ਯੂਕਰੇਨ ਵਿਵਾਦ: ਜੋਅ ਬਾਇਡਨ ਨੇ ਰੂਸ ਉੱਤੇ ਲਗਾਈਆਂ ਇਹ ਪਾਬੰਦੀਆਂ
ਤਸਵੀਰ ਸਰੋਤ, Reuters
ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਇਡਨ ਨੇ ਰੂਸ ਉੱਪਰ ਵਿਆਪਕ ਪਾਬੰਦੀਆਂ ਲਗਾਈਆਂ ਹਨ। ਬਾਇਡਨ ਨੇ ਕਿਹਾ, “ਅਸੀਂ ਰੂਸ ਦੀ ਸਰਕਾਰ ਲਈ ਪੱਛਮੀ ਵਿੱਤੀ ਸਹਾਇਤਾ ਨੂੰ ਬੰਦ ਕਰ ਦਿੱਤਾ ਹੈ।''
ਬਾਇਡਨ ਦਾ ਇਹ ਫੈਸਲਾ ਉਦੋਂ ਆਇਆ ਜਦੋਂ ਰੂਸੀ ਸਿਆਸਤਦਾਨਾਂ ਨੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੂੰ ਪੂਰਬੀ ਯੂਕਰੇਨ ਦੇ ਬਾਗੀਆਂ ਦੇ ਕਬਜ਼ੇ ਵਾਲੇ ਦੋ ਹਿੱਸਿਆਂ ਵਿੱਚ ਫੌਜ ਭੇਜਣ ਦਾ ਅਧਿਕਾਰ ਦਿੱਤਾ।
ਯੂਐੱਸ ਸਪੇਸ ਟੈਕਨਾਲੋਜੀ ਕੰਪਨੀ ਮੈਕਸਰ ਦੇ ਅਨੁਸਾਰ, ਪਿਛਲੇ 24 ਘੰਟਿਆਂ ਵਿੱਚ ਸੈਟੇਲਾਈਟ ਚਿੱਤਰਾਂ ਮੁਤਾਬਕ ਪੱਛਮੀ ਰੂਸ ਵਿੱਚ ਕਈ ਨਵੇਂ ਸੈਨਿਕਾਂ ਅਤੇ ਉਪਕਰਣਾਂ ਦੀ ਤੈਨਾਤੀ ਅਤੇ ਯੂਕਰੇਨ ਦੀ ਸਰਹੱਦ ਨੇੜੇ ਬੇਲਾਰੂਸ ਵਿੱਚ ਇੱਕ ਏਅਰਫੀਲਡ ਵਿੱਚ 100 ਤੋਂ ਵੱਧ ਵਾਹਨ ਦਿਖਾਈ ਦਿੱਤੇ ਹਨ।
ਯੂਐੱਸ ਨੇ ਪਹਿਲਾਂ ਹੀ ਅਮਰੀਕੀ ਕੰਪਨੀਆਂ ਨੂੰ ਵਿਦਰੋਹੀਆਂ ਦੇ ਕਬਜ਼ੇ ਵਾਲੇ ਯੂਕਰੇਨੀ ਖੇਤਰਾਂ ਡੋਨੈਟਸਕ ਅਤੇ ਲੁਹਾਂਸਕ ਨਾਲ ਵਪਾਰ 'ਤੇ ਪਾਬੰਦੀ ਲਗਾ ਦਿੱਤੀ ਸੀ - ਪਰ ਕੁਝ ਕੰਪਨੀਆਂ ਅਜੇ ਵੀ ਵਪਾਰ ਕਰ ਰਹੀਆਂ ਹਨ।
ਇੱਕ ਅਧਿਕਾਰੀ ਨੇ ਕਿਹਾ ਕਿ ਅਮਰੀਕਾ ਨਾਟੋ ਦੇ ਮੈਂਬਰ ਦੇਸ਼ਾਂ ਐਸਟੋਨੀਆ, ਲਾਤਵੀਆ ਅਤੇ ਲਿਥੁਆਨੀਆ - ਜੋ ਕਿ ਰੂਸ ਦੀ ਸਰਹੱਦ 'ਤੇ ਜਾਂ ਉਸ ਦੇ ਨੇੜੇ ਹਨ, ਵਿੱਚ ਵੀ ਸੈਨਿਕਾਂ ਨੂੰ ਭੇਜ ਰਿਹਾ ਹੈ।
ਇਸ ਤੋਂ ਇਲਾਵਾ, ਅਮਰੀਕੀ ਵਿਦੇਸ਼ ਮੰਤਰੀ ਐਂਟਨੀ ਬਲਿੰਕੇਨ ਨੇ ਰਾਸ਼ਟਰਪਤੀ ਬਾਇਡਨ ਦੇ ਭਾਸ਼ਣ ਤੋਂ ਬਾਅਦ ਘੋਸ਼ਣਾ ਕਰਦਿਆਂ ਕਿਹਾ ਕਿ ਉਨ੍ਹਾਂ ਨੇ ਆਪਣੇ ਰੂਸੀ ਹਮਰੁਤਬਾ ਨਾਲ ਵੀਰਵਾਰ ਦੀ ਯੋਜਨਾਬੱਧ ਬੈਠਕ ਨੂੰ ਵੀ ਰੱਦ ਕਰ ਦਿੱਤਾ ਹੈ।
