تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
زارا محمد؛ د بریتانیا اسلامي شورا لومړنۍ مشره
په بریتانیا کې زارا محمد د اسلامي شورا مشره ټاکل شوې. دا لومړی ځل دی چې یوه ښځه ددغې شورا په تاریخ کې د مشرتابه تر کچې رسېږي.
په بریتانیا کې اسلامي شورا یو لوی بنسټ ګڼل کېږي.
زارا محمد تر بریالیتوب وروسته وویل: "لوی ویاړ دی چې د شورا نوې منشۍ ټاکل شوې یم."
تر ۲۹ کلنې زارا مخکې هارون خان د دې شورا منشي و، چې څلور کاله یې دا دنده لرله.
زارا هیله منه ده چې د سکاټلنډ له ګلاسکو ښاره به ډېری ښځې د ژوند په بېلابېلو برخو کې د مشرتابه لپاره د پرمختګ الهام ترلاسه کړي.
دا وايي: "باوري یم چې ځینې وخت وړ ښځې د مشرتابه رول لوبولو په اړه زړه نازړه وي".
نوموړې زیاتوي: "د لانورو ښځو او ځوانانو ګډون مهم دی".
د لندن ښاروال صادق خان پر ټویټر لیکلي: "د ځوانې زارا ګومارنه په زړه پورې کار دی".
دی زیاتوي: "زارا محمد ته پوره بریا او توفیق غواړم چې د بنسټ په مشرتابه کې خپلې مشرۍ ته دوام ورکړي او د هېواد په لر وبر کې زموږ د سیمه ییزو ټولنو د ښېرازۍ او پرمختګ لامل وګرځي".
زارا قانون لوستی او د بشر حقونو اړوندو قوانینو کې ماسټري لري. مخکې د زدکوونکو د پرمختګ او روزنې برخه کې سلاکاره هم پاتې شوې ده.
په ۲۰۱۶ کال د اسلامي ټولنو د زدکوونکو د اتحادیې مشره هم وه.
تر وروستۍ ګومارنې مخکې زارا د بریتانیا د اسلامي شورا د لوی مشر مرستیاله وه.
د (مسلمان ځوانان نړۍ بدلوي) کتاب لیکواله شیلینا جان محمد وايي، د زارا ګومارنه "په سیمه ییزو مسلمانو ټولنو، په تېره بیا ټوله بریتانیا کې هڅوونکې شېبه ده. دا یوه تاریخي شېبه ده".