پاکستان کې نوی حکومت؛ هر ګوند پکې مهمې څوکۍ غواړي

د پاکستان نوي لومړي وزیر شهباز شریف لا هم خپله کابینه نه ده اعلان کړې او ځينې سرچینې یې لامل د ایتلافي ګوندونو تر منځ د څوکیو پر وېش نه جوړېدل بولي.

د لومړي وزیر شهباز شریف په مشرۍ دا حکومت چې له نهه ګوندونو جوړ دی، د سرچینو په خبره هر یو ګوند په کابینه کې مهمې او زیاتې څوکۍ غواړي او په همدې نه سره جوړېږي.

بل پلو د حکومت د یوه لوی ګوند جمعیت علماء اسلام "ف" ډلې مشر مولانا فضل الرحمان پر خپل حکومت غږ کړی، چې باید ژر تر ژره د ټاکنو نېټه اعلان کړي.

د پاکستان په ملي اسمبلۍ کې په تېره دوشنبه میا شهباز شریف ددغه هېواد ۲۳ لومړی وزیر وټاکل شو. نن (دوشنبه) يې اوونۍ پوره شوه، خو لا يې هم د خپلې کابینې د غړیو اعلان نه دی کړی.

سره له دې چې په پاکستان کې رسنیو د وزارتونو لپاره د ځینو سیاستوالو نومونه خپاره کړي، خو تر اوسه يې لاهم اعلان نشته. د لومړي وزیر شهباز شریف د حکومت ملګری او مذهبپال سیاستوال مولانا فضل الرحمان وايي، د ده ګوند لاهم په دې نظر دی، چې باید ژر د ټاکنو اعلان وشي.

"دا اوس چې کوم حکومت جوړ شوی دی، دا به تر یوه کال پورې وي. خو په دې حکومت کې هم د جمعیت علماء اسلام خپل موقف دی او هغه دا دی چې موږ اوس هم ژر تر ژره ټول ټاکنې غواړو."

مولانا فضل الرحمان په خپلو خبرو کې ټینګار کړی چې د دو ی غورځنګ مخکینی لومړی وزیر عمران خان له واکه لرې کړ، خو د نوموړي په ټکو "موږ به قام ته هغه امانت ورکوو."

مخکیني لومړي وزیر عمران خان هم د پېښور او کراچۍ په جلسو کې د ټاکنو د ژر کېدو غوښتنه کړې.

په دغه هېواد کې له اساسي قانون سره سم هر پنځه کاله وروسته باید ټول ټاکنې وشي. خو د پاکستان په تاریخ کې هېڅ لومړي وزیر خپله پنځه کلنه دوره نه ده پشپړه کړې.

بلې خوا لومړي وزیر شهباز شریف د هند لومړي وزیر نریندرا مودي ته لیک استولی او د کشمیر کشالې د اوارېدو خبره یې ورته کړې. په لیک کې ښاغلي شریف د دغې ستونزې اوارېدل د اسلام اباد او ډیلي په ګټه بللي.