د امریکا د مرستیال ولسمشر سلاکاره په کورونا وېروس اخته شوې

د امریکا مرستیال ولسمشر مایک پینس یوه لوړ پوړې سلاکاره پر کورونا وېروس اخته شوې. له دې یوه ورځ مخکې د سپینې ماڼۍ د یوه بل کارکوونکي په بدن کې هم دغه ناروغي تشخیص شوې وه.

د ښاغلي پینس مطبوعاتي سکرتره کاتي میلر د جمعې پر ورځ په کوویډ - ۱۹ اخته ثابته شوه.

سپینې ماڼۍ ویلي، د ولسمشر ډونلډ ټرمپ او مرستیال ولسمشر مایک پینس به هره ورځ معاینات کېږي او په وینا یې ''د ولسمشر ژغورنې لپاره به هر ممکن احتیاط وشي. ''

کورونا وېروس: هره ورځ به د ولسمشر ټرمپ طبي معاینه کېږي

کورونا وېروس؛ امریکا ۳ تریلیون ډالره پور اخلي

په امریکا کې اوس د کوویډ -۱۹ ناروغۍ له کبله د مړو شویو کسانو ټولټال شمېر ۷۶۰۰۰ کسانو ته رسېدلی، خو بل لور ته یو شمېر ایالتونو د قرنطین محدودیتونو نرمول پیل کړي دي.

د ښاغلي پینس ځانګړې الوتکه ایرفورس - ۲ د جمعې پر ورځ هغه مهال ناڅاپه له واشنګټنه بهر پر ځغاستلیکه تر یوه ساعت ډېره ودرول شوه او د د دفتر شپږ کسان یې ترې کوز کړل شول، چې ښاغلی پینس له مذهبي مشرانو سره د لیدنې لپاره لووا ته روانېده.

د سپینې ماڼۍ د یوه چارواکي له قوله چې نوم یې نه دی یاد شوی ویل شوي، د ښاغلي پینس د دفتر دغه شپږ کارکوونکي مېرمن میلر ته نژدې پاتې شوي دي، خو ولسمشر یا مرستیال ته یې نه دي نژدې شوي.

مېرمن میلر د ولسمشر ټرمپ د سلاکار سټېفن میلر مېرمن ده.

ولسمشر ټرمپ په سپینه ماڼۍ کې له جمهوريپالو سره د خبرو پر مهال خبریالانو ته د مېرمن کیتي ستاینه وکړه، چې په وینا یې پرلپسې یې معاینات کول، خو په وینا یې 'بیا ناڅاپه یې نن پایله مثبته راوخته. '

په سپینه ماڼۍ کې د دغې ناروغۍ خپرېدو په تړاو یوې پوښتنې ته ځواب کې ولسمشر ټرمپ وویل:

''څه چې مو له وسه پورې وي، تر هغه حده باید ټول احتیاطي تدبیرونه وشي. ''

نوموړي دغه راز وویل، د دویمې نړیوالې جګړې د سوبې ورځې یادګاري مراسیمو کې یې ځکه ماسک نه و کاروولی، چې په وینا یې هلته سپین ږیري رضاکار له ده 'کافي لېرې ولاړ وو. '