Cape Verde vs Cameroon live update: Indomitable Lions and Stallions qualify from Group A

Cameroon and Burkina Faso don progress to di next round of di 2021 Africa Cup of Nations afta dem draw wit Cape Verde and Ethiopia respectively.

Di Indomitable Lions top di group wit seven points but dem find am hard to break down Cape Verde as di match end 1-1.

Captain Vincent Aboubakar score im fifth goal of di tournament for di first half as im drill shot into di net.

Im goal ensure say di Al Nassr striker score for all three group games for di ongoing tournament.

Substitute Garry Rodrigues draw Cape Verde level for di 53rd minute afta im backheel cutback from Rocha Santos.

For di oda game for di group, Ethiopia score second half penalty to deny Burkin Faso win dia second match of di 2021 Afcon.

Di Stallions bin don take di lead for di 24th minute as Bayala chip di onrushing Ethiopia goalkeeper, Teklemariam Shanko.

But Ethiopia cut short dia celebrations as referee Ahmad Heeralall award di Walia Ibex penalty afta video assistant referee decide say Burkina Faso player handle di ball inside di box.

Getaneh Kebede convert di penalty to equalise for Ethiopia wey finish di group wit one point afta three matches.