ਕੋਰੋਨਾਵਾਇਰਸ ਕਰਕੇ ਇਟਲੀ ਵਿੱਚ ਹੁਣ ਤੱਕ 32,000 ਮੌਤਾਂ ਦੇ ਅੰਕੜਿਆਂ ਉੱਤੇ ਸਵਾਲ ਚੁੱਕਦੇ ਹੋਏ, ਮੌਤਾਂ ਦਾ ਸਹੀ ਅੰਕੜਾ 51,000 ਦੱਸਿਆ ਜਾ ਰਿਹਾ ਹੈ।
ਸ਼ੁਰੂਆਤ ਵਿੱਚ ਚੀਨ ਤੋਂ ਬਾਅਦ, ਇਟਲੀ ਕੋਰੋਨਾਵਾਇਰਸ ਨਾਲ ਸਭ ਤੋਂ ਵੱਧ ਪ੍ਰਭਾਵਤ ਹੋਣ ਵਾਲਾ ਦੇਸ ਸੀ। ਪਰ ਤੇਜ਼ੀ ਨਾਲ ਵਧ ਰਹੀ ਲਾਗ ਕਰਕੇ ਹੋ ਰਹੀਆਂ ਮੌਤਾਂ ਦੇ ਕਾਰਨ, ਇਟਲੀ ਚੀਨ ਨੂੰ ਪਛਾੜ ਕੇ ਪਹਿਲੇ ਨੰਬਰ ਉੱਤੇ ਰਿਹਾ।
ਪਰ ਹੁਣ ਅਮਰੀਕਾ ਸਭ ਤੋਂ ਅੱਗੇ ਚਲ ਰਿਹਾ ਹੈ ਜਿੱਥੇ 95 ਹਜ਼ਾਰ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ।
ਵੀਰਵਾਰ ਨੂੰ ਇਟਲੀ ਦੀ ਨੈਸ਼ਨਲ ਸੋਸ਼ਲ ਸਿਕਿਓਰਟੀ ਏਜੰਸੀ ਨੇ ਕਿਹਾ ਹੈ ਕਿ ਮਾਰਚ ਤੇ ਅਪ੍ਰੈਲ ਦੇ ਮਹੀਨੇ ਵਿੱਚ ਕੋਵਿਡ-19 ਕਰਕੇ ਦੱਸੀਆਂ ਗਈਆਂ ਮੌਤਾਂ, ਅੰਕੜਿਆਂ ਤੋਂ 19 ਹਜ਼ਾਰ ਜ਼ਿਆਦਾ ਹੋ ਸਕਦੀਆਂ ਹਨ।
INPS ਇਟਲੀ ਦੀ ਸਭ ਤੋਂ ਵੱਡੀ ਸਮਾਜਿਕ ਸੁਰੱਖਿਆ ਅਤੇ ਭਲਾਈ ਏਜੰਸੀ ਹੈ। ਇਨ੍ਹਾਂ ਦਾ ਕਹਿਣਾ ਹੈ ਕਿ ਸਰਕਾਰੀ ਅੰਕੜਿਆਂ 'ਤੇ ਭਰੋਸਾ ਨਹੀਂ ਕੀਤਾ ਜਾ ਸਕਦਾ।
ਇਸ ਅਧਿਐਨ ਵਿੱਚ ਦੱਸਿਆ ਗਿਆ ਕਿ ਮਾਰਚ-ਅਪ੍ਰੈਲ ਵਿੱਚ ਇਟਲੀ ਵਿੱਚ ਕੁੱਲ 156,429 ਮੌਤਾਂ ਹੋਈਆਂ।
ਇਹ ਗਿਣਤੀ 2015 ਤੋਂ 2019 ਦੇ ਵਿਚਕਾਰ ਇਨ੍ਹਾਂ ਮਹੀਨਿਆਂ ਵਿੱਚ ਇਟਲੀ ਵਿੱਚ ਹੋਈਆਂ ਮੌਤ ਦੀ ਔਸਤ ਨਾਲੋਂ 46,909 ਵਧੇਰੇ ਹੈ।
ਪਰ ਇਨ੍ਹਾਂ ਵਿੱਚੋਂ ਸਿਰਫ਼ 27,938 ਮੌਤਾਂ ਹੀ ਸਿਵਲ ਪ੍ਰੋਟੈਕਸ਼ਨ ਏਜੰਸੀ ਦੁਆਰਾ ਕੋਰੋਨਾਵਾਇਰਸ ਨਾਲ ਜੋੜੀਆਂ ਗਈਆਂ।
INPS ਦਾ ਕਹਿਣਾ ਹੈ ਕਿ ਵਧੇ ਹੋਏ ਮੌਤਾਂ ਦੇ ਅੰਕੜਿਆਂ ਨੂੰ ਸਿਰਫ਼ ਕੋਰੋਨਾਵਾਇਰਸ ਨਾਲ ਨਹੀਂ ਜੋੜਿਆ ਜਾ ਸਕਦਾ।
ਪਰ ਕੋਵਿਡ-19 ਦੇ ਮਰੀਜ਼ਾਂ ਕਾਰਨ ਲੋਕ ਸਿਹਤ ਸੇਵਾਵਾਂ ਨਹੀਂ ਲੈ ਪਾ ਰਹੇ ਸਨ ਕਿਉਂਕਿ ਉਨ੍ਹਾਂ ਕਰਕੇ ਹਸਪਤਾਲਾਂ ਵਿੱਚ ਕੋਈ ਜਗ੍ਹਾ ਨਹੀਂ ਸੀ।
ਤਸਵੀਰ ਸਰੋਤ, Getty Images
