د غزې جګړه کې د وژل شوې ماشومې هند رجب خورا ستر تصویر

د شپږ کلنې هند رجب یو لوی انځور په بارسلونا ساحل کې راڅرګند کړل شو، چې د هغې د مړینې دویم تلین ولمانځل شي.

هند د ۲۰۲۴ کال د جنورۍ په میاشت کې د غزې په جګړه کې د بمبارۍ له کبله د تښتېدو هڅه کوله چې د موټر دننه ایساره پاتې شوه او د خپلې کورنۍ یو شمېر غړو له وژل کېدو وروسته یې د مرستې لپاره زنګ وواهه.

هغه امبولانس چې دې ته د رسېدو لپاره واستول شو وروسته وران-ویجاړ وموندل شو او د هند، د هغې د کورنۍ غړو او دوو ژغورونکو مړي څو ورځې وروسته وموندل شول.

اسرائیلي پوځ، چې لومړی یې ویلي وو هیڅ ځواکونه یې په سیمه کې نه وو، وروسته وویل چې د دې پېښې په تړاو پلټنې کوي.