چیلسي له شاختار دونیڅک اوکرایینی لوبغاړی میخایلو مودریک په ۱۰۰ میلیون یورو اخیستی

چیلسي لوبډلې په وروستیو کې له اوکراییني شاختار دونېڅک لوبډلې نه اوکرایینی لوبغاړی میخایلو مودریک په ۷۰ میلیون یورو د اتو کلونو لپاره اخیستی دی.

دغه ۲۲ کلن اوکرایینی لوبغاړی تر اوسه له اوکرایین بهر نه دی لوبېدلی.

نوموړي سږ کال د اروپا په اتلولیو کې ځان مشهور کړ او د جرمني لوبډلې پر وړاندې یې هلته درې ګولونه ووهل.

د سکاټلنډ سلټیک لوبډلې پر وړاندې یې هم دوه ګوله وکړل.

تر دې مخکې یوازې د اوکرایین په سیمه ییزو لوبډلو کې لوبېدلی او ۴۷ ګولونه یې کړي دي.

مودریک د خپل هېواد لوبډلې په اتو لوبو کې لوبېدلی.

ده په خپله لوبډله کې د دویم کال لپاره پرله پسې د غوره لوبغاړي جایزه هم ګټلې ده.

د مودریک نور لګښت به هم شاوخوا ۳۰ میلیون یورو وي.

د دې معاملې ارزښت وروسته تر هغه لوړ شو چې شاختار دونېڅک لوبډلې د فیفا له هغې پرېکړې وروسته خپل ټول بهرني لوبغاړي له لاسه ورکړل چې د جګړې له کبله یې په اوکرایین کې د جګړې له کبله د ټولو نااوکراییني لوبغاړو د تړون ځنډولو ته اجازه ورکړه.

له دې پرېکړې وروسته اوکراییني لوبډلې له فیفا د ۴۳ میلیون یورو تاوان غوښتنه وکړه.

د اونۍ پای کې مودریک هیله وښوده چې د سرو زرو توپ به وګټي.

ده د شاختار دونېڅک لوبډلې وېبپاڼې ته ویلي: "هېچا دا تمه نه لرله چې د ۲۰۲۱ کال غوره لوبغاړي جازه به وګټم او هېڅوک دا تمه نه لري چې د سرو زرو توپ به وګټم، خو یوه ورځ به دا کار کېږي، دا زما له شخصي هدفونو یو دی".

د برایټون اوسني ایټالوي روزونکي روبرتو زیربي چې په ۲۰۲۱ او ۲۰۲۲ کې یې د شاختار مشري هم کړې ویلي: "باوري یم چې مودریک به په راتلونکې کې زرین توپ وګټي".

د شاختار مشر رینات احمدوف ویلي:‌ "ډاډه یم چې میخایلو به ژر د ټولو نړیوالو فوټبال لوبغاړو د احترام وړ کس وګرځي".

چیلسي مودریک یو "ماهر لوبغاړی" بللی چې په وینا یې "له چټکتیا برخمن" دی او په اروپا کې یو له خطرناکو یرغلګرو لوبغاړو څخه دی".