ਚੀਨ ਜਿਸ ਰਿਪੋਰਟ ਨੂੰ ਰੋਕਣਾ ਚਾਹੁੰਦਾ ਸੀ, ਉਹ ਹੋਈ ਜਾਰੀ- ਰੌਇਟਰਜ਼
ਖ਼ਬਰ ਏਜੰਸੀ ਰੌਇਟਰਜ਼ ਅਨੁਸਾਰ, ਚੀਨ ਚਾਹੁੰਦਾ ਸੀ ਕਿ ਯੂਰਪੀ ਯੂਨੀਅਨ ਦੀ ਇੱਕ ਰਿਪੋਰਟ ਨੂੰ ਰੋਕਿਆ ਜਾਵੇ।
ਇਸ ਰਿਪੋਰਟ ਵਿੱਚ ਚੀਨ ’ਤੇ ਕੋਰੋਨਾਵਾਇਰਸ ਦੀ ਲਾਗ ਦੇ ਫੈਲਣ ਬਾਰੇ ਗਲਤ ਜਾਣਕਾਰੀ ਦੇਣ ਦਾ ਇਲਜ਼ਾਮ ਹੈ।
ਰੌਇਟਰਜ਼ ਅਨੁਸਾਰ, ਚੀਨ ਚਾਹੁੰਦਾ ਸੀ ਕਿ ਇਸ ਰਿਪੋਰਟ ਨੂੰ ਬਲਾਕ ਕੀਤਾ ਜਾਵੇ। ਰੌਇਟਰਜ਼ ਨੇ ਚਾਰ ਸਰੋਤਾਂ ਅਤੇ ਕੂਟਨੀਤਕ ਪੱਤਰ ਵਿਹਾਰਾਂ ਦੀ ਸਮੀਖਿਆ ਕਰਨ ਤੋਂ ਬਾਅਦ ਇਹ ਖ਼ਬਰ ਦਿੱਤੀ ਹੈ। ਆਖਰਕਾਰ ਇਹ ਰਿਪੋਰਟ ਜਾਰੀ ਹੋ ਗਈ ਹੈ।
ਇਸ ਰਿਪੋਰਟ 'ਤੇ ਚੀਨ ਦੇ ਵਿਦੇਸ਼ ਮੰਤਰਾਲੇ ਨੇ ਵੀ ਇਸ ਬਾਰੇ ਹਾਲੇ ਤੱਕ ਕੁੱਝ ਨਹੀਂ ਕਿਹਾ ਹੈ।
ਰੌਇਟਰਜ਼ ਨੂੰ ਈਯੂ ਦੇ ਇੱਕ ਬੁਲਾਰੇ ਨੇ ਕਿਹਾ, "ਅਸੀਂ ਅਜਿਹੇ ਮਾਮਲਿਆਂ 'ਤੇ ਕੋਈ ਟਿੱਪਣੀ ਨਹੀਂ ਕਰਦੇ। ਇਹ ਸਾਡੇ ਪਾਰਟਨਰਜ਼ ਅਤੇ ਦੂਜੇ ਦੇਸਾਂ ਵਿਚਾਲੇ ਦੀ ਗੱਲਬਾਤ ਹੈ।”
ਯੂਰਪੀਅਨ ਯੂਨੀਅਨ ਦੇ ਇੱਕ ਹੋਰ ਅਧਿਕਾਰੀ ਨੇ ਰੌਇਟਰਜ਼ ਨੂੰ ਦੱਸਿਆ ਕਿ ਇਹ ਰਿਪੋਰਟ ਜਾਰੀ ਹੋ ਗਈ ਹੈ ਅਤੇ ਜਿਵੇਂ ਦੀ ਸੀ ਉਸੇ ਤਰ੍ਹਾਂ ਹੀ ਜਾਰੀ ਕੀਤੀ ਗਈ ਹੈ।
ਰੌਇਟਰਜ਼ ਅਨੁਸਾਰ, ਪਹਿਲਾਂ ਇਹ ਰਿਪੋਰਟ 21 ਅਪ੍ਰੈਲ ਨੂੰ ਹੀ ਜਾਰੀ ਕੀਤੀ ਜਾਣੀ ਸੀ ਪਰ ਚੀਨੀ ਅਧਿਕਾਰੀਆਂ ਨੂੰ ਪਤਾ ਲੱਗਣ ਕਾਰਨ ਦੇਰ ਹੋਈ।
ਖ਼ਬਰ ਏਜੰਸੀ ਅਨੁਸਾਰ, "ਇੱਕ ਸੀਨੀਅਰ ਚੀਨੀ ਅਧਿਕਾਰੀ ਨੇ ਚੀਨ ਵਿੱਚ ਯੂਰਪੀ ਯੂਨੀਅਨ ਦੇ ਅਧਿਕਾਰੀਆਂ ਨਾਲ ਸੰਪਰਕ ਕੀਤਾ ਸੀ ਅਤੇ ਕਿਹਾ ਸੀ ਕਿ ਜੇ ਇਹ ਰਿਪੋਰਟ ਉਸੇ ਰੂਪ ਵਿੱਚ ਅੱਜ ਹੀ ਜਾਰੀ ਹੁੰਦੀ ਹੈ ਤਾਂ ਸਾਡੇ ਸਹਿਯੋਗ ਲਈ ਇਹ ਬਹੁਤ ਬੁਰਾ ਹੋਵੇਗਾ।"
ਰੌਇਟਰਜ਼ ਨੇ ਚੀਨੀ ਵਿਦੇਸ਼ ਮੰਤਰਾਲੇ ਦੇ ਅਧਿਕਾਰੀ ਯਾਂਗ ਸਿਆਗੁਆਂਗ ਦੀ ਟਿੱਪਣੀ ਦਾ ਹਵਾਲਾ ਦਿੱਤਾ ਹੈ, ਜਿਸ ਵਿੱਚ ਉਨ੍ਹਾਂ ਨੇ ਕਿਹਾ ਸੀ ਕਿ ਜੇ ਰਿਪੋਰਟ ਛਪਦੀ ਹੈ ਤਾਂ ਇਹ ਚੀਨ ਨੂੰ ਨਾਰਾਜ਼ ਕਰਨ ਵਾਲਾ ਕਦਮ ਹੋਵੇਗਾ।
ਤਸਵੀਰ ਸਰੋਤ, Getty Images
