تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د پوتین سیاسي مخالف الېکسي نوالني په ۳۰ ورځې بند محکوم شو
د روسيې ولسمشر ولادیمیر پوتین سياسي مخالفینو يا اپوزېسيون تر ټولو مشهور کس الېکسي نوالني چې تېر کال په زهرو مسموم شوی و په مسکو کې نيول شوی او د ۳۰ ورځو لپاره د بند سزا ورکړل شوې ده.
الېکس ناوالني په زهرو له مسموېدو وروسته په لومړي ځل د يکشنبې پر ورځ له جرمني مسکو ته له رسېدو سره سم نيول شوی و.
روسي څارنوالان وايي، نوموړي د مشروطې ازادۍ له شرطونو سرغړونه کړې چې په وينا يې سياسي انګېزه لري.
ناوالني تېر کال اګست مياشت کې له مسمومېدو وروسته نژدې مړ شوی و چې پړه يې پر کرملين وراچول کېده، خو مسکو په دې پېښه کې لاس لرل رد کړي و.
د دوشنبې پر ورځ د محکمې پرېکړه د مسکو په يوه پوليس مرکز کې واورول شوه.
قاضي د مشروطې ازادۍ له شرايطو د سرغړونې له امله د فبرورۍ تر ۱۵ د ناوالني د توقيف امر وکړ.
د جنورۍ پر ۲۹ به د نوموړي په اړه يو ځل بيا محکمه دايره شي چې د نوموړي ځنډول شوې درې نيم کلنې سزا په اړه له سره پرېکړه وکړي.
ښاغلي ناوالني له ده سره چلند پر عدالت د ملنډو وهل بللي او د محکمې دغه اورونه يې په لوړه کچه ناقانوني بللې ده.
د نړۍ مشرانو د نوموړي نيول رد کړي او له بنده د ژر خوشي کېدو غوښتنه يې کړې ده.
د امريکا د بهرنيو چارو وزير مايک پومپيو د ناوالني د خوشي کېدو غوښتنه کړې ده او دا کار يې د روسيې له خوا د ناوالني او نورو هغو کسانو د غږونو غلي کول بللي چې د روسيې پر اوسني حکومت نيوکه کوي.
د بريتانيا حکومت هم په يوه خبرپاڼه کې د ښاغلي ناوالني پر نيول کېدو ژوره اندېښنه څرګنده کړې ده او د نوموړي د خوشي کولو غوښتنه يې کړه ده.