د غزې یوه ښوونکې: "دوه کلنه جګړه کې مې ډېر څه له لاسه ورکړل", یولنده نیل، د منځني ختیځ خبریاله، ریم
په غزه کې یوې فلسطینۍ ښوونکې انعام الوحیدي ویلي د تېرو دوو کلونو په اوږدو کې یې جګړې ژوند په بشپړه توګه بدل کړی، د هغې ۱۷ کلن زوی جهاد د اسرائیلي بمبارۍ کې ووژل شو او همدارنګه خپل کور او ټول پخوانی ژوند یې له لاسه ورکړی دی.
جګړه داسې مهال پیل شوه چې الوحیدي له خپلې کورنۍ سره د دير البلح سیمې ته د بې کوره کېدو په حالت کې وه، هغې د ماشومانو لپاره موقتي ښوونځی جوړ کړ چې بې زدکړو پاتې شوي وو او د خپلې لور په لویېدلو ویاړي چې د ګلاسګو پوهنتون ته د زدکړو لپاره تللې ده.
انعام د سږکال د اوربند په پیل کې بېرته غزې ښار ته راستنه شوه، خو تېره میاشت بیا له خپلو درېیو کوچنیو ماشومانو سره وتښتېده، ځکه چې اسرائیلي ځواکونو یې سیمه ونیوه او مېړه یې د خپلې مور او پلار پالنې ته ځان ځانګړی کړی و.
اوس انعام په یوه کرایه شوي ګراج کې ژوند کوي او هره ورځ د خوراک او پاکې اوبو د ترلاسه کولو لپاره مبارزه کوي او د بمبارۍ د دوامداره وېرې احساس بیانوي: "کله چې ماښام راشي، وېره هم ورسره خپره شي… موږ ټول سره یو ځای ویده کېږو، یو بل ته نژدې، په ځانګړې توګه زما تر ټولو کوچنی ماشوم."
الوحیدي وايي جګړه بې پایه ښکاري: "موږ فکر کاوه چې جګړه به یوه میاشت یا دوه میاشتې دوام وکړي… خو دوه کاله ډېر اوږد وخت دی. هره ثانیه موږ خبرونه ګورو او وېره لرو چې اوربند به مات شي او جګړه به بیا پیل شي."
