Na true say bandits dey Ikorodu, Lekki and oda parts of Lagos? Wetin we know

For di last few days, plenti videos and fotos dey spread round for social media say bandits don enta Lagos State, but say na true?

For some weeks now Nigeria don witness serious security concern, wit di latest from Oyo state school attack and Borno state wia dem kidnap children and teachers.

Different videos come begin fly around for social media from 1 June 2026 reach now, videos wey dia caption claim say bandits don enta Lagos begin circulate.

Some of di videos specifically mention say police gbab some of di bandits for Lekki and Ikorodu.

One video claim say parent don begin run go school to go pick dia children, wen dem hear di tori say bandit don invade dia community dey carry dia pipo.

E start like play, but grow into social conversation wia celebrities even join to post and raise alarm.

One particular video show as pipo gada round some men wey dem make to sidown for ground, while dem dey drop tins comot from dia pocket.

Dem even beat some of di accused pesin wey di pipo catch say dem be suspected bandits - even thoug dem no fit confam am.

But inside dis kasala, wetin be di truth? BBC News Pidgin ask relevant authorities wetin dey go on about di tori of bandits for Lagos.

Dem say no be true.

Wetin authorities tok

"I dey pleased to inform residents say security authorities for both di state and local levels dey fully aware of di situation and dey actively monitor developments. Necessary intelligence and security measures dey implemented to ensure di peace and stability of our communities."

Dis na wetin di chairman of Ibeju Lekki local goment, Abdullahi Sesan Olowa tok wen e dey respond to di different videos wey dey fly round for social media ontop claim say bandits dey operate for Lekki.

Di local goment chairman say dem alreadi dey aware of di situation and dem engage di necessary authorities and make dem no take law into dia hand.

"No individual or group suppose dey subjected to harassment, intimidation, profiling, or any form of unlawful treatment."

Di Lagos State Police Command confam say dem don see some viral social media posts wey dey alleged say bandits wey dey target schools and children dey for Ibeju-Lekki, Imota, Oke-Afo and oda parts of Lagos State.

Di police clear di matter say na lie, e no be true. Di Lagos Police tok tok pesin Abimbola Adebisi say dose wey dey spread di alarm just wan cause fear amog residents.

"Claims contained in di circulating posts na false, misleading, unfounded, and intended to create unnecessary fear, panic, and apprehension among residents."

"No security crisis currently dey, no invasion, or coordinated attack on any school or community in Ibeju-Lekki, Imota, Oke-Afo, or any oda part of Lagos State," di police say.

Sadly, di police say di false alarm lead to di death of one okada rider wey pipo bin label as fulani bandit, and dem attack am.

Police say wen dem label di man as bandit na sake of di fake alarm wey dem believe say armed bandit dey di area.

"Di spread of dis false alarm don already result tragic and avoidable loss of life, of one Kulaha Ayuba, aged 24 years, a commercial motorcycle rider wey some youths of di community wey act on di false and unverified belief say armed bandits don invade di area, allegedly labelled am as Fulani bandit, attack and fatally assault am."

Police say dem catch 15 suspects wey dey involve for spreading di false alarm, and dose wey get hand for wetin happun to di man wey kpai. Dem currently dey under investigation.

As police confam say no trace of bandits for Lagos, dem say anybody wey dem gbab for writing, publishing, or "deliberately circulating false and inciting information capable of causing public alarm, disorder, ethnic tension, or violence go dey investigated and prosecuted in accordance wit applicable laws."

Wetin be di situation for Ikorodu and Lekki

BBC News Pidgin reach di DPO of Lekki wey go di scene of di incident wia e confam say bandits no dey Lekki like some pipo claim for social media.

Officer Rasheed Owoseni wey dey in-charged of Lekki say no space even dey for di area for bandits to hide.

E say di video wey pipo dey spread as bandits no be so, say di individual wey pipo dey label as bandits na ram sellers wey come for sallah period.

"Di video na videos of pipo wey come Lagos to come sell ram during di sallah period. No place dey for dem to hide for here," di officer say.

For Ikorodu, some trending videos show wia parent dey panic run go schools to pick dia pikin sake of di false tori of bandits for di community.

We reach out to officer Oguniyi Babatunde, wey dey incharge of Imota area wia di allege situation happun.

Di officer say tins dey calm for di area, say na pipo wey dey spread rumour dey push di fake news.

"For now, tins dey calm and nothing of such bandit attacks hapun for Imota. Na rumor mongers bin spread di fake news."

E explain wetin happun say pipo gada to beat one aboki wey dey di area ontop allegations say dem find children clothes for im bag.

Oga Babatunde say wen e carry im men go di scene, e find say di matter no be as pipo put am for social media.

E say di man wey dem catch say na one woman for di community give am pikin clothes becos im own pikin no get clothes to wear.

Na di clothes dey di man bag wey pipo see come begin shout dey spread false news say e dey carry pikin.

Police invite di woman wey give am di clothe to also confam.

"Na so some pipo begin dey spread fake news wey make pipo dey run to go carry dia pikin for school."

Oga Caleb Ijioma, director of Roundcheck, organisation wey dey fact-check fake tori, say e don see di videos wey dey circulate about bandits for Lagos, but no be so e be.

E say di videos don create fear for di mind of pipo. Oga Ijioma say some of di videos na old ones wey pipo dey reshare.

"Di problem no be about if dis na true and not, na di mistrust for di security institutions to protect citizens."

"And tdie reason why dis unrelated events continue to spread na becos of fear. Fear say we no get strong security institution, fear sake of how dem see oda states dey battle insecurity."

Who go dey affected by di border measures