زرګونه اوښان په ډزو وژل کېږي

په سویلي اسټرالیا کې چارواکي وايي، د سختې وچکالۍ او ګرمې هوا له کبله به زرګونه اوښان له چورلکو په ډزو ووژني.

له هغه وروسته چې ځايي اوسېدونکو شکایت کړی، د اوښانو لویې پادې کلیو او ښارونو کې ودانیو ته زیان رسوي، د چهارشنبې له ورځې د دغو حیواناتو پنځه ورځنۍ وژنه پیل شوې ده.

په کانیپي سیمه کې یوه ځايي اوسېدونکې ماریتا بارکر وايي:

''دوی په لارو، کوڅو کې په اوبو پسې لالهاند ګرځي او له کبله یې موږ سره د ماشومانو د خوندیتوب اندېښنه ده. ''

چارواکي وايي، یو شمېر وحشي اسان به هم ووژني.

سعودي کې له 'اوښ' لېږدېدلې ناروغۍ انسان وژلی

غان؛ استرالیا کې د افغانانو یاد

هغه کسان چې دغه اوښان به وژني د اسټرالیا د چاپېریال ساتنې ادارې اړوند دي. د سیمې یوه چارواکي ریچارډ کنګ په یوه اعلامیه کې ویلي:

''اوښان په اوبو پسې ګرځي او له دې کبله د سیمې اوسېدونکي او د دوی ساتلي حیوانات له سختو ستونزو سره لاس او ګرېوان دي. ''

له تېرو څو میاشتو راهیسې په اسټرالیا کې د سختې ګرمۍ له کبله ونو، بوټو کې اورونه لګېدلي دي، خو له تېرو څلورو کلونو راهیسې دغه هېواد وچکالۍ هم ځپلی.

اوښان په اسټرالیا کې نه پیدا کېږي، بلکې دغه هېواد ته په ۱۹ زېږدیزه پېړۍ کې انګریزانو له افغانستان، هند او منځني ختیځه راوستي وو.

اوس د اټکل له مخې ویل کېږي، چې د هېواد منځنۍ برخه کې یې شمېر سلګونو زرو ته رسېږي.

دغه سارايي اوښان نه یوازې هغه اوبه څښي چې د سیمې خلک ورته اړتیا لري، بلکې کروندو او نورو تجهیزاتو ته هم زیانونه اړوي.

دوی دغه راز میتان نومي ګاز هم خپروي چې د اقلیمي بدلون له لاملونو یو دی.