ਕੋਰੋਨਾਵਾਇਰਸ ਅਪਡੇਟ: ਦਿੱਲੀ ਦੇ ਨਿੱਜੀ ਹਸਪਤਾਲਾਂ ’ਚ 20% ਬੈੱਡ ਕੋਵਿਡ-19 ਲਈ ਲਾਜ਼ਮੀ; ਚੀਨ ਨੇ ਕੀਤੇ ਇੱਕ ਦਿਨ ’ਚ 10 ਲੱਖ ਟੈਸਟ

ਲਾਈਵ ਕਵਰੇਜ

1. 24 ਮਈ 2020ਦੇਸ਼-ਦੁਨੀਆਂ ਦੀਆਂ ਕੋਰੋਨਾਵਾਇਰਸ ਨਾਲ ਜੁੜੀਆਂ ਹੁਣ ਤੱਕ ਦੀਆਂ ਖ਼ਬਰਾਂ ਦਾ ਅਪਡੇਟ

   • ਚੀਨ ਦੇ ਵਿਦੇਸ਼ ਮੰਤਰੀ ਵੋਂਗ ਯੀ ਨੇ ਕਿਹਾ ਹੈ ਕਿ ਅਮਰੀਕਾ ਚੀਨ ਨਾਲ ਸੰਬੰਧਾਂ ਨੂੰ ਨਵੇਂ ਸ਼ੀਤ ਯੁੱਧ ਵੱਲ ਲੈ ਜਾ ਰਿਹਾ ਹੈ। ਚੀਨ ਦੇ ਵਿਦੇਸ਼ ਮੰਤਰੀ ਨੇ ਕਿਹਾ, “ਕੁਝ ਅਮਰੀਕੀ ਰਾਜਨੀਤਿਕ ਸ਼ਕਤੀਆਂ ਇਤਿਹਾਸ ਦੇ ਚੱਕਰ ਨੂੰ ਘੁੰਮਾਉਣ ਦੀ ਇਹ ਇਕ ਖ਼ਤਰਨਾਕ ਕੋਸ਼ਿਸ਼ ਹੈ।“
   • ਚੀਨ ਦੇ ਵੁਹਾਨ ਦੇ ਇੰਸਟੀਚਿਉਟ ਆਫ਼ ਵਾਇਰੋਲੋਜੀ ਵਿਖੇ ਚਮਗਾਦੜਾਂ ਵਿਚ ਤਿੰਨ ਜੀਵੰਤ ਵਾਇਰਸ ਦੀਆਂ ਕਿਸਮਾਂ ਮਿਲੀਆਂ ਹਨ, ਪਰ ਸੰਸਥਾ ਦੇ ਨਿਰਦੇਸ਼ਕ ਦਾ ਕਹਿਣਾ ਹੈ ਕਿ ਇਨ੍ਹਾਂ ਵਿਚੋਂ ਕੋਈ ਵੀ ਇਸ ਵਾਇਰਸ ਨਾਲ ਮੇਲ ਨਹੀਂ ਖਾਂਦਾ ਜਿਸ ਕਾਰਨ ਵਿਸ਼ਵਵਿਆਪੀ ਤਬਾਹੀ ਹੋਈ ਹੈ।
   • ਫਰਾਂਸ ਦੇ ਸਿਹਤ ਮੰਤਰੀ ਓਲੀਵੀਅਰ ਵਰਨ ਨੇ ਕੋਵਿਡ -19 ਦੇ ਇਲਾਜ ਲਈ ਹਾਈਡ੍ਰੋਕਸੀਕਲੋਰੋਕੁਈਨ ਦੀ ਵਰਤੋਂ ਦੀ ਸਮੀਖਿਆ ਦੇ ਆਦੇਸ਼ ਦਿੱਤੇ ਹਨ, ਜਿਸ ਤੋਂ ਬਾਅਦ ਇਕ ਅਧਿਐਨ ਨੇ ਸੁਝਾਅ ਦਿੱਤਾ ਹੈ ਕਿ ਇਸ ਨਾਲ ਮੌਤ ਦਰਾਂ ਵਿਚ ਵਾਧਾ ਹੋਇਆ ਹੈ।
   • ਬ੍ਰਾਜ਼ੀਲ ਵਿਚ ਸ਼ਨੀਵਾਰ ਨੂੰ 965 ਵਿਅਕਤੀਆਂ ਦੀ ਕੋਰੋਨਾ ਦੀ ਲਾਗ ਕਾਰਨ ਮੌਤ ਹੋ ਗਈ, ਜਿਸ ਤੋਂ ਬਾਅਦ ਉਥੇ ਮਰਨ ਵਾਲਿਆਂ ਦੀ ਗਿਣਤੀ ਵਧ ਕੇ 22,013 ਹੋ ਗਈ ਹੈ। ਸ਼ਨੀਵਾਰ ਨੂੰ, 16,508 ਨਵੇਂ ਕੇਸ ਸਾਹਮਣੇ ਆਏ, ਜਿਸ ਤੋਂ ਬਾਅਦ ਸੰਕਰਮਿਤ ਮਰੀਜ਼ਾਂ ਦੀ ਗਿਣਤੀ 347,398 ਹੋ ਗਈ ਹੈ।
   • ਸ਼ਨੀਵਾਰ ਨੂੰ ਦਿੱਲੀ ਦੇ ਇਕ ਸੀਨੀਅਰ ਡਾਕਟਰ ਜਿਤੇਂਦਰ ਨਾਥ ਪਾਂਡੇ ਦੀ ਕੋਰੋਨਾਵਾਇਰਸ ਦੇ ਸੰਕਰਮਣ ਕਾਰਨ ਮੌਤ ਹੋ ਗਈ। ਨਿਊਜ਼ ਏਜੰਸੀ ਪੀਟੀਆਈ ਦੇ ਅਨੁਸਾਰ, 79 ਸਾਲਾ ਜਿਤੇਂਦਰ ਨਾਥ ਪਾਂਡੇ ਦਿੱਲੀ ਵਿੱਚ ਏਮਜ਼ ਦੇ ਪਲਮਨੋਜੀ ਵਿਭਾਗ ਦੇ ਡਾਇਰੈਕਟਰ ਅਤੇ ਮਸ਼ਹੂਰ ਡਾਕਟਰ ਸਨ।
   • ਭਾਰਤ ਵਿੱਚ ਪਿਛਲੇ 24 ਘੰਟਿਆਂ ਵਿੱਚ ਕੋਰੋਨਾਵਾਇਰਸ ਨਾਲ ਸੰਕਰਮਣ ਦੇ ਛੇ ਹਜ਼ਾਰ ਤੋਂ ਵੱਧ ਮਾਮਲੇ ਸਾਹਮਣੇ ਆਏ ਹਨ। ਕੇਂਦਰੀ ਸਿਹਤ ਮੰਤਰਾਲੇ ਨੇ ਐਤਵਾਰ ਨੂੰ ਕਿਹਾ ਕਿ ਭਾਰਤ ਵਿੱਚ ਹੁਣ ਤੱਕ 1,31,868 ਮਾਮਲਿਆਂ ਦੀ ਪੁਸ਼ਟੀ ਹੋਈ ਹੈ।

2. 24 ਮਈ 2020ਚੀਨ ਨੂੰ ਨਵੇਂ ਸ਼ੀਤ ਯੁੱਧ ਵੱਲ ਲੈ ਜਾ ਰਿਹਾ ਹੈ ਅਮਰੀਕਾ- ਚੀਨ ਦੇ ਵਿਦੇਸ਼ ਮੰਤਰੀ

   ਚੀਨ ਦੇ ਵਿਦੇਸ਼ ਮੰਤਰੀ ਵੋਂਗ ਯੀ ਨੇ ਕਿਹਾ ਹੈ ਕਿ ਅਮਰੀਕਾ, ਚੀਨ ਨਾਲ ਸੰਬੰਧਾਂ ਨੂੰ ਨਵੇਂ ਸ਼ੀਤ ਯੁੱਧ ਵੱਲ ਲੈ ਜਾ ਰਿਹਾ ਹੈ।

   ਚੀਨ ਦੇ ਵਿਦੇਸ਼ ਮੰਤਰੀ ਨੇ ਕਿਹਾ, “ਕੁਝ ਅਮਰੀਕੀ ਰਾਜਨੀਤਿਕ ਸ਼ਕਤੀਆਂ ਨੇ ਚੀਨ-ਅਮਰੀਕਾ ਸੰਬੰਧਾਂ ਨੂੰ ਆਪਣੀ ਗ੍ਰਿਫ਼ਤ ਵਿਚ ਲੈ ਲਿਆ ਹੈ ਅਤੇ ਦੋਵੇਂ ਦੇਸ਼ਾਂ ਨੂੰ ਇਕ ਨਵੇਂ ਸ਼ੀਤ ਯੁੱਧ ਵੱਲ ਲੈ ਜਾ ਰਹੇ ਹਨ। ਇਤਿਹਾਸ ਦੇ ਚੱਕਰ ਨੂੰ ਘੁੰਮਣ ਦੀ ਇਹ ਇਕ ਖ਼ਤਰਨਾਕ ਕੋਸ਼ਿਸ਼ ਹੈ।

   ਉਨ੍ਹਾਂ ਕਿਹਾ, "ਚੀਨ ਅਮਰੀਕਾ ਨੂੰ ਬਦਲਣ ਵਿੱਚ ਦਿਲਚਸਪੀ ਨਹੀਂ ਰੱਖਦਾ ਅਤੇ ਅਮਰੀਕਾ ਵਿਕਾਸ ਦੇ ਰਾਹ ਉੱਤੇ ਅੱਗੇ ਵਧਦੇ ਹੋਏ ਚੀਨ ਨੂੰ ਵੀ ਨਹੀਂ ਬਦਲ ਸਕਦਾ।"

   ਵੋਂਗ ਯੀ ਨੇ ਕਿਹਾ ਕਿ ਚੀਨ ਅਤੇ ਅਮਰੀਕਾ ਦੀ ਰਾਜਨੀਤਿਕ ਪ੍ਰਣਾਲੀ ਵੱਖਰੀ ਹੈ ਅਤੇ ਇਸਦਾ ਫੈਸਲਾ ਦੋਵਾਂ ਦੇਸ਼ਾਂ ਦੇ ਲੋਕਾਂ ਦੀ ਇੱਛਾ ਨਾਲ ਕੀਤਾ ਜਾਂਦਾ ਹੈ।

   ਉਨ੍ਹਾਂ ਨੇ ਕਿਹਾ, "ਉਹ ਆਪਣੇ ਰਸਤੇ ਤੋਂ ਬਾਹਰ ਜਾ ਰਹੇ ਹਨ ਪਰ ਇਸ ਦਾ ਇਹ ਮਤਲਬ ਨਹੀਂ ਹੈ ਕਿ ਸਹਿਯੋਗ ਦੀ ਕੋਈ ਸੰਭਾਵਨਾ ਨਹੀਂ ਹੈ। ਦੋਹਾਂ ਧਿਰਾਂ ਦਰਮਿਆਨ ਦੁਨੀਆ ਦੇ ਕਈ ਵੱਡੇ ਮੁੱਦਿਆਂ ਉੱਤੇ ਸਲਾਹ ਅਤੇ ਵਿਚਾਰ-ਵਟਾਂਦਰੇ ਦੀ ਜ਼ਰੂਰਤ ਹੈ।"

   ਉਨ੍ਹਾਂ ਕਿਹਾ, "ਕੋਵਿਡ -19 ਦੀ ਸ਼ੁਰੂਆਤ ਸਮੇਂ ਅਸੀਂ ਡਾਕਟਰੀ ਸਮਾਨ ਵਿੱਚ ਇੱਕ ਦੂਜੇ ਦੀ ਸਹਾਇਤਾ ਕੀਤੀ ਸੀ। 12 ਅਰਬ ਤੋਂ ਵੱਧ ਮਾਸਕ ਅਮਰੀਕਾ ਭੇਜੇ ਜਾ ਚੁੱਕੇ ਹਨ। ਪਰ ਅਫ਼ਸੋਸ ਦੀ ਗੱਲ ਹੈ ਕਿ ਰਾਜਨੀਤੀ ਦਾ ਵਾਇਰਸ ਅਮਰੀਕਾ ਵਿੱਚ ਫੈਲ ਰਿਹਾ ਹੈ।"

3. 24 ਮਈ 2020ਕੋਰੋਨਾਵਾਇਰਸ - ਹਸਪਤਾਲ ਵਿੱਚ ਈਦ ਦੇ ਤਿਉਹਾਰ ‘ਤੇ ਵੀ ਕੰਮ ਕਰ ਰਹੇ ਡਾਕਟਰ

   ਮਲੇਸ਼ੀਆ ਦੇ ਡਾਕਟਰ ਮੁਹੰਮਦ ਸਿਆਦ ਅਲ-ਹਤਿਮ ਈਦ ਦੇ ਮੌਕੇ 'ਤੇ ਪਰਿਵਾਰਕ ਮੈਂਬਰਾਂ ਤੋਂ ਦੂਰ ਹਨ। ਡਾ. ਸਿਆਦ ਦੇ ਨਾਲ-ਨਾਲ ਇਸ ਹਸਪਤਾਲ ਵਿਚ ਕੰਮ ਕਰਨ ਵਾਲੇ ਜ਼ਿਆਦਾਤਰ ਸਟਾਫ਼ ਲਈ ਇਹ ਉਦਾਸ ਕਰ ਦੇਣ ਵਾਲਾ ਸਮਾਂ ਹੈ।

   ਮਲੇਸ਼ੀਆ ਵਿਚ 7,000 ਲੋਕ ਸੰਕਰਮਿਤ ਹਨ, 115 ਦੀ ਮੌਤ ਹੋ ਗਈ ਹੈ।

   26 ਸਾਲਾ ਜੂਨੀਅਰ ਡਾਕਟਰ ਨੇ ਨਿਊਜ਼ ਏਜੰਸੀ ਰੋਇਟਰਜ਼ ਨੂੰ ਦੱਸਿਆ, “ਮਨ ਬਹੁਤ ਭਾਰਾ ਹੈ, ਬਹੁਤ ਸਾਰੇ ਡਾਕਟਰ, ਨਰਸਾਂ, ਵਰਕਰ ਹਨ ਜੋ ਕੁਆਲਾਲੰਪੁਰ ਦੇ ਨਹੀਂ ਹਨ। ਆਮ ਤੌਰ 'ਤੇ ਉਹ ਤਿਉਹਾਰ ਦੇ ਮੌਕੇ 'ਤੇ ਆਪਣੇ ਘਰ ਜਾਂਦੇ ਸਨ, ਪਰ ਇਸ ਵਾਰ ਇਹ ਸੰਭਵ ਹੈ ਨਹੀਂ ਹੈ।"

   ਮੁਸਲਿਮ ਪ੍ਰਭਾਵਸ਼ਾਲੀ ਮਲੇਸ਼ੀਆ ਨੇ ਮਾਰਚ ਦੇ ਅੱਧ ਤੋਂ ਦੇਸ਼ ਵਿਚ ਤਾਲਾਬੰਦੀ ਦਾ ਐਲਾਨ ਕੀਤਾ ਹੈ।

4. 24 ਮਈ 2020ਅਫ਼ਗਾਨਿਸਤਾਨ: ਤਾਲਿਬਾਨ ਦਾ ਈਦ ਮੌਕੇ ਤਿੰਨ ਦਿਨਾਂ ਲਈ ਜੰਗਬੰਦੀ ਦਾ ਐਲਾਨ

   ਐਤਵਾਰ ਤੋਂ ਈਦ-ਅਲ-ਫਿਤਰ ਦੇ ਮੁਕੱਦਸ ਮੌਕੇ 'ਤੇ ਤਾਲਿਬਾਨ ਨੇ ਅਫ਼ਗਾਨਿਸਤਾਨ ਸਰਕਾਰ ਨਾਲ ਜੰਗਬੰਦੀ ਦੀ ਘੋਸ਼ਣਾ ਕੀਤੀ ਹੈ ।

   ਪਿਛਲੇ ਹਫ਼ਤਿਆਂ ਦੌਰਾਨ ਸਰਕਾਰੀ ਫੌਜਾਂ ਵਿਰੁੱਧ ਕੱਟੜਪੰਥੀ ਇਸਲਾਮਿਸਕ ਸਮੂਹ ਵੱਲੋਂ ਕੀਤੇ ਗਏ ਹਮਲਿਆਂ ਵਿੱਚ ਵਾਧਾ ਹੋਇਆ ਹੈ।

   ਰਾਸ਼ਟਰਪਤੀ ਅਸ਼ਰਫ ਗਨੀ ਨੇ ਇਸ ਐਲਾਨ ਦਾ ਸਵਾਗਤ ਕਰਦਿਆਂ ਕਿਹਾ ਕਿ ਉਨ੍ਹਾਂ ਦੇ ਸਿਪਾਹੀ ਸੰਘਰਸ਼ ਦੀਆਂ ਸ਼ਰਤਾਂ ਦਾ ਸਨਮਾਨ ਕਰਨਗੇ।

   ਇਕ ਪਾਸੇ ਈਦ ਨੂੰ ਲੈਕੇ ਅਫ਼ਗਾਨਿਸਤਾਨ-ਤਾਲਿਬਾਨ ਵਿਚਾਲੇ ਹੋਏ ਇਸ ਫੈਸਲੇ ਦੀ ਸ਼ਲਾਘਾ ਕੀਤੀ ਜਾ ਰਹੀ ਹੈ ਅਤੇ ਦੂਜੇ ਪਾਸੇ ਅਫ਼ਗਾਨਿਸਤਾਨ ਦੀ ਆਲ-ਗਰਲ ਰੋਬੋਟਿਕਸ ਟੀਮ ਨੇ ਕਾਰ ਦੇ ਪੁਰਜਿਆਂ ਤੋਂ ਕਿਫ਼ਾਇਤੀ ਵੈਂਟੀਲੇਟਰ ਬਣਾ ਕੇ ਕੋਰੋਨਾਵਾਇਰਸ ਦੇ ਮਰੀਜ਼ਾਂ 'ਤੇ ਆਪਣਾ ਧਿਆਨ ਕੇਂਦਰਿਤ ਕੀਤਾ ਹੈ।

   ਪੂਰੀ ਖ਼ਬਰ ਪੜ੍ਹਨ ਲਈ ਇਸ ਲਿੰਕ 'ਤੇ ਕਲਿੱਕ ਕਰੋ।

5. 24 ਮਈ 2020ਦਿੱਲੀ ਦੇ ਨਾਮਵਰ ਡਾਕਟਰ ਦੀ ਕੋਰੋਨਾਵਾਇਰਸ ਕਾਰਨ ਮੌਤ

   ਸ਼ਨੀਵਾਰ ਨੂੰ ਦਿੱਲੀ ਦੇ ਇੱਕ ਸੀਨੀਅਰ ਡਾਕਟਰ ਜਿਤੇਂਦਰ ਨਾਥ ਪਾਂਡੇ ਦੀ ਕੋਰੋਨਾਵਾਇਰਸ ਦੇ ਸੰਕਰਮਣ ਕਾਰਨ ਮੌਤ ਹੋ ਗਈ।

   ਨਿਊਜ਼ ਏਜੰਸੀ ਪੀਟੀਆਈ ਦੇ ਅਨੁਸਾਰ, 79 ਸਾਲਾ ਜਿਤੇਂਦਰ ਨਾਥ ਪਾਂਡੇ ਦਿੱਲੀ ਵਿੱਚ ਏਮਜ਼ ਦੇ ਪਲਮਨੋਜੀ ਵਿਭਾਗ ਦੇ ਡਾਇਰੈਕਟਰ ਅਤੇ ਮਸ਼ਹੂਰ ਡਾਕਟਰ ਸਨ।

   ਏਮਜ਼ ਦੇ ਡਾਇਰੈਕਟਰ ਡਾ: ਰਣਦੀਪ ਗੁਲੇਰੀਆ ਨੇ ਦੱਸਿਆ ਕਿ ਮੰਗਲਵਾਰ ਨੂੰ ਡਾ. ਪਾਂਡੇ ਅਤੇ ਉਨ੍ਹਾਂ ਦੀ ਪਤਨੀ ਦਾ ਕੋਰੋਨਾ ਟੈਸਟ ਪੌਜ਼ਿਟਿਵ ਆਇਆ ਸੀ। ਉਨ੍ਹਾਂ ਨੂੰ ਲਾਗ ਦੇ ਹਲਕੇ ਲੱਛਣ ਸਨ ਅਤੇ ਉਨ੍ਹਾਂ ਨੇ ਘਰ ਵਿੱਚ ਅਲੱਗ-ਥਲੱਗ ਰਹਿਣ ਦਾ ਫੈਸਲਾ ਕੀਤਾ ਸੀ।

   ਡਾ. ਗੁਲੇਰੀਆ ਨੇ ਦੱਸਿਆ, "ਉਹ ਏਮਜ਼ ਵਿਚ ਐਮਬੀਬੀਐਸ ਵਿਦਿਆਰਥੀ ਵਜੋਂ ਆਏ ਅਤੇ ਮੈਡੀਸਨ ਵਿਭਾਗ ਦੇ ਚੇਅਰਮੈਨ ਵਜੋਂ ਸੇਵਾਮੁਕਤ ਹੋਏ ਸਨ।"

6. 24 ਮਈ 2020ਯੂਕੇ ਪੀਐੱਮ ਦੇ ਮੁੱਖ ਸਹਿਯੋਗੀ ’ਤੇ ਫਿਰ ਲੱਗੇ ਲੌਕਡਾਊਨ ਤੋੜਨ ਦੇ ਇਲਜ਼ਾਮ

   ਯੂਕੇ ਦੇ ਪ੍ਰਧਾਨ ਮੰਤਰੀ ਦੇ ਮੁੱਖ ਸਹਿਯੋਗੀ ਡੋਮਿਨਿਕ ਕਮਿੰਗਜ਼ 'ਤੇ ਨਵੇਂ ਇਲਜ਼ਾਮ ਲਗਾਏ ਜਾ ਰਹੇ ਹਨ ਕਿ ਉਨ੍ਹਾਂ ਨੇ ਲੌਕਡਾਊਨ ਦੇ ਨਿਯਮਾਂ ਦੀ ਫਿਰ ਉਲੰਘਣਾ ਕੀਤੀ ਹੈ।

   ਕਮਿੰਗਜ਼ ਅਤੇ ਸਰਕਾਰ ਨੇ ਕਿਹਾ ਸੀ ਕਿ ਉਸਨੇ ਲੰਡਨ ਤੋਂ ਕਾਉਂਟੀ ਡਰਹਮ "ਉਚਿਤ ਅਤੇ ਕਾਨੂੰਨੀ ਢੰਗ ਨਾਲ" ਆਪਣਾ ਵਾਹਨ ਚਲਾ ਕੇ ਕੂਚ ਕੀਤਾ ਸੀ ਕਿਉਂਕਿ ਉਸਦੀ ਪਤਨੀ ਨੂੰ ਕੋਰੋਨਾਵਾਇਰਸ ਦੇ ਲੱਛਣ ਸਨ।

   ਆਬਜ਼ਰਵਰ ਅਤੇ ਸੰਡੇ ਮਿਰਰ ਦੀਆਂ ਰਿਪੋਰਟਸ ਮੁਤਾਬਕ, ਉਸ ਨੂੰ ਕੋਵਿਡ -19 ਲੱਛਣਾਂ ਤੋਂ ਠੀਕ ਹੋਣ ਅਤੇ ਲੰਡਨ ਵਿਚ ਕੰਮ 'ਤੇ ਪਰਤਣ ਤੋਂ ਬਾਅਦ, ਉੱਤਰ ਪੂਰਬ ਵਿਚ ਦੋ ਹੋਰ ਮੌਕਿਆਂ 'ਤੇ ਦੇਖਿਆ ਗਿਆ ਸੀ।

   ਮੰਤਰੀਆਂ ਨੇ ਕਿਹਾ ਹੈ ਕਿ ਕਮਿੰਗਜ਼ ਅਤੇ ਉਨ੍ਹਾਂ ਦੀ ਪਤਨੀ ਨੇ ਬੱਚਿਆਂ ਦੀ ਦੇਖਭਾਲ ਲਈ ਆਪਣੇ ਆਪ ਨੂੰ ਵੱਖ ਕਰਨਾ ਚੁਣਿਆ ਹੈ।

7. 24 ਮਈ 2020ਪੰਜਾਬ ਦੇ ਜਲੰਧਰ 'ਚ ਮਜ਼ਦੂਰ ਪਿਛਲੇ 5 ਦਿਨਾਂ ਤੋਂ ਕਰ ਰਹੇ ਆਪਣੀ ਵਾਰੀ ਦਾ ਇੰਤਜ਼ਾਰ

   ਜਲੰਧਰ ਦੇ ਫਲਾਈਓਵਰ ਦੇ ਹੇਠਾਂ ਖੜ੍ਹੇ ਇਹ ਮਜ਼ਦੂਰ ਪਿਛਲੇ ਪੰਜ ਦਿਨਾਂ ਤੋਂ ਆਪਣੇ ਘਰ ਪਹੁੰਚਣ ਲਈ ਇੰਤਜ਼ਾਰ ਕਰ ਰਹੇ ਹਨ।

   ਮਜ਼ਦੂਰਾਂ ਦਾ ਕਹਿਣਾ ਹੈ ਕਿ ਉਹਨਾਂ ਨੂੰ ਕੋਈ ਰੋਟੀ-ਪਾਣੀ ਪ੍ਰਸ਼ਾਸਨ ਵਲੋਂ ਨਹੀਂ ਮਿਲ ਰਿਹਾ।

8. 24 ਮਈ 2020ਬ੍ਰਾਜ਼ੀਲ ਵਿਚ ਸੰਕਰਮਿਤ ਮਰੀਜ਼ਾਂ ਦੀ ਗਿਣਤੀ ਸਾਢੇ ਤਿੰਨ ਲੱਖ ਦੇ ਪਾਰ

   ਬ੍ਰਾਜ਼ੀਲ ਵਿਚ ਸ਼ਨੀਵਾਰ ਨੂੰ 965 ਵਿਅਕਤੀਆਂ ਦੀ ਕੋਰੋਨਾ ਦੀ ਲਾਗ ਕਾਰਨ ਮੌਤ ਹੋ ਗਈ, ਜਿਸ ਤੋਂ ਬਾਅਦ ਉਥੇ ਮਰਨ ਵਾਲਿਆਂ ਦੀ ਗਿਣਤੀ ਵਧ ਕੇ 22,013 ਹੋ ਗਈ ਹੈ।

   ਸ਼ਨੀਵਾਰ ਨੂੰ, 16,508 ਨਵੇਂ ਕੇਸ ਸਾਹਮਣੇ ਆਏ, ਜਿਸ ਤੋਂ ਬਾਅਦ ਸੰਕਰਮਿਤ ਮਰੀਜ਼ਾਂ ਦੀ ਗਿਣਤੀ 3,47,398 ਹੋ ਗਈ ਹੈ।

   ਇਸ ਦੇ ਨਾਲ, ਬ੍ਰਾਜ਼ੀਲ ਨੇ ਲਾਗ ਦੇ ਮਾਮਲੇ ਵਿੱਚ ਰੂਸ ਨੂੰ ਪਛਾੜ ਦਿੱਤਾ। ਹੁਣ ਬ੍ਰਾਜ਼ੀਲ ਅਮਰੀਕਾ ਤੋਂ ਬਾਅਦ ਦੁਨੀਆਂ ਵਿਚ ਦੂਜੇ ਨੰਬਰ ‘ਤੇ ਹੈ।

   ਪਰ ਇਹ ਅੰਕੜੇ ਅਧਿਕਾਰਤ ਹਨ ਅਤੇ ਅਸਲ ਸੰਖਿਆ ਵਧੇਰੇ ਹੋ ਸਕਦੀ ਹੈ ਕਿਉਂਕਿ ਬ੍ਰਾਜ਼ੀਲ ਵਿੱਚ ਜਾਂਚ ਦੀ ਗਤੀ ਬਹੁਤ ਹੌਲੀ ਹੈ।

9. 24 ਮਈ 2020ਕੋਰੋਨਾਵਾਇਰਸ: ਤੁਹਾਡੇ ਜ਼ਿਲ੍ਹੇ ਵਿੱਚ ਕੋਰੋਨਾ ਦੇ ਕਿੰਨੇ ਕੇਸ ਹਨ, LIVE ਗ੍ਰਾਫਿਕਸ ਰਾਹੀਂ ਜਾਣੋ

   ਤੁਹਾਡੇ ਜ਼ਿਲ੍ਹੇ ਵਿੱਚ ਕੋਰੋਨਾ ਦੇ ਕਿੰਨੇ ਕੇਸ (ਜ਼ਿਲ੍ਹੇ ਦਾ ਨਾਂ ਇੰਗਲਿਸ਼ ਵਿੱਚ ਲਿਖੋ)

   ਕੋਰੋਨਾਵਾਇਰਸ ਨਾਲ ਜੁੜੇ ਮਾਮਲਿਆਂ ਨੂੰ ਪੂਰੀ ਦੁਨੀਆਂ ਦੇ ਨਕਸ਼ੇ ’ਤੇ ਵੇਖੋ

   ਜਾਣੋ ਕਿਸ ਦੇਸ ਵਿੱਚ ਹਨ ਕੋਰੋਨਾਵਾਇਰਸ ਦੇ ਕਿੰਨੇ ਕੇਸ

   ਗ੍ਰਾਫ਼ਿਕਸ ਵੇਖਣ ਲਈ ਇਸ ਲਿੰਕ 'ਤੇ ਕਲਿੱਕ ਕਰੋ।

10. 24 ਮਈ 2020ਵੁਹਾਨ ਦੀ ਪ੍ਰਯੋਗਸ਼ਾਲਾ ਵਿੱਚ ਚਮਗਾਦੜਾਂ 'ਚ ਤਿੰਨ ਕਿਸਮਾਂ ਦੇ ਕੋਰੋਨਾਵਾਇਰਸ ਮਿਲੇ: ਚੀਨੀ ਮੀਡੀਆ

    ਚੀਨ ਦੇ ਵੁਹਾਨ ਦੇ ਇੰਸਟੀਚਿਉਟ ਆਫ਼ ਵਾਇਰੋਲੋਜੀ ਵਿਖੇ ਚਮਗਾਦੜਾਂ ਵਿਚ ਤਿੰਨ ਜੀਵੰਤ ਵਾਇਰਸ ਦੀਆਂ ਕਿਸਮਾਂ ਮਿਲੀਆਂ ਹਨ, ਪਰ ਸੰਸਥਾ ਦੇ ਨਿਰਦੇਸ਼ਕ ਦਾ ਕਹਿਣਾ ਹੈ ਕਿ ਇਨ੍ਹਾਂ ਵਿਚੋਂ ਕੋਈ ਵੀ ਇਸ ਵਾਇਰਸ ਨਾਲ ਮੇਲ ਨਹੀਂ ਖਾਂਦਾ ਜਿਸ ਕਾਰਨ ਵਿਸ਼ਵਵਿਆਪੀ ਤਬਾਹੀ ਹੋਈ ਹੈ।

    ਵਿਗਿਆਨੀ ਮੰਨਦੇ ਹਨ ਕਿ ਕੋਵਿਡ -19 ਦੀ ਸ਼ੁਰੂਆਤ ਵੁਹਾਨ ਵਿੱਚ ਹੋਈ ਅਤੇ ਵਾਇਰਸ ਪਹਿਲਾਂ ਚਮਗਾਦੜਾਂ ਵਿੱਚ ਆਇਆ ਅਤੇ ਫਿਰ ਜਾਨਵਰਾਂ ਰਾਹੀਂ ਮਨੁੱਖਾਂ ਤੱਕ ਪਹੁੰਚਿਆ।

    ਨਿਊਜ਼ ਏਜੰਸੀ ਏਐਫ਼ਪੀ ਦੇ ਅਨੁਸਾਰ, ਵੁਹਾਨ ਇੰਸਟੀਚਿਉਟ ਆਫ਼ ਵਾਇਰੋਲੋਜੀ ਦੇ ਡਾਇਰੈਕਟਰ ਵੋਂਗ ਯਾਨਈ ਨੇ ਚੀਨੀ ਸਰਕਾਰੀ ਟੀਵੀ ਚੈਨਲ ਸੀਜੀਟੀਐਨ ਨੂੰ ਦੱਸਿਆ ਕਿ ਅਮਰੀਕੀ ਰਾਸ਼ਟਰਪਤੀ ਡੋਨਲਡ ਟਰੰਪ ਅਤੇ ਹੋਰ ਬਹੁਤ ਸਾਰੇ ਲੋਕਾਂ ਦੇ ਦਾਅਵੇ ਨਾਲ ਇਹ ਦਾਅਵਾ ਕੀਤਾ ਗਿਆ ਹੈ ਕਿ ਵਾਇਰਸ ਵੁਹਾਨ ਦੇ ਇੱਕ ਕੇਂਦਰ ਤੋਂ ਫੈਲਿਆ ਹੈ।

    ਸ਼ਨੀਵਾਰ ਨੂੰ ਵੋਂਗ ਯਾਨਈ ਨੇ ਕਿਹਾ, "ਸਾਡੇ ਕੋਲ ਇਸ ਸਮੇਂ ਤਿੰਨ ਕਿਸਮਾਂ ਦੇ ਵਾਇਰਸ ਹਨ। ਪਰ ਉਨ੍ਹਾਂ ਵਿਚੋਂ 79.8% ਸਾਰਸ-ਕੋਵ -2 (ਮੌਜੂਦਾ ਵਾਇਰਸ) ਨਾਲ ਮੇਲ ਖਾਂਦਾ ਹੈ।"

11. 24 ਮਈ 2020ਪੰਜਾਬ ’ਚ ਫ਼ੈਕਟਰੀਆਂ ਬੰਦ ਪਈਆਂ ਪਰ ਇਹ ਫੈਕਟਰੀਆਂ PPE ਕਿਟਾਂ ਕਿਵੇਂ ਬਣਾ ਰਹੀਆਂ

    ਕੋਰੋਨਾਵਾਇਰਸ ਲੌਕਡਾਊਨ ਦੇ ਕਾਰਨ ਜਦੋਂ ਵੱਡੀਆਂ-ਵੱਡੀਆਂ ਫ਼ੈਕਟਰੀਆਂ ਵਿੱਚ ਕੰਮ ਬੰਦ ਪਿਆ ਹੈ, ਉਸ ਵੇਲੇ ਲੁਧਿਆਣਾ ਤੇ ਫਗਵਾੜਾ ਦੀਆਂ ਇਨ੍ਹਾਂ ਫ਼ੈਕਟਰੀਆਂ ’ਚ ਜ਼ੋਰਾਂ 'ਤੇ ਪੀਪੀਈ ਕਿੱਟਾਂ ਬਣ ਰਹੀਆਂ ਹਨ ਤੇ ਵੱਡੇ ਆਡਰ ਹਾਸਲ ਕਰਨ ਦਾ ਇੰਤਜ਼ਾਰ ਕਰ ਰਹੇ ਹਨ।

    (ਰਿਪੋਰਟ: ਅਰਵਿੰਦ ਛਾਬੜਾ, ਸ਼ੂਟ ਐਂਡ ਐਡਿਟ: ਗੁਲਸ਼ਨ ਕੁਮਾਰ)

12. 24 ਮਈ 2020ਈਦ ਮੌਕੇ ਸ਼ਾਹੀ ਇਮਾਮ ਲੋਕਾਂ ਨੂੰ ਸਰਕਾਰੀ ਹਦਾਇਤਾਂ ਦੀ ਪਾਲਣਾ ਕਰਨ ਦੀ ਕੀਤੀ ਅਪੀਲ

    ਜੰਮੂ-ਕਸ਼ਮੀਰ ਅਤੇ ਕੇਰਲਾ ਨੂੰ ਛੱਡ ਕੇ ਬਾਕੀ ਦੇਸ਼ ਵਿੱਚ ਸੋਮਵਾਰ ਨੂੰ ਈਦ ਦਾ ਤਿਓਹਾਰ ਮਨਾਇਆ ਜਾਣਾ ਹੈ। ਜੰਮੂ-ਕਸ਼ਮੀਰ ਅਤੇ ਕੇਰਲਾ ਵਿੱਚ ਅੱਜ ਈਦ ਮਨਾਈ ਜਾ ਰਹੀ ਹੈ।

    ਇਸ ਮੌਕੇ ਦਿੱਲੀ ਦੀ ਜਾਮਾ ਮਸਜਿਦ ਦੇ ਸ਼ਾਹੀ ਇਮਾਮ ਸਈਅਦ ਅਹਿਮਦ ਬੁਖਾਰੀ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਸੋਸ਼ਲ ਡਿਸਟੈਂਸਿੰਗ ਅਤੇ ਸਰਕਾਰੀ ਹਦਾਇਤਾਂ ਦੀ ਪਾਲਣਾ ਕੀਤੀ ਜਾਵੇ।

13. 24 ਮਈ 2020ਔਰਤ ਨੇ ਦਿੱਤਾ ਟਰੇਨ ਵਿੱਚ ਬੱਚੇ ਨੂੰ ਜਨਮ

    ਖ਼ਬਰ ਏਜੰਸੀ ਏਐੱਨਆਈ ਮੁਤਾਬਕ ਇੱਕ ਔਰਤ ਨੇ ਸ਼੍ਰਮਿਕ ਸ਼ਪੈਸ਼ਲ ਟਰੇਨ ਵਿੱਚ ਇੱਕ ਬੱਚੇ ਨੂੰ ਜਨਮ ਦਿੱਤਾ ਹੈ। ਉਹ ਤੇਲੰਗਾਨਾ ਦੇ ਸਿੰਕਦਰਾਬਾਦ ਤੋਂ ਬਲੰਗੀਰ ਤੱਕ ਸਫ਼ਰ ਕਰ ਰਹੀ ਸੀ।

    ਔਰਤ ਨੂੰ ਬਲੰਗੀਰ ਪਹੁੰਚਣ ’ਤੇ ਹਸਪਤਾਲ ਪਹੁੰਚਾਇਆ ਗਿਆ। ਬੱਚਾ ਅਤੇ ਮਾਂ ਦੋਵੇਂ ਸਿਹਤਯਾਬ ਹਨ।

14. 24 ਮਈ 2020ਕੋਰੋਨਾਵਾਇਰਸ ਲੌਕਡਾਊਨ ਵਿੱਚ ਢਿੱਲ ਮਗਰੋਂ ਦਫ਼ਤਰ ਪਹੁੰਚਣ 'ਚ ਕਿੰਨਾ ਖ਼ਤਰਾ - 5 ਅਹਿਮ ਖ਼ਬਰਾਂ

    ਕੋਰੋਨਾਵਾਇਰਸ ਕਰਕੇ ਲੱਗੇ ਲੌਕਡਾਊਨ ਦੌਰਾਨ ਕੁਝ ਦੇਸ਼ਾਂ ਨੇ ਢਿੱਲ ਦਿੱਤੀ ਹੈ ਪਰ ਇਸ ਦੇ ਨਾਲ ਹੀ ਲਾਗ ਫੈਲਣ ਦੇ ਖਦਸ਼ੇ ਵੀ ਜ਼ਾਹਿਰ ਕੀਤੇ ਜਾ ਰਹੇ ਹਨ।

    ਅਜਿਹੇ ਵਿੱਚ ਅੱਜ ਦੀਆਂ 5 ਅਹਿਮ ਖ਼ਬਰਾਂ ਵਿੱਚ ਪੜ੍ਹੋ ਕਿ ਢਿੱਲ ਦੌਰਾਨ ਕਿਵੇਂ ਲਾਗ ਤੋਂ ਬਚਣ ਲਈ ਸੁਚੇਤ ਰਿਹਾ ਜਾ ਸਕਦਾ ਹੈ ਅਤੇ ਇਸ ਦੇ ਨਾਲ ਹੀ ਦੇਸ਼ ਤੇ ਦੁਨੀਆਂ ਦੀਆਂ ਕਈ ਹੋਰ ਕੋਰੋਨਾ ਸਬੰਧ ਖ਼ਬਰਾਂ ਇੱਥੇ ਕਲਿੱਕ ਕਰਕੇ ਪੜ੍ਹੋ।

15. 24 ਮਈ 2020ਕੋਰੋਨਾਵਾਇਰਸ ਮਹਾਮਾਰੀ: ਧੁੱਪ ਸੇਕਣ ’ਤੇ ਕੀਟਾਣੂ ਨਾਸ਼ਕ ਟੀਕੇ ਨਾਲ ਇਲਾਜ ਕਿੰਨਾ ਕਾਰਗਰ

    ਅਮਰੀਕੀ ਰਾਸ਼ਟਰਪਤੀ ਡੌਨਲਡ ਟਰੰਪ ਨੇ ਦਾਅਵਾ ਕੀਤਾ ਸੀ ਕਿ ਕੀਟਾਣੂਨਾਸ਼ਕਾਂ ਦੇ ਟੀਕੇ ਲਗਾਉਣ ਤੇ ਅਲਟਰਾ ਵਾਇਲਟ ਰੇਅ (ਪਰਾਬੈਂਗਣੀ ਕਿਰਨਾਂ) ਨਾਲ ਕੋਰੋਨਾਵਾਇਰਸ ਦੇ ਮਰੀਜ਼ਾਂ ਦਾ ਇਲਾਜ਼ ਕੀਤਾ ਜਾ ਸਕਦਾ ਹੈ।

    ਇਸ ਬਾਰੇ ਲਗਾਤਾਰ ਦਾਅਵੇ ਹੋ ਰਹੇ ਹਨ, ਬਹੁਤ ਸਾਰੇ ਮੁਲਕਾਂ ਵਿਚ ਸੋਸ਼ਲ ਮੀਡੀਆ ਉੱਤੇ ਅਜਿਹੇ ਦਾਅਵੇ ਹੋ ਰਹੇ ਹਨ।

    ਕੀਟਾਣੂ ਨਾਸ਼ਕਾਂ ਦੀ ਵਰਤੋਂ ਨਾਲ ਸਰੀਰ ਜਾਂ ਸਤ੍ਹਾ ਉੱਤੇ ਹੀ ਵਾਇਰਸ ਨਸ਼ਟ ਕੀਤੇ ਜਾ ਸਕਦੇ ਹਨ।

    ਪਰ ਸੱਚਮੁੱਚ ਧੁੱਪ ਸੇਕਣ ਜਾਂ ਅਜਿਹੇ ਉਪਾਅ ਕਾਰਗਰ ਹਨ ਇਹ ਜਾਨਣ ਲਈ ਇੱਥੇ ਕਲਿੱਕ ਕਰੋ।

16. 24 ਮਈ 2020ਭਾਰਤ ਵਿੱਚ ਪਿਛਲੇ 24 ਘੰਟਿਆਂ ’ਚ 147 ਮੌਤਾਂ ਤੇ 6767 ਨਵੇਂ ਕੇਸ

    ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰਾਲੇ ਮੁਤਾਬਕ ਪਿਛਲੇ 24 ਘੰਟਿਆਂ ਵਿੱਚ ਕੋਰੋਨਾਵਾਇਰਸ ਦੇ 6767 ਨਵੇਂ ਕੇਸ ਸਾਹਮਣੇ ਆਏ ਹਨ ਅਤੇ 147 ਮੌਤਾਂ ਦਰਜ ਕੀਤੀਆਂ ਗਈਆਂ ਹਨ।

    ਇਸ ਦੇ ਨਾਲ ਹੀ ਭਾਰਤ ਵਿੱਚ ਹੁਣ ਤੱਕ ਲਾਗ ਦੇ 1,31,686 ਕੇਸ ਅਤੇ 3867 ਮੌਤਾਂ ਦਾ ਅੰਕੜਾ ਹੋ ਗਿਆ ਹੈ।

    ਇਨ੍ਹਾਂ ਵਿਚੋਂ 54,440 ਲੋਕ ਠੀਕ ਵੀ ਹੋਏ ਹਨ।

17. 24 ਮਈ 2020ਕੋਰੋਨਾਵਾਇਰਸ ਦਾ ਇਲਾਜ : ਕੀ ਗਰਮੀਆਂ ਦੀ ਲੂ ਕੋਵਿਡ-19 ਨੂੰ ਭੁੰਨ ਸਕੇਗੀ

    ਕੋਰੋਨਾਵਾਇਰਸ ਨੂੰ ਲੈ ਕੇ ਅਫ਼ਵਾਹਾਂ ਦਾ ਬਜ਼ਾਰ ਵੀ ਗਰਮ ਹੈ ਜਿਸ ਕਰਕੇ ਲੋਕਾਂ ਦੇ ਮਨਾਂ ਵਿੱਚ ਬਹੁਤ ਸਵਾਲ ਉੱਠ ਰਹੇ ਹਨ।

    ਸੋਸ਼ਲ ਮੀਡੀਆ 'ਤੇ ਇਹੋ ਜਿਹੇ ਦਾਅਵਿਆਂ ਦਾ ਢੇਰ ਹੈ। ਇੱਕ ਪੋਸਟ ਜਿਸ ਨੂੰ ਹਜ਼ਾਰਾਂ ਦੇਸਾਂ ਵਿੱਚ ਕਈ ਲੋਕਾਂ ਨੇ ਸ਼ੇਅਰ ਕੀਤਾ ਹੈ, ਉਸ ਵਿੱਚ ਇਹ ਦਾਅਵਾ ਕੀਤਾ ਗਿਆ ਕਿ ਗਰਮ ਪਾਣੀ ਪੀਣ ਨਾਲ ਤੇ ਸੂਰਜ ਦੀ ਰੋਸ਼ਨੀ ਵਿੱਚ ਰਹਿਣ ਨਾਲ ਇਸ ਵਾਇਰਸ ਨੂੰ ਮਾਰਿਆ ਜਾ ਸਕਦਾ ਹੈ।

    ਪਰ ਇਨ੍ਹਾਂ ਦਾਅਵਿਆਂ ਦੀ ਸੱਚਾਈ ਬਾਰੇ ਵਿਸਥਾਰ ਵਿੱਚ ਪੜ੍ਹਨ ਲਈ ਇੱਥੇ ਕਲਿੱਕ ਕਰੋ।

18. 24 ਮਈ 2020ਅਮਰੀਕਾ ਵਿੱਚ ਕੋਰੋਨਾਵਾਇਰਸ ਨਾਲ ਹੁਣ ਤੱਕ 97 ਹਜ਼ਾਰ ਲੋਕਾਂ ਦੀ ਮੌਤ

    ਅਮਰੀਕਾ ਵਿੱਚ ਕੋਰੋਨਾਵਾਇਰਸ ਦੀ ਚਪੇਟ ਵਿੱਚ ਆਉਣ ਨਾਲ ਪਿਛਲੇ 24 ਘੰਟਿਆਂ ਵਿੱਚ 1,127 ਲੋਕਾਂ ਦੀ ਮੌਤ ਹੋਈ ਹੈ। ਜੌਨਸ ਹੋਪਕਿਨਸ ਯੂਨੀਵਰਸਿਟੀ ਮੁਤਾਬਕ ਇਸ ਦੇ ਨਾਲ ਹੀ ਅਮਰੀਕਾ ਵਿੱਚ ਕੋਰੋਨਾਵਾਇਰਸ ਹੁਣ ਤੱਕ 97,048 ਲੋਕਾਂ ਦੀ ਮੌਤ ਹੋ ਗਈ ਹੈ।

    ਸੈਂਟਰ ਫਾਰ ਡਿਜੀਜ ਕੰਟ੍ਰੋਲ ਦਾ ਅੰਦਾਜ਼ਾ ਹੈ ਕਿ ਅਮਰੀਕਾ ਵਿੱਚ ਇੱਕ ਜੂਨ ਤੋਂ ਪਹਿਲਾਂ ਹੀ ਮਰਨ ਵਾਲਿਆਂ ਦੀ ਕੁੱਲ ਗਿਣਤੀ ਇੱਕ ਲੱਖ ਨੂੰ ਪਾਰ ਕਰ ਜਾਵੇਗੀ।

    ਅਮਰੀਕਾ ਵਿੱਚ ਕੋਰੋਨਾਵਾਇਰਸ ਨਾਲ ਮਰਨ ਵਾਲਿਆਂ ਦੀ ਗਿਣਤੀ ਕਿਸੇ ਵੀ ਦੇਸ ਤੋਂ ਜ਼ਿਆਦਾ ਹੈ। ਅਮਰੀਕਾ ਤੋਂ ਬਾਅਦ ਬਰਤਾਨੀਆ ਵਿੱਚ ਸਭ ਤੋਂ ਵੱਧ ਲੋਕਾਂ ਦੀ ਜਾਨ ਗਈ ਹੈ।

    ਬਰਤਾਨੀਆਂ ਵਿੱਚ ਕੋਰੋਨਾਵਾਇਰਸ ਨਾਲ ਹੁਣ ਤੱਕ 36,757 ਲੋਕਾਂ ਦੀ ਮੌਤ ਹੋ ਗਈ ਹੈ।

19. 24 ਮਈ 2020ਜਰਮਨੀ: 40 ਲੋਕਾਂ ਦੇ ਪੌਜ਼ੀਟਿਵ ਆਉਣ ਤੋਂ ਬਾਅਦ ਚਰਚ ਬੰਦ

    ਜਰਮਨੀ ਵਿੱਚ ਲੌਕਡਾਊਨ ਦੇ ਨਿਯਮਾਂ ਵਿੱਚ ਰਾਹਤ ਦਿੱਤੇ ਜਾਣ ਤੋਂ ਬਾਅਦ ਚਰਚ ਵਿੱਚ ਹੋਈ ਇੱਕ ਪ੍ਰਾਰਥਨਾ ਸਭਾ ਵਿੱਚ ਸ਼ਿਰਕਤ ਕਰਨ ਵਾਲੇ 40 ਲੋਕ ਕੋਰੋਨਾ ਪੀੜਤ ਆਏ।

    10 ਮਈ ਨੂੰ ਫਰੈਂਫਰਟ ਦੇ ਇੱਕ ਚਰਚ ਵਿੱਚ ਹੋਈ ਪ੍ਰਾਰਥਨਾ ਸਭਾ ਵਿੱਚ ਇਹ ਲੋਕ ਸ਼ਾਮਿਲ ਹੋਏ ਸਨ।

    ਚਰਚ ਦੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੇ ਸੋਸ਼ਲ ਡਿਸਟੈਂਸਿੰਗ ਦੇ ਸਾਰੇ ਨਿਯਮਾਂ ਦੀ ਪਾਲਣਾ ਕੀਤੀ ਸੀ, ਇਸ ਦੇ ਨਾਲ ਹੀ ਪੂਰੇ ਚਰਚ ਨੂੰ ਵੀ ਡਿਸਇਨਫੈਕਟ ਕੀਤਾ ਗਿਆ ਸੀ।

    ਫਿਲਹਾਲ ਚਰਚ ਨੂੰ ਬੰਦ ਕਰ ਦਿੱਤਾ ਗਿਆ ਹੈ ਅਤੇ ਆਨਲਾਈਨ ਪ੍ਰਾਰਥਨਾ ਸਭਾਵਾਂ ਦਾ ਪ੍ਰਬੰਧ ਕੀਤਾ ਜਾ ਰਿਹਾ ਹੈ।

20. 24 ਮਈ 2020ਨਿਊਯਾਰਕ ਵਿੱਚ ਇੱਕ ’ਚ 100 ਤੋਂ ਘੱਟ ਮੌਤਾਂ

    ਇਸ ਸਾਲ ਮਾਰਚ ਮਹੀਨੇ ਤੋਂ ਬਾਅਦ ਪਹਿਲੀ ਵਾਰ ਨਿਊਯਾਰਕ ਵਿੱਚ ਕੋਰੋਨਾਵਾਇਰਸ ਕਰਕੇ ਹੋ ਰਹੀਆਂ ਮੌਤਾਂ ਦਾ ਅੰਕੜਾ 100 ਤੋਂ ਘੱਟ ਰਿਹਾ ਹੈ।

    ਨਿਊਯਾਰਕ ਦੇ ਗਰਵਰਨਰ ਐਂਡਰਿਊ ਕੂਮੋ ਨੇ ਦੱਸਿਆ ਹੈ ਕਿ ਬੀਤੇ 24 ਘੰਟਿਆਂ ਵਿੱਚ ਇੱਥੇ 84 ਲੋਕਾਂ ਦੀ ਮੌਤ ਕੋਰੋਨਾਵਾਇਰਸ ਨਾਲ ਹੋਈ ਹੈ।

    ਅਮਰੀਕਾ ਵਿੱਚ ਨਿਊਯਾਰਕ ਕੋਰੋਨਾਵਾਇਰਸ ਨਾਲ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੈ। ਅਪ੍ਰੈਲ ਵਿੱਚ ਇੱਥੇ ਇੱਕ ਦਿਨ ਵਿੱਚ ਇੱਕ ਹਜ਼ਾਰ ਤੋਂ ਵੱਧ ਲੋਕਾਂ ਦੀ ਮੌਤ ਦਰਜ ਕੀਤੀ ਗਈ ਸੀ।

    ਨਿਊਯਾਰਕ ਵਿੱਚ ਕੋਰੋਨਾਵਾਇਰਸ ਦੇ ਮਾਮਲੇ ਘੱਟ ਜ਼ਰੂਰ ਹੋ ਰਹੇ ਹਨ ਪਰ ਅਮਰੀਕਾ ਵਿੱਚ ਕੋਰਨਾ ਪੀੜਤਾਂ ਦੀ ਗਿਣਤੀ ਲਗਾਤਾਰ ਵਧ ਰਹੀ ਹੈ।

    ਜੌਨ ਹੌਪਕਿਨਸ ਯੂਨੀਵਰਸਿਟੀ ਦੇ ਡੈਸ਼ਬੌਰਡ ਮੁਤਾਬਕ ਇੱਥੇ ਹੁਣ ਤੱਕ 16,21,658 ਲੋਕ ਕੋਰਨਾਵਾਇਰਸ ਨਾਲ ਪੀੜਤ ਹਨ, ਜਦ ਕਿ 97,048 ਲੋਕਾਂ ਦੀ ਮੌਤ ਕੋਰੋਨਾ ਕਾਰਨ ਹੋਈ ਹੈ।