تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د پاکستان سترې محکمې د دغه هېواد د پخواني لومړي وزیر او د تحریک انصاف ګوند مشر عمران خان نیول کېدل ناقانونه وبلل او د نوموړي د خوشي کېدو امر یې کړی دی. د تحریک انصاف ګوند وکیلانو سترې محکمې ته د ښاغلي خان د نیول کېدو پر ضد عریضه کړې وه. وړاندې د سترې محکمې مشر حکم کړی و چې عمران خان دې یوه ساعت کې محکمې ته حاضر کړل شي. د پاکستان پولیس وايي، د ښاغلي خان له نیول کېدو وروسته احتجاجونو کې تر اوسه اته کسان وژل شوي او نژدې ۲۰۰۰ کسان نیول شوي دي.
د پاکستان تحریک انصاف ګوند یو مشر فواد چودري وايي، د حیرانتیا خبره ده چې د اسلام اباد عالي محکمې د عمران خان نیول کېدل قانوني اعلان کړي دي.
دی وايي له یوې موثقې فیصلې پرته د عمران خان نیول غیر قانوني دي او موږ به سبا سهار په عالي محکمه کې دا پرېکړه وننګوو.
د ویلو ده چې د اسلام اباد د عالي محکمې مشر امیر فاروق د پاکستان د پخواني لومړي وزیر عمران خان نیول د محکمې له ساحې قانوني چاره بللې.
د بلوچستان د کورنیو چارو وزیر میر ضیاءالله ویلي "په ویګو ګاډي کې کسانو ډزې کړې چې یو مظاهره کوونکی پکې وژل شوی دی".
نوموړی وايي، بلوچستان کې وضعیت کابو شوی دی، خو کوټه ښار کې د تحریک انصاف ګوند د کارمنانو د احتجاج پرمهال د پولیسو په ګډون شپږ کسان ټپیان شوي هم دي.
له بي بي سي سره پر ټیلیفون ښاغلي ضیاءالله وویل، بلوچستان کې له کوټې پرته احتجاجونه پای ته رسېدلي.
دی وايي، یوه بېړنۍ ناسته یې جوړه کړې، لاریونیانو بلوچستان کې ځینې چټکې لارې تړلې وې، چې اوس بېرته پرانیستل شوې دي.
د تحریک انصاف ګوند کارمنانو د کوټې ښار اصلي دروازه کې - چې د کوټې هوايي ډګر لار هم ګڼل کېږي، احتجاج کړی.
د تحریک انصاف یو احتجاج کوونکی په همدې سیمه کې وژل شوی.
که څه هم تحریک انصاف ددغه کس د وژلو پړه پر امنیتي ځواکونو اچولې ده، خو د کورنیو چارو وزیر دا ادعا رد کړې ده.
دوی وايي، د ډزې کوونکو تورنو کسانو د نیول کېدو امر شوی دی.
د پاکستان پلازمېنې اسلام اباد عالي محکمې مشر عامر فاروق د محکمې له ساحې د تحریک انصاف ګوند مشر عمران خان نیول قانوني چاره بللې.
ښاغلی خان نن سې شنبه پلازمېنه اسلام اباد کې ونیول شو.
له هغه وروسته د پاکستان په بېلا بېلو ښارونو کې د تحریک انصاف ګوند پلویانو احتجاج پیل کړ.
د پاکستان تحریک انصاف ګوند مرستیال مشر او د پاکستان بهرنیو چارو مخکیني وزیر شاه محمود قریشي وايي، د عمران خان د ازادۍ تر مهاله به احتجاج روان وي.
د پاکستان تحریک انصاف ګوند مرستیال شاه محمود قريشي ویلي، که د انټرنېټ بندېدو له کبله مو اړیکه پرې شي، نو هر ځای کې چې احتجاج پیل شوی، د عمران خان تر خوشې کېدو به دوام ومومي.
هغه د ټویټر یوه پیغام کې غوښتنه کړې چې 'خلک دې با امنه واوسي. ان شاءالله موږ به د خپل مشر تر موندلو وروسته خپلو کورونو ته ستنېږو.
تر دې وړاندې د دغه ګوند یوه بل مشر اسد عمر ویلي و چې د شاه محمود قریشي په مشرۍ شپږ کسیزه کمېټه به، چې عمران خان جوړه کړې، د راتلونکې تګلاره اعلان کړي.
پاکستان کې د خصوصي ښوونځیو د فېدراسیون مشر کاشف مرزا ویلي چې د تحریک انصاف ګوند مشر عمران خان تر نیول کېدو وروسته پیل شوي اړودوړ ته په کتو به سبا چارشنبه (د مې لسمه) ټول هېواد کې خصوصي ښوونځي تړلي وي.
د نوموړي لخوا خپاره شوي بیان کې راغلي چې خصوصي ښوونځیو کې به د نورمال ټولګیو د بېرته پیلېدو په اړه اعلان سبا تر سلا مشورو وروسته وشي.
پاکستان کې د پنجاب ایالت سرپرست اعلی وزیر محسن نقوي د تحریک انصاف ګوند د مشر عمران خان تر نیول کېدو وروسته دغه ایالت کې پیل شویو احتجاجونو ته په شارې ویلي، له ولس سره ژمنه کوي چې دی به د پاکستان پر ریاست 'دغه برید' کې یو ښکېل کس هم پرې نږدي.
هغه د ټویټر یوه پيغام کې لیکلي چې "دا سیاست نه، بلکې سراسر ترهګري ده."
ښاغلي نقوي زیاتوي چې خپله کابینه کې یې د امن او ثبات څارونکې کمېټې ته لارښونه کړې چې د ټول ایالت په کچه دې له نږدې د وضعیت څارلو ته دوام ورکړي.
د پنجاب سرپرست اعلی وزیر وايي، هر کس د سوله ییز احتجاج حق لري، خو د سړکونو بندول او پر تاسیساتو بریدونه په هېڅ ډول نه زغمل کېږي.
د پاکستان د پلازمېنې اسلام اباد پولیسو وايي، دغه ښار کې د مخکیني لومړي وزیر عمران خان د نیول کېدو خلاف پیل شویو احتجاجونو کې د دوی ۵ سرتېري ټپي شوي دي.
د اسلام اباد پولیسو دا خبر د خپل ټویټر پر پاڼه خپور کړی.
دوی زیاته کړې چې له قانون د سرغړونې له کبله ۴۳ احتجاج کوونکي هم نیول شوي دي.
د پولیسو په وینا احتجاج کوونکو ځینو برخو لارې او سړکونه هم تړلي دي.
اسلام اباد کې عمران خان تر نیول کېدو وروسته د راولپنډۍ، د لاهور او پېښور بېلابېلو سیمو کې احتجاجونه پیل شوي دي.
د دغو احتجاجونو غوښتنه پخپله عمران خان او د هغه مرستیال شاه محمود قریشي کړې.
د تحریک انصاف غړو او پلویانو لاهور کې د زمان پارک پر لور په غځېدلي سړک ټایرونو ته اور اچولی او سړک یې ځای ځای بند کړی دی.
د پاکستان د لومړي وزیر شهباز شریف واکمن مسلم لیګ (ن) ګوند د عمران خان نیول کېدو ته غبرګون کې ویلي، چې نوموړی بالاخره هغه ځای ته ولاړ، چې باید تللی وای.
د عمران خان د تحریک انصاف ګوند مرستیال او د هغه حکومت کې بهرنیو چارو وزیر شاه محمود قریشي د پي ټي ای پر ملاتړو غږ کړی چې د هېواد لروبر احتجاجونه پیل کړي.
هغه د ټویټر یوه پیغام کې لیکلي د 'عمران خان نیول کېدل نامنظور - ټول قوم دې سملاسي واټونو ته راووځي.'
ښاغلي قريشي په یوه بل ویډیويي پيغام کې د پاکستان ولس مخاطب کړی چې "نن باید له کورونو راووځي."
هغه په دې ویډیو کې وايي 'نن په کور مه کینئ - عمران خان ستاسې د راتلونکې لپاره هلې ځلې کوي. که تاسې رښتینې ازادي غواړئ، له خپلو ماشومانو او کورنیو سره راووځئ.'
اسلام اباد کې تر نیول کېدو وروسته د عمران خان یو ویډیويي پیغام خپور شوی، چې ظاهرآ له وړاندې ریکارډ شوی دی.
هغه په دغه بیان کې وايي 'تر هغې چې زما دا بیان تر تاسې در رسېږي، زه به یوه ناجایزه قضیه کې نیول شوی واوسم.'
نوموړی زیاتوي، له قانونه یې هېڅ سرغړونه نه ده کړې او د دې لپاره نیول کېږي چې د ده لخوا د 'رښتینې ازادۍ' له پیل شوي تحریک په شا شي.
نوموړی زیاتوي چې دا ګام د دې لپاره هم اخیستل کېږي چې د ده په وینا 'د مفسدو غلو د ډلې وارد شوی حکومت، چې پر موږ مسلط کړل شوی، ومنم.'
عمران خان په دغه پیغام کې پر خلکو غږ کړی چې د خپلو حقونو او ازادۍ لپاره پورته شي، راووځي او مبارزه وکړي.
د پاکستان کورنیو چارو وزیر 'رانا ثنا الله' ویلي، چې عمران خان د احتساب ملي بیرو 'نېب' نیولی دی.
هغه له نوموړي سره د تشدد او زور زیاتي رپوټونه هم رد کړي.
د پاکستان کورنیو چارو وزیر د ټویټر یوه پیغام کې ویلي چې "عمران خان له جلبونو سره سره حاضر نه شو. د نېب لخوا ملي خزانې ته د زیان اړولو لپاره نیول شوی دی."
د اسلام اباد لوړې محکمې هم ادعا کړې چې د عمران خان د نیولو پر مهال هېچا سره هېڅ ډول تاوتریخوالی نه دی شوی.
د پاکستان تحریک انصاف مشر عمران خان نیول کېدو خلاف د دې ګوند کارکوونکي په راولپنډۍ ښار کې د پاکستاني پوځ مرکز دروازې ته د احتجاج لپاره رسېدلي دي.
په یوه ویډیويي کلیپ کې چې بي بي سي ته رسېدلی، لیدل کېږي چې قهرېدلي احتجاجیان د پوځي مرکز لومړۍ شمېره دروازې ته په زور ننوځي.
د پېښې په ځای کې یو خبریال خالد چودري وايي، په دې ځای کې اوس هم مظاهره روانه ده او په مري روډ سیمه کې یوې امنیتي پوستې ته هم اور ورته کړل شوی دی.
بل لور د پنجاب ایالت په مرکزي ښار لاهور کې هم د عمران خان نیول کېدو خلاف مظاهرې شوې او احتجاجیان په کېنټ سیمه کې د قول اردو مخکې راټول شوي.
د بي بي سي خبریال فرقان الهي وايي، مظاهره کوونکو هلته یو شمېر ګاډو ته اور ورته کړی او په کېنټ سیمه کې یو شمېر پولیس ګاډو ته هم اور ورته کړل شوی دی.
د پاکستان تحریک انصاف ګوند وايي امنیتي ځواکونو پخوانی لومړی وزیر عمران خان نیولی دی.
د دغه ګوند وکیلانو او مشرانو ادعا کړې چې عمران خان اسلام اباد کې د رینجرز ځواکونو لخوا نیول شوی.
پولیسو هم د عمران خان نیول کېدل تایید کړي.
د اسلام اباد پولیسو مشر یوه بیان کې ویلي چې عمران خان 'القادر ټرسټ' قضیه کې نیول شوی.
د اسلام اباد پولیس وايي، پلازمېنه کې ۱۴۴ بند نافذ دی او که څوک سرغړونه وکړي، پر خلاف به یې ګام واخیستل شي.
تر اوسه دغلته وضعیت نورمال ښودل شوی. خو د لاهور او پېښور بېلابېلو سیمو کې د احتجاجونو د پیلېدو خبر ورکړ شوی.
د پي ټي ای یوې مشرې 'مسرت جمشید چیمه' د ویډیو یو پیغام کې ویلي چې "له عمران خان سره ډېر زور زیاتی روان دی - هغه وهي - ما ته مالومه نه ده چې دوی له عمران خان سره څه کړي دي."