د محکمې لومړۍ ناسته پای ته ورسېده؛ مادورو او مېرمن یې ټول تورونه رد کړل

ژوندی پوښښ

1. ۱۳ مرغومی ۱۴۰۴ - ۳ جنوري ۲۰۲۶په ماسک تړلې سترګې، په لاس کې د اوبو بوتل او پر تن سپورتي جامې: ټرمپ د وېنزویلا د نیول شوي ولسمشر تصویر خپور کړ

   د امریکا ولسمشر ډونلډ ټرمپ پر خپله خواله رسنۍ ’ټروتھ سوشل‘ یو تصویر خپور کړی او ورسره لیکلي یې دي، ''نکولاس مادورو په یو اېس اېس ایوو جیما کې.''

   ایوو جیما د هغې جنګي بېړۍ نوم دی، چې لږ مخکې یې په هکله ولسمشر ټرمپ فاکس نیوز ته ویلي و، نکولاس مادورو د امریکا نیویارک ته لېږدوي.

   په تصویر کې مادورو په داسې حال کې لیدل کېږي، چې پر سترګو یې ماسک تړلی، غوږۍ یې پر غوږونو ایښې او خړ رنګه سپورتي کالي یې اغوستي دي.

   په امریکا کې د بي بي سي همکاره رسنۍ 'سي بي اېس'وايي، تمه ده هغه امریکايي پوځي الوتکه چې مادورو به امریکا ته رسوي، نن به د نیویارک سټېورټ هوايي ډګر کې ناسته وکړي.

   سټېورټ یو پوځي هوايي ډګر دی، چې د نیویارک هډسن والي سیمه کې موقعیت لري.

   سرچینې وايي، ولسمشر مادورو اوسمهال د امریکايي پوځ په توقیف کې دی او د الوتکې له کېناستو وروسته به د امریکا فدرالي چارواکو ته وسپارل شي.

   تمه کېږي، چې مادورو به راتلونکې دوشنبه د نیویارک سدرن فدرالي محکمې ته وړاندې شي.

2. ۱۳ مرغومی ۱۴۰۴ - ۳ جنوري ۲۰۲۶ټرمپ: مادورو له داسې ځایه ونیول شو چې ''د کور پرتله ډېر د یوې کلا په شان و''

   ډونالډ ټرمپ فاکس نیوز ته وویل:

   ''موږ غوښتل دا کار څلور ورځې مخکې ترسره کړو، خو هوا مناسبه نه وه.''

   هغه وویل:

   ''هوا باید په بشپړ ډول مناسبه وای… ناڅاپه هوا ښه شوه او موږ وویل: پیل وکړئ.''

   هغه زیاته کړه چې کله مادورو ونیول شو، هغه ''په داسې کور کې و چې د عادي کور پرتله ډېر د یوې کلا په شان و''،

   او ''شاوخوا یې کلک فولادي دیوالونه وو''.

   ټرمپ یو ځل بیا ټینګار وکړ چې د ده په اند هېڅ امریکایي سرتېری نه دی وژل شوی، او زیاته یې کړه:

   ''یوازې یو څو کسان ټپیان شول، خو بېرته ستانه شول او ویل کېږي چې حالت یې ښه دی.''

3. ۱۳ مرغومی ۱۴۰۴ - ۳ جنوري ۲۰۲۶وروستی, ټرمپ وايي، نیکولاس مادورو او مېرمن یې نیویارک ته لېږدول کېږي

   د امریکا ولسمشر ډونلډ ټرمپ وايي، د وېنزویلا ولسمشر او مېرمن یې په ''یواېس اېس لوو جیما'' نومې بېړۍ کې د امریکا نیویارک ته راوړل کېږي.

   د شنبې پر سهار د فوکس نیوز خبري شبکې سره ټیلیفوني مرکه کې د متحدو ایالتونو ولسمشر وویل: ''هو، د لوو جیما، دوی په بېړۍ کې دي. دوی به نیویارک ته روان شي. چورلکو دوی وایستل، او په چورلکو کې یې ښه الوتنه درلوده ــــ زه باوري یم دوی به ترې خوند اخیستی وي. خو، هو، دوی ډېر خلک وژلي، دا مو باید په یاد وي.''

   د هغو بدیلو لارو په تړاو یوې پوښتنې ته، چې ده نیکولاس مادورو ته وړاندیز کړې وې، ډونلډ ټرمپ وویل: ''ښه نو، اصلاً ما ویلي و، چې باید تسلیم شې.''

   ښاغلي ټرمپ فوکس نیوز ته وویل، یوه اونۍ مخکې یې له نیکولاس مادورو سره خبرې کړې وې:

   ''دا ډېر مهم سیمبول و، او موږ ـــــ ما خبرې درلودې. ما له هغه سره خپله خبرې وکړې، خو ما (ورته) وویل، ته باید لاس پر سر شې. ته باید تسلیم شې.''

4. ۱۳ مرغومی ۱۴۰۴ - ۳ جنوري ۲۰۲۶پر وېنزویلا د امریکا برید ته ځینې نړیوال غبرګونونه

   پر وېنزویلا د امریکا برید او د ولسمشر نیکولاس مادورو نيونې ته د پراخو نړۍ والو غبرګونونو لړ کې د دغه هېواد ملاتړې روسیې دا برید په سختو ټکو غندلی او هغه یې پر یوه خپلواک هېواد تېری بللی.

   د روسیې بهرنیو چارو وزارت یوه بیان کې ویلي، د ولسمشر مادورو او د هغه د مېرمنې د نیولو په تړاو باید سملاسي وضاحت ورکړل شي. بیان کې دا د یوه خپلواک هېواد پر ملي حاکمیت ''د نه منلو وړتېری'' او د نړۍ وال قانون خلاف کار بلل شوی دی.

   د اروپايي ټولنې د بهرنیو اړیکو مسوولې کایا کالاس په دې هکله ویلي، د امریکا د بهرنیو چارو له وزیر سره غږیدلې. هغې ویلي، اروپايي ټولنه وضعیت له نږدې څاري او د اروپايي ټولنې له نظره ولسمشر مادورو مشروعیت نه لري او په وېنزویلا کی یې د واک د سوله ییز لېږد غوښتنه یې کړې، خو هغې ټینګار کړی چې په ټولو شرایطو کې دې نړیوال قانون او د ملګرو ملتونو منشور ته درناوی وشي.

   د برېتانیا لومړي وزیر کیئر سټارمر ویلي، هېواد یې دې برید کې ښکېل نه و. د هغې پوښتنې په ځواب کې چې ایا دا برید غندي؟

   هغه وویل، غواړي لومړی پر واقعیت ځان پوه کړي او په چټکۍ سره د بدلېدونکي وضعیت په تړاوله ولسمشر ټرمپ سره خبرې وکړي.

   د وېنزویلا په ګاونډ کي هم بېلابېلو هېوادونو په دې هکله غبرګونونو ښودلي دي. د کولمبیا ولسمشر ګوستاو پټرو د دې برید په اړه سخته اندېښنه ښودلې.

   کیوبا چې د وېنزویلا ملاتړی هېواد بلل کېږي دا برید غندلی، خو د ارجنټاین ولسمشر خاویر میلي، چي د ولسمشر ټرمپ ملاتړی دی، د امریکا د دې ګام هرکلی کړی او ویلي یې دي چې ازادي پرمختګ کوي.

   د ایران د بهرنیو چارو وزارت دا تېری بللی او د غندنې تر څنګ یې له عاملینو او پلانوونکو سره د حساب غوښتنه کړې. ایران ويلي چي دا پر یوه خپلواک هېواد برید او د سیمه ییزې او نړیوالې سولې او امنیت پرضد ګام دی او نړیوال نظم له خطره سره مخامخ کوي.

5. ۱۳ مرغومی ۱۴۰۴ - ۳ جنوري ۲۰۲۶وروستی, د امریکا مرستیال ولسمشر غبرګون

   پر وېنزویلا د امریکا متحدو ایالتونو برید ته غبرګون کې د ولسمشر ټرمپ مرستیال جې ډي وینس وايي، ښاغلي ټرمپ څو ځله له دې وضعیته د وتلو لپاره بدیلې لارې وړاندیز کړې وې، خو په خبره یې ''په دې ټول بهیر کې یې یو څه ډېر برالا کړي، چې د نشه یي توکو قاچاق باید ودرول شي او غلا شوي تیل باید بېرته متحدو ایالتونو ته وسپارل شي.''

   ښاغلی وینس وايي، ''د وېنزویلا ولسمشر نیکولاس مادرو اوس وروستی کس دی، چې وپوهېد ولسمشر ټرمپ پر خپلو خبرو عمل کوي.''

   نوموړي پر اېکس یوه پیغام کې ویلي، ''زموږ د ځانګړو عملیاتو زړورو ځواکونو ته مبارکي، چې رښتیا یې اغېزمن او د ستاینې وړ عملیات په بریالیتوب سره ترسره کړل.''

6. ۱۳ مرغومی ۱۴۰۴ - ۳ جنوري ۲۰۲۶د وېنزویلا پر ولسمشر نیکولاس مادورو کوم تورونه دي؟

   د امریکا لویه څارنوال‍ۍ وایي، ولسمشر مادورو "د مخدره توکو او وسلو درلودلو" له کبله تر تعقیب لاندې و.

   د امریکا د لویې څارنوالۍ په خبره ولسمشر مادورو او د هغه مېرمنې ته د نیویارک په یوه محکمه کې قضایي دوسیه جوړه شوې او ژر به محاکمه شي.

   د امریکا لویې څارنوالۍ ویلي چې ښاغلی مادورو له یو لړ تورونو سره لکه " د مخدره توکو قاچاق، د کوکاین واردات، د وسلو او چاودیدونکو توکو ساتلو " مخامخ دی چې امریکا ته یې ګواښ پېښولی شو.

   د امریکا لویې څارنوالۍ له مخې " دوی به ډېر ژر د امریکا په خاوره کې له امریکايي عدالت او د دغه هېواد له محاکمې سره مخامخ شي."

   خو د امریکا څارنوالۍ د وېنزویلا د لومړۍ مېرمنې د تورونو په اړه څه نه دي‌ ویلي.

   د امریکا لویې څارنوالۍ د هغو امریکایي ځواکونو ستاینه هم کړې چې د دوی په ټکو "په زړورتیا یې د دوه مهمو نړیوالو قاچاقبرو د نیولو لپاره بریالي عملیات وکړل."

7. ۱۳ مرغومی ۱۴۰۴ - ۳ جنوري ۲۰۲۶پر وېنزویلا د برید ځینې انځورونه

8. ۱۳ مرغومی ۱۴۰۴ - ۳ جنوري ۲۰۲۶'دا پېښه په اوسني دور کې بې مثاله ده', جو انووډ، د بي بي سي د نړیوالو چارو خبریال

   ادعا کېږي چې د امریکا ډیلټا ځواکونه د وېنزویلا پلازمېنې زړه ته ننوتلي او د دغه هېواد ولسمشر او لومړۍ میرمنه یې نیولي که داسې وي نو داسې پېښه په نننۍ نړۍ کې کومه بله بېلګه نه لري.

   دې ته یوه ورته پېښه په ۱۹۸۹م کې هم شوې چې هغه مهال د پاناما پوځي مشر ونیول شو خو د نوعیت له اړخه ګرانه ده چې د وېنزویلا د پېښې مثال دې پیدا شي.

   په ۱۹۸۹م کال د امریکايي ځانګړو ځواکونو یوې ډلې د پاناما د هغه مهال پوځي مشر په یوه جلا تخنیک له مخکې نیولی و.

   د پاناما او وېنزویلا دواړو مشرانو یو ورته والی دا هم دی چې دوی دواړو په خپلو وروستیو ولسمشریزو ټاکنو کې د بري ادعاوې درلودې، امریکا پر دغو دواړو د مخدره توکو د قاچاق تورونه لګولي او د دواړو پر وړاندې له عملیاتو مخکې امریکا په پراخه کچه پوځي چمتووالی نیولی و.

   خو په دومره توپیر چې د پاناما د وخت مشر نوریګا له یوې لنډې جګړې وروسته چې پوځ یې سخته ماته وخواړه ونیول شو.

   د پاناما د هغه وخت مشر د جګړې له پیل وروسته په یوه بهرني سفارت کې پناه اخېستي وه چېرې چې نوموړي ۱۱ ورځې تېرې کړې وې.

   هلته له ورتګ وروسته نوموړی سخت ځورول کیده چې بالاخره وتلو ته اړ شو.

   ویل کېږي هغه ته په ډېر لوړ اواز د راک سندرې چالانې وې چې نور یې هلته د پاتې کیدو صبر ختم شوی و. له دې وروسته دی امریکا ته ولېږدول شو او د مخدره توکو د کاروبار له کبله مجرم وپېژندل شو.

   د نېکولاس مادورو د نیولو په اړه ټول معلومات لا نه دي روښانه شوي خو په ښکاره دا له پخوا هم خطرناک او پراخه عملیات برېښي چې په ترڅ کې یې د ښاغلي مادورو او د هغه د میرمنې د نیول کېدو ادعا کېږي.

   د وېنزویلا د ولسمشر د راتلونکي په اړه اټکل کول سخت دی خو ښايي په څو راتلونکو ورځو کې یې په اړه داسې رپوټونه خپاره شی چې دی د امریکا د ننه په کوم زندان کې بندي دی او یا په دې نیټه محاکمې ته وړاندې کېږي.

9. ۱۳ مرغومی ۱۴۰۴ - ۳ جنوري ۲۰۲۶پر وېنزویلا د امریکا برید ته د کولمبیا او کیوبا غبرګونونه

   پر وېنزویلا د امریکا له بریدونو سملاسي وروسته د کولمبیا ولسمشر د ملي امنیت شورا غونډه وربللې او ولسمشر ګستاوو پېټرو د وېنزویلا سره پر پوله د اضافي سرتېرو د ځای پر ځای کېدو اعلان کړی دی.

   له کولمبیا رپوټونه وايي د وېنزویلا له پلازمینې کاراکاس او نورو سیمو د کډوالو ورتګ هم ارزول شوي او ورته چمتووالی روان دی.

   د کولمبیا او وېنزویلا ترمنځ څه باندې دوه زرو کیلومتره اوږده پوله ده او له تاریخي پلوه له دواړو هېوادونو سلګونه زره خلک د اقتصاد او نورو کړکېچونو له کبله یوه بل هېواد ته مخه کوي.

   په همدې مهال کولمبیا او کیوبا پر وېنزویلا د امریکا بریدونه غندلي او اندیښنه یي ښودلې چې دا به په سیمه کې د بې ثباتۍ سبب شي.

10. ۱۳ مرغومی ۱۴۰۴ - ۳ جنوري ۲۰۲۶" د وېنزویلا ولسمشر به په امریکا کې محاکمه کېږي"

    امریکا کې یوه جمهوري پلوه سناتور د دغه هېواد د بهرنیو چارو وزیر مارک روبیو له قوله ویلي چې " د ولسمشر مادورو له نیولو وروسته د وېنزویلا پر وړاندې د نورو ګامونو د اخېستو تمه نشته."

    سناتور مایک لي ویلي چې مارک روبیو ورته په یوه تېلیفوني اړیکه کې د وېنزویلا د ولسمشر " نیول کیدل" تایید کړي دي.

    ښاغلي لي د امریکا د بهرنیو چارو وزیر له قوله ویلي " مادورو اوس د امریکایانو په لاس بندي دی" او وېنزویلا کې د نورو عملیاتو اړتیا نه ویني.

    هغه همدا راز ویلي د امریکا بریدونه د هغو دفاعي ځواکونو د ساتنې او ورسره د همکارۍ په موخه ترسره شول چې د " مادورو د نیولو حکم یې پلی کاوه."

11. ۱۳ مرغومی ۱۴۰۴ - ۳ جنوري ۲۰۲۶د امریکا ولسمشر وایي، ځواکونه یې د وېنزویلا ولسمشر او لومړۍ مېرمنه نیولي

    امریکايۍ رسنۍ سي بي اېس رپوټ ورکړی و چې د امریکا ولسمشر ډونلډ ټرمپ د وېنزویلا په ځینو سیمو له ډلې یې په نظامي بنسټونو د برید حکم صادر کړی دی.

    پر ۲۰۱۳ کال د پخواني ولسمشر هوګو چاوېز له مرګ وروسته نیکولاس مادورو د وېنزویلا ولسمشر شو او له هغه وخته راهیسې د دغه هېواد مشري پر غاړه لري که څه هم هر ځلې ټاکنه یې له لانجو، تاوتریخجنو لاریونونو او د پراخو درغلیو ادعاوو سره مله وه.

    په وروستي ځل نیوکولاس مادورو په ۲۰۲۴م کال کې د ولسمشریزو ټاکنو ګټلو اعلان وکړ چې وېنزویلا کې د هغه جنجالي بریا پر وړاندې یې مخالفینو په ټول هېواد کې لاریونونه پیل کړل.

    امریکا په ۱۹۸۹م کال کې پر پانامه له بریده وروسته چې د هغه هېواد نظامي رهبري یې ړنګه کړله، د لاتینې امریکا په کوم هېواد کې نېغ په نېغه داسې نه ده ښکیله شوې چې د کوم هېواد مشري دې په دې اندازه وننګوي.

12. ۱۳ مرغومی ۱۴۰۴ - ۳ جنوري ۲۰۲۶امریکا پر وېنزویلا برید کړی

    د امریکا ولسمشر ډونلډ ټرمپ وایي، امریکایي ځواکونو پر وېنزویلا پراخ بریدونه کړي چې په ترڅ کې یې د هغه هېواد " ولسمشر نیکولاس مادورو او د هغه مېرمنه" نیولي او له هېواده وېستلي دي.

    نوموړي دا اعلان په خپلې ټولنیزې پاڼې (سوشیل ټروټ) خپور کړی دی.

    ښاغلی ټرمپ وایي، دا عملیات د امریکايي ځواکونو لخوا په ډېرې ښې همغږۍ تر سره شوي او زیاته کړې یې ده چې په اړه به یې د امریکا پر وخت نن ۱۱ بجې خبري غونډه کې لا نور جزییات په ډاګه کړي.

    د ښاغلي ټرمپ دغه څرګندونې په وېنزویلا کې چارواکو سملاسي نه رد او نه هم تایید کړي دي.