Hamas say dem don agree to disarm afta Trump announce Board of Peace plan

US President Donald Trump announce say di Board of Peace don reach agreement for di "complete disarmament" of Hamas plus oda armed groups for Gaza.

One senior Hamas official tell BBC say di group don agree to di Board of Peace plan to completely disarm for Gaza, and say dem go release official statement soon.

Israel neva comment.

Di board, wey Trump create and lead tok for statement say di agreement end months of "intensive, good faith negotiations", and say dia focus now na on implementation.

Dis na part of di second phase of one US-brokered Gaza ceasefire plan wey include di disarmament of Hamas, di withdrawal of Israeli troops plus di reconstruction of Gaza.

Wetin dey inside di Board of Peace Plan

Di US president say Israel go withdraw from Gaza "as disarmament don complete" and e call di agreement "one critical step as Gaza go finally dey governed by a new Palestinian govment".

"Di International Stabilization Force go work wit new Palestinian police force to take responsibility for Gaza to dey safe for dia residents and dia neighbours," e tok for one post on Truth Social.

Trump say di agreement mark "major milestone for di implementation of di Trump 20-Point Plan", and e thank di mediators Egypt, Qatar and Turkey.

Di plan, wey dem unveil for September last year, include di creation of di Board of Peace to oversee di agreement implementation and "handle di funding for di redevelopment of Gaza".

Founding members of di board, aside from di US, include Pakistan, Saudi Arabia, Turkey and di United Arab Emirates.

UK, France and China dey among some of di countries wey no join di group wen e start as some cite concerns wey relate to international law and di UN.

Although e start as part of Trump Gaza peace plan, believe dey say di board don widen dia scope, as dia website describe di organisation as a more general, "international peace-building body".

For di plan, Hamas go provide go items and store dia remaining heavy weapons under Palestinian supervision.

Palestinian officials wey dey involved for di tok-tok believe say di new leadership dey prepared to take wetin dem describe as di most consequential political decision for Hamas history, wey dey driven by di devastating humanitarian conditions wey dey face more dan two million Palestinians for Gaza.

For one call wit tori pipo, one US official say US dey hopeful say Israel go agree to withdraw from Gaza once Hamas don disarm, "We no dey ask Israel to do anytin oda dan agree to di 20-point plan wey dem agree to, initially. And so we dey very confident say dem go adhere to am."

If Israel decide say dem no go withdraw, Trump go dey "very disappointed", di official tok.

Initially, Israel bin agree to di plan, but dem dey highly sceptical of Hamas willingness to disarm.

BBC don see di agreement, wey provide for di inventorying and storage of Hamas remaining heavy weapons under Palestinian supervision. Dis potentially remove di most significant obstacle to advancing di Trump-backed peace initiative for Gaza.

US officials say dem go disarm di smaller groups for Gaza first, bifor Hamas begin dismantle wetin dem describe as dia state-like military infrastructure of tunnels, weapons depots and production facilities - one process dem agree say go take long time to do.

Di officials say dem deliberately build di plan on "zero trust" and dem no verify wit either Hamas or Israel on moving to di next phase until di oda don fulfil dia commitments.

One senior Hamas official and member of di movement negotiating team tell BBC say di toks bin dey "long and extremely difficult", as Hamas insist on di wording "inventorying and storing weapons" under Palestinian oversight instead of make dem hand am ova to Israel.

E still dey too early to judge weda di agreement go dey fully implemented or weda all parties go honour dia commitments.

But if e hold, e go mark di first credible step towards ending a war wey don last for early three years and e go open di way for a broader political process.

For Gaza, di announcement dey met wit little public enthusiasm.

Many Palestinians don grow deeply sceptical of political breakthroughs, as previous agreements don repeatedly break down even bifor implementation.

According to Gaza Hamas-run health ministry, Israeli attacks don kill at least 1,168 Palestinians since one ceasefire between Israel and Hamas take effect last October.

Four Israeli sojas don die inside Palestinian attacks for Gaza ova di same period.

Cairo dey set to host one meeting "soon" of di Gaza truce mediators, wey also include di United States, Qatar and Turkey, state-linked Al-Qahera News report early Friday.

Earlier for di day, unnamed sources wey follow Reuters tok report say talks between di mediators and Hamas leaders for Cairo on implementing di US-brokered Gaza peace plan don make rare progress, but one Israeli official say di proposed terms no dey satisfactory.