د لومړي ځل لپاره افغانستان د سکي نړیوالو سیالیو ته لار وموندله

دا سیالۍ د روانې فبرورۍ پر ۱۶مه د سویس په سینټ مورټس ښار کې د نړۍ د څه باندې ۶۰ هېوادونو د لوبغاړو ترمنځ پیلېږي.

په دې سیالیو کې د سکي دوه افغان لوبغاړي سجاد حسیني او علي شاه د افغانستان په استازیتوب لوبېږي.

ښاغلي حسیني له سویسه د ټیلېفون پر کرښه بي بي سي ته وویل، له تېرو درو کلونو راهیسې یې په دې سیالیو کې د ګډون لپاره تمرینونه کول:

"له دې مخکې مې څلور سیالۍ کړې او دغو سیالیو لار راته برابره کړه چې په نړیوالو سیالیو کې ګډون وکړم".

* انځورونه: په افغانستان کې د واورې رگبي

* د بامیان په هسکو غرونو کې بهرنیان سکي لوبه کوي

د هغه په اند، دا هم د افغان لوبغاړو لپاره لویه خبره ده، چې له اروپايي هېوادونو سره سکي لوبه کوي.

خو زیاته یې کړه، چې له سیمه ییزو هېوادونو، لکه ایران، تاجکستان، قرغزستان او نورو سره سیالي کولی شي.

په وروستیو کلونو کې په افغانستان کې سکي لوبه ډېره شوې او اوسنۍ واورې بیا د دې لوبې مینوال هڅولي چې دا لوبه وکړي.