عراق؛ واده کې اور لګېدنې د ناوې او زوم په ګډون ۱۱۵ کسان وژلي
د عراق دولتي رسنۍ وايي، د دغه هېواد په شمال کې د واده په مراسمو کې د اور لګېدو له امله " لږ تر لږه ۱۱۵ تنه وژل شوي او شاوخوا ۱۵۰ تنه نور ټپيان دي".
د سیمه ییزو رسنیو په وینا، په قربانیانو کې ناوې او زوم هم شامل دي.
تر اوسه د اورلګېدنې لامل نه دی څرګند، خو لومړني راپورونه ښيي چې د اورلوبو د وسايلو له روښانولو وروسته اور لګېدلی دی.
د عراق رسمي خبري اژانس نینا وايي، اورلګېدنه د شمالي ولایت نینوی ښار په حمدانیه سیمه کې شوې ده.
د نينا خبري اژانس له خوا خپرو شويو عکسونو کې خلک ښکاري چې په يوه تالار کې د اور وژلو هڅه کوي.
په ټولنيزو رسنيو د ځايي خبريالانو له خوا خپرو شويو عکسونو کې په تالار کې سوځېدلي مړي هم ليدل کېږي.
عراق کې د دې پېښې په اړه پلټنې هم پیل شوې که څه هم په لومړي رپوټ کې بې احتیاطي د اور لګیدا دلیل بلل شوی.
د عکس سرچینه، Reuters
د عکس سرچینه، Getty Images
نينا خبري اژانس د عراق د ملکي دفاعي ادارې د مشر له خولي ويلي، اور اخيستونکو تختو ښايي د اور په بلېدو کې مرسته کړې وي.
د يادې ادراې یوه چارواکي ویلي، "اور د ودانۍ د ځینو برخو د نړېدو لامل شوی، ځکه د ټيټ لګښت او ژر اور اخيستونکي مواد په ودانۍ کې کارول شوي وو، چې د اور له پیلېدو څو دقیقې وروسته ونړېدل."
عيني شاهدانو ويلي، اور ځايي وخت د شپې ۱۰:۴۵ دقيقې هغه مهال ولګېد چې په تالار کې سلګونو کسانو جشن او نڅا کوله.
د چارواکو په وینا د پېښې ځای ته امبولانسونه او طبي کارکوونکي رسېدلي دي.
د عراق د لومړي وزیر دفتر په اېکس ټولنیزه رسنۍ (ټوېټر) لیکلي، لومړي وزیر چارواکو ته سپارښتنه کړې چې "د دې بدمرغې پېښې له قربانیانو سره د مرستې لپاره ټولې هڅې وکړي."
د عکس سرچینه، REUTERS
د عکس سرچینه، Getty Images
