کورونا وېروس: ملګري ملتونه وايي وبا ماشومان له واکسینو بې برخې کړي

ملګري ملتونه وايي، نژدې ۳۰ کاله وروسته د نړۍ په لر او بر کې ډېر ماشومانو له ناروغیو د خوندیتوب واکسینو ته لاسرسی نه لري. د ملګرو ملتونو مسوولینو په وینا تېرو څلورو میاشتو موده کې د هغو ماشومانو شمېر کې څرګند لږوالی لیدل شوی، چې د ګوزڼ، شري او سکاروي په څېر ناروغیو د خوندیتوب لپاره واکسین ورکول کېږي.

د ملګرو ملتونو مشرتابه په خبره د دې ناروغیو پرتله د کورونا وېروس له کبله ماشومان له لږ خطر سره مخامخ دي. د دغې ادارې په خبره واکسین د بشر په تاریخ کې له ناروغیو د خوندیتوب تر ټولو غوره وسیله ده. د یادونې ده، چې د افغانستان په ګاونډي هېواد پاکستان کې پرون حکومت اعلان وکړ چې په روغتونونو کې ماشومانو ته د واکسین ورکولو لړۍ پیلوي،

خو د کورونا وېروس له کبله په دغه هېواد کې د ګوزڼ مخنیوي واکسین کور په کور لړۍ اغېزمنه شوې او رپوټونه ښيي چې له ۱۰۰ ډېر ماشومان د ګوزڼ ښکار شوي دي.

لسګونه ایراني روغتیاپالانو ژوند له لاسه ورکړی

ایراني چارواکي وايي، د کوویډ - ۱۹ له پیله تر اوسه په دغه هېواد کې د وېروس له کبله ۱۴۰ روغتیا پالانو ژوند له لاسه ورکړی. د ایران روغتیا وزارت یوه چارواکې سیما سادات لاري وايي: پر موږ ټولو د دوی احسان دی او د دې لپاره چې درناوی یې وکړو، باید روغتیايي لارښوونې پلي کړو.

د اپریل میاشتې له نیمايي راهیسې چې دغه هېواد کې قرنطین بندیزونه نرم شول، د نویو ناروغانو شمېر کې په چټکې سره ډېروالی راغلی. ایران کې تر اوسه د کوویډ - ۱۹ ناروغۍ اخته ۲۶۴۵۶۱ کسانو نومونه ثبت شوي دي او ۱۳۴۱۰ ایرانیان د همدې ناروغۍ له کبله مړه شوي دي.

روغتیايي چارواکي وايي د ناروغانو شمېر ډېرېدو یو لامل د معایناتو ډېرېدل دي او په وینا یې خلک د خوندیتوب لارښوونې نه عملي کوي.

کورونا او فېشن

ساینسپوهان وايي، ښايي کورونا تر ډېره وخته پورې د انسانانو لپاره ستونزې جوړې کړې او په داسې وضعیت کې به ټولنیز واټن او احتیاطي تدبیرونه د ژوند یوه مهمه برخه وي. له همدې کبله په ټوله نړۍ کې د مراسمو لمانځلو، مېلمستیاوو او جشنونو، مېلو بڼه هم بدله ښکاري.

دې وضعیت ته په کتو سره تکنالوژي شرکتونه او ډیزاینران یا موډ او فېشن طراحان له وېروسه د خوندیتوب چارې ته په کتو سره کالي، ماسکونه او نور فېشن لوازمات ډیزاین کوي.

د امریکا جوډوسې نومي ډیزاینر د راتلونکي لپاره دغه ماسک ډیزاین کړی، چې نه یوازې ټول مخ پټوي، بلکې فېشني هم ښکاري. د لندن پلاستکې فنټاسټک بیا له کورونا د خوندیتوب لپاره (ای سفیر) نوی پوښ چمتو کړی، چې د سټاروارز کرکټرونو یا فضايي مخلوق خولیو ته ورته ښکاري.