۱۷ کلن پیلوټ په یوازې سر د نړۍ له یوه سره تر بله په بریالیتوب سره هوايي سفر وکړ

یوه ځوان پیلوټ په نړۍ کې تر ټولو کم عمره کس شو چې په یوه کوچنۍ الوتکه کې یې د نړۍ له یوه سره تر بله په یوازې سر سفر وکړ. مک رادرفورډ په پنځه میاشتو کې یوه کوچنۍ الوتکه د نړۍ ۵۲ هېوادونو ته ورسوله او بالاخره یې د بلغاریا په سوفیا هوايي ډګر کې کېنوله.

مک چې مور، پلار یې بریتانویان دي، خو دی په بلجیم کې لوی شوی دی. ده د خپل هوايي سفر لړ کې له هغه وروسته یوه شپه د ارام سمندر په یوه غیر اباد ټاپو کې تېره کړې چې الوتکه یې له شګلن توپان سره مخامخ شوه.

له دې مخکې بریتانوي پیلوټ ټراویس لوډلو د یوازې الوت ریکارډ درلود، چې پروسږ کال د یې د ۱۸ کالو او ۱۵۰ ورځو په عمر خپل سفر بشپړ کړ.

په بریالیتوب سره د خپل سفر له بشپړولو وروسته مک نور هم وهڅول چې ''خپل عمر ته له کتو پرته خپل ارمان پوره کړئ. سخت زیار وکړئ او خپل هدف ته د رسېدو لپاره مخکې لاړ شئ. ''

د مک مشرې خور زارا د سږ کال په جنورۍ کې د تر ټولو کم عمره ښځې په حیث د نړۍ له یوه سره تر بله الوت بشپړ کړی دی.

نوموړی د خپل سفر په اوږدو کې له اسیا، اروپا، امریکا او دوو سمندرونو تېر شو. مک چې د هوابازانو د یوې کورنۍ اړوند دی، د مارچ میاشتې پر ۲۳ مه خپل سفر پیل کړی و، او په دې سفر کې یې د دبۍ سخته ګرمي ګاللې او په هند کې بیا د هوايي ډګرونو له ناڅاپي تړل کېدو سره مخامخ شوی.

خور یې زارا وايي، ورور یې له مور، پلار او دې سره هره ورځ اړیکه نیوله او په وینا یې: ''ما د لارو او الوتنې په هکله داسې مشورې ورکولې چې ګټه ورته وکړي. ''

مک مخکې ویلي و له درې کلنۍ یې ارمان درلود چې پیلوټ شي او په ۲۰۲۰ کال کې یې هغه مهال ارمان پوره شو، چې په ۱۵ کلنۍ کې یې د الوتکې الوځولو جواز ترلاسه کړ.

د مک پلار سام رادرفورډ د فیري یا هغې الوتکې مسلکي پیلوټ دی، چې د کښتۍ په توګه هم کار کوي او مور یې بیاتریک شخصي پیلوټه ده.