ਭਾਰਤ ਦੇ ਵਿਦੇਸ਼ ਮੰਤਰਾਲੇ ਨੇ ਕਿਹਾ ਪਾਕਿਸਤਾਨ ਨੇ ਕੀਤਾ ਜੰਗਬੰਦੀ ਦਾ ਉਲੰਘਣ

ਲਾਈਵ ਕਵਰੇਜ

ਰਿਪੋਰਟ- ਪ੍ਰਿਅੰਕਾ ਧੀਮਾਨ ਤੇ ਗੁਰਜੋਤ ਸਿੰਘ

1. 10 ਮਈ 2025ਪੰਜਾਬ ਦੀਆਂ ਯੂਨੀਵਰਸਿਟੀਆਂ-ਕਾਲਜਾਂ ਨੂੰ ਜਾਰੀ ਕੀਤੀਆਂ ਗਈਆਂ ਨਵੀਆਂ ਹਿਦਾਇਤਾਂ

   

   ਤਸਵੀਰ ਸਰੋਤ, @harjotbains/X

   ਭਾਰਤ-ਪਾਕਿਸਤਾਨ ਤਣਾਅ ਦੇ ਮੱਦੇਨਜ਼ਰ ਸੂਬੇ ਦੀਆਂ ਯੂਨੀਵਰਸਿਟੀਆਂ ਅਤੇ ਕਾਲਜਾਂ ਨੂੰ ਨਵੀਆਂ ਹਿਦਾਇਤਾਂ ਜਾਰੀ ਕੀਤੀਆਂ ਹਨ।

   ਇਨ੍ਹਾਂ ਵਿੱਚ ਕਿਹਾ ਗਿਆ ਹੈ ਕਿ ਇਹ ਸਿੱਖਿਆ ਅਦਾਰੇ ਨਾ ਤਾਂ ਵਿਦਿਆਰਥੀਆਂ ਨੂੰ ਘਰ ਜਾਣ ਲਈ ਮਜਬੂਰ ਕਰਨਗੇ ਅਤੇ ਨਾ ਹੀ ਕੈਂਪਸ ਵਿੱਚ ਰੁਕਣ ਲਈ ਮਜਬੂਰ ਕਰਨਗੇ।

   ਇਸ ਸਬੰਧੀ ਜਾਰੀ ਨੋਟਿਸ ਨੂੰ ਆਪਣੇ ਐਕਸ ਅਕਾਊਂਟ 'ਤੇ ਸਾਂਝਾ ਕਰਦਿਆਂ ਸਿੱਖਿਆ ਮੰਤਰੀ ਹਰਜੋਤ ਸਿੰਘ ਬੈਂਸ ਨੇ ਲਿਖਿਆ, ''ਸੂਬੇ ਦੀਆਂ ਸਾਰੀਆਂ ਯੂਨੀਵਰਸਿਟੀਆਂ ਅਤੇ ਕਾਲਜਾਂ ਨੂੰ ਵਿਦਿਆਰਥੀਆਂ ਦੀ ਸੁਰੱਖਿਆ ਨੂੰ ਯਕੀਨੀ ਬਣਾਉਣ ਦੇ ਨਿਰਦੇਸ਼ ਦਿੱਤੇ ਗਏ ਹਨ।''

   ਉਨ੍ਹਾਂ ਕਿਹਾ ਕਿ ''ਸੁਰੱਖਿਆ, ਆਵਾਜਾਈ, ਜਾਂ ਨਿੱਜੀ ਕਾਰਨਾਂ ਕਰਕੇ ਜੇਕਰ ਕੋਈ ਵਿਦਿਆਰਥੀ ਕੈਂਪਸ ਛੱਡਣ ਵਿੱਚ ਅਸਮਰੱਥ ਹੈ ਜਾਂ ਛੱਡਣਾ ਨਹੀਂ ਚਾਹੁੰਦਾ ਤਾਂ ਉਸਨੂੰ ਕੈਂਪਸ ਛੱਡਣ ਲਈ ਮਜਬੂਰ ਨਹੀਂ ਕੀਤਾ ਜਾਵੇਗਾ। ਜੇਕਰ ਇੱਕ ਵੀ ਵਿਦਿਆਰਥੀ ਉੱਥੇ ਰਹਿ ਜਾਂਦਾ ਤਾਂ ਸੰਸਥਾਵਾਂ ਉਸ ਦੇ ਰਹਿਣ, ਖਾਣ ਅਤੇ ਦੇਖਭਾਲ ਦਾ ਪ੍ਰਬੰਧ ਕਰਨ।''

   ''ਉਨ੍ਹਾਂ ਨੂੰ, ਪ੍ਰੀਖਿਆਵਾਂ ਲਈ ਰੁਕਣ ਲਈ ਵੀ ਮਜਬੂਰ ਨਹੀਂ ਕੀਤਾ ਜਾਵੇਗਾ। ਘਰ ਵਾਪਸ ਜਾਣ ਵਾਲਿਆਂ ਲਈ ਕੋਈ ਅਕਾਦਮਿਕ ਜੁਰਮਾਨਾ ਨਹੀਂ ਹੋਣਾ ਚਾਹੀਦਾ - ਸਮਾਂ ਸਾਰਣੀ ਮੁੜ ਜਾਰੀ ਕੀਤੀ ਜਾਣੀ ਚਾਹੀਦੀ ਹੈ ਜਾਂ ਬਦਲ ਪ੍ਰਦਾਨ ਕੀਤੇ ਜਾਣੇ ਚਾਹੀਦੇ ਹਨ।''

   

   ਤਸਵੀਰ ਸਰੋਤ, @harjotbains/X

2. 10 ਮਈ 2025ਜੰਮੂ ਦੇ ਰਿਹਾਇਸ਼ੀ ਇਲਾਕੇ ਵਿੱਚ ਗੋਲਾਬਾਰੀ ਤੋਂ ਬਾਅਦ ਦਾ ਮੰਜ਼ਰ, ਦੇਖੋ ਤਸਵੀਰਾਂ

   ਜੰਮੂ ਦੇ ਰਿਹਾਇਸ਼ੀ ਇਲਾਕੇ ਵਿੱਚ ਇਸ ਵੇਲੇ ਦਹਿਸ਼ਤ ਦਾ ਮਹੌਲ ਹੈ।

   ਬੀਤੀ ਰਾਤ, ਜੰਮੂ ਸ਼ਹਿਰ ਦੀ ਰੇਹਾਰੀ ਕਲੋਨੀ 'ਚ ਗੋਲਾਬਾਰੀ ਕੀਤੀ ਗਈ, ਜਿਸ ਨਾਲ ਕਈ ਘਰਾਂ ਨੂੰ ਖਾਸਾ ਨੁਕਸਾਨ ਪਹੁੰਚਿਆ ਹੈ।

   ਗੋਲਾਬਾਰੀ ਦੌਰਾਨ ਹੋਏ ਨੁਕਸਾਨ ਦੀਆਂ ਤਸਵੀਰਾਂ...

   

   

   

   

   

3. 10 ਮਈ 2025ਜੰਮੂ ਦੇ ਰਿਹਾਇਸ਼ੀ ਇਲਾਕੇ 'ਤੇ ਹਮਲਾ, ਸਥਾਨਕ ਲੋਕਾਂ ਨੇ ਕੀ ਦੱਸਿਆ, ਦਿਵਿਆ ਆਰੀਆ, ਬੀਬੀਸੀ ਪੱਤਰਕਾਰ

   

   ਸ਼ੁੱਕਰਵਾਰ ਦੀ ਰਾਤ ਨੂੰ ਪਾਕਿਸਤਾਨ ਵੱਲੋਂ ਜੰਮੂ ਸ਼ਹਿਰ ਦੀ ਰੇਹਾਰੀ ਕਲੋਨੀ 'ਚ ਵੀ ਹਮਲਾ ਕੀਤਾ ਗਿਆ।

   ਸਥਾਨਕ ਲੋਕਾਂ ਨੇ ਬੀਬੀਸੀ ਨੂੰ ਦੱਸਿਆ ਕਿ ਹਮਲੇ ਵਿੱਚ ਕਈ ਘਰਾਂ ਨੂੰ ਨੁਕਸਾਨ ਪਹੁੰਚਿਆ ਅਤੇ ਕਈ ਵਾਹਨਾਂ ਦੇ ਸ਼ੀਸ਼ੇ ਟੁੱਟ ਗਏ।

   ਲੋਕਾਂ ਦਾ ਕਹਿਣਾ ਹੈ ਕਿ ਪਹਿਲੀ ਵਾਰ ਸ਼ਹਿਰ ਦੇ ਵਿਚਕਾਰ ਸਥਿਤ ਕਿਸੇ ਰਿਹਾਇਸ਼ੀ ਇਲਾਕੇ ਨੂੰ ਨਿਸ਼ਾਨਾ ਬਣਾਇਆ ਗਿਆ ਹੈ।

   ਸਥਾਨਕ ਨਿਵਾਸੀ ਰਾਕੇਸ਼ ਗੁਪਤਾ ਨੇ ਦੱਸਿਆ, "ਇੱਕ ਜ਼ੋਰਦਾਰ ਧਮਾਕਾ ਹੋਇਆ ਅਤੇ ਪੂਰਾ ਇਲਾਕਾ ਧੂੰਏਂ ਨਾਲ ਭਰ ਗਿਆ। ਹਰ ਪਾਸੇ ਡਰ ਅਤੇ ਭਗਦੜ ਦਾ ਮਾਹੌਲ ਸੀ। ਪਾਕਿਸਤਾਨ ਆਮ ਲੋਕਾਂ 'ਤੇ ਹਮਲਾ ਕਿਉਂ ਕਰ ਰਿਹਾ ਹੈ?"

   ਬੀਬੀਸੀ ਨੂੰ ਦੱਸਿਆ ਗਿਆ ਕਿ ਕੁਝ ਲੋਕ ਜ਼ਖਮੀ ਹੋਏ ਹਨ ਅਤੇ ਉਨ੍ਹਾਂ ਨੂੰ ਨੇੜਲੇ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਹੈ।

   ਬੀਬੀਸੀ ਟੀਮ ਦੇ ਉੱਥੇ ਹੋਣ ਦੌਰਾਨ ਹੀ ਜੰਮੂ-ਕਸ਼ਮੀਰ ਦੇ ਮੁੱਖ ਮੰਤਰੀ ਉਮਰ ਅਬਦੁੱਲਾ ਵੀ ਘਟਨਾ ਸਥਾਨ 'ਤੇ ਪਹੁੰਚੇ, ਪਰ ਜਦੋਂ ਲੜਾਕੂ ਜਹਾਜ਼ ਉੱਪਰੋਂ ਉਡਾਣ ਭਰਨ ਲੱਗੇ ਤਾਂ ਉਨ੍ਹਾਂ ਨੂੰ ਤੁਰੰਤ ਉੱਥੋਂ ਜਾਣਾ ਪਿਆ।

   ਹਵਾਈ ਹਮਲੇ ਦੇ ਸਾਇਰਨ ਵਜਾਏ ਗਏ ਅਤੇ ਲੋਕਾਂ ਨੂੰ ਇਲਾਕਾ ਖਾਲੀ ਕਰਨ ਲਈ ਕਿਹਾ ਗਿਆ।

   

4. 10 ਮਈ 2025ਭਾਰਤੀ ਫੌਜ ਨੇ ਕਿਹਾ ਪਾਕਿਸਤਾਨ ਨੇ ਹਾਈ ਸਪੀਡ ਮਿਜ਼ਾਇਲ ਦੀ ਵਰਤੋਂ ਕੀਤੀ, ਪੰਜਾਬ ਬਾਰੇ ਕੀ ਦੱਸਿਆ

   

   ਤਸਵੀਰ ਸਰੋਤ, Ministry of External Affairs, India/YT

   ਭਾਰਤੀ ਵਿਦੇਸ਼ ਸਕੱਤਰ ਵਿਕਰਮ ਮਿਸਰੀ ਨੇ ਸ਼ਨੀਵਾਰ ਨੂੰ ਭਾਰਤੀ ਫੌਜ ਦੇ ਬੁਲਾਰਿਆਂ ਨਾਲ ਕੀਤੀ ਸਾਂਝੀ ਪ੍ਰੈੱਸ ਕਾਨਫਰੰਸ ਵਿੱਚ ਕਿਹਾ ਕਿ ਪਾਕਿਸਤਾਨ ਦੀਆਂ ਗਤੀਵਿਧੀਆਂ ਭੜਕਾਊ ਹਨ, ਭਾਰਤ ਨੇ ਸੰਤੁਲਿਤ ਅਤੇ ਯੋਜਨਾਬੱਧ ਤਰੀਕੇ ਨਾਲ ਇਸ ਦਾ ਜਵਾਬ ਦਿੱਤਾ ਹੈ।

   ਭਾਰਤੀ ਫੌਜ ਦੇ ਕਰਨਲ ਸੋਫ਼ੀਆ ਕੁਰੈਸ਼ੀ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ''ਪਾਕਿਸਤਾਨ ਫੌਜ ਨੇ ਪੂਰੇ ਪੱਛਮੀ ਮੋਰਚੇ 'ਤੇ ਲਗਾਤਾਰ ਹਮਲੇ ਜਾਰੀ ਰੱਖੇ। ਜਿਸ 'ਚ ਯੂਕੈਨ ਡਰੋਨ, ਲੰਬੀ ਦੂਰੀ ਦੇ ਹਥਿਆਰ ਅਤੇ ਲੜਾਕੂ ਜਹਾਜ਼ਾਂ ਦਾ ਵੀ ਇਸਤੇਮਾਲ ਕੀਤਾ ਗਿਆ ਅਤੇ ਭਾਰੀ ਫੌਜੀ ਢਾਂਚੇ ਨੂੰ ਨਿਸ਼ਾਨਾ ਬਣਾਇਆ ਗਿਆ ਹੈ।''

   ''ਐਲਓਸੀ 'ਤੇ ਸ਼੍ਰੀਨਗਰ ਤੋਂ ਨਲਿਆ ਤੱਕ 26 ਤੋਂ ਵੱਧ ਥਾਵਾਂ 'ਤੇ ਹਵਾਈ ਘੁਸਪੈਠ ਦੀਆਂ ਕੋਸ਼ਿਸ਼ਾਂ ਕੀਤੀਆਂ ਗਈਆਂ। ਭਾਰਤੀ ਸੁਰੱਖਿਆ ਬਲਾਂ ਨੇ ਜ਼ਿਆਦਾਤਰ ਖਤਰਿਆਂ ਨੂੰ ਸਫਲਤਾਪੂਰਵਕ ਨਾਕਾਮ ਕੀਤਾ। ਫਿਰ ਵੀ ਊਧਮਪੁਰ, ਪਠਾਨਕੋਟ, ਆਦਮਪੁਰ, ਭੁਜ ਅਤੇ ਬਠਿੰਡਾ ਦੇ ਫੌਜੀ ਹਵਾਈ ਸਟੇਸ਼ਨਾਂ 'ਤੇ ਫੌਜੀ ਸਾਜੋ ਸਮਾਨ ਤੇ ਸੁਰੱਖਿਆ ਮੁਲਾਜ਼ਮਾਂ ਨੂੰ ਨੁਕਸਾਨ ਪਹੁੰਚਾਇਆ।''

   

   ਤਸਵੀਰ ਸਰੋਤ, YT/MEA

   ਉਨ੍ਹਾਂ ਅੱਗੇ ਦੱਸਿਆ, ''ਪਾਕਿਸਤਾਨ ਨੇ ਸਵੇਰੇ 1 ਵੱਜ ਕੇ 40 ਮਿੰਟ 'ਤੇ ਹਾਈ ਸਪੀਡ ਮਿਜ਼ਾਈਲ ਵਰਤ ਕੇ ਪੰਜਾਬ ਦੇ ਏਅਰ ਬੇਸ ਸਟੇਸ਼ਨ ਨੂੰ ਨਿਸ਼ਾਨਾ ਬਣਾਉਣ ਦੀ ਕੋਸ਼ਿਸ਼ ਕੀਤੀ।''

   ''ਇੱਕ ਨਿੰਦਣਯੋਗ ਅਤੇ ਗੈਰਵਿਵਹਾਰਿਕ ਕਾਰਵਾਈ ਤਹਿਤ ਪਾਕਿਸਤਾਨ ਨੇ ਸ਼੍ਰੀਨਗਰ, ਅਵੰਤੀਪੂਰ ਅਤੇ ਊਧਮਪੁਰ ਦੇ ਫੌਜੀ ਹਵਾਈ ਅੱਡਿਆਂ 'ਤੇ ਡਾਕਟਰੀ ਕੇਂਦਰਾਂ ਅਤੇ ਸਕੂਲਾਂ ਨੂੰ ਨਿਸ਼ਾਨਾ ਬਣਾਇਆ।''

   ਉਨ੍ਹਾਂ ਕਿਹਾ ਕਿ ਇਸ ਦੇ ਨਾਲ ਪਾਕਿਸਤਾਨ ਦੀ ਆਮ ਨਾਗਰਿਕਾਂ ਦੇ ਢਾਂਚਿਆਂ 'ਤੇ ਹਮਲਾ ਕਰਨ ਦੀ ਗੈਰ-ਜਿੰਮੇਦਾਰਾਨਾ ਪ੍ਰਵਿਰਤੀ ਮੁੜ ਉਜਾਗਰ ਹੋਈ ਹੈ।

   ਭਾਰਤ ਨੇ ਪਾਕਿਸਤਾਨ 'ਚ ਕਿਹੜੀਆਂ ਥਾਵਾਂ ਨੂੰ ਨਿਸ਼ਾਨਾ ਬਣਾਇਆ

   

   ਤਸਵੀਰ ਸਰੋਤ, YT/MEA

   ''ਭਾਰਤੀ ਬਲਾਂ ਨੇ ਤੁਰੰਤ ਅਤੇ ਸੁਨਿਯੋਜਿਤ ਢੰਗ ਨਾਲ, (ਪਾਕਿਸਤਾਨ ਵਿੱਚ) ਟੈਕਨੀਕਲ ਇੰਸਟਾਲੇਸ਼ਨਜ਼, ਕਮਾਂਡ ਅਤੇ ਕੰਟਰੋਲ ਸੈਂਟਰ, ਰਡਾਰ ਸਾਈਟਸ ਅਤੇ ਹਥਿਆਰ ਭੰਡਾਰਾਂ ਨੂੰ ਚੁਣ ਕੇ ਨਿਸ਼ਾਨਾ ਬਣਾਇਆ।''

   ''ਰਫੀਕੀ, ਮੁਰੀਦ, ਚੱਕਲਾਲਾ, ਰਹਿਮ ਯਾਰ ਖਾਂ, ਸੁਕੁਰ ਅਤੇ ਚੁਨੀਆਂ ਸਥਿਤ ਪਾਕਿਸਤਾਨ ਦੇ ਫੌਜੀ ਟਿਕਾਣਿਆਂ 'ਤੇ ਏਅਰ ਲਾਂਚਡ ਸਟੀਕ ਹਥਿਆਰਾਂ ਅਤੇ ਲੜਾਕੂ ਜਹਾਜ਼ਾਂ ਨਾਲ ਹਮਲੇ ਕੀਤੇ ਗਏ।''

   ''ਪਸਰੂਰ ਸਥਿਤ ਰਡਾਰ ਸਾਈਟ ਅਤੇ ਸਿਆਲਕੋਟ ਦੇ ਏਵੀਏਸ਼ਨ ਬੇਸ 'ਤੇ ਹਮਲਾ ਕੀਤਾ ਗਿਆ। ਇਨ੍ਹਾਂ ਕਾਰਵਾਈਆਂ ਦੌਰਾਨ ਭਾਰਤ ਨੇ ਘੱਟੋ-ਘੱਟ ਕੋਲੈਟਰਲ ਡੈਮੇਜ ( ਆਮ ਨਾਗਰਿਕਾਂ ਨੂੰ ਘੱਟੋ-ਘੱਟ ਨੁਕਸਾਨ) ਯਕੀਨੀ ਬਣਾਇਆ।''

   ਉਨ੍ਹਾਂ ਕਿਹਾ ਕਿ, ''ਪਾਕਿਸਤਾਨ ਨੇ ਲਾਹੌਰ ਤੋਂ ਉਡਾਨ ਭਰਨ ਵਾਲੇ ਯਾਤਰੂ ਜਹਾਜ਼ਾਂ ਦੀ ਆੜ ਲੈ ਕੇ ਕੌਮਾਂਤਰੀ ਹਵਾਈ ਰਸਤਿਆਂ ਦੀ ਦੁਰਵਰਤੋਂ ਕੀਤੀ, ਤਾਂ ਜੋ ਉਹ ਆਪਣੀਆਂ ਗਤੀਵਿਧੀਆਂ ਲੁਕਾ ਸਕਣ।''

   ''ਪਾਕਿਸਤਾਨ ਨੇ ਆਦਮਪੁਰ ਸਥਿਤ ਐਸ 400 ਪ੍ਰਣਾਲੀ, ਸੂਰਤਗੜ੍ਹ ਤੇ ਸਿਰਸਾ ਦੇ ਹਵਾਈ ਅੱਡਾ, ਨਗਰੋਟਾ ਦੇ ਬ੍ਰਹਮੋਸ ਬੇਸ, ਦੇਹਰਾਗੀਰੀ ਦੇ ਤੋਪਖਾਨਾ ਅਤੇ ਚੰਡੀਗੜ੍ਹ ਦੇ ਅਗ੍ਰੀਮ ਗੋਲਾ-ਬਾਰੂਦ ਡਿਪੋ ਨੂੰ ਨਸ਼ਟ ਕਰਨ ਦੇ ਝੂਠੇ ਦਾਅਵੇ ਸੋਸ਼ਲ ਮੀਡੀਆ 'ਤੇ ਫੈਲਾਏ, ਜਿਨ੍ਹਾਂ ਦਾ ਭਾਰਤੀ ਫੌਜ ਪੂਰੀ ਤਰ੍ਹਾਂ ਖੰਡਨ ਕਰਦੀ ਹੈ।''

   ਉਨ੍ਹਾਂ ਕਿਹਾ ਕਿ ਭਾਰਤੀ ਹਥਿਆਰਬੰਦ ਬਲ ਇਸ ਗੱਲ ਨੂੰ ਦੁਹਰਾਉਂਦੇ ਹਨ ਕਿ 'ਉਹ ਤਣਾਅ ਨੂੰ ਵਧਾਉਣਾ ਨਹੀਂ ਚਾਹੁੰਦੇ, ਬਸ਼ਰਤੇ ਪਾਕਿਸਤਾਨ ਵੀ ਅਜਿਹਾ ਹੀ ਵਿਵਹਾਰ ਕਰੇ'।

5. 10 ਮਈ 2025ਭਾਰਤੀ ਫੌਜ ਨੇ ਕਿਹਾ 'ਸਾਡੀਆਂ ਪੱਛਮੀ ਸਰਹੱਦਾਂ 'ਤੇ ਹਮਲੇ ਜਾਰੀ'

   

   ਤਸਵੀਰ ਸਰੋਤ, ADG PI - INDIAN ARMY/X

   ਭਾਰਤੀ ਫੌਜ ਨੇ ਕਿਹਾ ਹੈ ਕਿ ਦੇਸ਼ ਦੀਆਂ ਪੱਛਮੀ ਸਰਹੱਦਾਂ 'ਤੇ ਡਰੋਨ ਅਤੇ ਹੋਰ ਹਥਿਆਰਾਂ ਵਾਲੇ ਹਮਲੇ ਜਾਰੀ ਹਨ ਅਤੇ ਇਨ੍ਹਾਂ ਵਿੱਚ ਵਾਧਾ ਹੋ ਰਿਹਾ ਹੈ।

   ਨਾਲ ਹੀ ਇਹ ਵੀ ਕਿਹਾ ਗਿਆ ਹੈ ਕਿ ਅੰਮ੍ਰਿਤਸਰ ਵਿਖੇ ਅੱਜ ਸਵੇਰੇ ਪਾਕਿਸਤਾਨ ਦੇ ਡਰੋਨ ਉੱਡਦੇ ਦਿਖਾਈ ਦਿੱਤੇ ਸਨ, ਜਿਨ੍ਹਾਂ ਨੂੰ ਭਾਰਤੀ ਹਵਾਈ ਰੱਖਿਆ ਪ੍ਰਣਾਲੀ ਦੁਆਰਾ ਨਸ਼ਟ ਕਰ ਦਿੱਤਾ ਗਿਆ।

   ਭਾਰਤੀ ਫੌਜ ਦੇ ਅਧਿਕਾਰਿਤ ਐਕਸ ਅਕਾਊਂਟ 'ਤੇ ਇਸਦੀ ਜਾਣਕਾਰੀ ਦਿੰਦੇ ਹੋਏ ਲਿਖਿਆ ਗਿਆ ,''ਪਾਕਿਸਤਾਨ ਵੱਲੋਂ ਸਾਡੀਆਂ ਪੱਛਮੀ ਸਰਹੱਦਾਂ 'ਤੇ ਡਰੋਨ ਅਤੇ ਹੋਰ ਹਥਿਆਰਾਂ ਵਾਲੇ ਹਮਲਿਆਂ 'ਚ ਸਪਸ਼ਟ ਤੌਰ 'ਤੇ ਵਾਧਾ ਜਾਰੀ ਹੈ। ਅਜਿਹੀ ਹੀ ਇੱਕ ਘਟਨਾ ਵਿੱਚ, ਅੱਜ ਸਵੇਰੇ ਲਗਭਗ 5 ਵਜੇ, ਅੰਮ੍ਰਿਤਸਰ ਦੇ ਖਾਸਾ ਕੈਂਟ ਉੱਤੇ ਕਈ ਦੁਸ਼ਮਣ ਹਥਿਆਰਬੰਦ ਡਰੋਨ ਉੱਡਦੇ ਦੇਖੇ ਗਏ। ਦੁਸ਼ਮਣ ਡਰੋਨਾਂ ਨੂੰ ਤੁਰੰਤ ਸਾਡੀਆਂ ਹਵਾਈ ਰੱਖਿਆ ਪ੍ਰਣਾਲੀਆਂ ਦੁਆਰਾ ਨਸ਼ਟ ਕਰ ਦਿੱਤਾ ਗਿਆ।''

   ''ਭਾਰਤ ਦੀ ਪ੍ਰਭੂਸੱਤਾ ਦੀ ਉਲੰਘਣਾ ਕਰਨ ਅਤੇ ਨਾਗਰਿਕਾਂ ਨੂੰ ਖ਼ਤਰੇ ਵਿੱਚ ਪਾਉਣ ਦੀ ਪਾਕਿਸਤਾਨ ਦੀ ਸਪਸ਼ਟ ਕੋਸ਼ਿਸ਼ ਅਸਵੀਕਾਰਨਯੋਗ ਹੈ। ਭਾਰਤੀ ਫੌਜ ਦੁਸ਼ਮਣ ਦੇ ਮਨਸੂਬਿਆਂ ਨੂੰ ਨਾਕਾਮ ਕਰ ਦੇਵੇਗੀ।''

   

   ਤਸਵੀਰ ਸਰੋਤ, ADG PI - INDIAN ARMY/X

6. 10 ਮਈ 2025ਪਾਕਿਸਤਾਨੀ ਹਮਲੇ ਵਿੱਚ ਜੰਮੂ-ਕਸ਼ਮੀਰ ਦੇ ਪ੍ਰਸ਼ਾਸਨਿਕ ਅਧਿਕਾਰੀ ਦੀ ਮੌਤ, ਸੀਐੱਮ ਉਮਰ ਅਬਦੁੱਲ੍ਹਾ ਨੇ ਦਿੱਤੀ ਜਾਣਕਾਰੀ

   

   ਤਸਵੀਰ ਸਰੋਤ, Getty Images

   ਜੰਮੂ-ਕਸ਼ਮੀਰ ਦੇ ਰਾਜੌਰੀ ਵਿੱਚ ਪਾਕਿਸਤਾਨ ਵੱਲੋਂ ਕੀਤੇ ਗਏ ਹਮਲੇ ਵਿੱਚ ਸੂਬੇ ਦੇ ਇੱਕ ਪ੍ਰਸ਼ਾਸਨਿਕ ਅਧਿਕਾਰੀ ਦੀ ਮੌਤ ਹੋ ਗਈ ਹੈ। ਇਸ ਦੀ ਜਾਣਕਾਰੀ ਸੂਬੇ ਦੇ ਮੁੱਖ ਮੰਤਰੀ ਉਮਰ ਅਬਦੁੱਲ੍ਹਾ ਨੇ ਦਿੱਤੀ ਹੈ।

   

   ਤਸਵੀਰ ਸਰੋਤ, @OmarAbdullah/X

   ਉਨ੍ਹਾਂ ਆਪਣੇ ਐਕਸ ਅਕਾਊਂਟ 'ਤੇ ਲਿਖਿਆ, ''ਰਾਜੌਰੀ ਤੋਂ ਦੁੱਖ ਭਰੀ ਖ਼ਬਰ। ਅਸੀਂ ਜੰਮੂ-ਕਸ਼ਮੀਰ ਪ੍ਰਸ਼ਾਸਨਿਕ ਸੇਵਾਵਾਂ ਦੇ ਇੱਕ ਸਮਰਪਿਤ ਅਧਿਕਾਰੀ ਨੂੰ ਗੁਆ ਦਿੱਤਾ ਹੈ। ਕੱਲ੍ਹ ਹੀ ਉਹ ਜ਼ਿਲ੍ਹੇ ਦੇ ਆਲੇ-ਦੁਆਲੇ ਡਿਪਟੀ ਮੁੱਖ ਮੰਤਰੀ ਦੇ ਨਾਲ ਫੇਰੀ 'ਤੇ ਅਤੇ ਮੇਰੀ ਪ੍ਰਧਾਨਗੀ ਹੇਠ ਹੋਈ ਔਨਲਾਈਨ ਮੀਟਿੰਗ ਵਿੱਚ ਸ਼ਾਮਲ ਹੋਏ ਸਨ।''

   ''ਅੱਜ ਪਾਕਿਸਤਾਨ ਵੱਲੋਂ ਰਾਜੌਰੀ ਸ਼ਹਿਰ ਨੂੰ ਨਿਸ਼ਾਨਾ ਬਣਾਇਆ ਗਿਆ ਅਤੇ ਅਧਿਕਾਰੀ ਦੇ ਘਰ 'ਤੇ 'ਵੀ ਹੋਈ ਗੋਲੀਬਾਰੀ ਦੌਰਾਨ ਸਾਡੇ ਵਧੀਕ ਜ਼ਿਲ੍ਹਾ ਵਿਕਾਸ ਕਮਿਸ਼ਨਰ, ਰਾਜ ਕੁਮਾਰ ਥੱਪਾ ਦੀ ਮੌਤ ਹੋ ਗਈ।''

   ''ਇਸ ਭਿਆਨਕ ਜਾਨੀ ਨੁਕਸਾਨ ਨਾਲ ਲੱਗੇ ਧੱਕੇ ਅਤੇ ਦੁੱਖ ਨੂੰ ਪ੍ਰਗਟ ਕਰਨ ਲਈ ਮੇਰੇ ਕੋਲ ਕੋਈ ਸ਼ਬਦ ਨਹੀਂ ਹਨ। ਪਰਮਾਤਮਾ ਉਨ੍ਹਾਂ ਦੀ ਆਤਮਾ ਨੂੰ ਸ਼ਾਂਤੀ ਦੇਵੇ।''

7. 10 ਮਈ 2025ਬਠਿੰਡਾ ਏਅਰ ਫੋਰਸ ਸਟੇਸ਼ਨ ਅੰਦਰ ਧਮਾਕੇ ਦੀਆਂ ਰਿਪੋਰਟਾਂ, ਧਮਾਕੇ ਪਿਛਲੇ ਕਾਰਨ ਅਜੇ ਨਹੀਂ ਪਤਾ

   ਬਠਿੰਡਾ ਦੇ ਏਅਰ ਫੋਰਸ ਸਟੇਸ਼ਨ ਦੇ ਅੰਦਰ ਧਮਾਕੇ ਦੀਆਂ ਰਿਪੋਰਟਾਂ ਆਈਆਂ ਹਨ, ਪਰ ਧਮਾਕੇ ਪਿਛਲੇ ਕਾਰਨ ਅਜੇ ਪਤਾ ਨਹੀਂ ਲੱਗ ਸਕੇ ਸਨ।

   ਬੀਬੀਸੀ ਪੱਤਰਕਾਰ ਹਰਮਨਦੀਪ ਸਿੰਘ ਮੁਤਾਬਕ, ਬਠਿੰਡਾ ਦੇ ਐੱਸਐੱਸਪੀ ਅਪਨੀਤ ਕੌਂਡਲ ਨੇ ਇਸ ਗੱਲ ਦੀ ਪੁਸ਼ਟੀ ਕੀਤੀ ਕਿ ਏਅਰ ਫੋਰਸ ਬੇਸ ਦੇ ਅੰਦਰ ਸਵੇਰੇ 7.20 ਵਜੇ ਧਮਾਕਾ ਹੋਇਆ ਹੈ।

   ਪਰ ਉਨ੍ਹਾਂ ਨਾਲ ਹੀ ਇਹ ਵੀ ਕਿਹਾ ਕਿ ਇਸ ਧਮਾਕੇ ਦੇ ਕਾਰਨਾਂ ਦਾ ਪਤਾ ਨਹੀਂ ਲੱਗ ਸਕਿਆ ਹੈ।

   ਇਸ ਤੋਂ ਪਹਿਲਾਂ ਗੁਰਦਸਪੁਰ ਤੋਂ ਵੀ ਧਮਾਕੇ ਦੀ ਜਾਣਕਾਰੀ ਮਿਲੀ ਹੈ, ਜਿਸ ਦੇ ਕਾਰਨ ਇੱਕ ਖੇਤ ਵਿੱਚ ਬਹੁਤ ਡੂੰਘਾ ਟੋਆ ਬਣ ਗਿਆ ਹੈ।

8. 10 ਮਈ 2025ਪਾਕਿਸਤਾਨ ਨੂੰ ਆਈਐੱਮਐੱਫ ਤੋਂ ਮਿਲਿਆ ਕਰਜ਼ਾ, ਭਾਰਤ ਦਾ ਕੀ ਰੁਖ਼ ਰਿਹਾ

   

   ਤਸਵੀਰ ਸਰੋਤ, Getty Images

   ਭਾਰਤ-ਪਾਕਿਸਤਾਨ ਤਣਾਅ ਦੇ ਵਿਚਕਾਰ, ਅੰਤਰਰਾਸ਼ਟਰੀ ਮੁਦਰਾ ਫੰਡ (ਆਈਐਮਐਫ) ਨੇ ਐਕਸਟੈਂਡਡ ਫੰਡ ਸਹੂਲਤ (ਈਐਫਐਫ) ਦੇ ਤਹਿਤ ਪਾਕਿਸਤਾਨ ਨੂੰ ਤੁਰੰਤ ਇੱਕ ਅਰਬ ਅਮਰੀਕੀ ਡਾਲਰ ਦੇ ਫੰਡ ਜਾਰੀ ਕਰ ਦਿੱਤੇ ਹਨ।

   ਭਾਰਤ ਨੇ ਪਾਕਿਸਤਾਨ ਨੂੰ ਕਰਜ਼ਾ ਦੇਣ ਲਈ ਹੋਈ ਵੋਟਿੰਗ ਵਿੱਚ ਹਿੱਸਾ ਨਹੀਂ ਲਿਆ। ਪਾਕਿਸਤਾਨ ਦੇ ਮਾੜੇ ਟਰੈਕ ਰਿਕਾਰਡ ਦਾ ਹਵਾਲਾ ਦਿੰਦੇ ਹੋਏ, ਭਾਰਤ ਨੇ ਖਦਸ਼ਾ ਪ੍ਰਗਟਾਇਆ ਕਿ ਆਈਐਮਐਫ ਫੰਡਾਂ ਦੀ ਦੁਰਵਰਤੋਂ ਰਾਜ-ਪ੍ਰਯੋਜਿਤ ਸਰਹੱਦ ਪਾਰ ਅੱਤਵਾਦ ਲਈ ਕੀਤੀ ਜਾ ਸਕਦੀ ਹੈ।

   ਭਾਰਤ ਨੇ ਇੱਕ ਬਿਆਨ ਜਾਰੀ ਕਰਕੇ ਕਿਹਾ ਹੈ ਕਿ ਪਾਕਿਸਤਾਨ ਲੰਬੇ ਸਮੇਂ ਤੋਂ ਆਈਐਮਐਫ ਤੋਂ ਕਰਜ਼ਾ ਲੈ ਰਿਹਾ ਹੈ ਪਰ ਆਈਐਮਐਫ ਦੀਆਂ ਸ਼ਰਤਾਂ ਦੀ ਪਾਲਣਾ ਕਰਨ ਵਿੱਚ ਉਸਦਾ ਟਰੈਕ ਰਿਕਾਰਡ ਬਹੁਤ ਮਾੜਾ ਹੈ।

   ਪਿਛਲੇ 35 ਸਾਲਾਂ ਵਿੱਚ, ਪਾਕਿਸਤਾਨ ਨੇ 28 ਸਾਲ ਆਈਐਮਐਫ ਤੋਂ ਕਰਜ਼ਾ ਲਿਆ ਹੈ। ਸਾਲ 2019 ਤੋਂ ਪਿਛਲੇ ਪੰਜ ਸਾਲਾਂ ਵਿੱਚ ਆਈਐਮਐਫ ਦੇ ਚਾਰ ਸਹਾਇਤਾ ਪ੍ਰੋਗਰਾਮ ਹੋਏ ਹਨ।

   ਭਾਰਤ ਨੇ ਕਿਹਾ ਕਿ ਪਾਕਿਸਤਾਨ ਦਾ ਰਿਕਾਰਡ ਦੱਸਦਾ ਹੈ ਕਿ ਆਈਐਮਐਫ ਪ੍ਰੋਗਰਾਮ ਸਹੀ ਢੰਗ ਨਾਲ ਬਣਾਏ ਨਹੀਂ ਗਏ ਜਾਂ ਉਨ੍ਹਾਂ ਦੀ ਨਿਗਰਾਨੀ ਸਹੀ ਤਰ੍ਹਾਂ ਨਾਲ ਨਹੀਂ ਹੋਈ ਜਾਂ ਫਿਰ ਪਾਕਿਸਤਾਨ ਨੇ ਉਨ੍ਹਾਂ ਨੂੰ ਸਹੀ ਢੰਗ ਨਾਲ ਲਾਗੂ ਨਹੀਂ ਕੀਤਾ।

   ਭਾਰਤ ਨੇ ਇਹ ਵੀ ਕਿਹਾ ਕਿ ਪਾਕਿਸਤਾਨੀ ਫੌਜ ਆਰਥਿਕ ਮਾਮਲਿਆਂ ਵਿੱਚ ਦਖਲ ਦਿੰਦੀ ਹੈ। ਇਸ ਨਾਲ ਨੀਤੀਗਤ ਚੂਕ ਅਤੇ ਸੁਧਾਰਾਂ ਦੇ ਉਲਟ ਹੋਣ ਦਾ ਜੋਖਮ ਵਧ ਗਿਆ ਹੈ।

   ਭਾਵੇਂ ਉੱਥੇ ਆਮ ਨਾਗਰਿਕਾਂ ਦੀ ਸਰਕਾਰ ਹੈ, ਪਰ ਪਾਕਿਸਤਾਨੀ ਫੌਜ ਘਰੇਲੂ ਸਿਆਸਤ ਵਿੱਚ ਵੱਡੀ ਭੂਮਿਕਾ ਨਿਭਾਉਂਦੀ ਹੈ ਅਤੇ ਆਰਥਿਕਤਾ ਵਿੱਚ ਵੀ ਦਖਲ ਦਿੰਦੀ ਹੈ।

9. 10 ਮਈ 2025ਭਾਰਤ ਦੇ 32 ਹਵਾਈ ਅੱਡਿਆਂ ਤੋਂ ਨਾਗਰਿਕ ਉਡਾਣਾਂ 15 ਮਈ ਤੱਕ ਬੰਦ: ਡੀਜੀਸੀਏ

   

   ਤਸਵੀਰ ਸਰੋਤ, Getty Images

   ਭਾਰਤ-ਪਾਕਿਸਤਾਨ ਤਣਾਅ ਦੇ ਵਿਚਕਾਰ, ਭਾਰਤ ਦੇ ਸ਼ਹਿਰੀ ਹਵਾਬਾਜ਼ੀ ਮੰਤਰਾਲੇ (ਡੀਜੀਸੀਏ) ਨੇ ਦੇਸ਼ ਦੇ ਉੱਤਰੀ ਅਤੇ ਪੱਛਮੀ ਹਿੱਸਿਆਂ ਵਿੱਚ ਸਥਿਤ 32 ਹਵਾਈ ਅੱਡਿਆਂ ਤੋਂ ਨਾਗਰਿਕ ਉਡਾਣਾਂ 'ਤੇ ਪਾਬੰਦੀ ਲਗਾ ਦਿੱਤੀ ਹੈ।

   ਏਅਰਪੋਰਟ ਅਥਾਰਟੀ ਆਫ਼ ਇੰਡੀਆ (ਏਏਆਈ) ਅਤੇ ਸਬੰਧਤ ਹਵਾਬਾਜ਼ੀ ਅਧਿਕਾਰੀਆਂ ਨੂੰ ਕਈ 'ਨੋਟਿਸ ਟੂ ਏਅਰਮੈਨ (ਨੋਟਮ)' ਜਾਰੀ ਕੀਤੇ ਗਏ ਹਨ। ਜਿਸ ਦੇ ਤਹਿਤ 15 ਮਈ ਤੱਕ ਉਡਾਣਾਂ ਬੰਦ ਰਹਿਣਗੀਆਂ।

   ਜਿਨ੍ਹਾਂ ਹਵਾਈ ਅੱਡਿਆ 'ਤੇ ਨਾਗਰਿਕਾਂ ਉਡਾਣਾਂ ਲਈ ਪਾਬੰਦੀ ਲਗਾਈ ਗਈ ਹੈ, ਉਹ ਹਨ - ਊਧਮਪੁਰ, ਅੰਬਾਲਾ, ਅੰਮ੍ਰਿਤਸਰ, ਅਵੰਤੀਪੁਰਾ, ਬਠਿੰਡਾ, ਭੁਜ, ਬੀਕਾਨੇਰ, ਚੰਡੀਗੜ੍ਹ, ਹਲਵਾਰਾ, ਹਿੰਡਨ, ਜੈਸਲਮੇਰ, ਜੰਮੂ, ਜਾਮਨਗਰ, ਜੋਧਪੁਰ, ਕਾਂਡਲਾ, ਕਾਂਗੜਾ (ਗੱਗਲ), ਕੇਸ਼ੋਦ, ਕਿਸ਼ਨਗੜ੍ਹ, ਕੁੱਲੂ ਮਨਾਲੀ (ਭੁੰਤਰ), ਲੇਹ, ਲੁਧਿਆਣਾ, ਮੁੰਦਰਾ, ਨਲਿਆ, ਪਠਾਨਕੋਟ, ਪਟਿਆਲਾ, ਪੋਰਬੰਦਰ, ਰਾਜਕੋਟ (ਹੀਰਾਸਰ), ਸਰਸਾਵਾ, ਸ਼ਿਮਲਾ, ਸ਼੍ਰੀਨਗਰ, ਥੋਇਸ ਅਤੇ ਉੱਤਰਲਾਈ।

   ਏਅਰ ਇੰਡੀਆ ਨੇ ਸੋਸ਼ਲ ਮੀਡੀਆ ਐਕਸ 'ਤੇ ਜਾਣਕਾਰੀ ਦਿੱਤੀ ਹੈ ਕਿ ਹਵਾਬਾਜ਼ੀ ਅਧਿਕਾਰੀਆਂ ਦੀ ਸੂਚਨਾ ਤੋਂ ਬਾਅਦ, ਜੰਮੂ, ਸ਼੍ਰੀਨਗਰ, ਲੇਹ, ਜੋਧਪੁਰ, ਅੰਮ੍ਰਿਤਸਰ, ਚੰਡੀਗੜ੍ਹ, ਭੁਜ, ਜਾਮਨਗਰ ਅਤੇ ਰਾਜਕੋਟ ਲਈ ਉਡਾਣਾਂ 15 ਮਈ ਸਵੇਰੇ 5.29 ਵਜੇ ਤੱਕ ਰੱਦ ਕੀਤੀਆਂ ਜਾ ਰਹੀਆਂ ਹਨ।

10. 10 ਮਈ 2025ਗੁਰਦਾਸਪੁਰ 'ਚ ਸਵੇਰੇ ਸੁਣਾਈ ਦਿੱਤਾ ਵੱਡਾ ਧਮਾਕਾ, ਖਾਲੀ ਖੇਤ 'ਚ ਬਣਿਆ 40 ਫੁੱਟ ਲੰਮਾ ਟੋਆ

    

    ਤਸਵੀਰ ਸਰੋਤ, Gurpreet Singh/BBC

    ਗੁਰਦਾਸਪੁਰ ਜ਼ਿਲ੍ਹੇ ਦੇ ਪਿੰਡ ਰਾਜੂ ਬੇਲਾ, ਛਿੱਛਰਾ ਵਿਖੇ ਅੱਜ ਸਵੇਰੇ 4:30 ਵਜੇ ਵੱਡਾ ਧਮਾਕਾ ਸੁਣਾਈ ਦਿੱਤਾ ਹੈ।

    ਬੀਬੀਸੀ ਸਹਿਯੋਗੀ ਗੁਰਪ੍ਰੀਤ ਸਿੰਘ ਤੋਂ ਪ੍ਰਾਪਤ ਜਾਣਕਾਰੀ ਮੁਤਾਬਕ, ਇਸ ਧਮਾਕੇ ਤੋਂ ਬਾਅਦ ਪਿੰਡ ਦੇ ਖਾਲੀ ਪਏ ਇੱਕ ਖੇਤ ਵਿੱਚ 40 ਫੁੱਟ ਲੰਬਾ ਅਤੇ 15 ਫੁੱਟ ਡੂੰਘਾ ਟੋਆ ਬਣ ਗਿਆ ਹੈ।

    ਇਹ ਧਮਾਕਾ ਇੰਨਾ ਜ਼ਬਰਦਸਤ ਸੀ ਕਿ ਇਸਦੇ ਤਿੰਨ ਤੋਂ ਚਾਰ ਕਿਲੋਮੀਟਰ ਦੇ ਨੇੜਲੇ ਇਲਾਕੇ ਵਿੱਚ ਲੋਕਾਂ ਦੇ ਘਰਾਂ ਦੀਆਂ ਖਿੜਕੀਆਂ ਦੇ ਸ਼ੀਸ਼ੇ ਟੁੱਟ ਗਏ ਹਨ।

    ਧਮਾਕੇ ਤੋਂ ਬਾਅਦ, ਪਿੰਡ ਦੇ ਲੋਕਾਂ ਵਿੱਚ ਸਹਿਮ ਦਾ ਮਾਹੌਲ ਹੈ।

11. 10 ਮਈ 2025ਪਾਕਿਸਤਾਨੀ ਫੌਜ ਨੇ ਕਿਹਾ ਕਿ ਉਸ ਨੇ ਭਾਰਤ ਵਿਰੁੱਧ ਜਵਾਬੀ ਕਾਰਵਾਈ ਸ਼ੁਰੂ ਕੀਤੀ ਹੈ

    

    ਤਸਵੀਰ ਸਰੋਤ, Getty Images

    ਪਾਕਿਸਤਾਨ ਦੇ ਸਰਕਾਰੀ ਟੀਵੀ ਅਤੇ ਫੌਜ ਦੇ ਜਨਸੰਪਰਕ ਵਿਭਾਗ ਨੇ ਕਿਹਾ ਹੈ ਕਿ ਉਨ੍ਹਾਂ ਨੇ ਭਾਰਤ ਵਿਰੁੱਧ ਜਵਾਬੀ ਹਮਲਾ ਸ਼ੁਰੂ ਕਰ ਦਿੱਤਾ ਹੈ।

    ਪਾਕਿਸਤਾਨ ਨੇ ਭਾਰਤ 'ਤੇ ਇਲਜ਼ਾਮ ਲਗਾਇਆ ਸੀ ਕਿ ਭਾਰਤ ਨੇ ਉਸ ਦੇ ਤਿੰਨ ਫੌਜੀ ਹਵਾਈ ਅੱਡਿਆਂ ਨੂੰ ਨਿਸ਼ਾਨਾ ਬਣਾਇਆ ਹੈ।

    ਪਾਕਿਸਤਾਨੀ ਫੌਜ ਦੇ ਜਨਸੰਪਰਕ ਵਿਭਾਗ, ਆਈਐਸਪੀਆਰ ਦੇ ਅਨੁਸਾਰ, ਪਾਕਿਸਤਾਨ ਨੇ ਜਵਾਬੀ ਕਾਰਵਾਈ ਨੂੰ 'ਆਪ੍ਰੇਸ਼ਨ ਬੁਨਯਾਨ ਮਰਸੂਸ' ਦਾ ਨਾਮ ਦਿੱਤਾ ਹੈ।

    ਭਾਰਤ ਨੇ ਪਾਕਿਸਤਾਨ ਦੇ ਇਨ੍ਹਾਂ ਦਾਅਵਿਆਂ 'ਤੇ ਅਜੇ ਤੱਕ ਕੁਝ ਨਹੀਂ ਕਿਹਾ ਹੈ।

12. 10 ਮਈ 2025ਪਾਕਿਸਤਾਨ ਨੇ ਕਿਹਾ, ‘ਭਾਰਤ ਨੇ ਤਿੰਨ ਫੌਜੀ ਅੱਡਿਆਂ 'ਤੇ ਮਿਜ਼ਾਈਲ ਹਮਲਾ ਕੀਤਾ’

    

    ਤਸਵੀਰ ਸਰੋਤ, Getty Images

    ਪਾਕਿਸਤਾਨੀ ਫੌਜ ਦੇ ਬੁਲਾਰੇ ਲੈਫਟੀਨੈਂਟ ਜਨਰਲ ਅਹਿਮਦ ਸ਼ਰੀਫ ਚੌਧਰੀ ਨੇ ਕਿਹਾ ਹੈ ਕਿ ਭਾਰਤ ਨੇ ਉਨ੍ਹਾਂ ਦੇ ਤਿੰਨ ਫੌਜੀ ਅੱਡਿਆਂ 'ਤੇ ਮਿਜ਼ਾਈਲ ਨਾਲ ਹਮਲਾ ਕੀਤਾ ਹੈ।

    ਭਾਰਤ ਨੇ ਅਜੇ ਤੱਕ ਇਸ ਬਾਰੇ ਕੋਈ ਟਿੱਪਣੀ ਨਹੀਂ ਕੀਤੀ ਹੈ।

    ਸਰਕਾਰੀ ਟੈਲੀਵਿਜ਼ਨ 'ਤੇ ਲੈਫਟੀਨੈਂਟ ਜਨਰਲ ਅਹਿਮਦ ਸ਼ਰੀਫ ਚੌਧਰੀ ਨੇ ਕਿਹਾ ਕਿ ਦੇਸ਼ ਦੀਆਂ ਫੌਜਾਂ "ਪੂਰੀ ਤਰ੍ਹਾਂ ਤਿਆਰ" ਹਨ ਅਤੇ ''ਇਸਦਾ ਜਵਾਬ'' ਦੇਣਗੀਆਂ।

    ਪਾਕਿਸਤਾਨ ਨੇ ਜਿਨ੍ਹਾਂ ਟਿਕਾਣਿਆਂ ਨੂੰ ਨਿਸ਼ਾਨਾ ਬਣਾਉਣ ਦਾ ਦਾਅਵਾ ਕੀਤਾ ਹੈ, ਉਨ੍ਹਾਂ ਵਿੱਚੋਂ ਇੱਕ ਰਾਵਲਪਿੰਡੀ ਵਿੱਚ ਨੂਰ ਖਾਨ ਹੈ, ਜਿੱਥੇ ਦੇਸ਼ ਦਾ ਫੌਜੀ ਹੈੱਡਕੁਆਰਟਰ ਹੈ। ਇਹ ਪਾਕਿਸਤਾਨ ਦੀ ਰਾਜਧਾਨੀ ਇਸਲਾਮਾਬਾਦ ਤੋਂ 10 ਕਿਲੋਮੀਟਰ ਦੂਰ ਸਥਿਤ ਹੈ।

    ਪਾਕਿਸਤਾਨ ਫੌਜ ਦੇ ਲੈਫਟੀਨੈਂਟ ਨੇ ਇਸ ਤੋਂ ਪਹਿਲਾਂ ਕਿਹਾ ਸੀ ਕਿ ਪਾਕਿਸਤਾਨ ਦੀ ਹਵਾਈ ਰੱਖਿਆ ਪ੍ਰਣਾਲੀ ਨੇ ਭਾਰਤ ਦੀਆਂ ਜ਼ਿਆਦਾਤਰ ਮਿਜ਼ਾਇਲਾਂ ਬੇਅਸਰ ਕਰ ਦਿੱਤੀਆਂ ਹਨ, ਪਰ ਕੁਝ ਇਸ ਸਿਸਟਮ ਤੋਂ ਪਾਰ ਹੋ ਗਈਆਂ ਹਨ।

13. 10 ਮਈ 2025ਭਾਰਤ ਪਾਕਿਸਤਾਨ ਤਣਾਅ: ਹੁਣ ਤੱਕ ਦਾ ਅਹਿਮ ਘਟਨਾਕ੍ਰਮ

    ਬੀਬੀਸੀ ਪੰਜਾਬੀ ਦੇ ਲਾਈਵ ਪੇਜ 'ਤੇ ਤੁਹਾਡਾ ਸਵਾਗਤ ਹੈ। ਭਾਰਤ-ਪਾਕਿਸਤਾਨ ਤਣਾਅ ਨਾਲ ਜੁੜੀਆਂ ਵੱਡੀਆਂ ਖ਼ਬਰਾਂ ਪੜ੍ਹਨ ਲਈ ਸਾਡੇ ਇਸ ਲਾਈਵ ਪੇਜ ਨਾਲ ਜੁੜੇ ਰਹੋ।

    ਹੁਣ ਤੱਕ ਦਾ ਅਹਿਮ ਘਟਨਾਕ੍ਰਮ:

    • ਪਾਕਿਸਤਾਨ ਨੇ ਕਿਹਾ ਭਾਰਤ ਨੇ ਤਿੰਨ ਹਵਾਈ ਅੱਡਿਆਂ ਉੱਤੇ ਮਿਜ਼ਾਇਲ ਨਾਲ ਹਮਲਾ ਕੀਤਾ ਹੈ।
    • ਪਾਕਿਸਤਾਨੀ ਫੌਜ ਨੇ ਕਿਹਾ ਹੈ ਕਿ ਉਨ੍ਹਾਂ ਨੇ ਭਾਰਤ ਖਿਲਾਫ਼ ਜਵਾਬੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
    • ਪਾਕਿਸਤਾਨ ਨੂੰ ਆਈਐੱਮਐੱਫ ਤੋਂ ਕਰਜ਼ ਮਿਲਿਆ ਹੈ।
    • ਭਾਰਤ ਨੇ 32 ਹਵਾਈ ਅੱਡਿਆਂ ਤੋਂ ਨਾਗਰਿਕ ਉਡਾਣਾਂ 15 ਮਈ ਤੱਕ ਬੰਦ ਕੀਤੀਆਂ ਹਨ।
    • ਅੰਮ੍ਰਿਤਸਰ, ਗੁਰਦਾਸਪੁਰ ਤੇ ਪਠਾਨਕੋਟ ਤੋਂ 10 ਮਈ ਨੂੰ ਤੜਕੇ ਸਵੇਰ ਤੋਂ ਧਮਾਕੇ ਦੀਆਂ ਅਵਾਜ਼ਾਂ ਆ ਰਹੀਆਂ ਹਨ।
    • ਭਾਰਤੀ ਵਿਦੇਸ਼ ਮੰਤਰਾਲੇ ਅਨੁਸਾਰ ਪਾਕਿਸਤਾਨ ਨੇ 300-400 ਡਰੋਨਜ਼ ਨਾਲ ਹਮਲਾ ਕੀਤਾ।