More Nigerians dey expected to come back from South Africa on Wednesday

Sixty-five more Nigerians dey expected to come back from South Africa dis Wednesday, according to di Federal Ministry of Foreign Affairs.

Dis dey come just about one week afta anoda 83 pipo bin also come back to Nigeria from South Africa on 18 August.

Di foreign affairs ministry say dis new arrivals dey sponsored by private individuals as di govment-sponsored evacuation process bin don end.

Di Nigerians go comot from Oliver Tambo International Airport for Johannesburg, South Africa by 3.30pm local time, through South African Airways, and dem go touch down for di Murtala Mohammed International Airport for Lagos around 8.45pm Nigerian time.

Di pressure continue to dey mount from anti-immigration protesters for South Africa wey call demsefs di 'March and March' group.

Dem don set anoda deadline of 30 September wen dem tok say evri illegal migrants for South Africa must to pack im load and leave di kontri.

For months now, di March and March group don intensify dia anti-immigration campaign, as dem claim say di govment of South Africa no wan tackle di high rate of immigrants wey dey enta di kontri illegally.

Dem bin first give deadline of June 30 for citizens of African kontris to comot from dia kontri, and true true, more dan 85,000 pipo from Nigeria, Ghana, Malawi, Zimbabwe, Zambia and odas, run comot from South Africa bifor dat date.

Govments arrange emergency flights to comot dia citizens and kontris wey get land border wit South Africa, like Mozambique, Zimbabwe, and Malawi, arrange for buses to carry dia pipo.

Di March and March group claim say na sake of illegal immigration make di kontri economy dey bad, youth unemployment dey increase, and also drug and violent crimes dey on di rise.

Dem claim say dem no get problem wit pipo wey dia immigrant status for South Africa dey legal, but some Nigerian and Ghanaian returnees don tell di BBC say dia status bin dey legal wen dem dey for South Africa, yet di protesters target dem.

Homes and businesses of many African citizens don also dey targeted by protesters wey use di opportunity to loot and destroy pipo livelihoods.

One Nigerian returnee narrate to Nigerians in Diaspora Commission (Nidcom) how dem bin harass and rob her plenty times wit gun wey dem point to her head

Di South African govment say dem don make plenty arrests and dey prosecute pipo wey break di law during di anti-immigration protests, and say dem don warn dia citizens make dem no dey take di law into dia own hands.

Meanwhile, some African govments including Nigeria and Ghana dey demand for compensation from South Africa for many of dia citizens wey lose dia sources of livelihoods during di violence wey follow di anti-immigration protests, and for di many wey gatz abandon dia properties for di kontri as dem run for dia lives.

South Africa govment, on di oda hand, say dem go demand make govments pay dem back di money wey dem spend to deport dia citizens from di kontri. But Nigeria govment say dem neva receive any request like dat.