جرمني: یوه سړي د خپلې کورنۍ شپږ کسان په ډزو وژلي

د جرمني په سویل لوېدیځ ښارګوټي روت امسي کې پولیس وايي، یوه سړي د مور، پلار په ګډون د کورنۍ شپږ کسان په ډزو وژلي دي.

دغه ۲۶ کلن سړي په خپله پولیسو ته د غرمنۍ پر مهال ټیلیفون کې ویلي و، چې په یوه رستورانت کې یې یو شمېر کسان په ډزو وژلي.

پولیسو دغه سړی چې د ټوپک جواز یې درلود، د ودانۍ بهر ولاړ وموند او نیولی یې دی. په رستورانت کې دننه د دریو نارینه وو او دریو ښځو مړي موندل شوي دي.

د ځايي پولیسو په خبره د وژل شویو کسانو عمرونه د ۳۶ او ۶۹ کلونو تر منځ وو.

په پېښه کې د دغې کورنۍ دوه نور خپلوان ټپیان شوي دي، چې یو یې سخت ټپي دی. پولیسو وايي، نیول شوي سړي د کورنۍ دوو نورو زلمیانو ته هم ګواښونه کړي وو، خو هغوی ته یې کوم زیان نه دی رسولی.

داسې باور کېږي، چې پېښه په کورنۍ شخړې پورې تړاو لري.

پولیس وايي، هڅه کوي د پېښې انګېزه معلومه کړي. دوی زیاتوي، داسې کوم ثبوت نه شته، چې وښيي په دې پېښه کې نور څوک هم ښکېل دي.

پولیسو د پېښې سیمه محاصره کړې او کارپوهان د اړوندو ثبوتونو په راټولولو بوخت دي.

د ځايي رسنیو په رپوټونو کې ویل شوي، پېښه له ځايي وخت سره سم پاو کم یوه بجه شوې ده او خورا زیات شمېر پولیس د پېښې په ځای کې لیدل شوي دي.

روت امسي یو کوچنی ښارګوټی دی، چې نژدې پنځه زره کسان پکې اوسي. بل لور ته د ځايي رسنیو په رپوټونو کې ویل شوي دي، مشکوک کس نژدې ۳۰ کلن معلومېږي.