رپوټونه وايي، اروپايي ټولنه د ترکیې او سوریې د زلزلې د "ناورین په غبرګون" کې بېړنۍ غونډه جوړوي.
ټاکل شوې چې یاده غونډه نن د دوشنبې په ماښام جوړه شې او د دې ناورین د غبرګون په اړه به پکې خبرې کېږي.
تر ډېره په دغو ناستو کې چې "دې کړکېچ ته ګډ سیاسي ځواب"په موخه جوړېږي، د اروپايي ټولنې اړوند بنسټونه ، نور کلیدي ادارې او اغېزمن شوي غړي هېوادونه پکې ګډون کوي.
دوی له له وړاندې هم ویلي و چې، ترکیې ته به د قربانیانو د ژغورنې او لټون لپاره د مرستې ډله برابروي.
مخکې تر دې د اروپايي ټولنې د بهرنیو چارو مشر جوزف بورېل او د ناورین د مدیرت کمېشنر جینز لینارسیک ویلي وو:"اروپايي ټولنه هم چمتو ده چې په سوریه کې له هغو اغېزمنو شویو کسانو سره مرسته وکړي چې د بشري مرستو د پرواګرامونو له لاري يې د مرګ ژوبلې رپوټونه ورکړل شوي دي.
"یادې ټولنې همدا راز ویلي:" زمونږ پام ټولو هغو خلکو ته دی چې خپل عزیزانو او خپلوان یې له لاسه ورکړي او یا هغه زړور کسان چې د نورو د ژوند ژغورلو لپاره کار کوي او لګیا دي.
"تایید شوي رپوټونه وايي، په ترکیه او سوریه کې د زورورې زلزلې له امله د وژل شویو شمېر اوس له ۲۳۰۰ اوښتی دی.
د ژغورنې عملیات لا هم روان دي او وېره ده چې ښايي د قربانیانو شمېر نور هم لوړ شي. دواړو هېوادونو د نړیوالو مرستو غوښتنه کړې.