ਭਾਰਤ ਦੀ ਕੋਵੈਕਸੀਨ ਕੋਰੋਨਾਵਾਇਰਸ ਦੇ ਬੀ.1.617 ਵੇਰੀਐਂਟ ਖ਼ਿਲਾਫ਼ ਅਸਰਦਾਰ: ਡਾ ਫਾਊਚੀ
ਖ਼ਬਰ ਏਜੰਸੀ ਪੀਟੀਆਈ ਮੁਤਾਬਕ ਵ੍ਹਾਈਟ ਹਾਊਸ ਦੇ ਮੈਡੀਕਲ ਸਲਾਹਕਾਰ ਅਤੇ ਅਮਰੀਕਾ ਦੇ ਚੋਟੀ ਦੇ ਮਹਾਂਮਾਰੀ ਮਾਹਰ ਡਾ. ਐਂਥਨੀ ਫਾਊਚੀ ਨੇ ਕਿਹਾ ਹੈ ਕਿ ਭਾਰਤ ਵਿੱਚ ਬਣੀ ਕੋਵੈਕਸੀਨ ਕੋਰੋਨਾਵਾਇਰਸ ਦੇ ਜਾਨਲੇਵਾ ਵੇਰੀਐਂਟ B.1.167 ਦੇ ਖ਼ਿਲਾਫ਼ ਅਸਰਦਾਰ ਰਹੀ ਹੈ।ਡਾ. ਫਾਊਚੀ ਨੇ ਇਹ ਜਾਣਕਾਰੀ ਮੰਗਲਵਾਰ ਨੂੰ ਇੱਕ ਪ੍ਰੈਸ ਵਾਰਤਾ ਦੌਰਾਨ ਦਿੱਤੀ।
ਖ਼ਬਰ ਏਜੰਸੀ ਪੀਟੀਆਈ ਅਨੁਸਾਰ ਡਾ. ਫਾਊਚੀ ਨੇ ਕਿਹਾ, "ਅਸੀਂ ਲੋਕ ਦੈਨਿਕ ਆਧਾਰ ’ਤੇ ਅੰਕੜੇ ਦੇਖ ਰਹੇ ਹਾਂ ਪਰ ਤਾਜ਼ਾ ਅੰਕੜਿਆਂ ਤੋਂ ਪਤਾ ਲੱਗਿਆ ਹੈ ਕਿ ਕੋਵੈਕਸੀਨ ਦੀ ਵਰਤੋਂ ਕਰਨ ਵਾਲਿਆਂ ਨੂੰ ਫ਼ਾਇਦਾ ਹੋਇਆ ਹੈ। ਇਹ B.1.617 ਵੇਰੀਐਂਟ ਖ਼ਿਲਾਫ਼ ਵੀ ਅਸਰਦਾਰ ਰਹੀ ਹੈ। ਅਜਿਹੇ ਵਿੱਚ ਭਾਰਤ ਵਿੱਚ ਟੀਕਾਕਰਨ ਬਹੁਤ ਹੀ ਅਹਿਮ ਹੈ।"
ਮੰਗਲਵਾਰ ਨੂੰ ਨਿਊਯਾਰਕ ਟਾਇਮਜ਼ ਦੀ ਰਿਪੋਰਟ ਵਿੱਚ ਵੀ ਕਿਹਾ ਸੀ ਕਿ ਕੋਵੈਕਸੀਨ ਇਮਿਊਨ ਸਿਸਟਮ ਨੂੰ ਮਜ਼ਬੂਤ ਕਰਨ ਅਤੇ ਰੋਗ ਪ੍ਰਤੀਰੋਧਕ ਬਣਾਉਣ ਵਿੱਚ ਮਦਦ ਕਰ ਰਹੀ ਹੈ।ਕੋਵੈਕਸੀਨ ਨੂੰ ਭਾਰਤ ਬਾਇਓਟੈਕ ਨੇ ਨੈਸ਼ਨਲ ਇੰਸਟੀਚਿਊਟ ਆਫ ਵਾਇਰੌਲੋਜੀਅਤੇ ਇੰਡੀਅਨ ਕਾਉਂਸਿਲ ਆਫ ਮੈਡੀਕਲ ਰਿਸਰਚ ਦੇ ਨਾਲ ਮਿਲ ਕੇ ਤਿਆਰ ਕੀਤਾ ਹੈ। ਕੋਵੈਕਸੀਨ ਨੂੰ ਐਮਰਜੈਂਸੀ ਵਰਤੋਂ ਲਈ ਪ੍ਰਵਾਨਗੀ 3 ਜਨਵਰੀ ਨੂੰ ਮਿਲੀ ਸੀ। ਟ੍ਰਾਇਲ ਨਤੀਜਿਆਂ ਵਿੱਚ ਇਸ ਦੀ ਕਾਰਗਰਤਾ ਦਰ 78 ਪ੍ਰਤੀਸ਼ਤ ਦੱਸੀ ਗਈ ਹੈ।
ਡਾ ਫਾਊਚੀ ਨੇ ਕਿਹਾ,"ਅਸੀਂ ਕੋਵੈਕਸੀਨ ਦੇ ਲਈ ਲੋੜੀਂਦਾ ਕੱਚਾ ਮਾਲ ਭਾਰਤ ਭੇਜ ਰਹੇ ਹਾਂ ਤਾਂ ਕਿ ਉਥੇ ਹੋਰ ਟੀਕਿਆਂ ਦਾ ਉਤਪਾਦਨ ਹੋ ਸਕੇ। ਸਾਨੂੰ ਲੱਗਦਾ ਹੈ ਕਿ ਇਹ ਬਹੁਤ ਹੀ ਅਹਿਮ ਮਦਦ ਹੈ।"
ਇਸ ਤੋਂ ਪਹਿਲਾਂ ਭਾਰਤ ਵਿੱਚ ਹੀ ਕੋਵੈਕਸੀਨ ਨੂੰ ਲੈ ਕੇ ਕਈ ਸਵਾਲ ਉੱਠਦੇ ਰਹੇ ਹਨ ਅਤੇ ਛੱਤੀਸਗੜ੍ਹ ਨੇ ਇਸ ਦੀ ਵਰਤੋਂ ਤੋਂ ਇਨਕਾਰ ਕਰ ਦਿੱਤਾ ਸੀ।
ਤਸਵੀਰ ਸਰੋਤ, Getty Images
