ ਕਿਹਾ ਕਿ ਯੂਕਰੇਨ "ਆਪਣਾ ਬਚਾਅ ਕਰੇਗਾ" ਅਤੇ ਇਹ ਕਿ "ਦੁਨੀਆ ਪੁਤਿਨ ਨੂੰ ਰੋਕ ਸਕਦੀ ਹੈ ਅਤੇ ਜ਼ਰੂਰ ਰੋਕਣਾ ਚਾਹੀਦਾ ਹੈ"।
ਉਨ੍ਹਾਂ ਕਿਹਾ ਕਿ ''ਹੁਣ ਕਰਵਾਈ ਕਰਨ ਦਾ ਸਮਾਂ ਹੈ।''
ਦੇਸ਼ ਦੇ ਲੋਕਾਂ ਨੂੰ ਸੰਬੋਧਨ ਕਰਦਿਆਂ ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਕਿਹਾ ਹੈ ਕਿ ਰੂਸ ਦੀ ਯੂਕਰੇਨ 'ਤੇ ਕਬਜ਼ਾ ਕਰਨ ਦੀ ''ਕੋਈ ਯੋਜਨਾ ਨਹੀਂ'' ਹੈ।
ਵਿਸ਼ੇਸ਼ ਫ਼ੌਜੀ ਕਾਰਵਾਈ ਦਾ ਐਲਾਨ ਕਰਦਿਆਂ ਉਨ੍ਹਾਂ ਨੇ ਕਿਹਾ ਕਿ ਯੂਕਰੇਨ ਦੇ ਲੋਕ ਅਜ਼ਾਦੀ ਨਾਲ ਚੋਣ ਕਰ ਸਕਣਗੇ ਕਿ ਦੇਸ਼ ਨੂੰ ਕੋਣ ਚਲਾਵੇ।
ਖ਼ਬਰ ਏਜੰਸੀ ਰੌਇਟਰਜ਼ ਨੇ ਚਸ਼ਮਦੀਦ ਗਵਾਹਾਂ ਦੇ ਹਵਾਲੇ ਨਾਲ ਯੂਕਰੇਨ ਦੀ ਸਰਹੱਦ ਦੇ ਨਾਲ ਹੀ ਲਗਦੇ ਰੂਸੀ ਸੂਬੇ ਬੇਲਗਰਾਡ ਵਿੱਚ ਧਮਾਕਿਆਂ ਦੀ ਖ਼ਬਰ ਦਿੱਤੀ ਹੈ।
ਫਲਾਈਟਰਡਾਰ24 ਨੇ ਵੀਰਵਾਰ ਸਵੇਰੇ ਦੱਸਿਆ ਹੈ ਕਿ ਪਾਇਲਟਾਂ ਨੂੰ ਜਾਰੀ ਇੱਕ ਨੋਟਿਸ ਮੁਤਾਬਕ ਯੂਕਰੇਨ ਦੇ ਅਕਾਸ਼ ਵਿੱਚ ਨਾਗਰਿਕ ਉਡਾਣਾਂ ਨੂੰ ''ਸੰਭਾਵੀ ਖ਼ਤਰੇ ਕਾਰਨ'' ਜਾਣ ਤੋਂ ਰੋਕਿਆ ਗਿਆ ਹੈ।
ਹਾਲਾਂਕਿ ਇਸ ਬਾਰੇ ਜ਼ਿਆਦਾ ਵੇਰਵੇ ਉਪਲਭਦ ਨਹੀਂ ਸਨ।
ਯੂਕਰੇਨ ਸਰਕਾਰ ਵੱਲੋਂ ਇਸ ਉੱਪਰ ਕੋਈ ਪ੍ਰਤੀਕਿਰਿਆ ਨਹੀਂ ਦਿੱਤੀ ਗਈ ਹੈ।
ਇਸੇ ਦੌਰਾਨ ਯੂਕਰੇਨ ਦੇ ਪ੍ਰਮੁੱਖ ਹਵਾਈ ਅੱਡਿਆਂ ਉੱਪਰ ਜਹਾਜ਼ਾਂ ਦਾ ਆਉਣਾ-ਜਾਣਾ ਸਮਾਂ-ਸਾਰਨੀ ਮੁਤਾਬਕ ਚੱਲ ਰਿਹਾ ਹੈ।
ਬੀਬੀਸੀ ਪੱਤਰਕਾਰਾਂ ਨੇ ਪੁਸ਼ਟੀ ਕੀਤੀ ਸੀ ਕਿ ਉਨ੍ਹਾਂ ਨੇ ਰਾਜਧਾਨੀ ਕੀਵ ਅਤੇ ਕਰਾਮਾਤੋਰਸਕ ਅਤੇ ਡੋਨੇਤਸਕ ਵਿੱਚ ਧਮਾਕਿਆਂ ਦੀ ਉੱਚੀ ਅਵਾਜ਼ ਸੁਣੀ ਹੈ।
ਸਾਨੂੰ ਯੂਕਰੇਨ ਦੇ ਹੋਰ ਕਈ ਹਿੱਸਿਆਂ ਵਿੱਚ ਵੀ ਧਮਾਕਿਆਂ ਦੀ ਅਪੁਸ਼ਟ ਰਿਪੋਰਟਾਂ ਮਿਲ ਰਹੀਆਂ ਹਨ।
ਕੀਵ ਵਿੱਚ ਬੀਬੀਸੀ ਪੱਤਰਕਾਰ ਪੌਲ ਐਡਮਸ ਨੇ ਵੀਰਵਾਰ ਸੇਵੇਰੇ ਦੱਸਿਆ ਕਿ ਉਨ੍ਹਾਂ ਨੇ ਪੰਜ ਤੋਂ ਛੇ ਧਮਾਕਿਆਂ ਦੀਆਂ ਅਵਾਜ਼ਾਂ ਸੁਣੀਆਂ ਹਨ।
ਸਥਾਨਕ ਮੀਡੀਆ ਰਿਪੋਰਟਾਂ ਵਿੱਚ ਕੀਵ ਦੇ ਮੁੱਖ ਬੋਰਿਸਪੋਲ ਹਵਾਈ ਅੱਡੇ ਦੇ ਨਜ਼ਦੀਕੀ ਵੀ ਗੋਲੀ ਚੱਲਣ ਦੀਆਂ ਅਵਾਜ਼ਾਂ ਸੁਣੀਆਂ ਗਈਆਂ ਹਨ।
ਇਸ ਤੋਂ ਇਲਾਵਾ ਸੋਸ਼ਲ ਮੀਡੀਆ ਉੱਪਰ ਉੱਤਰ-ਪੂਰਬ ਦੇ ਖ਼ਰਕੀਵ, ਦੱਖਣ ਵਿੱਚ ਓਡੇਸਾ ਅਤੇ ਪੂਰਬ ਵਿੱਚ ਡੋਨੇਤਸਕ ਓਬਲਾਸਟ ਖੇਤਰਾਂ ਵਿੱਚ ਵੀ ਧਮਾਕਿਆਂ ਦੀਆਂ ਖ਼ਬਰਾਂ ਹਨ।
ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਹੁਣੇ ਹੀ ਯੂਕਰੇਨ ਦੇ ਡੋਨਬਾਸ ਖੇਤਰ ਵਿੱਚ "ਫੌਜੀ ਕਾਰਵਾਈ" ਦਾ ਐਲਾਨ ਕੀਤਾ ਹੈ।
ਉਨ੍ਹਾਂ ਨੇ ਇਹ ਐਲਾਨ ਉਸੇ ਸਮੇਂ ਇੱਕ ਟੈਲੀਵਿਜ਼ਨ ਭਾਸ਼ਣ ਵਿੱਚ ਕੀਤਾ ਜਦੋਂ ਸੰਯੁਕਤ ਰਾਸ਼ਟਰ ਸੁਰੱਖਿਆ ਪਰਿਸ਼ਦ ਉਨ੍ਹਾਂ ਨੂੰ ਰੁਕਣ ਲਈ ਬੇਨਤੀ ਕਰ ਰਹੀ ਸੀ।
ਪੁਤਿਨ ਨੇ ਯੂਕਰੇਨ ਦੇ ਫੌਜੀਆਂ ਨੂੰ ਕਿਹਾ ਹੈ ਕਿ ਉਹ ਹਥਿਆਰ ਸੁੱਟ ਦੇਣ ਤੇ ਆਪਣੇ ਘਰਾਂ ਨੂੰ ਪਰਤ ਜਾਣ।
ਉਨ੍ਹਾਂ ਨੇ ਚੇਤਾਵਨੀ ਦਿੱਤੀ ਕਿ ਜੇ ਖੂਨ ਬਹੇਗਾ ਤਾਂ ਉਸ ਦਾ ਇਲਜ਼ਾਮ ਯੂਕਰੇਨ 'ਤੇ ਲੱਗੇਗਾ।
ਯੂਕਰੇਨ ਤੇ ਰੂਸ ਵਿਚਕਾਰ ਤਣਾਅ ਜਾਰੀ ਹੈ। ਇਸ ਦੌਰਾਨ ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੈਂਸਕੀ ਨੇ ਕਿਹਾ ਕਿ ਰੂਸ ਨੇ ਯੂਕਰੇਨ ਦੀ ਸਰਹੱਦ 'ਤੇ ਦੋ ਲੱਖ ਫੌਜੀ ਤਾਇਨਾਤ ਕੀਤੇ ਹਨ।
ਦੇਰ ਰਾਤ ਟੀਵੀ 'ਤੇ ਕੀਤੇ ਸੰਬੋਧਨ ਵਿੱਚ ਉਨ੍ਹਾਂ ਨੇ ਕਿਹਾ ਕਿ ਯੂਕਰੇਨ ਦੇ ਲੋਕ ਸ਼ਾਂਤੀ ਚਾਹੁੰਦੇ ਹਨ। ਯੂਕਰੇਨ ਦੇ ਅਧਿਕਾਰੀ ਸ਼ਾਂਤੀ ਚਾਹੁੰਦੇ ਹਨ।
ਉਨ੍ਹਾਂ ਨੇ ਕਿਹਾ ਕਿ ਰੂਸ ਦਾ ਇਹ ਕਦਮ ਯੂਰਪ ਵਿੱਚ ਇੱਕ ਵੱਡੀ ਜੰਗ ਦੀ ਸ਼ੁਰੂਆਤ ਕਰ ਸਕਦਾ ਹੈ।
ਉਨ੍ਹਾਂ ਨੇ ਰੂਸ ਨੂੰ ਚੇਤਾਵਨੀ ਦਿੰਦਿਆਂ ਕਿਹਾ, "ਜੇ ਉਹ ਹਮਲਾ ਕਰਦੇ ਹਨ, ਜੇ ਉਹ ਸਾਡਾ ਦੇਸ਼ ਲੈਣ ਦੀ ਕੋਸਿਸ਼ ਕਰਦੇ ਹਨ - ਸਾਡੀ ਅਜ਼ਾਦੀ, ਸਾਡੀ ਜ਼ਿੰਦਗੀ, ਸਾਡੇ ਬੱਚਿਆਂ ਦੀ ਜ਼ਿੰਦਗੀ - ਤਾਂ ਅਸੀਂ ਵੀ ਆਪਣਾ ਬਚਾਅ ਕਰਾਂਗੇ।"
ਬੀਬੀਸੀ ਪੰਜਾਬੀ ਦੇ ਲਾਈਵ ਪੇਜ 'ਤੇ ਤੁਹਾਡਾ ਸਵਾਗਤ ਹੈ। ਰੂਸ ਤੇ ਯੂਕਰੇਨ ਵਿਚਕਾਰ ਤਣਾਅ ਜਾਰੀ ਹੈ। ਇਸ ਪੇਜ ਰਾਹੀਂ ਅਸੀਂ ਇਸ ਸੰਕਟ ਨਾਲ ਜੁੜੀਆਂ ਅਹਿਮ ਗਤੀਵਿਧੀਆਂ ਸਾਂਝੀਆਂ ਕਰਾਂਗੇ। 23 ਫਰਵਰੀ ਦੇ ਲਾਈਵ ਪੇਜ ਲਈ ਇੱਥੇ ਕਲਿੱਕ ਕਰੋ।