Tears as Nigerian actor Ogogo make final journey home afta e battle wit cancer
Wia dis foto come from, BBC, @ogogotaiwohassan/Instagram
Nigerian actor Taiwo Hassan wey many pipo sabi as Ogogo don make im final journey home on Monday, 24 August afta im death on Sunday, 23 August at di age of 66.
Dem bury Ogogo for im hometown of Ilaro, Ogun State, southwest Nigeria. Special prayers bin take place for di Pavilion during di burial as family, friends and colleagues pay dia last respects to di actor.
Ogogo die afta im battle wit cancer days afta im family come out to seek assistance on wia dem fit treat am.
Im colleague Jide Kosoko bin announce di death on im Instagram page afta Ogogo daughter bin break down in tears for one live wia she tok say her papa don die.
"Wit heavy hearts and profound sadness, we announce di passing of ALHAJI TAIWO HASSAN, popularly known as OGOGO, wey pass away at 3:00 p.m. today Sunday, 23rd August 2026. At 66 years," Jide Kosoko write for im Instagram page.
For di burial, Ogogo best friend and fellow actor Yinka Quadri break down in tears and pipo begin console am.
Dem bin bring in Ogogo corpse bifor di mourners inside one coffin wey dem use white cloth cova.
Mourners carry im coffin around street for some kilometres bifor dem reach di burial location.
During di burial, dem comot im bodi from di coffin, wrap am wit white cloth and lay am to rest inside grave. Dem use fresh plantain leaves to cova am bifor dem pour sand to cova di grave.
Afta Ogogo family bin come out to seek assistance on wia dem fit treat di ogbonge actor, Nollywood stars and feem makers for di Yoruba movie industry bin gada on Friday, 21 August, to offer special prayers for dia colleague.
One video wey ogbonge actor Yinka Quadri and Ogogo best friend post wey don bin viral, show as plenty prominent Nollywood personalities gada to pray for im recovery.
"Feem makers come togeda in heartfelt prayers for veteran Actor Alhaji Taiwo Hassan Ogogo, to seek Allah mercy, divine intervention, and complete healing and recovery for am", Yinka Quadri write for di post on Instagram.
Dis article contain content wey Instagram provide. We ask for una permission before anytin dey loaded, as dem fit dey use cookies and oda technologies. You fit wan read di Instagram cookie policy and privacy policy before accepting. To view dis content choose 'accept and continue'.
End of Instagram post
Fotos from di burial
Who be Taiwo Hassan?
Wia dis foto come from, @ogogotaiwohassan/Instagram
Taiwo Hassan na Nollywood actor, wey dey popular for im multiple roles for di Yoruba feems.
Im don dey act for veri long time and na face wey pipo wey dey watch feem well-well fit recognise.
Ogogo, wey also dey known for im beautiful voice wen e dey chant, die at di age of 66.
E come from di family of twins. Im forefather na Taiwo, di one wey follow am na Taiwo, im papa na Taiwo and im mama give birth to twins four times.
Ogogo na di last of im parents twins wey kpai. Im parents born thirteen pikin dem wey remain three bifor im death.
Ogogo na trained boxer wey no dey hide im boxing skills.
Di actor bin battle chronic ulcer for six to seven years wey bin nearly take im life.
Im best friend na Yinka Quadri – e say no friend wey im don eva love like dis fellow actor.
'Na all of us go chop breakfast' na famous Ogogo line for one Yoruba movie wey become street slang.
Tori be say im acting career bin pass forty years and im bin act ova 300 feems for Yoruba. One of di ogbonge feems wey im act and wey blow well-well na Owo Blow wey dem release for 1996 and directed by Tade Ogidan.
Pipo also sabi Ogogo as pesin wey get action inside feems wit di way e dey act, im aura and how e dey carry imsef. Na dis im action create di Yoruba street slang, 'Action Po bi Ogogo,' wey mean 'Action Plenty like Ogogo'.
