د اسرائیلو دفاع وزارت تائید کړې چې ایران پر اسرائیلو ډرون ور توغولې دي. پر اسرائیل د ایران یو شمېر توغول شوې بېپیلوټه الوتکې مو غورځولې. د ایران د بهرنیو چارو وزیر وايي، پر اسرائیلو د تېرې شپې له برید څخه ۷۲ ساعته مخکې ګاونډیان او د سیمې هېوادونه خبر کړل شوي وو. اسرائیلو ویلي، د ایران له ۳۰۰ توغول شویو ډرون او توغندیو یې کابو ټول شنډ کړي، خو لا هم د خبرداري کچه لوړه ده.
د اسرائیلو پوځ وايي دوی د ایران لخوا توغول شوي "ډېری" توغندي او ډرونونه شنډ او له منځه وړي دي.
په يوه تازه بيان کې اسرائيلو ويلي د خپلو متحدينو سره په ګډه مرسته يې ډېر توغندي مخکې دې چې د اسرائیلو خاورې ته داخل شي شنډ کړي دي.
په بيان کې راغلي لږ شمېر توغندي د اسرائيلو په جنوب کې لګېدلي چې د پام وړ زيان يې نه دی اړولی دی.
د عکس سرچینه، EPA
د اروپايي ټولنې د بهرنۍ پالیسۍ مشر جوزېف بورېل د ایران برید د سیمې ثبات ته جدي ګواښ بللی او فرانسې هم د ایران بریدونه غندلي او خبرداری یې ورکړی چې د ایران اقدامات د بې ثباتۍ نوو کچو ته رسېدلي.
د بريتانیا د دفاع وزیر ګرانټ شپس په یوه اعلامیه کې ویلي چې پر اسرائیلو د ایران بریدونه په سختو ټکو غندي او دا به بله ګټه ونه لري بلکې یوازې به د سیمې امنیت خراب کړي.
پر اسرائیلو د ایران له هوايي برید وروسته، د ملګرو ملتونو سرمنشي انتونیو ګوتېرېش په یوه بیان کې د "سیمه ییز ویجاړونکي کړکېچ د خپرېدو د اصلي خطر" په اړه خبرداری ورکړ.
په یوه بیان کې ښاغلي ګوتېرېش پر اسرائیلو د ایران پراخ هوايي برید په کلکه غندلی او د کړکېچ د سملاسي بندېدو غوښتنه یې وکړه او له دواړو غاړو يې وغوښتل چې د لوړې کچې له زغمه کار واخلي.
د ملګرو ملتونو سرمنشي ټینګار کړی چې هغه په وار وار ویلي چې "نړۍ بله جګړه نشي زغملی."
د عکس سرچینه، EPA
د اسرائیلو د پوځ ویاند دانیل هاګاري په یوه بیان کې ویلي، له ایرانه پر اسرائیلو شاوخوا ۲۰۰ډرون، کروز توغندي او بالستیک توغندي توغول شوي دي.
د نوموړي په وینا، د اسرائیلو او د هغې د متحدینو دفاعي سیسټم د توغندیو او ډرونونو "لوی شمېر" له منځه وړي دي.
د دغه اسراييلي چارواکي په وينا، ډېری دغه راکټونه "د اسرائيلو له خاورې بهر" شنډ کړي دي.
د اسرائیلو د پوځ ویاند زیاته کړې چې د دغه هېواد په جنوب کې لږ تر لږه یو ځای په نښه شوی، خو دغه "پوځي مرکز" ته کوم "جدي" زیان نه دی رسېدلی.
هغه دا هم وویل چې د دې بریدونو په پایله کې یوه کوچنۍ نجلۍ "لږ" ټپي شوې ده.
نوموړي په دې اړه نور جزئيات ورنه کړل، خو تر دې مخکې د اسراييلو بېړنيو خدمتونو ويلي وو، چې دوى د يوې لس کلنې نجلۍ درملنه کوي، چې د مرميو له امله ټپي شوې وه.
د اسراییلو ای ۲۴ تلویزیون د دغه هېواد په نقب دښته کې چاودنه شوې ده.
يادې رسنۍ ویلي، چاودنه د اسرائیلو په جنوب کې شوې او په ترڅ کې يې"۱۱ کلنه ماشومه ټپي شوې".
دغه ټلویزیوني چینل ویلي، چاودنه د "ایران د برید" له امله شوې ده.
د ايران اسلامي انقلابي ګارډ څو ساعته مخکې د اسرائیلو پر اهدافو پراخ ډرون او توغنديز بریدونه کړي وو.
د امریکا ولسمشر جو بایډن ته د هغه د ملي امنیت سلاکارانو د حالت په اړه معلومات ورکړل. هغه پر اېکس په یوه ټویټ کې ليکلي: "د ایران او د هغو د نیابتي ډلو لخوا د اسرائیل امنیت ته د ګواښونو پر ضد زموږ تعهد کلک دی".
د عکس سرچینه، X/@POTUS
د بیت المقدس په وخت د شپې په ۱:۴۵ دقیقې د خطر زنګونه فعال شوي. په لوړ غږ چاودنې هم اورېدل شوې او هوايي دفاعي سیستم هم پر اسمان ځینې څیزونه په نښه کوي.
وړاندې ځینو امریکايي سرچینو ویلي وو چې د ایران له خوا ځینې توغول شوي ډرون یې په هوا کې غورځولي دي. د ایران دولتي خبري اژانس ایرنا بیا ځینې داسې وېډیوګانې خپرې کړي چې ادعا کوي په بیت المقدس کې ځینې هدفونه وېشتل شوي دي.
د ايران دولتي خبري اژانس ايرنا د ايران د يو شمېر ډرونونو انځور خپور کړی چې وايي د سپاه پاسداران له لوري توغول شوي ډورن له کربلا تېرېږي. دغه اژانس دا هم ویلي چې د ایران دفاع وزیر خبرداری ورکړی چې که کوم هېواد امریکا ته خپله فضاه ورکړي چې پر ایران برید وکړي، دوی به یې پر وړاندې ګامونه واخلي.
د عکس سرچینه، Irna
امریکايي چارواکو ویلي، پوځ يې یو شمېر هغه ډرون ویشتلي او غورځولي چې اسرائیلو ته په لار وو. په دې اړه چې دا يې چېرې او څرنګه ویشتلي لا تراوسه نور معلومات نه دي ورکړل شوي.
د ایران د دفاع وزیر محمد رضا قرايي آشتیاني هغو هېوادونو ته ګوتڅنډه کړې چې پر ایران د برید لپاره خپل هوايي حریم او خاورې کارولو اجازه اسرائيلو ته ورکړي.
د ایران دولتي خبري اژانس ایرنا د ښاغلي اشتیاني له خولې ویلي: "هر هغه هېواد چې اسرائيلو ته پر ایران د برید لپاره خپل هوايي حریم یا خاوره پرانیزي، پرېکنده ځواب به ورکړل شي."
لږ مخکې ایران د اسرائیلو پر خاوره د ډرون بریدونه وکړل.
تر دې وړاندې د اسرائيلو لومړي وزير بنيامين نتنياهو خبرداری ورکړی و، چې د دغه هېواد پر خاوره د هر ډول بريد ځواب به ورکړي.
د اسرائیلو لومړي وزیر بنیامین نتنیاهو د ډرونونو له توغولو وړاندې خپل ملت په وینا کې ویلي چې پوځ یې "هرې سناریو ته چمتو دی." نوموړی زیاتوي، "د اسرائیلو خلک په تېرو څو کلونو کې په ځانګړي ډول په تېرو څو اوونیو کې د ایران مخامخ برید چمتو وو."
"زموږ دفاعي سیستم فعال شوی، هرې سناریو ته چمتو یوو، که دفاع وي او که یرغل. د اسرائیلو دولت پياوړ دی. د اسرائيلو پوځ ځواکمن دی."
نوموړي په خپلو خبرو کې ویلي، که هرڅوک ورته زیان ورسوي، دوی به هم زیان ور اړوي.
د امریکا ولسمشر جوبایډن د ډلېور په نامه یوه ایالت ته خپل سفر لنډ کړی او بېرته سپېنې ماڼۍ ته ګرځېدلی دی. هغه پرون (جمعه) ایران ته خبرداری ورکړی و چې "برید ونه کړي." نوموړي په خپلو خبرو کې ټینګار کړی و چې د اسرائیلو دفاع به کوي.
ټاکل شوې نوموړی په دې اړه وروسته خبرې هم وکړي.
د امریکا سپینې ماڼۍ ویلي، ایران د اسرائیلو پر خلاف هوايي برید پیل کړی چې احتمال لري څه ساعته وخت به ونيسي.
د ملي امنيت شورا وياندې اډرېن واټسن ويلي، د امريکا ولسمشر جو بایډن ته "د هغه د ملي امنیت د ټیم لخوا په منظم ډول د وضعیت په اړه معلومات ورکول کېږی".
نوموړې وايي، "د ده ټیم له اسرائیلي چارواکو او نورو شریکانو او متحدینو سره په دوامداره اړیکه کې دی."
د عکس سرچینه، Getty Images
سپاه پاسداران په لنډه اعلامیه کې ویلي، "په دمشق کې د ایران پر کونسلګرۍ د صهیونیستي رژیم دبرید په ځواب کې د سپا لسګونه بې پیلوټه الوتکو ځانګړي" ځایونه په نښه کړې دي.
ایران د اسرائیلو حکومت "صهیونیستي رژیم" بولي.
اسرائیلو پر ایراني کونسلګرۍ د برید مسوولیت نه دی منلی، خو په پراخه کچه داسې فکر کېږي، چې د دې برید تر شا د اسرائیل لاس و.
د ایران دولتي خبري اژانس ایرنا هم تائید کړې چې د سپاه پاسدران ځواکونو "پر اشغال شویو فلسطیني سیمو د ډرون لوی برید" کړی دی.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د اسرائیلو دفاع وزارت تائید کړې چې ایران پر اسرائیلو بې پیلوټه الوتکې ور توغولې دي. د اسرائیلو دفاع وزارت ویاند ډانیل هګري په یوه تلویزیوني وینا کې پر خپلو خلکو غږ کړی چې "ارام" و اوسي او د دوی لارښوونو ته غوږ ونیسي.
نوموړي وايي، بې پېلوټه الوتکې لا د اسرائیلو خاروې ته نه دي رسېدلي او ښايي ساعتونه وخت واخلي. د دې برید اټکل له وړاندې کېده او داسې رپوټونه وو چې ایران ورته چمتوالی بشپړ کړی و.
ښاغلي هګري زیاتوي،"موږ په بشپړ ډول دفاع او بریدونو ته چمتو یوو، موږ له امریکا او نورو ملګرو سره بشپړه همغږي لرو."
د اسرائیلو دغه چارواکی زیاتوي، چې "د دغو بې پیلوټه الوتکو د له منځه وړلو لپاره یې دفاع سیستم فعال کړی دی او پوځیان د خبردارۍ په لوړه کچه کې دي."
